Luka 24

Nii Yeso a ntiina wa

1A kaa ntiiri tǝro mbutu wa, nakǝn ma ɗǝnda toone ɓǝ haa yara u ma seera yabwa ɓa ko a tiina. 2Ɓǝ taa ɓaa tǝng ɗungara a ee tiina yan, 3pa ɓǝ kansǝwa ɓǝ wǝr mabiri Ankundi Yeso wara. 4Fer senda ɓora a nii nok siso parata raɓ ɓǝ nǝɗ a kal ɓoso ɓǝ tungsǝ lukta pengpeng nga weɗweɗɗo. 5A kokto ɓoso toona ka ɓa ɓǝ ntii maa ɓǝ nhii oota a putu pa parata ka ɓa ɓǝ nkee me, “Tomtomni waso sǝn kǝrsǝ ya ma huurtu ya a ɗaaso ɓa ɓǝ wodsǝ ɓau? 6Yǝ sem a hamɓa ra yǝ niin! Se ɗimma mbu yǝ nkesǝsǝ ɓa a fer sǝsǝ ke ma sase Galili wa yǝ nkee me, 7‘Au Ete ya ɗaɗ ɓaa ka na a nema ɓan tenatenatoɓa, ɓa ka kwaakǝ ɗǝm a ka tatǝnɓa kiya nii ɗǝm.’ ” 8Pa ɓǝ ɗimma a mara ira.

9Ɓǝ fiɗsǝ a ham ntiina ɓa wa ɓǝ nkee mbusǝsǝ nsaad ɓa puu haa fin sǝɓa nsaad ma ɓaata. 10Ən Maryamu Magadaliya, Yuwana, Maryamu maa Yakubu ya, ma ɓaata ke ma ɓosa ɓǝ nkee mbusa ɓahona wa. 11Pa ɓǝ yau ma mbu toona sǝɓa nkee ɓǝsǝ ɓa ra me ɓǝ wǝr mara sǝra ǝn hautǝma. 12Tomsǝ maaso wa Bitrus ya ni, ya mon ya ko a ham ntiina ɓa, yǝ ntisǝ maa wa ya wǝr luktu ɓa mbǝrkǝsǝ Ankundi ɓa sedɗe. Pa ya faɗ mbusa yǝn wǝr weɗara ma mbu tomsǝ ɓa.

Emfǝɗkaa raɓ a ɗǝɗa Imawus ra

13A ka sǝsa emfǝɗkaa raɓ ɓǝn koko a urko yarme Imuwasu mǝbmǝb u, kansǝ kilimeta puu haa fin a kan Urshalima wa. 14Ɓǝn kankana a ɗaaso ɓoso a mbu tomsǝ ɓa. 15Ɓǝn kansǝnkan a ɗaaso ɓoso wa a mbu tomsǝ Yeso ɓa wa pa Yeso ma nkweera ira ya ko yǝɓǝ ntee ɓǝ siki ke. 16Kaa yǝ ti ɓǝ maa ma sǝra.

17Yǝɓǝ ta me, “Sǝn kan mara mbi rau a ɗaaso waaso a sikou?”

Pa ɓa nǝɗ ɓǝ siwi ɓǝn sengge putu. 18Fin a ɗaaso ɓoso ǝn yarsǝ me Kiliyobas, yaa ta me, “Nwango ngǝn wee Urshalima ngǝ maa mbu tomsǝ a tǝrma ma warau?”

19Pa yǝɓǝ taa ka ndǝ, “Mbiu?”

“A ɗuura Yeso ya Nazarat ya,” ɓǝ kakka. “Yǝn ya nawanto ya mara ira ma kwangto asi ma mbu yǝn tomsǝ ɓa a wii Kaa wa ma ɓeta nsaad. 20Wiina ɓan nek mbusa ɓa ma kuɓsa sǝta ɓǝ nasǝ me ɓa a kan kiita wadawa ɓaa kwaakǝ. 21Pa tǝn ti senda me ndǝ sase kiya kang kon nkweera Isra'ila wa. Nga wa nawa tǝrma taatǝn mbu nsaad ɓa tomsǝwa. 22Ma sokǝra ɓaata toona ɓǝ ta ɓǝ natǝ yalira. Ɓǝ ko a ham ntiina ɓa nakǝn naso ma ɗenda, 23pa ɓǝ ta mabiri isi ra ɓǝ wo ɓǝtǝ nkee me ɓǝ wǝr nga rotǝma ɓan timira Kaa ɓa, ɓǝ fǝɗsǝ a liura ɓa, ɓǝ nkee ɓǝ me Yeso yǝma huurtu. 24Pa ɓaata a ɗaaso waata ɓǝ ko a ham ntiina ɓa koɓǝ wǝr nga toonasǝba nkeesǝwa pa ɓǝ wǝr Yeso ra.”

25Yǝɓǝ nkee me, “Sǝn hauta sǝ naa ɓongtǝrato na kǝn ma mbu ɓan nawanto Kaa ɓǝ nkesǝwara! 26Ɗaɗ Krisiti ya wee kongsa mbu ɓa nhe pa ya kan a too Kaa wa usu rau?” 27Ntinyo ma Musa ma ɓan nawanto ɓa nsaad yǝɓǝ nkee mbu ɓa nkeesǝ a likarkar kwangwa ɓa a ɗuura ira.

28Ɓǝ kosǝ kwang ma uru ɓǝ kosǝ asi wa Yeso yǝ tom nga kǝya talǝ a wiyo. 29Pa ɓaa kǝna me a tǝr a tani, me ɗikira tomon kaa kanan, paya ko koya kaɗa ɓoni.

30Ɓǝn sesǝ mbuseyan se wa, ya too nkaadǝng, yǝ na himara Kaa yǝ ɓaa kǝ, yǝ ɓǝ na. 31Pa nuwa ɓosa a wili ɓaa maa, pa ya leete a hamsǝsa. 32Ɓǝ ta ɓaatǝ me, “Seura nda paa fer yǝn kansǝnkan ma ndase a ɗǝɗa wa yǝ wilsǝ likarkar Kwangwa rau?”

33Ɓǝ ni ɓǝ kang Urshalima nok siso. Kǝnso ɓǝ ta ɓa puu haa fin sǝɓa ma ɓaata ke ma ɓosa a ham fina 34ɓǝn nkee me, “Ən ɓongtǝra! Ankundi niin ɗǝm yǝ weɗa ee usu Siman.” 35Pa ɓa raɓ sǝɓa ɓǝ nkee mbu tomsǝ a ɗǝɗa ɓa ma fer ɓǝ masǝ mǝn Yeso wa ma ɓaakǝsǝ nkaadǝng yǝ tomsǝ wa.

Yeso weɗa ee usu emfǝɗkaa

36Ɓǝn kansǝ mara sǝra wa, Yeso ma nkweera ira yǝ nǝɗ a ɗaaso ɓoso yǝ ɓǝ nkee me, “Naupa a sani.”

37Pa kokto ɓǝ ma ɓǝ madki, ɓǝn nkee me ko ǝn simo. 38Yǝɓǝ nkee me, “Sǝn kura kokto mbiu, ɗǝm sǝn tom pǝnoo a senda sa mee ǝn mbiu? 39Sǝ sengge nemasǝna ma nasǝna. Ndǝ niina! Sǝna ntee sǝ sengge simo yǝ semma solta ma tǝute nga sǝn wǝrsǝ nǝsǝ ma siyo wara.”

40Yǝ nkeesǝ mbusǝsa maaso wa, yǝɓǝ weɗa nema isa ma natsa isa. 41Pa ɗǝm ɓǝ na ɓongtǝra ra me kuda hur ɓǝn ma yalira, yǝɓǝ ta me, “Sǝma mbuseya a ham ɓau?” 42Ɓaa na yoosǝra nseyara, 43paya kono ya kǝuwǝ a wii ɓoso.

44Yǝɓǝ nkee me, “Mbu ɓa ǝn mbu nǝ nkesǝsǝ ɓa fer nɗǝsǝ ke ma sasewa me mbusǝsa nsaad kǝ kungu a ɗuura mbu ɓa nyorsǝ a Masaka Musa wa, ɓan nawanto Kaa ɓa ma Zabura.”

45Pa yǝɓǝ wil senda me ɓǝ maa likarkaraa. 46Yǝɓǝ nkee me, “Ən mbu nyorsǝ ɓa: Krisiti kiya wee kongsa ɗǝm kiya nii a woda ira a ka tǝrma tatǝnɓa, 47ɗǝm konpatawa ma lee a senda mbu tenatenato ɓa, ɓaakǝ nkee ɓeta a ɗǝnda ira a put ntaadiwa nsaad kǝ ntii Urshalima. 48Sase sǝkǝ wǝr mbu tomsǝɓa nsaad kosǝ nkee ɓaata kǝn mbu tomsǝ ɓa. 49Kǝnǝ ko nǝsǝ tung mbu Paane yǝ nkeesǝ, me kǝyǝsǝ tung ɓa pa sǝ kaɗ a uru ndub me ɓaa nasǝ kwangto Kaa wan.”

Ɓaa too Yeso a ko a liura

50Pa yǝɓǝ to yǝben a kal uro ǝn yar me Betaniya, yǝ nik nema sisa ɓoti yǝɓǝ na saltǝra. 51Yǝn na ɓǝsǝ saltǝrawa, yǝɓǝ lee ɓa too asa ko ɓoti a liura. 52Pa ɓaa nyoo ɓǝ kang Urshalima ma kuda pengpengra. 53Nfee ɓǝn kaɗ a Hit Kaa Urshalima wa ɓǝn nyoo Kaa.

Zur Zeit ausgewählt:

Luka 24: LLA

Markierung

Kopieren