Jenesis 10
10
Noé ho Jafé nia jerasaun
1Rai nabeen hotu tiha, Noé nia oan sira mos hetan oan. Nee mak jerasaun hosi Sem, Jafé ho Kam.
2-5Jafé nia oan mak nee: Gomer, Magoge, Madai, Javán, Tubal, Mezeke ho Tiras. Sira ida-idak nia jerasaun ho sira nia lian, sira nia suku, ho sira nia rain rasik.
Gomer nia jerasaun mak nee: Askenás, Rifate ho Togarma.
Javán nia jerasaun mak Elisá, Tarsis, ema Kitim sira, ho Dodanim nebee hela iha tasi ibun.
Kam nia jerasaun
6Kam nia oan mak nee: Kuse, Misraim, Pute ho Kanaán.#10:6:Kuse nee mak ‘Etiópia’. Misraim mak ‘Ejitu’.
7Kuse nia oan mak nee: Sebá, Havila, Sabtá, Raamá, ho Sabteká.
Raamá nia oan mak nee: Sabá ho Dedán.
8Kuse nia oan mane ida naran Nimrode. Nia funu nain primeiru iha mundu. 9Ho NAI Maromak nia tulun, nia sai kasador diak ida. Tanba nee ema baibain dehan, “O nee kasador diak ida hanesan Nimrode.” 10Fofoun nia rain komesa hosi Babel, Ereke, Akade, ho Kalné, sidade sira hotu iha Sinear.#10:10:‘Sinear’ nee Babel nia naran seluk. Fatin nee agora iha baliza Irán ho Irake. 11Depois nia ukun tan too Asíria. Iha nebaa nia harii sidade Ninive, Reobote-Ir, Kalá, 12ho Resén, iha Ninive ho Kalá nia klaran. Nee hotu mesak sidade boot.
13Misraim nia jerasaun mak nee: ema Ludim, Anamim, Leabim, Naftuim, 14Patrusim, Kasluim, i Kaftorim. Ema Kasluim nee mak ema Filistin sira nia bei-ala.
15Kanaán nia oan boot mak Sidon. Kanaán mos bei-ala hosi ema Ete, 16Jebusi, Amori, Girgasi, 17Evi, Arki, Sini, 18Arvadi, Zemari, ho Amati.
Kanaán nia jerasaun sira namkari baa dook, 19too sira nia rai baliza komesa hosi Sidon ba iha Gerar, too iha Gaza. Hosi nee, ba iha Sodoma, Gomora, Admá, ho Zeboím, too iha Lasa.
20Sira hotu nee Kam nia jerasaun. Ida-idak ho nia lian, nia suku, ho nia rain rasik.
Sem nia jerasaun
21Jafé nia maun Sem, ema Eber#10:21:Matenek nain Biblia nian balu dehan Eber nee mak ema ‘Ebreu’. sira nia bei-ala.
22Sem nia oan, mak Elam, Asúr, Arpaxad, Lude ho Aram.
23Aram nia jerasaun mak ema Us, Hul, Geter ho Mas.#10:23:Mas nia naran seluk ‘Mezeke’.
24Arpaxad nia oan, Xela. Xela nia oan Eber.
25Eber iha oan mane nain rua. Ida boot naran Peleg (nee dehan katak ‘fahe’), tanba iha tempu nee, ema sira fahe malu iha mundu. Nia alin naran Joktan.
26Joktan nia jerasaun mak Almodá, Selefe, Azár-Mavé, Jerá, 27Adoraun, Uzál, Dikla, 28Obal, Abimael, Sabá, 29Ofir, Havila, ho Jobabe. Sira hotu nee Joktan nia jerasaun.
30Sira nia hela fatin nee, komesa hosi Mesá, too iha Sefar, nee mak iha foho sira iha loro-sae.
31Sira nee hotu, Sem nia jerasaun. Ida-idak ho nia lian, nia suku, ho nia rain rasik.
32Sira nee hotu, Noé nia jerasaun, ida-idak ho nia suku rasik. Tempu rai nabeen hotu ona, sira nee mak fahe namkari halo nakonu mundu.
Zur Zeit ausgewählt:
Jenesis 10: BTDT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 Wycliffe Timor-Leste.
