Johani 19
19
1Ndizvo apo Piratu wakamutora Jesu, akamuchaya. 2No masocha akaruka junguja ro minzwa, akaridira panyezuru po musoro wake akamusimija nguvo yakapshuka. 3Akaviya kwaari akati: “Changamire, Mambo wo vajudha!” Nao akamurova ngo pama. 4Na Piratu wakabudazve, akati kwavari: “Ringiranyi, ndinomubudisa kwomuri kuti muzive kuti andiwani ndava kwaari.” 5Ndizvo Jesu wakabuda, akasimijwa junguja ro minzwa, no nguvo yakapshuka. Piratu wakati, kwavari: “Ringiranyi uwu mundhu!” 6Ndizvo apo vapristi vakuru, no vatungamiriri vamuvona, vakamima, vechiti: “Mukohomere, mukohomere.” Piratu wakati kwavari: “Mutorenyi imwimwi mumukohomere; ngokuti, andiwani ndava kwaari.” 7#Vonayi kuna: Revh. 24:16.Vajudha vakamupingura: “Tino mupango; ngo mupango uwu kunosisira kuti afe, ngokuti iye wakajiita Mwana wa Mwari.” 8Ndizvo Piratu azwa izwi iri wakapinda kutya. 9Wakanghwinazve mu nyumba yo kutongera, akati kuna Jesu: “Unobva kwapi?” Asi Jesu aazivi kumupingura. 10Ndizvo Piratu wakati kwaari: “Aundipinguri here? Auzivi here kuti ndino simba rokukusunungura, neni ndino simba rokukukohomera?” 11Jesu wakamupingura: “Aungavi no simba panyezuru pangu kuti usikazivi kuripuwa rechibva mu denga: Ndizvo uwo wakandipira kwouri uno kushaisha kwakapinda kukura.” 12Ngosure kwo izvi, Piratu wakapshaka kuti ungamusunungura: Asi vajudha vakadanijira, vechiti: “Kuti ukamusunungura uwu auri shamwari ya Khesari akadi: Pikija ndiyani unojiita Mambo unovereketa kumukira Khesari.” 13Apo Piratu azwa aya mazwi wakamubudisa Jesu kunja, wakagara pachigaro cho kutongera ndava, pandau inozwi Yakagangatwa Mapuwe, asi ngo kwo Chihebheru inozwi Gabatha. 14Kwayiva nguva yo kunasirira Phasika yoda kuyita nguva yo chitandhatu; naye wakati kuna vajudha: “Ringiranyi mambo wenyu!” 15Ndizvo vakadanijira: “Mubvisei, mubvisei, mumukohomere.” Piratu wakati kwavari: “Ndokohomera here mambo wenyu?” Vapristi vakuru vakapingura: “Isisu atina mambo, ega Khesari.” 16Ndizvo iye wakamupira kwavari kuti akohomehwe.
Kukohomehwa kwa Jesu
(Mateu 27:32-44; Marku 15:21-32; Ruka 23:26-43)
Navo vakamutora Jesu. 17Naye wakabuda echitwara muchinjiko kuenda ku ndau inozwi Dendhenya, iyo inodanijwa ngo kwo Chihebheru, Gorogota. 18Apo ndipo po vakamukohomera, pamwepo no vamweni vaviri umwe ngo ino, no umweni ngo iyo, na Jesu ngo pakati. 19Na Piratu wakatarazve matahwa akadira panyezuru po muchinjiko; uku ndikwo kutahwa kwawo, JESU WO NAZARETHA, MAMBO WO VAJUDHA. 20Ndizvo matahwa aya akajijwa ngo vazhinji vo vajudha; ngokuti ndau iyo yaakakohomehwa Jesu yayiva phedo no dhoropa: Nao inga akatahwa ngo Chihebheru, ngo Chiroma, no Chigiriki. 21Ndizvo vapristi vakuru no vajudha vakati kuna Piratu: “Usatara kuti, Mambo wo vajudha, asi kuti iye wakati: Ndiri mambo wo vajudha.” 22Piratu wakapingura, kuti: “Chondatara, ndatara.” 23Ndizvo masocha ayinga akohomera Jesu, akatora zvokusimira zvake, akazviparura kuyita matimbu marongomuna kusocha rimwe ngarimwe dimbu raro; nghanju yakezve vayinga isina musono, asi inga yakarukwa ngo kureba kubvira ngo nyezuru kwayo mbhera urebu hwayo hwese. 24#Vonayi kuna: Ndu. 22:18.Ndizvo akavereketesana pakati pavo, echiti: “Tisaparura, asi ngatiringijire hakata tivone kuti inoita yani.” Kuti matahwa azarisike, anoti: “Vakakovanisana zvokusimira zvangu pakati pavo, no nghanju yangu yakaringijihwa hakata.” Ndizvo masocha akaita izvi. 25Asi inga kwakayima apo phedo po muchinjiko wa Jesu mayi wake, na yaya wa mayi wake, na Mariya mukaji wa Kropasi, na Mariya Magadhareni. 26Ndizvo Jesu avona mayi wake no mujiji uwo waaida vakayima phedopo, wakati kuna mayi wake: “Jimayi vona mwana wako.” 27Ndizvo wakati kuna mujiji uwo: “Vona mayi wako.” Kubvira ngo nguva iyo uwo mujiji wakavatora kuti vagare kanyi kwake.
Kufa kwa Jesu
(Mateu 27:45-56; Marku 15:33-41; Ruka 23:44-49)
28Sure kwo izvi Jesu echiziva kuti zviro zvese zvayinga zvapera kuti matahwa azarisike, wakati: “Ndapera ngo nyota.” 29Ndizvo chayivapo chimujiyo chakazara ngo vhini, raishasha, navo vakadira shiponji chakazara ngo vhini raishasha pa hisopi, vakaridira pa muromo wake. 30Ndizvo apo Jesu aashira vhini raishasha wakati: “Zvapera.” Wakakotamisa musoro wake, wakafa. 31Ndizvo vajudha, ngokuti rayiva zuva ro kunasirira Phasika, kwokuti miviri isagara iri pa muchinjiko ngo zuva ro sabatha ngokuti iro zuva ro sabatha rayiva zuva guru, vakakumbira kuna Piratu kuti mirenje yavo iguhwe, nokuti vabviswepo. 32Ndizvo masocha akaviya, akagura mirenje yo wokutanga, no yo umweni, avo vakakohomehwa naye. 33Asi apo aguma paayiva Jesu, akavona kuti inga wafa, aazivi kugura mirenje yake, 34asi umwe wo masocha, wakabaya rutivi rwake ngo mukhondo, paripo kwakabuda ngazi no kumwa. 35No uwo wakazvivona wakayita chapupu, no uchapupu hwake huno gwinyiso, no uwo unoziva kuti unovereketa gwinyiso, kwokuti imwimwi mutende. 36#Vonayi kuna: Eki. 12:46; Zviv. 9:12; Ndu. 34:20.Ngokuti izvi zvakaitika kuti matahwa azarisike, anoti: “Godo narimwe rake arizoguhwi.” 37#Vonayi kuna: Zak. 12:10; Chak. 1:7.No matahwa amwenizve anoti: “Vanozomuringira, uwo wo vakabaya.”
Kuvigwa kwa Jesu
(Mateu 27:57-61; Marku 15:42-47; Ruka 23:50-56)
38Ngosure kwo izvi Josefa wo Arimatiya, ari mujiji wa Jesu asi ngo kufishika ngo kutya vajudha wakakumbira kuna Piratu kuti ungabvisa muviri wa Jesu: Na Piratu wakamutendera, ndizvo wakaviya akabvisa muviri wake. 39Na Nikodhemusi wakaviyavo, uwo wakaviya kwaari pakutanga usiku, echizisa mutombo wakayita muvhengo wo mure no mutengo hwawo hwayiva mapaundi ari zana (100). 40Ndizvo vakatora muviri wa Jesu, vakaupukutira ngo jira rakachena pamwepo no mutombo wo maka, kudari ngo chirovejeso cho vajudha cho kuviga. 41Zvino kwayivapo munda pandau iyo yaakakohomehwa, no mumunda umwo mwayiva no guva ibza risikazivi kumbovigwemwo mundhu. 42Ndizvo vakaviga umwo Jesu ngokuti rayiva zuva rokunasirira ro vajudha; ngokuti guva rayiva phedopo.
Zur Zeit ausgewählt:
Johani 19: CINDAU NT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Novo Testamento Cindau © Bible Society of Mozambique, 2023.
