Génesis 6
6
Li cristianoetic ta vo'onee puru mulil ibat ta yo'ntonic
1C'alal ibolic xa'ox li cristianoetic li' ta banamile, ich'ian tsebetic yu'unic noxtoc. 2Li xnich'nabtac Diose laj yilic ti toj c'upilic sba li tsebetique. Jech te lic st'ujic ti bu junucal tsc'an chiq'uique, jech te inupin xchi'uquic. 3Li Muc'ul Diose jech laj yal: “Mu xcac' ti toj jal chcuxiic li cristianoetique yu'un oy sbec'talic, jech ja' xa no'ox ta xcac' cuxiicuc vacvinic (120) jabil”, xi.
4Ja'o te ilic sts'unubal muc'tic cristianoetic#Nm 13.33. ta banamil ti c'alal laj yic' sbaic xchi'uc xnich'nabtac Dios li stsebetic cristianoetique, yu'un i'ayin yalab xnich'nabic xchi'uquic. Ja' ti ven tsatsal cristianoetic ibatic ta ts'acale, ti puquem sc'oplalic ta buyuc no'ox ta vo'onee.
5Li Muc'ul Diose laj yil ti i'epaj smulic li cristianoetic ta banamile, xchi'uc ti ja' no'ox batem ta yo'ntonic o snopel li c'usitic chopole. 6Li Muc'ul Diose toj vocol laj ya'ay, yu'un altic no'ox la spas cristianoetic ta sba banamil. 7Jech laj yal: “Ta jtu'pbe o sts'unubal ta banamil li cristianoetic la jpase, xchi'uc scotol chonbolometic, xchi'uc li chonetic ti xquilet ta banamil chanove, xchi'uc li mutetique. Xco'laj xchi'uc ti manchuc la jpase”, xi.
8Ac'o me jech laj yal li Muc'ul Diose, pero li Noee lec laj yil.#Mt 24.37; Lc 17.26; 1 P 3.20.
Li Noee la spas jun barco
9Li'i ja' sc'oplal Noé. Li Noee ja' jun lequil vinic. Scotol c'ac'al lec yich'oj ta muc' li Diose. Ja' no'ox stuc oy ta yo'nton tspas c'usi tsc'an Dios ta scotol cristianoetic ti c'alal cuxul li Noee. Jech lec laj yil sbaic xchi'uc li Diose.#2 P 2.5. 10Li Noee ivoc' oxib xnich'on, ja' Sem, Cam, xchi'uc Jafet.
11Li Diose laj yil ti nojem ta mulil li banamile yu'un toj chopol li c'usitic tspasique. 12Scotol cristianoetic ibolibic, jech i'epaj mulil ta banamil laj yil li Diose. 13Ja' yu'un jech laj yalbe li Noee: “Laj xa jnop ti ta jlajes scotol li cristianoetique, yu'un ja' ta scojic ti toj ep c'usitic chopol li' ta banamile. Ja' yu'un ta xcules scotol xchi'uc li c'usitic oy ta sbejel banamile. 14Meltsano jun barco ta te' ti ep xuch'ale. Ep ta c'ol yut xapas. Pac'o lec ta xuch' ta yute xchi'uc li spate, yu'un jech mu x'och vo' ta yut. 15Li barcoe ja' jech smuc'ul xapas chac li'i: Vo'lajuneb svucvinic (135) metro li snatile. Ja' o'lol yoxibal xcha'vinic metro (22 1/2) li sjamalile. Ja' o'lol xchanlajunebal metro (13 1/2) li stayalile. 16Oxcoj sjol xapas, xchi'uc jun ventana o'lol metro mu sta li smac sjole, xchi'uc jun sti' ta jot xocon. 17Yu'un ta xcac' taluc pulel ta vo'. Ta xmuc ta vo' li banamile yu'un ac'o uluc sts'unubal scotol li c'usitic cuxajtic ta sbejel banamile. Jech ta xcham scotol li c'usitic oy ta banamile. 18Pero li vo'ote ta xcom ta atojol li c'usi chapanbil cu'un ta sventa coltaele. Cha'ochic ta barco achi'uc avajnil, anich'nab, xchi'uc avalibtac. 19Jech noxtoc ic'o ochel ta barco jcot stot jcot sme' ta scotol li jaychop chonbolometic oy ta banamile, yu'un jech mu x'ul o sts'unubal jech chac c'u cha'al li vo'ote. 20Te co'ol cha'ochic ta barco achi'uc li cha'cha'cot chonbolometic ta jujuchop sts'unubalique xchi'uc li chonetic ti xquilet ta banamil chanovique, yu'un jech cuxul chcomic. 21Tsobo ep ta chop ve'liletic. Nac'o ta yut barco, yu'un jech oy ave'elic, xchi'uc jech oy sve'elic ec li chonbolometic te ta yut barcoe”, x'utat.
22Li Noee la spas scotol jech c'u cha'al i'albat yu'un li Diose.#Heb 11.7.
Zur Zeit ausgewählt:
Génesis 6: TZE97
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tzotzil Chenalhó DC Bible © Sociedad Bíblica de México, a. c., 2002.
