Apostolu sira nia Istoria 7
7
Estevão defende aan iha tribunal relijiaun nian
1Depois nai-lulik Judeu nia boot husu ba Estevão, “Sala nebee sira foo ba o nee, loos ka lae?”
2-3Estevão hataan, “Irmaun sira, rona lai mai. Hori uluk molok ita nia bei-ala Abraão muda fatin ba Haran, bainhira sei hela iha Mezopotámia,#7:2-3:Rai Mezopotámia nee agora mak nasaun Irake. I sidade Haran nee nia fatin iha nasaun Síria nia laran. Nai Maromak boot teb-tebes, hatudu ona Aan ba nia, ho foo orden dehan, ‘Husik tiha o nia rain ho o nia familia sira. I o baa iha rai ida nebee Hau sei hatudu ba o.’ 4Entaun Abraão husik tiha ema Kaldeu sira nia rain nee, muda ba sidade Haran. Bainhira nia aman mate tiha, Nai Maromak haruka nia muda mai iha rai nee, nebee agora ita boot sira hela baa.#Jenesis 11:31; 12:4 5Iha tempu nebaa, Nai Maromak la foo rai pedasuk ida ba Abraão hanesan nia rikusoin. Maibee Nia promete atu foo rai nee tomak ba Abraão ho nia jerasaun sira. Momentu Nai Maromak promete nee, Abraão seidauk iha oan.#Jenesis 12:7; 13:15; 15:18; 17:8 6Maibee Nai Maromak dehan ba nia, ‘O nia jerasaun sei baa hela iha ema nia rain. I ema rai nain sei halo sira hanesan atan, i hanehan sira durante tinan atus haat. 7Maibee liu tiha tinan atus haat nee, Hau sei kastigu nasaun nebee halo sira hanesan atan. Nee liu tiha, o nia jerasaun sei sai hosi nasaun nee i mai adora Hau iha fatin nee.’#Jenesis 15:13-14; Ezodu 3:12 8Depois Nai Maromak halo aliansa ho Abraão liu hosi sunat, nee hanesan sinal ida katak Abraão sira sai ona Nai Maromak nia ema. I bainhira Abraão nia oan Isac halo loron walu, Abraão sunat nia. Bainhira too nia tempu, Isac sunat nia oan Jacó. Depois Jacó mos sunat nia oan mane sanulu resin rua. Sira nee mak ita ema Judeu nia bei-ala.#Jenesis 17:10-14; 21:2-4; 25:26; 29:31—35:18
9Ita nia bei-ala sira nee laran moras ba sira nia alin José, too sira faan tiha nia ba iha rai Ejitu hanesan atan. Maibee Nai Maromak sempre hamutuk ho nia,#Jenesis 37:11,28; 39:2,21 10i hasai nia hosi susar ho terus laran. Nai Maromak mos foo matenek ba nia, too liurai Ejitu haree nia diak, i foti nia sai governador iha rai Ejitu tomak, i sai xefi iha liurai nia palasiu.#Jenesis 41:39-41
11Liu tiha nee, rai hamlaha boot iha rai Ejitu ho rai Kanaán, too halo ema barak terus iha fatin-fatin. I ita nia bei-ala sira la iha hahaan atu haan.#Jenesis 42:1-2 12Depois Jacó rona dehan iha rai Ejitu iha hahaan. Entaun nia haruka nia oan sira baa sosa hahaan iha nebaa. 13Sosa tiha hahaan, sira fila ona. Bainhira sira nia hahaan hotu ona, Jacó haruka sira baa sosa tan iha rai Ejitu. Nee mak foin José foo hatene dehan, nia nee sira nia alin rasik, i foo konhese nia familia ba liurai Ejitu.#Jenesis 45:1; 16 14Depois José husu ba nia aman ho nia familia hotu muda ba Ejitu. Sira nebee baa iha Ejitu nee, iha ema hitu-nulu resin lima.#Jenesis 45:9-10; 45:17-18; 46:27 15Nunee Jacó muda ba rai Ejitu, i nia ho ita nia bei-ala sira seluk mate iha nebaa.#Jenesis 46:1-7; 49:33 16Sira nia jerasaun lori fila bei-ala sira nia ruin ba iha aldeia Sikém iha rai Kanaán. I sira hakoi mate ruin sira nee iha rate nebee uluk Abraão sosa hosi Hamór nia jerasaun sira.”#Jenesis 23:3-16; 33:19; 50:7-13; Josué 24:32
Estevão koalia kona ba Moisés ho ema sira nebee lakohi rona ba nia
17Estevão hatutan nia koalia, “Uluk Nai Maromak promete ona dehan, Nia sei foo rai nee ba Abraão. Bainhira nia loron besik ona atu Nai Maromak kumpri Nia promesa nee, ita nia povu Judeu iha rai Ejitu amenta barak teb-tebes. 18Depois iha liurai foun ida komesa ukun iha Ejitu, nia la hatene kona ba José.#Ezodu 1:7-8 19Liurai nee buka dalan hodi halo terus ita nia povu i hanehan ita nia bei-ala sira. Nia obriga sira soe tiha sira nia oan nurak, para sira mate.#Ezodu 1:10-11; 22
20Iha tempu nee, profeta Moisés moris, nia la hanesan labarik baibain. Nia inan-aman sira la tuir liurai nia orden. Sira kuidadu labarik nee sub-subar iha sira nia uma, too nia fulan tolu.#Ezodu 2:2 21Bainhira sira la bele subar tan labarik nee ona, sira lori nia baa husik tiha iha liur. Maibee liurai Ejitu nia oan feto hetan labarik nee i nia foti hodi baa hakiak hanesan nia oan rasik.#Ezodu 2:3-10 22Nunee ema Ejitu sira hanorin sira nia matenek hotu ba Moisés, too nia sai ema boot, i nia matenek koalia, ho matenek iha nia serbisu.
23Bainhira profeta Moisés tinan haat-nulu ona, nia desidi baa vizita nia maun-alin sira hosi povu Israel. 24Too iha nebaa, nia haree ema Ejitu ida baku hela ema Israel ida. Nia baa defende nia maluk, i baku mate tiha ema Ejitu nee. 25Moisés hanoin dehan nia povu hatene ona katak Nai Maromak mak haruka nia baa hasai sira hosi terus nia laran. Afinal sira seidauk komprende. 26Aban fali, nia haree ema Israel nain rua baku malu. Nia baa sori sira, i dehan, “Imi nain rua nee mesak maun-alin deit. Nusaa mak imi baku malu fali?”
27Maibee ema ida baku nia kolega nee, dudu tiha Moisés ba sorin, hodi dehan, ‘See mak foti o sai ami nia xefi?! I see mak foti o hodi tesi ami nia lia?! 28O atu oho hau hanesan horiseik o oho tiha ema Ejitu nee?’ 29Rona nunee, Moisés halai sai hosi Ejitu, baa hela iha rai Midian. Nia kaben iha nebaa, i sira hetan oan mane nain rua.#Ezodu 2:11-15; 18:3-4
30Liu tiha tinan haat-nulu, profeta Moisés baa iha rai fuik maran besik Foho Sinai. Iha nebaa Nai Maromak nia anju mosu ba nia hosi ahi lakan iha ai huun kiik ida. 31Haree nunee, Moisés hakfodak no admira. Nia baa besik hodi hatene saida mak nee. Derepenti, nia rona Maromak koalia hosi ahi laran dehan, 32‘Hau nee o nia bei-ala sira nia Maromak; Abraão, Isac, ho Jacó́ sira nia Maromak.’ Rona nunee, Moisés tauk atu-mate, i nia la brani foti oin hodi haree.
33Depois Maromak koalia tan, ‘Moisés, rai nebee o hamriik ba nee santu. Nee duni hasai tiha o nia sandalias! 34Hau hatene Hau nia povu Israel sira nia terus iha Ejitu, i Hau rona ona sira hakilar husu tulun mai Hau. Nee duni Hau tuun agora hodi liberta sira. Prepara ona ba. Hau atu haruka o fila fali ba iha Ejitu.’#Ezodu 3:1-10
35Nunee, liu hosi anju nebee hatudu Aan iha ahi nee, Nai Maromak haruka Moisés fila ba Ejitu. Moisés nee, mak uluk povu Israel lakohi simu. Sira dehan, ‘See mak foti o sai ami nia xefi ho ami nia juis?’ Agora Nai Maromak rasik mak foti nia hodi baa hasai povu Israel hosi terus laran i hodi ukun sira!#Ezodu 2:14 36Depois Moisés lori povu Israel sai hosi Ejitu liu hosi Tasi Mean. I nia halo milagre ho sinal boboot iha Ejitu, iha Tasi Mean, ho mos durante tinan haat-nulu nebee sira lao iha rai fuik maran. Sinal sira nee halo povu admira teb-tebes.#Ezodu 7:3; 14:21; Numerus 14:33
37Moisés nee mak foo hatene ba povu Israel dehan, ‘Nai Maromak sei foti ema ida hosi imi nia leet hodi sai Nia profeta, hanesan Nia foti ona hau.’#Deuteronomio 8:15; 18 38I Moisés nee hamutuk ho povu Israel sira iha rai fuik maran. Anju nee hatoo Nai Maromak nia Liafuan ba nia iha Foho Sinai. I Moisés hatutan fali liafuan sira nee ba povu Israel. Liafuan sira nee hatudu dalan nebee foo moris ba ita.#Ezodu 19:1—20:17; Deuteronomio 5:1-33
39Maibee bele nunee mos, ita nia bei-ala sira lakohi rona ba Moisés. Sira la simu nia, i hakarak fila fali deit ba Ejitu. 40I sira baa hamaus Arão dehan, ‘Ami husu ba senhor halo estatua lulik ba ita atu lori ita ba oin. Tan Moisés nee lori ita hotu sai hosi rai Ejitu, maibee agora ami la hatene ema nia aman nee iha nebee.’#Ezodu 32:1 41Entaun sira halo estatua ida, nia modelu hanesan karau vaka oan ida. Sira oho animal hodi halo sakrifisiu ba estatua lulik nee. Sira halo festa rame loos, i haksolok ho buat nebee mak sira halo ho sira nia liman rasik.#Ezodu 32:2-6 42Haree nunee, Nai Maromak fila kotuk i husik tiha liman ba sira. Entaun sira komesa adora loromatan, fulan, ho fitun. Nee tuir loloos ho Nai Maromak nia profeta hakerek ona hori uluk dehan,
‘Imi ema Israel sira,
durante tinan haat-nulu imi lao haleu rai fuik maran,
imi oho animal hodi adora Hau ka? Lae!
43Imi laos adora Hau!
Loro-loron imi adora mak imi nia lulik deit.
Imi gosta tama-sai uma lulik Moloke nian.
Imi mos adora estatua fitun ida, naran Renfan.
Nunee, imi adora estatua nebee imi halo ho imi nia liman rasik!
Nee duni Hau sei soe tiha imi ba dook iha rai Babilónia nia sorin nebaa.’ ”
Liafuan sira nee mak uluk Nai Maromak nia profeta foo sai.#Amós 5:25-27
Estevão koalia kona ba Nai Maromak nia Uma Kreda Boot
44Estevão hatutan nia koalia dehan, “Iha rai fuik maran nee, ita nia bei-ala sira harii tenda harohan hodi adora Maromak. Tenda nee sira halo tuir modelu nebee Nai Maromak hatudu ona ba profeta Moisés.#Ezodu 25:9,40
45La kleur, bainhira Josué sira halo funu hadau rai hosi nasaun sira seluk nebee Maromak duni sai hosi rai Kanaán, sira lori mos tenda harohan. Sira harii fali tenda nee, i tenda nee hamriik nafatin iha nebaa too liurai David kaer ukun.#Josué 3:14-17 46Liurai David nee sempre halo haksolok Nai Maromak nia laran. I nia husu ba Nai Maromak, atu nia bele harii Uma Kreda Boot ida ba Nai Maromak, ida nebee nia avoo Jacó sira uluk adora.#2 Samuel 7:1-16; 1 Kronikas 17:1-14 47Afinal David nia oan Salomão mak harii uma kreda nee.#1 Liurai sira 6:1-38; 2 Kronikas 3:1-17
48Maibee Nai Maromak la hela iha uma nebee ema mak halo. Hanesan uluk Nai Maromak nia profeta ida hakerek ona dehan,
49‘Lalehan mak Hau nia kadeira hodi tuur kaer ukun.
I mundu nee fatin hodi tau Hau nia ain.
Nunee oinsaa imi atu halo uma ida ke serve mai Hau?!
Oinsaa imi atu halo fatin ida hodi Hau hela?! La bele duni!
50Tanba buat hotu-hotu iha lalehan ho iha rai, Hau mak halo.’ ”#Isaías 66:1-2
Liafuan sira nee mak uluk Nai Maromak nia profeta hakerek.
Estevão kritika nai ulun sira tanba sira kontra Maromak nia Ema Santu
51I Estevão koalia tan ba sira ho siak dehan, “Imi nee ulun toos duni! Imi hanesan ema nebee la konhese Nai Maromak, i lakohi rona. Imi sempre kontra Nai Maromak nia Espiritu Santu, hanesan mos imi nia bei-ala sira.#Isaías 63:10 52Imi nia bei-ala sira sempre halo terus Nai Maromak nia profeta sira. Imi dehan took, profeta ida nebee mak sira la halo terus? La iha! Sira oho tiha profeta sira nebee foo sai dehan Ema Moris Loos atu mai. Too Ema nee mai mos, imi rasik faan ho oho tiha nia. 53Imi simu ona Nai Maromak nia lei liu hosi Nia anju. Maski nunee, imi la halo tuir.”
Sira tuda Estevão ho fatuk too mate
54Bainhira justisa nain relijiaun sira rona Estevão nia koalia nee, sira hirus teb-tebes too ruun nehan.
55Maibee Espiritu Santu domina Estevão. I nia foti matan hateke ba lalehan, nia haree Nai Maromak nia naroman nabilan, i Nai Jesus hamriik hela iha Nai Maromak nia liman loos. 56Nia dehan, “Rona mai! Hau haree lalehan nakloke, i Jesus, Ema Oan, hamriik hela iha Nai Maromak nia liman loos.”
57Rona nunee, sira taka tilun, hakilar, i halai rame-rame baa 58rasta nia sai hosi sidade. I testemunha sira hasai sira nia faru foo ba ema foin sae ida mak hein. Nia naran Saulo. I sira komesa tuda Estevão ho fatuk.
59Sira tuda nia dadauk, nia halo orasaun dehan, “Nai Jesus! Simu ona Hau nia klamar baa!” 60Nia hakneak, i hakilar ho lian makaas dehan, “Aman Maromak, la bele foo sala nee ba sira!” I nia mate.
Zur Zeit ausgewählt:
Apostolu sira nia Istoria 7: BTDT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 Wycliffe Timor-Leste.
