Jenesis 7
7
Rai nabeen
1Tuir mai, NAI Maromak hatete ba Noé, “Hau haree baa iha fatin-fatin, so o mesak deit mak moris loos. Tanba nee, o ho o nia kaben ho o nia oan sira tama ona ba roo laran nee. 2-3Hosi animal hotu-hotu nebee imi bele haan, ho animal hotu-hotu nebee bele lori mai foo Hau, o lori par hitu tama ba roo laran. Hosi manu fuik hotu-hotu mos lori par hitu. Maibee animal sira seluk nebee la bele haan, lori deit par ida, aman ida, inan ida. Nunee animal ho manu fuik sira nee sei sai fini, para bele iha nafatin.
4Hanoin didiak! Tanba loron hitu tan, Hau sei haruka udan boot mai la para, too loron haat-nulu kalan haat-nulu. Ho nunee, Hau sei halo nabeen buat hotu-hotu nebee moris iha rai maran, nebee Hau halo ona.”
5I Noé halo tuir buat hotu-hotu nebee NAI Maromak haruka. 6Bainhira udan boot nee mai, Noé tinan 600 ona. 7Noé ho nia kaben, ho nia oan sira, ho nia feto foun sira tama ba roo laran, para bele salva aan hosi bee boot nee. 8-9Tuir NAI Maromak nia orden nee, Noé lori tama ba roo laran manu fuik oi-oin ho animal sira seluk, ida-idak ho nia par. Nia lori animal nebee ema bele haan, ho mos animal nebee bandu la bele haan. 10Liu tiha loron hitu, udan boot fakar mai, too mundu nee bee nakonu.
11Natoon Noé tinan 600, liu fulan rua loron 17, rai nabeen. Iha tempu nee, hanesan odamatan lalehan nakloke, udan boot mos fakar mai. I bee matan hotu-hotu iha rai okos nakfera too bee fakar sai. 12Udan mos mai loron-kalan la para, too loron haat-nulu.
13Iha loron nee, Noé ho nia kaben, ho nia oan nain tolu nee mak, Sem, Jafé ho Kam, ho nia feto foun sira hotu tama ba roo laran. 14Sira tama hamutuk ho animal sira, hanesan animal hakiak ho animal fuik, manu fuik ho animal sira seluk nebee iha liras. 15-16Par ida-idak hosi animal hotu-hotu nebee iha moris, tama ba roo laran hamutuk ho Noé, tuir Nai Maromak nia orden.
Bainhira sira tama tiha hotu ona ba roo laran, NAI Maromak taka tiha odamatan.
17-19Udan boot mai nafatin, too loron haat-nulu. Bee sae amenta aas too roo namlele iha bee leten. Bee sae bebeik too taka tiha foho aas sira. 20Bee nee sae nafatin, too liu tiha foho tutun sira nee metru hitu.
21-23Nunee buat hotu-hotu nebee moris iha mundu nee mate mohu. Hanesan ema, animal hakiak, animal dolar ho animal fuik - kiik ho boot - ho manu fuik sira. So Noé ho sira nebee iha roo laran mak moris. 24Bee nee la tuun durante loron 150.
Zur Zeit ausgewählt:
Jenesis 7: BTDT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 Wycliffe Timor-Leste.
