УблапӀэ 5
5
Ятфэнэрэ шъхьэр
Адамрэ Хьаомрэ къатекӀыгъэхэр
1Мары Адамрэ ащ къытекӀыгъэхэмрэ ятхылъ.
Тхьэм цӀыфыр къызегъэшӀым, Ащ Ежь итеплъэ иӀэу къыгъэшӀыгъ. 2Ащ хъулъфыгъэрэ бзылъфыгъэрэ къыгъэшӀыгъ, ынэшӀуи ахэмэ ащифагъ. Ахэр къызегъэшӀхэм, ахэмэ афиусыгъ – «цӀыфы».
3Адам илъэсишъэрэ щэкӀырэ къыгъэшӀагъэу, ежь фэдэу, ежь итеплъэ иӀэу шъао къыфэхъугъ. Адам ащ Щэт цӀэу фиусыгъ. 4Щэт къызэхъум ыуж, Адам илъэс шъий къыгъэшӀэжьыгъ; ащ джыри къохэри пхъухэри къыфэхъугъэх. 5Илъэс шъибгъурэ щэкӀырэ къыгъашӀи, ар лӀагъэ.
6Щэт илъэсишъэрэ тфырэ къыгъэшӀагъэу Енощ къыфэхъугъ. 7Енощ къызэхъум ыуж, Щэт илъэс шъийрэ блырэ къыгъэшӀэжьыгъ, ащ джыри къохэри пхъухэри къыфэхъугъэх. 8Илъэс шъибгъурэ пшӀыкӀутӀурэ къыгъашӀи, Щэт лӀагъэ. 9Енощ илъэс тӀокӀиплӀырэ пшӀырэ къыгъэшӀагъэу Къэнан къыфэхъугъ. 10Къэнан къызэхъум ыуж, Енощ илъэс шъийрэ пшӀыкӀутфырэ къыгъэшӀэжьыгъ, ащ джыри къохэри пхъухэри къыфэхъугъэх. 11Илъэс шъибгъурэ тфырэ къыгъашӀи, Енощ лӀагъэ.
12Къэнан илъэс тӀокӀищырэ пшӀырэ къыгъэшӀагъэу ащ Махъалалэл къыфэхъугъ. 13Махъалалэл къызэхъум ыуж, Къэнан илъэс шъийрэ тӀокӀитӀурэ къыгъэшӀэжьыгъ; ащ джыри къохэри пхъухэри къыфэхъугъэх.
14Илъэс шъибгъурэ пшӀырэ къыгъашӀи, Къэнан лӀагъэ. 15Махъалалэл илъэс тӀокӀищырэ тфырэ къыгъэшӀагъэу Ерэд къыфэхъугъ. 16Ерэд къызэхъум ыуж, Махъалалэл илъэс шъийрэ щэкӀырэ къыгъэшӀэжьыгъ; ащ джыри къохэри пхъухэри къыфэхъугъэх. 17Илъэс шъийрэ тӀокӀиплӀырэ пшӀыкӀутфырэ къыгъашӀи, Махъалалэл лӀагъэ.
18Ерэд илъэсишъэрэ тӀокӀищырэ тӀурэ къыгъэшӀагъэу Хъанох къыфэхъугъ. 19Хъанох къызэхъум ыуж, Ерэд илъэс шъий къыгъэшӀэжьыгъ, ащ джыри къохэри пхъухэри къыфэхъугъэх. 20Илъэс шъибгъурэ тӀокӀищырэ тӀурэ къыгъэшӀагъэу Ерэд лӀагъэ.
21Хъанох илъэс тӀокӀищырэ тфырэ къыгъэшӀагъэу Матущэлахъ къыфэхъугъ. 22Матущэлахъ къызэхъум ыуж, Хъанох илъэс шъищырэ щыӀагъ, ар Тхьэм ыпашъхьэ итэу псэугъ, джыри къохэри пхъухэри къыфэхъугъэх. 23Хъанох илъэс шъищырэ тӀокӀищырэ тфырэ къыгъэшӀагъ. 24Хъанох Тхьэм ыпашъхьэ итэу псэугъ. ЕтӀанэ Хъанох щымыӀэжьы хъугъэ, сыда пӀомэ Тхьэм ар ыштэжьыгъ.
25Матущэлахъ илъэсишъэрэ тӀокӀиплӀырэ блырэ къыгъэшӀагъэу Лэмэх къыфэхъугъ. 26Лэмэх къызэхъум ыуж, Матущэлахъ илъэс шъиблырэ тӀокӀиплӀырэ тӀурэ къыгъэшӀэжьыгъ, ащ джыри къохэри пхъухэри къыфэхъугъэх. 27Илъэс шъибгъурэ тӀокӀищырэ бгъурэ къыгъашӀи, Матущэлахъ лӀагъэ.
28Лэмэх илъэсишъэрэ тӀокӀиплӀырэ тӀурэ къыгъэшӀагъэу шъао къыфэхъугъ. 29НухьэкӀэ#5:29 Нухь – ижъырэ джуртыбзэкӀэ къикӀырэр: гупсэфыгъу. ар ащ еджи, къыӀуагъ: «Зиусхьаным нэлатыр зэрихыгъэ чӀыгур тылэжьы зыхъукӀэ, тиӀофшӀэнкӀи тӀэхэм къинэу алъэгъурэмкӀи мы шъаом гупсэфыгъо тигъэгъотыщт».
30Нухьэ къызэхъум ыуж, Лэмэх илъэс шъитфырэ тӀокӀиплӀырэ пшӀыкӀутфырэ къыгъэшӀэжьыгъ; ащ джыри къохэри пхъухэри къыфэхъугъэх. 31Илъэс шъиблырэ тӀокӀищырэ пшӀыкӀублырэ къыгъашӀи, Лэмэх лӀагъэ.
32Нухьэ ыныбжь илъэс шъитф зэхъум, Щэм, Хъам, Ефэт аӀоу къыфэхъугъэх.
Zur Zeit ausgewählt:
УблапӀэ 5: АдыТГ
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2002-2023
