Lucas 19

Nai Jesus hasoru malu ho kobrador impostu Zaqueu

1Depois Jesus tama iha sidade Jerikó, i lao liu hosi sidade laran. 2Iha nebaa iha ema ida naran Zaqueu. Nia xefi kobrador impostu i nia em riku ida. 3Zaqueu hakaas aan atu haree Jesus, maibee la hetan, tanba ema barak teb-tebes, i nia ema badak oan ida. 4Entaun nia halai uluk tiha ema barak nee hodi baa sae ai huun ida iha dalan ninin atu bele haree Jesus, tanba Jesus atu liu hosi nebaa.

5Too iha ai huun nee, Jesus hateke ba leten hodi dehan, “Zaqueu, tuun lalais mai! Iha kalan ida nee Hau tenki toba iha ita nia uma.”

6Zaqueu tuun kedas, i lori Jesus ba nia uma ho laran haksolok. 7Ema hotu-hotu nebee haree nunee, murmura dehan, “Nia nee ema moris iha sala. Nusaa mak Jesus baa vizita fali iha nia uma?”

8Bainhira iha uma ona, Zaqueu hamriik hodi dehan ba Nai Jesus, “Nai, agora kedas rikusoin hotu nebee hau iha, sorin balu hau foo ba ema kiak sira. I se hau han-matak ema ruma, hau selu fali sira dala haat.”

9Jesus hatete ba nia, “Ohin loron nee kedas, Nai Maromak salva o nia uma kain tomak, tanba o mos Abraão nia jerasaun. 10Tanba, Hau, Ema Oan, mai iha mundu hodi buka no salva ema nebee lakon.”#Mateus 18:11

Komparasaun kona ba atan nain sanulu

(Mateus 25:14-30)

11Tempu nebaa, ema barak rona hela Jesus nia hanorin. Nia besik dadaun Jerusalém, i povu hanoin katak, too iha nebaa, Maromak atu ukun kedas nudar Liurai. Entaun Jesus hanorin sira ho komparasaun ida. 12Nia konta nunee: “Iha ema ida jerasuan liurai baa rai dook para foti nia sai liurai, depois mak nia fila fali mai ukun iha nia rain rasik. 13Molok nia atu baa, nia bolu nia atan nain sanulu hodi entrega moeda osan mean ida-idak ba sira. Nia foo orden dehan, ‘Imi uza osan nee hodi fila liman too hau fila fali mai, para hau bele hetan funan.’ Depois nia baa.

14Maibee nia povu odi nia, nunee sira haruka sira nia reprezentante balu baa kedas iha nebaa hodi foo hatene, dehan, ‘Ami lakohi ema ida nee ukun ami.’

15Maski nunee, sira foti nia sai liurai duni. Depois nia fila ba nia rain. Too iha uma, nia bolu nia atan nain sanulu nee hodi husu kona ba osan nebee nia entrega ba sira nee, hodi hatene hira mak sira manaan fali .

16Atan primeiru mai hatete, ‘Patraun, osan mean ida nebee patraun foo mai hau nee, manaan fali sanulu.’

17Patraun hatete ba nia, ‘Diak loos! O nee atan diak duni. Tanba o foo laran no halo buat kiik-oan nee ho loos, nunee hau foo fiar ba o, i agora hau foti o hodi ukun sidade sanulu.’

18Tuir mai, atan segundu mai dehan, ‘Patraun, osan mean nebee ita foo mai hau nee, manaan fali lima.’

19Patraun hatete ba nia, ‘Diak loos! Hau foti o hodi ukun sidade lima.’

20Maibee atan ida seluk mai dehan, ‘Patraun, ita nia osan hau falun ho hena hodi rai didiak. 21Hau halo nunee, tanba hau tauk. Hau hatene patraun ema ida ke siak-teen. Ita gosta foti buat nebee laos patraun mak rai, i kuu buat nebee laos ita mak kuda.’

22Patraun hataan, ‘Hei, atan aat! O nia liafuan rasik mak hamonu fali o. O hatene ona hau ema ida ke siak-teen, hau gosta foti buat nebee laos hau mak rai, i kuu buat nebee laos hau mak kuda. 23Se nunee, nusaa mak o la rai hau nia osan iha banku, para hau fila mai, bele hetan fali osan nee ho nia funan?’

24Depois patraun hatete ba ema sira nebee hamriik besik, dehan, ‘Foti tiha nia osan nee hodi foo ba atan ida nebee iha ona sanulu.’

25Sira protesta dehan, ‘Patraun, nia iha ona sanulu!’

26Patraun hataan, ‘Hau hatete ba imi, ema nebee iha ona, sei simu tan. Maibee ema nebee la iha, ituan nebee nia iha mos, sei foti tiha hosi nia.#Mateus 13:12; Marcos 4:25; Lucas 8:18 27Agora, hau nia inimigu sira nebee lakohi simu hau hanesan liurai, imi baa kaer sira, lori mai oho tiha hotu iha hau nia oin.’ ”#Mateus 25:14-30

Ema simu Nai Jesus iha Jerusalém ho haklalak

(Mateus 21:1-11; Marcos 11:1-11; João 12:12-19)

28Konta tiha hotu, Jesus kontinua lao sae ba Jerusalém, i ema barak tuir Nia. 29Bainhira Nia besik ona aldeia Betfagé ho Betánia iha foho Oliveira nia lolon, Nia haruka Nia eskolanti nain rua baa uluk. Nia dehan ba sira, 30“Imi baa iha aldeia iha oin nebaa. Bainhira imi tama iha nebaa, imi sei haree kuda buru oan ida kesi hela, ema ida seidauk sae. Baa kore tiha lori mai. 31Se karik ema ruma husu ba imi, ‘Nusaa mak imi kore fali kuda buru nee?’, hatete ba sira, ‘Nai mak presiza.’ ”

32Entaun sira nain rua baa, sira haree buat hotu tuir loloos saida mak Jesus dehan. 33Bainhira sira kore dadauk kuda nia talin, kuda nain husu ba sira, “Nusaa mak imi kore fali kuda buru nee?”

34Sira hataan, “Nai mak presiza.” 35I sira dada kuda buru nee lori ba Jesus, depois hasai sira nia hena tau ba iha kuda nia kotuk hodi hasae Jesus baa. 36Jesus liu dadauk, ema barak hasai sira nia hena nahe tutuir dalan. 37Bainhira sira besik ona Jerusalem atu tuun hosi foho Oliveira, ema barak no Nia eskolante sira nebee tuir Nia nee komesa hahii Nai Maromak, tanba milagre hotu-hotu nebee sira haree ona. 38Sira haklalak ho haksolok dehan,

“Nai Maromak foo bensaun ba Liurai!

Nia mai hodi Nai Maromak nia naran.

Agora ema dame malu ona ho Maromak iha lalehan.

Hahii ba Maromak nebee ukun iha fatin aas liu!”#Salmu sira 118:26

39Maibee ema Farizeu balu iha ema barak nee nia leet, dehan ba Jesus, “Mestri, haruka Ita nia ema sira nee nonook.”

40Jesus hataan, “Hau hatete ba imi, se sira nee nonook, maka fatuk sira nee sei haklalak.”

Nai Jesus tanis ba ema Jerusalém

41Bainhira sira besik atu tama ona Jerusalém, Jesus haree sidade nee, Nia tanis 42hodi dehan, “Koitadu, imi ema Jerusalém! Tuir loloos, ohin loron imi hatene ona dalan nebee mak bele lori imi ba moris iha paz ho hakmatek nia laran. Maibee imi la hatene nafatin, i agora imi la haree ona. 43Too tempu ida, imi nia inimigu sira sei haleu imi hanesan muru i habit imi hosi fatin hotu-hotu. 44Sira sei harahun tiha imi nia sidade halo tetuk too rai. I sira sei kaer o ho o nia oan sira no povu riba ba rai too mate. Buat sira nee hotu sei akontese tanba imi lakohi hatene Maromak, maski Nia mai tiha ona para salva imi.”

Nai Jesus duni sai kontratu nain sira hosi Uma Kreda Boot

(Mateus 21:12-17; Marcos 11:15-19; João 2:13-22)

45Jesus tama ba iha area Uma Kreda Boot nian, i duni sai ema sira nebee halo hela kontratu iha uma oin. 46Nia siak sira dehan, “Iha Maromak nia liafuan hakerek tiha ona dehan, ‘Hau nia Uma nee fatin hodi halo orasaun.’#Isaías 56:7; Jeremias 7:11 Maibee imi halo fali hanesan ema naok-teen sira nia subar fatin.”

47Loro-loron Jesus baa hanorin iha Uma Kreda Boot. Maibee nai lulik nia ulun sira, mestri relijiaun sira, ho nai ulun Judeu sira buka dalan atu oho Nia.#Lucas 21:37 48Maibee sira la hetan dalan, tanba povu hotu gosta teb-tebes rona Jesus nia liafuan.

Zur Zeit ausgewählt:

Lucas 19: BTDT

Markierung

Kopieren