Jenesis 17
17
Maromak halo aliansa ho Abrão
1Bainhira Abrão tinan 99, NAI Maromak mai hatudu Aan ba nia. Nia hatete, “Hau nee NAI Maromak Boot Liu. O tenki tuir nafatin Hau nia hakarak, i moris loos. 2Hau atu halo aliansa ho o, i halo o nia jerasaun sai barak teb-tebes.”
3Abrão hakniak no hakruuk too rai. Maromak koalia tan dehan, 4-5“Hau halo aliansa ho o, nunee: o sei sai nasaun barak nia bei-ala. Tanba nee, o nia naran laos Abrão tan ona (nee dehan katak ‘aman nebee konhesidu’), maibee Abraão (nee dehan katak ‘nasaun barak nia aman’). 6Hau sei halo o nia jerasaun barak teb-tebes. Hau sei harii nasaun barak liu hosi o, no sei foti liurai barak hosi o nia jerasaun.
7Hau kaer nafatin Hau nia aliansa ho o, ho mos o nia jerasaun sira. Aliansa nee rohan laek, tan Hau nee o nia Maromak ho tan o nia jerasaun sira nia Maromak. 8Rai Kanaan nee hotu, Hau sei foo ba o ho o nia jerasaun sira. Agora o hela iha nee hanesan ema lao rai. Maibee aban-bainrua rai Kanaan nee tomak sei sai o nia jerasaun sira nian, too tinan ba tinan. I Hau rasik mak sira nia Maromak. 9-10Maibee o ho o nia jerasaun sira mos tenki tuir nafatin aliansa nee. Mane hotu-hotu tenki sunat. 11-13Komesa agora, mane hotu-hotu nebee iha ona loron walu, tenki sunat. O nia familia, ho o nia ema sira hotu, ho o nia atan sira nebee o hola ona hosi nasaun seluk, sira hotu tenki sunat. Sunat nee hanesan sinal aliansa entre Hau ho imi. 14Mane nebee mak la sunat, la tama iha Hau nia aliansa, i la pertense Hau nia povu.”
15I Maromak dehan tan, “Komesa agora ba oin, o la bele bolu tan o nia kaben Sarai, maibee bolu fali Sara.#17:15:Naran Sara nee dehan katak ‘nasaun barak nia bei-ala’. 16Hau sei foo bensaun barak ba Sara, para bele hetan oan mane ida foo ba o. Tebes! Sara sei sai nasaun barak nia bei-ala. I Hau sei foti liurai barak hosi nia jerasaun.”
17Entaun, Abraão hakneak i hakruuk too rai. Maibee iha nia laran nia hamnasa. Nia hanoin dehan, “Mane katuas tinan atus ida hanesan hau nee, sei hetan tan oan? I Sara mos ferik liu ona ho tinan 90, oinsaa sei bele hetan oan?” 18Nia mos dehan ba Maromak, “Maromak, biar Ismael deit mak hetan hau nia rikusoin mos, la buat ida.”
19Maibee Maromak hataan, “Lae! O nia kaben Sara mak sei hetan oan mane ida. O tau nia naran Isac. Hau nia aliansa sei tuun ba nia, ho nia jerasaun too tinan ba tinan. 20Hau mos rona ona saida mak o husu atu foo ba Ismael. Tanba nee, Hau mos foo bensaun ba Ismael, i Hau sei aumenta nia jerasaun halo barak. Sei iha liurai suku 12 hosi nia jerasaun. I nia jerasaun sei sai nasaun boot ida. 21Bele nunee, maibee Hau nia aliansa nee ho deit Isac. Iha tinan oin mai, mais-ou-menus tempu hanesan nee, Sara sei tuur ahi.” 22Koalia hotu nunee, Maromak mos baa, husik hela Abraão.
23-27Iha loron nee kedas, Abraão halo tuir Maromak nia orden. Nia mos sunat. Depois nia sunat Ismael, ho mane hotu-hotu iha nia familia, ho mos nia atan mane sira hotu. Iha loron sira sunat nee, Abraão tinan 99 ona, i Ismael tinan 13.
Zur Zeit ausgewählt:
Jenesis 17: BTDT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 Wycliffe Timor-Leste.
