लुका 24
24
इसु सिकासो सिन्हुका
(मत्ति २८:१-१०; मरकुस १६:१-११; युहन्ना २०:१-१०)
1देउबारको दिना एअ् र्हिमाङ इङको बेबालाइ ताइमिको त्यार पाका आतर रो मलम चुमतेङ इसुको तोमता हानिहि। 2इन्ता थुकालिलोलाउ एम्बालाइ तोमता दुल्का नुइको बारका उन्ठुइ लाअ्पाका तिङहि। 3कालाउ तोमलिअ्ता दुल्लाउ एम्बालाइ प्रभु इसुको सिका जिउहेङ मातिङहि। 4आवाइतेङ जाअ्तेङ हिका पहरता मिँदोङ चोलका धाबा लागाइका न्हेमि द्याङ एम्बालाइको भेरपा जाअ्हि। 5इन्ता हिका बेबालाइ थितेङ भोनोता पोम्भेलेहि। कालाउ इङको न्हेमि द्याङ दोअ्हि, “नेलाइ सिकासो सिन्हुकाहेङ हाइपालि सिकालाइको माझाता भोसुखेना? वा इता मान्थु। 6वा सिकासो सिन्हुलि दोहोइ! गालिलता हिलाउ वा नेलाइहेङ हाइ दोअ्का हिघाहि फोम मान्थु?#मत्ति १६:२१; १७:२२-२३; २०:१८-१९; मरकुस ८:३१; ९:३१; १०:३३-३४; लुका ९:२२; १८:३१-३३ 7‘का द्याङको चानहेङ पापि द्याङको खुरता सुमप्यावा। कुरुसता टाङगाइतेङ सेअ्तावा रो सुम्निता आरोङ सिकासो सिन्हुताङका’ दोअ्का काथा हाइ नेलाइहेङ फोम मान्थु?” 8एन्सालाउ खिनिङ एम्बालाइ इसुको दोअ्का काथा फोमपाहि।
9इङकोन्हुअ्सो बेबालाइ तोमसो घुरितेङ ताइमिको तिङका गोताङ काथा तेएअ्मि चात्यागेलाइ रो बो द्याङगेलाइहेङ बुङ हिम्पाहि। 10इदोइ बेबालाइचाहिँ मरियम मग्दलिनि, याकुबको आमाइ मरियम, योआन्ना रो बो आधिमि बेबालाइ हिघाहि। एबालाइदोङ इदोइ काथा तेएअ् साल्तेङ दिङगिल्कालाइहेङ हिम्पाका हिघाहि। 11कालाउ “एम्बालाइको दोअ्का काथा ते मामा माको!” दोअ्तेङ साल्तेङ दिङगिल्कालाइ इङको बेबालाइको दोअ्का काथा मासाअ्हि। 12कालाउ पत्रुस जुरुक जाराकपा ल्होतेङ धाअ्पुतेङ तोमभारि हानिहि। इन्ता थुकातेङ लिअ्ता तुघुरतेङ खाङलाउ ते वा इसुहेङ लुन्दाइका धाबाखिनिङ तिङहि कालाउ बो हाइदोङ मातिङहि। इदोइ तिङतेङ वा भारभुसाइतेङ साअ्भारि घुरिहि।
इसु इम्माउसको दामाता
(मरकुस १६:१२-१३)
13इङको दिना इसुको न्हेमि चात्यागेलाइ यरुसलेम पुरसो न्हे घान्टाझोको दुरे हिका इम्माउस दोअ्का देराभारि हानिदोङघाखे। 14एम्बालाइ एलाङ जेङका घटनाको बारेता काथा पादोङघाखे। 15एसापा काथापातेङ हानिकाताङ पालाउ इसु लोतेङ एम्बालाइदोसाङ तेलि तेङहि। 16कालाउ एम्बालाइ वासेहेङ नाल्लि मादोहि। 17इसु एम्बालाइहेङ हिअ्हि, “नेलाइ हाइको बारेता काथापातेङ हानिदोङसुखेना?” कालाउ इङको न्हेमि जाअ्हि रो एम्बालाइको र्हाइ खाङलाउ सोकता परिका भाइपाङ तिङघाहि। 18इङको न्हेमिता क्लेओपास दोअ्का इसुहेङ हिअ्हि, “बाहारसो लोका हिनाङसिङ ना खिनिङ इदोइ काथा हिङना मान्थुन्हा। आन्जिनानि यरुसलेमता जेङका काथा हाइ ना हिङनाङ मान्थुन्हा?” 19इसु एम्बालाइहेङ हिअ्हि, “हिसिका काथा?” एम्बालाइ दोअ्हि, “नासरतको इसुको बारेता जेङका काथा। वा परमेस्वर रो द्याङको आगाता सरबङ हिका काम पाका रो रेम्फा बिद्या पिका परमेस्वर पाहासो धुइका हिघाहि। 20कालाउ केलाइको मुल धामि रो यहुदि आगुवागेलाइ वासेहेङ कुरुसता टाङगाइतेङ सेअ्लि भाअ्सिङ रोमि हाकिमको खुरता सुम्पिहि। 21वादोङ इस्राएलिगेलाइहेङ छुटकारा पिका दोअ्तेङ केलाइ आस पाका हिघान्हाहि। कालाउ वासेहेङ कुरुसता टाङगाइका बुङ नानि सुमनि जेङहोइ। 22आरोङ केलाइको आधिमि बाइ ओनेगेलाको दोअ्का काथा हिङतेङ केलाइ ते भारभुसाइन्हाहि। हाइदोनु एम्बालाइ एअ् र्हिमाङ तोमता हानिका हिघाखे। 23कालाउ इन्ता एम्बालाइ इसुको सिका जिउ मातिङहि। कालाउ एम्बालाइकोता स्वरगदुत देखाल पितेङ ‘इसु ते सिन्हुपाङ हि’ दोअ्हि आङ। 24इदोइ काथा हिङतेङ केलाइको आधिमि सानाइतिगेलाइ बुङ तोमता खाङलि हानिहि। कालाउ ओबालाइ बुङ इङको बेबालाइको दोअ्का भाइपाङ निङहि। कालाउ वासेहेङ चाहिँ मातिङहि।”
25इसु दोअ्हि, “नेलाइते हिसिका आबुझ द्याङगेलाइ हिसुन्हा। परमेस्वर पाहासो धुइकालाइको दोअ्का काथाता खान्धुर पालिसुदाङ नेलाइहेङ हिसिका गार्हो जेङहि। 26हाइ आदर रो पारताप निङकाखान्तेङ लाम्फा ख्रिस्ट तु: भोगिलि मागोइधाङ कुनु?” 27कालाउ इसु मोसाको लेखिका किताब रो परमेस्वर पाहासो धुइकालाइ लेखिका किताबता झाराङ वाको बारेता लेखिका काथाको माने एम्बालाइहेङ हेपिहि।
28एम्बालाइ हानिकाताङ पालाउ इम्माउस देराको भेरपा थुकालिलोलाउ इसु इन्तासो आसा दुरे हानिलि भोहि। 29कालाउ इङको न्हेमि चात्यागेलाइ इसुहेङ दोअ्हि, “बेला दुबिलि तोम्होइ, नानि ना केलाइदोफा दोङ हि।” कालाउ इसु एम्बालाइदोफाङ बासा हिलि हानिहि। 30इसु चालि योम्लाउ वा तोले चुमतेङ परमेस्वरहेङ च्याबास पिहि। कालाउ तोले पेङतेङ एम्बालाइहेङ पिहि। 31कालाउ खिनिङ इङको न्हेमिको मिँ हेनातेङ एम्बालाइ इसुहेङ नाल्हि। कालाउ एन्सालाउदोङ इसु गोलोप जेङहि। कालाउ एम्बालाइ ताताइमिता इस्का काथा पाहि, 32“किधिमिदोफा दामाता बातमारेतेङ लोकाताङ पालाउ वा धरमकिताबको माने हेपिलाउ केलाइको कोन्धाङ लेङचातेङ लेङचाका जेङका माहिघाहि कुनु?”
33इङकोन्हुअ्सो एम्बालाइ ओदोङघरि ल्होतेङ यरुसलेमभारि हानिहि। इन्ता थुकालाउ एम्बालाइ तेएअ् चात्यागेलाइदोफा बो द्याङगेलाइ जोम्तेङ हिका निङहि। 34इन्ता हिका द्याङगेलाइ इङको न्हेमिहेङ एसा दोअ्हि, “जातिङकोङ प्रभु इसु सिकासो सिन्हुहोइ रो वा सिमोनकोता देखाल पिहि!” 35कालाउ इङको न्हेमि चात्या दामाता घाटेका घाटाना रो इसु तोले पेङतेङ पिलाउ हेसापा वासेहेङ नाल्का काथा इन्ता हिका बो द्याङगेलाइहेङ बुङ हिम्पाहि।
इसु चात्यागेलाइकोता तिङका
(मत्ति २८:१६-२०; मरकुस १६:१४-१८; युहन्ना २०:१९-२३; साल्तेङ दिङगिल्का १:४-८)
36एम्बालाइ इदोइ काथा पाकापाकाताङ इसु एम्बालाइको माझाता जाअ्हि रो दोअ्हि, “नेलाइहेङ सान्ति ज्याको।” 37केलाइ मासान कि तिङन्हाहि ना हाइ दोअ्तेङ एम्बालाइ हेन्जाङ थिहि। 38कालाउ इसु एम्बालाइहेङ दोअ्हि, “नेलाइ हाइपालि थिसुखेना? हाइपालि मनता इस्का साङखा पासुखेना? 39काङको खुर खोकोइ खाङसु कालाउ नेलाइ कासेहेङ रेम्फा नालस्वाना। का मासान माको हाइदोनु मासानगेलाइको ते हारा रो बिह्या मान्थुखे कालाउ काङकोते हि, इङको नेलाइ तिङदोङसुखेना।” 40एसा दोअ्तेङ इसु एम्बालाइहेङ ताइको खुर रो खोकोइ तिम्पाहि। 41इङको तिङतेङ एम्बालाइ हेथे हेन्जा लेङचाहि रो भारभुसाइतेङ इदोइ काथा साअ्लि दोङ मादोहि। एन्साजेङलाउ इसु एम्बालाइहेङ दोअ्हि, “नेलाइदोसा इता हाइदोङ चाका आनेमाने हि?” 42कालाउ एम्बालाइ वासेहेङ खिङका एअ्पोङ हाया पिहि। 43वा इङको हाया र्हुतेङ एम्बालाइकोङ आगाता चापिहि। 44कालाउ वा दोअ्हि, “का नेलाइदोफा हिलाउ दोअ्का बचनगेलाइ एला पुरा जेङलि लोका हि। ‘काङको बारेता न्याम, परमेस्वर पाहासो धुइकाको किताबगेलाइ रो लेको किताबता लेखिका गोताङ काथा पोङघालिङ गोयाङ’ दोअ्तेङ का नेलाइहेङ दोअ्काङ हिघाखा!”
45इङकोन्हुअ्सो इसु एम्बालाइहेङ धरमकिताबता लेखिका काथागेलाइ गिलि सरबङ पिहि रो दोअ्हि, 46“धरमकिताबता इस्का लेखिका हि: छुटकारा पिका ख्रिस्ट तु: भोगितेङ सुमनिता आरोङ सिकासो सिन्हुतावा। 47ख्रिस्टको मिङता पास्ताइनु पाप माफ जेनावा दोअ्का काथा चारबितिङ पारचार जेङलिगोयाङ। इदोइ काथा यरुसलेमसो थालिन्हातेङ गोताङ जात्याको द्याङगेलाइहेङ हिङपालिगोयाङ। 48नेलाइदोङ इदोइ गोताङ काथाको दासि हिसुन्हा। 49कालाउ हिङसु, काङको आबाको पाका बाचा का नेलाइकोता पिगिलाङका। कालाउ र्हुतासो सरबङ मानिङपाधाउ नेलाइ इदोइ पुरता हिसु।”#साल्तेङ दिङगिल्का १:४
इसु स्वरगता हानिका
(मरकुस १६:१९-२०; साल्तेङ दिङगिल्का १:९-११)
50इङकोन्हुअ्सो इसु चात्यागेलाइहेङ यरुसलेम पुरसो बेथानिया देराभारि चुमपुहि। इन्ता थुकातेङ वा ताइको खुर तोल्हेतेङ एम्बालाइहेङ सहसाम्पा पिहि।#साल्तेङ दिङगिल्का १:९-११ 51इसु सहसाम्पा पिकाताङ पालाउ दोङ एम्बालाइसो खेङन्हातेङ स्वरगभारि तोल्हेन्हातेङ हानिहि। 52कालाउ एम्बालाइ वासेहेङ सेउपाहि रो लेङचातेङ यरुसलेम पुरभारि घुरिहि। 53कालाउ एम्बालाइ दिनाङ थानता जोम्तेङ परमेस्वरहेङ बाखिनघाखे।
Zur Zeit ausgewählt:
लुका 24: DHIM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2025 by Nepal Bible Society and Wycliffe Bible Translators, Inc.
