Yohanes 7

Yesus el weit yapu babye, elti, dib kum tenebik ati, nyabuk yupu

1Yesus el melilamik nang weik, lik ubukba, batakik talak arye dipdongobuka anoutamak ara, Yesus arye Galilea mutuku noutam akuk peterepra balamuk. Sik Yudea tam noutamak ulamik nang, Yahudi yala nang arye, ‘Yesus optibye’ tenen, elti, kalikinmek ning ara, Yesus akunum bikmoka anya arye, Yudea tam kum banmok. 2Bukni, sik Yahudi yala nang arye, weik sum tenebuka kwalilamik ning, el si ara, Bara Asik dopnarye, Kwalina Sum dam akunum ubuk. 3-4Akwalina sum, mambul sum dam akunum ubukba, Yesus el weit yapu koprop arye, Yesus ati nyabik.

“An yupu kekenyak ninye arye, ninye kum winipmanto pil dolyam ning ara, ‘Sik Yudea tam unyak nang ton eiptinge’ tenen, teleb ning ara, an adiparyuk Galilea tam batakuka, Yudea tam bitume. Ura, yata nang do nirya, ‘Nun si kel biksikirye, nunti ereipsikiba, weik nang unamabe’, tenenyak nang ara, duknubuka pil kum donyake. Ance ninye arye winipmanto kum pil donanye ulyama ati, ‘Ninye mutuku-mutuku nirya kel biknamak’ tenen, ati ara, Yudea tam bimince, ninye nirya elinamakak pil dolbilyame,” nyabik.

5Yesus el weit yapu koprop arye ayupu tenepce nyabika deiyok ara, sik babye, ‘Yesus ara dipkopropnye’ tenen, dib kum tenelamika ati, ayupu nyabik. 6Nyabik ati ara, Yesus arye, el weit yapu koprop ati tamubuka nyabuk.

“Anggunda wini talak do, yuk talak do nirya, neika aululum bukni, Allah arye tenyamnuk talak ara, aminyan upnamnila ati, nara Yudea tam min kum binamane. 7Sik diba tenena kum, talye unyak ninye nirya ati, narye, ‘Anggun winilulum ning ara, malyeuk winilulume,’ nyabuka wenenuna anya arye, sikce nati lik upliba, ‘Anye bira nun lik,’ teneninyake. Bukni, yuk talye nang arye, anggunti ara, ‘Nun lik,’ kum tenesinyake. 8Ati na weit yapu, anggunda Yudea tam kwalipnamakak bilulume. Allah arye tenyamnuk talak min kum upmanila ati, nara Yudea tam kwalipnamakak ara, min kum binune.” Yesus arye nyabuk.

9Yesus arye ayupu akunum nyabukopura, Galilea tam noutam akuk unmok. 10Galilea mutuku uk unmoka ani, aminyan talak el weit yapu, ‘Weik kwalina sum binuyap’ tenen, bisik banmek talak ara, Yesus babye aminyan biyuk. Yesus elce Yudea tam biyuka ara, ‘Ninye nirya eipnamak’ tenen, talye mankau kanye bobuka lakak kum biyuk bukni, dungnubuka biyuk.

11Ara, Yudea tam noutamak, weik sum ati kwalipmakak ara, sik Yahudi yala deiyok nang arye, “Anye bira dan do?” nyabuka asinmekce, elti, pia kalikuka dinauk unmek. 12Sik ninye weik arye amutuku bulupmek noutamak, sik nirya arye Yesus ati weik arye murmurulanmek. Ton nang arye, “Yesus ara, teleb ululnye,” nyanmek bukni, yuk nang arye ara, “Kume, Yesus ara tenepce arye nyasiliba, el yupu kekenyak ninye mankau arye tilila ning ati dib tenenyake,” nyanmek. 13Winibuka yuk-yuk murmurulanmek bukni, sik awekmek ninye nirya arye, ‘Yahudi yala deiyok nang kekepsikirye, malye kanye bobuka wenepsikcak’ tenen, Yesus ati yupu laka kum nyanmek. Murmurulanauk unmek.

Yesus arye, “Na Ni Koprop Allah arye, nyanilye yupu uk peteresunune,” nyabuk yupu

14Sik aninye nirya, weik sum ati kwalepmekce unmeka ani, noutam talak akunum ubukba, Yesus ara anyasik biyuk. Ara, Yahudi yala nang arye Allah ati arilbalamik aik, weik mambul aik dam biyukce, deiyok koubuka peterenmok. 15Yesus arye peterenmokbuk, sik Yahudi yala deiyok nang kekenmekce, “Se, anye bira, yuk nang arye peteryamikak, ton kel kum bikamuk bukni, yata wiribuka deice arye, aning-aning nirya weik kel arye peterenmal do?” nyabuka, asipdanuka lukuldanmek.

16Nyabuka asipdeyikbuk, Yesus arye tamubuka nyabuk. “Kume. Narye peteresunun yupu ara, na kanye aryuk tenebuka kum nyasunune. Na dopdeipnuknye Allah arye nyaniliba, el nyanilye touk ayupu uk narye peteresunune. 17Yata ninye do nirya, sikce, ‘Allah tenenyamsukce, el yupu deice nyasilye touk, aninguk talibuka unamabe,’ tenebikirye dipkoprop ubicopura, kel biknamak ning nyapnusine. Na Yesus arye, na kanye aryuk peterenun do? Na Ni Koprop Allah arye nyanilye yupu uk peterenun do? Ayupu dobolbanyak ninyeuk kel biknamakca,” Yesus arye nyabuk.

18Nyabukce ayupu tonap nyabuk. “Yata nang do nirya, sik kanye aryuk peterenyak nang ara, ‘Sik kekepsikirye, nunti si erebuka ereipnamsiak’ tenen, wininyake. Aning atonun kum bukni, yatanye do nirya, ‘Na ti dopdeipnuknye, elti, pil dopnyebuk, yuk nang nirya arye eltibuk si erebuka, el siuk erepnamake,’ tenelinye bira, anye bira dib yupu uk nyalule. El winilul ning ap, el nyalye yupu ap nirya ara, tilila ning tonok ning babye kum winilule. Diksukumuk ulule,” Yesus arye nyabuk.

19Nyabukce, Yesus arye Yahudi yala nang ati nyabuk. “Allah arye, ‘Aning ara wininamlume bukni, aning kum wininamlume,’ nyapdeibukura, Musa arye sekeiyamsuk yupu,#7:19 Musa sekeiyamsuk yupu lak len yupu ara, nomor 35 dipdelulume. mem yupu ara, kum areamsuk do? Kume, elcuk ayupu arepsuk bukni, anggun kan-kan noutamak arye, tonoknye babye, ayupu moubuka taliplirye, kum melilule. Anggunda yata ning deiyok ati, ‘El optibye’ tenen, piripdenmanulum do?” Yesus arye nyabuk.

20Nyabukba, awekmek ninye kan-kan noutamak tonoknye birye nyabuk. “Kume, anda isa talyamuknye ulyame. Yata nang arye opmandanmakiakba, ayupu nyapmasilam do?” nyabuk. 21-22Nyabukura, Yesus arye nyabuk.

Anggun pil dona kum sum, Sabat sum, ninye kum winipmanto ning tonok ning uk, ninye kweten pil dopsibuk, anggun nirya eibuka kel biknulumce, ‘Elda pil atonun ning winipmale’ tenen, nati lukdanuka malye tenepmanulume. Bukni, Musa arye, “Ninye den bola mouse ning#7:21 den bam bol mouse ning sengna yupu deiyok kel bikna ati, laka nyana yupu nomor 19 dirume. sekenamlulume,” nyapdeiyamsuka ati, anggunce pil dona kum sum, Sabat sum sal mapu dobuka, anggun den bola mouse deice tam sekelulume. Winilulum ning ara, ‘Aning ara malye wininyabe,’ kum tenelulume.

23Ura, anggun ton tenipdelulume. Musa arye, “Wininamlulume,” nyamsuk yupu, ‘Mem yupu kum yanipnuyab,’ tenelulum deice arye, Sabat sum arye pil kum dolulume. Bukni, Sabat sum aupmatu babye, ‘Nun mapu den bola mouse deice tam sekna teleb’ tenen, sekna piluk dolulume. Winilulume ati ara, yata deiyok arye nati, ‘Sabat sum ninye nong nirya kwetepmo deice arye, pil atonun dobuk’ tenen, yu upsukba derepmanulum do? 24Anggunda, nong bol deice ninguk eibuka, yupu bokolilulumce, “Aning teleb, aning malye,” nyalulum ning ara batakmunce, dipkoprop noutamak ninguk tenebuka, diksukum yupu uk bokolinamlulume. Yesus arye nyabuk.

“Aminyan yanamlanye, Kristus nyalamaknye bira, Yesus ulul do?” nyabuka, asipdeyik yupu

25Yesus arye ayupu nyabukba, adiparyuk sik Yerusalem mutuku noutamak ulamik ninye arye nyanmek. “Kayapo, sik Yahudi yala deiyok nang arye, ‘Anye bira nun optibye,’ tenenmeknye bira, el Yesus akunuma daribe? 26Elda, nun kekenmapak laka aryuk nyanmal bukni, sik deiyok nang arye elti, yupu tonok ning babye ton nyabuka, kum wenenyaka ara, yata ati do? Ati sik deiyok nang arye Yesus ati, ‘Kume, Allah arye, ninye lyepnamle tenen, wipdeibuknye, Kristus, el Yesus ara, dipkoprop Ninye Lyena Deiyoknye ulule’ tenen, akunum kel bikmakce, kanye lamabukauk unyak do?

27Bukni, nunuk ara, nun kele. ‘Anye bira Kristus kume. Elda amutukunye koprop ulule,’ tenebuka akunum kel bikupu. Tonda, Ninye Lyena Deiyoknye, Kristus nyalamaknye yanamle talak ara, ninye nirya arye, ‘Anye bira amutukunye, anang arye deibiknye’ tenen, kum kel kipmanto upnamake. Aning ati ara, Yesus ara Kristus kum ulule,” nyanmek.

28Sik awekmek nang arye nyanmekbuk, Yesus arye sik Yahudi yala nang arye domik aik, Allah el kina ap, el si erena ap ati arilbalamik aik, mambul weik aik dam tuba tikmokce, weik yupu deice arye nyabuk.

“Anggunda dib nyanmalume. Na ap, na mutuku ap, akunum kel bikamnulume. Bukni nara, na kanye aryuk amutuku kum unune. Aning kum bukni, na dopdeipnukce, tukwak mutuku dopdeipnuknye bira, pia dipnye ulule. Elti ara, anggun kum kel bikamlume. 29Anggun kum kel bikamlum bukni, na dopdeipnuknye Allah ara, elce dopdeipnukba, nara el damak arye yanamse ati, el bikamse,” Yesus arye nyabuk.

30Yesus arye ayupu nyabukura, sik awekmek nang yu ubukba adiparyuk, ‘Tomopnuyabe’ tenen, piripdeyik bukni, Allah arye Yesus ati, ‘El opnamik talak anye,’ tenyamuk sum ara kabul anya arye, tonoknye babye, Yesus kum talibik. 31Awekmek ninye weik arye malye tenenmek bukni, ton nang mitik weik arye Yesus ati dib tenepmek. Atalak arye dib tenepmek nang ara, ‘Kume, wini talak nyasilinye birye, ninye kum winipmanto ning, mambul pil dosilye ning ara, weik mambul ulula anya arye, Kristus nyalamaknye aminyan yanamle talak ara, pia mambul pil weik arye tonap winipnamsil do? Kume, el Yesus ara akunum yanmal atia,’ tenebikce dib tenenmek.

32Awekmek ninye kan-kan arye, sik Farisi nang ton wekmeka ati, aninye nyanmek yupu kekebikce yu ubuk. Yu ubukba, sik Farisi nang ap, Allah arena ati weik deiyok nang, sik imam nang ap arye, ‘Yesus tomobuka tapu koupnamak’ tenen, biyikce yupu nyapdeibikba, Allah arilbalamik aik yin talibuka kaleklamik nang#7:32 kaleklamik nang ati, laka nyana yupu nomor 8 dindelelume. arye, Yesus ati elelbiyik. 33Sik banmek talak ara, Yesus arye asukumuk tuba wekmek nang ati ayupu nyabuk. “Nara, anggun dam tia yasirye, anggun ap unmap bukni, mitik ton unmanya ani, Allah tenepnuk talak akunum uplyopura, na dopdeipnuknye Allah dam binamne.

34Binyopura, anggunce, ‘Yata mutuku binmal do?’ tenen, pia enamnulum bukni, kum eipnamnulume. Na binuka unamne mutuku ara, anggun ap kum yatume,” nyabuk. 35Yesus arye nyabukba, sik Yahudi yala deiyok nang kekebikce nyapdayik.

“Anye bira, dan mutuku bitu ak, nun kum eipdatibye do? Elda, nun yala nang bukni, Yunani yala ninye ap ansinibuka unyak mutuku binamal do? Amutuku bilirye, Yunani ninye peterepra banamla ati, ayupu nyapmasil do? 36Elce, ‘Eipnamnulum bukni, pia kum eipnamnulum,’ nyapmok ning ap, tonda, ‘Na binuka unamne mutuku ara, anggun ap kum yatume,’ nyapmok yupu ap, yata ning deiyok ati, aning tenebukce nyapmasil do?” Sik Yahudi yala deiyok nang arye nyaldanmek.

37Atalak weik yuna yupra banmekba, sirya sum, ‘Asum ara weik mambul sum,’ tenelamik ning ara, Yesus tikukce yupu weik arye nyabuk. “Anggun kekepnuse. Yatanye do nirya, mek pataplyopura, na dam yalirye, mek dinamle. 38Yata ninye do nirya, nati dib tenebiceura, aminyan ara, mek pu mek weik arye langdibuka diniplirye, balamle atonun, aninye sik kanye talima noutamak arye, pia kam una deiyok ning ara, mek pu panaplirye, pia balamle atonun unamle,” Yesus arye nyabuk.

39Ura, Yesus arye ayupu nyabuk ning ara, winipmanto ati nyabuk bukni, ayupu nong noutam ning ara ani. “Sik kanye talima noutamak arye kam una deiyok ning mek atonun banamle,” nyabuk ning nong ara, Allah El Dib Kanye weik arye arepnamuk ning ati nyabuk. Yesus ati dib tenebik ninye ara, aminyan talak Allah El Dib Kanye aribukba, dopropnamika ati nyabuk bukni, ayupu nyabuk talak ara, Allah El Dib Kanye min kum aribuka anya arye, min kum doprobik. Yesus dibukba, Allah arye kam bukdeibukce, pia teleb kipdeipnamuka ara, min dam kum uamuka ati, el Dib Kanye min kum aribuk talak arye nyabuk.

40Yesus arye adomona yupu atonun yupu nyabukba, el yupu kekenmek nang arye nyabik. “Kume, nun kanye ara, anyasilinye bira, Allah el yupu laka nyana deiyoknye, nabi ulule,” nyabik. 41Yuk nang, arye “Nun kanye ara, elda Ninye Lyena Deiyoknye, Kristus nyalamaknye ulule,” nyabik.

Nyabik bukni, ton yuk nang ara, “Kume, yata wiribuka Kristus nyanyaknye bira, Galilea mutuku noutamak arye yasutu do? Ara kum winipmantoe. 42Allah yupu sekamsika noutamak arye yata nyasulul do? ‘Ninye Lyena Deiyoknye, Kristus yanamle,’ nyanyaknye bira, ‘Daud el yala nang arye deipnamake.’ Tonda, ‘Nun apu Daud, el ulamuk mutuku koprop, Betlehem mutuku arye yanamsile,’ nyalula anya arye, anye Yesus ara, yata wiribuka Kristus uptu do? Aning ara kume,” nyabik.

43Aning atonun sik kanye walwal ubukba, Yesus ati ninye bokuka, ton nang yuk, ton nang yuk, yupu yuk-yuk nyanmeka anya arye, kanye yuk-yuk tenebik. 44Ton nang arye, ‘Yesus tomobuka tapu kouptibye,’ tenenmek bukni, tonoknye babye, Yesus el nong kum talibik.

Yahudi yala deiyok nang arye Yesus ati, dib kum tenebik yupu

45Sik nirya Allah el si erena aik damuk daunmeka ani, sik asum dopdeipmek nang, Allah arilbalamik aik kalekna ati, yin talin nang tamubuka, sik Farisi nang ap, Allah arena ati deiyok nang ap, sik dam tamubuka biyik. Biyikopura, adeiyok nang arye asipdeyik. “Anggun dan do, yata ati Yesus tomobuka kum boyanmasulum do?” nyabuka wenebik. 46Wenebikbuk, ayin talin nang arye, “Kume, anye birye nyalye yupu ara, pia mambule. Yuk nang nirya ara, el nyalye touk pia kum nyalamsike,” nyabik.

47Nyabikba, sik Farisi nang arye yu ubukba, tamubuka nyabik. “Elce tenebuka yupu deice nyapmoba, anggunce tilila ning ati akunum diba tenepmalumce nyapsulum do? 48-49Anggun tenipdelulume. Nun Farisi nang ap, nun Yahudi yala deiyok nang ap arye, elti, diba tenenyap do? Kume, diba pia kum tenenyap bukni, amutuku talye wekmak ninye ara, sikda kanye bona kum ninye unyake. Sikda Musa sekamuk yupu nirya ara, pia kum kel biklamike. Sikda yuk nang arye anang ati, ‘Motona talipnamle’ tenen, benepdeibika deice arye, aninye arye Yesus ati diba tenenyake,” nyabik.

50-51Sik Yahudi yala deiyok nang arye ayupu nyabikura, Nikodemus ara, sik kan-kan ulamuknye, sik piluk dolamuknye bukni, el minopce Yesus dam dungnubuka asilbinamuknye birye ayupu nyabuk. “Na kayapu, Allah arye nyabukura, Musa arye sekeiyamsuk yupu, nun talinyap mem yupu ara, ‘Ninye talye lulubuka oltakana telebe,’ nyasulul do? Akumopura, ‘Opnamap,’ tenepmalumnye bira, el yupu lak nyaplibuk, kekepmunyopura, adeice aryuk, ‘Malye winibuk ning ani’ tenen, ‘Yupu bokolina telebe,’ nyasulul do?” nyabuka, Nikodemus arye asipdeyuk.

52Nikodemus arye, sik awekmek Farisi nang ati nyabukba, sikce tamubuka elti, nyabik. “An babye Galilea mutukunye ulyama deice arye nyapsilam do? Allah yupu sekamik ning moubuka dipdemince, kel biknalame. Ayupu noutamak ara, ‘Allah yupu lak nyana deiyoknye, Galilea mutuku noutamak arye nabinye yanamsile,’ kum nyasulule,” nyabuka wenebik. 53Nyabuka wenebukba, sik nirya yuk-yuk sik aik tamubuka biyik.

Zur Zeit ausgewählt:

Yohanes 7: EIPA

Markierung

Kopieren