João 17

Nai Jesus halo orasaun kona ba Nia aan rasik

1-2Jesus koalia tiha hotu nunee, Nia hateke ba loro leten, hodi halo orasaun dehan:

“Aman Doben, Hau nia tempu too ona para Aman foti aas Hau. Hau Ita Boot nia Oan. Aman foo ona direitu no kbiit mai Hau hodi ukun ema hotu-hotu iha mundu nee. Aman foo kbiit nee para Hau bele foo moris rohan laek ba ema hotu nebee Aman foo ona mai Hau. Nunee, Hau husu Aman foti aas Hau, para Hau bele hatudu Aman nia naroman-nabilan. 3Dalan hodi hetan moris loloos nebee rohan laek mak nee: Ema tenki konhese Aman, nudar Nai Maromak nebee loos. La iha tan seluk ida. Sira mos tenki konhese Hau, Jesus Kristu, nebee Aman haruka ona mai iha mundu nee. 4Hau foti aas Aman iha mundu nee, liu hosi hatudu ona Aman nia naroman-nabilan. Hau halo remata ona serbisu nebee Aman foo mai Hau. 5Molok Ita halo mundu nee, Hau hamutuk ho Aman. Tempu nebaa, Hau nia naroman-nabilan hanesan ho Aman nia naroman-nabilan. Agora Hau atu fila ba Aman. Nunee Hau husu para Aman foti aas Hau, para Hau nia naroman-nabilan fila fali hanesan uluk.”

Nai Jesus halo orasaun kona ba nia eskolante sira

6Jesus halo orasaun tan dehan, “Aman foo ona ema iha mundu nee, para sai Hau nia ema. Hau hanorin ona sira, para sira konhese Ita Boot. Sira nee Aman ninian, nebee Aman foo ona hodi sai Hau nian mos. Sira halo tuir Ita Boot nia Liafuan. 7Agora sira mos komprende ona dehan, buat hotu-hotu nebee Aman foo ona mai Hau, nia huun mai hosi Aman. 8Hau hanorin ona ba sira Liafuan hotu nebee Aman foo hatene mai Hau. Sira mos simu Liafuan sira nee. Sira mos hatene dehan, Hau mai hosi Aman. I sira fiar dehan, Aman mak haruka Hau mai.

9Hau halo orasaun kona ba sira. Hau laos halo orasaun kona ba ema hotu iha mundu nee. Maibee Hau halo orasaun deit kona ba ema nebee Aman foo ona mai Hau, tan sira nee Aman ninian. 10Buat hotu nebee Hau nian, Aman nian mos. I buat hotu nebee Aman nian, Hau nian mos. I Hau nia ema sira nee, mak foti aas Hau. 11Hau la hela tan iha mundu nee ona, tanba la kleur tan Hau sei fila ba Hau nia Aman. Maibee ema sira nee hela nafatin iha mundu nee.

Aman Santu, Hau husu Aman kuidadu sira uza Ita Boot nia kbiit nebee Ita Boot foo mai Hau. Hau mos husu para sira sai neon ida laran ida, hanesan Hau sai ida ho Aman. 12Bainhira Hau sei hamutuk ho sira iha mundu, Hau mak tau matan ba sira, tanba sira nee Aman ninian. Hau tau matan ba sira didiak para sira bele metin nafatin ho Aman, i ida deit mos la lakon. So Judas deit mak lakon, nee hodi halo tuir saida mak hakerek ona iha Eskritura Sagrada.#Salmu sira 41:9; João 13:18

13Agora Hau atu fila fali ba Hau nia Aman. Hau foo hatene buat sira nee bainhira Hau sei iha mundu nee. Nunee, Hau nia ema sira nia laran haksolok nafatin, hanesan Hau nia laran mos haksolok. 14Hau hatoo ona Aman nia Liafuan ba sira. Ema seluk iha mundu nee odi Hau nia ema, tanba Hau nia ema sira nee moris la hanesan sira. Hau mos nunee, Hau la hanesan ho ema iha mundu nee. 15Bainhira Hau halo orasaun, Hau la husu para Aman hasai sira hosi mundu nee. Maibee Hau husu ba Aman tau matan ba sira, nunee sira dook hosi buat aat. 16Sira la hanesan ho ema seluk iha mundu nee. Hau mos nunee.

17Liu hosi Aman nia lia loos, hamoos sira nia laran para sira moris loos. Aman nia Liafuan mak lia loos. 18Aman mak haruka Hau mai iha mundu nee. I Hau mos haruka sira nunee, para sira moris namkari iha ema sira iha mundu nee nia leet. 19Hau kuidadu Hau nia aan para laran moos nafatin. Ho nunee, Hau nia ema sira mos kuidadu sira nia aan para laran moos nafatin. Tan Aman nia Liafuan nebee loos mak halo sira foo sira nia aan tomak ba Aman.”

Nai Jesus halo orasaun kona ba ema fiar sira hotu

20Jesus kontinua halo orasaun, “Hau halo orasaun laos ba sira nebee iha agora deit. Maibee Hau mos halo orasaun kona ba ema nebee sei fiar mai Hau, liu hosi ema sira nee nia mensajen.

21Aman, Hau husu para sira hotu sai neon ida laran ida, hanesan mos Aman ho Hau iha neon ida laran ida. Hau mos hakarak para sira metin nafatin ho Ita, nunee ema seluk iha mundu nee bele fiar dehan, Aman mak haruka Hau mai. 22Aman hatudu ona Hau nia naroman-nabilan ba sira, no Hau foti aas ona sira, hanesan Hau. Nunee, sira sai neon ida laran ida, hanesan mos Aman ho Hau ida deit. 23Hau hamutuk ho sira hanesan Ita Boot hamutuk ho Hau. Sira tenki moris laran ida. Se sira moris laran ida hanesan nee, ema seluk iha mundu nee sei hatene dehan, Aman hadomi sira hanesan Aman hadomi Hau. Nunee sira mos hatene dehan, Aman mak haruka Hau mai.

24Aman, Hau hakarak para ema hotu nebee Aman foo ona mai Hau, hamutuk ho Hau. Tan Hau hakarak atu sira haree Hau nia Aman foti aas Hau. Aman hadomi ona Hau, molok Ita halo mundu nee.

25Aman nebee laran moos, ema iha mundu nee la konhese Ita Boot, maibee Hau konhese. Hau nia ema sira mos hatene katak, Aman mak haruka Hau mai iha mundu nee. 26Hau foo hatene ona ba sira, see mak Ita Boot. Hau mos sei foo hatene nafatin ba sira nunee, tanba Hau hakarak sira senti duni Aman nia domin. Domin nebee sira senti nee, hanesan Aman nia domin nebee Aman foo mai Hau. Nunee, Hau mos bele metin nafatin ho sira.”

Zur Zeit ausgewählt:

João 17: BTDT

Markierung

Kopieren