Luka 22
22
Yahuda yawan me kiya fang Yeso
1Ngawa Tadkoma u nkaadǝng yisti semra wa, ɓaa Yahudawa ǝn yarme hiira Tadko #22:1 Tadkoma u Kaa yǝ timisǝ an timira isi me ǝn tod em ntiiri parata Yahudawa sa ra wa ǝn wowo, 2Winna nek mbusǝsa ɓǝn kǝr ɗǝɗa ɓǝkaa tom ɓa ma Yeso ra, pa ɓǝn kura kokto ɓeta wa. 3Pa Kuɓ Nsaa wa yǝ kanaa Yahuda Iskariyoti ni, ya ɓan yarsǝsǝ me , ya fin a ɗaaso emfǝɗkaa puu nhaa raɓ ɓa. 4Pa Yahuda yǝ ko a kuɓ nek mbusasa ma ɓan sengge Hit Kaa wa ɓa yǝ kan ma ɓosa mbu yǝka tom ya fang Yeso ɓa. 5Ɓǝ kura maa nepto ya ɓǝ yauwan me ɓekaa na koɓa. 6Yahuda yǝ yawan yǝ ti senda yǝn kǝrsǝ ɗǝɗa yǝkaa tom yǝɓǝ na Yeso a nema ya a fer ɓeta kaura wa.
Mbuseya a feɗefeɗe ɓa
7Pa ka nkaadǝng yisti semra ɓa wosǝ wa u ɓan todsǝ tǝmnka ɓǝ se ɓa tom tadko wa. 8Yeso ya timi Bitrus ma Yohanna yǝɓǝ nkee me, “So kosǝdǝ sǝk ham kǝɗa se mbuseya tadkoɓa.” 9“Ngǝn ta me kotǝ sǝk hamsa nau?” Ɓa taa.
10Ya kakka, “Me sǝ kan a urun pararakǝra kiya wo ma sǝɗaa a ɗuura me yǝ won sa ɓǝɗɗǝ a hit kiya kan wa, 11sǝ nkee An taanda ya me, ‘Malǝm nkee me, ham ham waa ɓa nau, ham kǝna se mbu tadki ya ma emfǝɗkaa ɓǝna ɓa?’ 12Kǝyǝsǝ weɗa wiine hito ɓoti ya sǝksǝ kwalari. Sǝ kǝn kǝnso.”
13Ɓǝ ko sǝwa, koɓǝ ta mbusa nga Yeso nkee ɓǝsǝ wa, pa ɓǝ wǝrkǝ Mbukamsa Tadko ma kaɓa.
14Fer usu kansǝwa Yeso ma ɓahona sisa ɓǝ kaɗ me ɓǝkǝ se mbuseya. 15Pa yǝɓǝ nkee me, “Nǝn ta me nǝ se mbuseya tadko ɓa ma sase pa nǝ wee kongsa. 16Nǝn nkeesǝn nkee, na se ɗǝm ra me fer maar tadko sǝra kunggun a kuɓsutu Kaa wara.”
17Yǝ tosǝ kofi wa yǝ na himara Kaa yǝɓǝ nkee me, “Sǝ kono sǝ ɓaa a ɗaaso waso. 18Nǝn nkeesǝ me nǝ ɓaarǝ nǝ we em ngwate ɓa ra me ka kuɓsutu Kaa ɓa wosǝra wa.”
19Yǝ too nkaadǝng yǝ na himara yǝ ɓaa yǝɓǝ na yǝn nkee me, “Nwa ndǝ maabiri yaane u nǝ nasǝ wa. Sǝ tom maaso me sa ɗim ma niina.”
20Maso ɗǝm a ɗǝɗa finda yǝ feɗsǝ ma se mbuseya wa ya too kofi ya nkee me, “Kofi wa ǝn kofi nfiinfii waa a monma na u tuksǝ me ǝn sase wa. 21Pa ya kǝyǝ nǝsǝ nfang ya yǝn se mbuseya kee ma niina. 22Au Ete ya kiya ko nga kaa yausǝ wa, pa mbu manyamanyato ɓa, a yaa yǝ pangsǝsǝ ya.” 23Ɓǝ tii ta ɓaatǝwa me yakǝ tom mbusa niu?
24Pa renǝta a nii a ɗaaso emfǝɗkaa me ndǝ yamni kiya kaɗ ya kwang yau. 25Yeso yeɓǝ nkee me, “Kuɓsa ɓaa ɓǝn Yahudawa ra ɓa, ɓǝn weɗa kwangto kuɓsutu wa a ɗuura ɓaa ɓǝn tom ɓǝsǝ kuɓsutu ɓa, ɗǝm ɓaa kwang kwang ɓosa ɓǝn yar nkweera ɓora me, ‘ɓǝn ɓen kwasira ɓeta ɓa.’ 26Pa waaso sǝ kaɗ maaso ra, me maaso a lee yaa yǝsǝ kwang a ɗaaso waaso ya, yǝ kang nga yaa ngeek ya. Pa yaa yǝn tomsǝ kuɓsutu ya, yǝ kang nga hoora. 27Pa ndǝ yamni yǝsǝ kwang ngǝu yayǝ kaɗsǝ a ham se mbuseya ɓau hana yayǝn nasǝ mbuseya yau? Ən ya yǝ kaɗsǝ a ham se mbuseya ɓa rau? Pa na ɗaaso waso nga yayǝn nasǝ mbuseya ya. 28Ən saase sǝ nǝɗsǝ a ndiira na a fer mǝkǝta naa wa. 29Nga paane yǝ nanǝsǝ kuɓsutu nǝn nasǝ maaso kǝn. 30Me sǝ se sǝ wee a ham kaɗɗa kuɓsutu waano ɓa sǝ kǝ kaɗ a ham kaɗ kuɓsa ɓa, sǝn kankiita tuwa pu a nhaa raɓ u Isra'ila wa.
31“Siman, Siman Kuɓ Nsaa wa yǝ ta me yǝsǝ ree nga alkama. 32Pa nǝ tom kǝnaran a ɗuura ngaan Siman me ɓongtǝra yange ǝn tom ngeek ra. Pa me ngǝ kangan ngǝ kwasi ɓaata ɓǝnga.”
33Pa yǝ kakka, “Ankundi, nǝ yauwan me nǝ ko a kurung hana woɗa.”
34Yeso yaa kak me, “Nǝn nkee ngǝ Bitrus, naso, me ǝn nkee me kokra ǝn pa pomra ya, kǝngǝ nǝ renǝ a kan taatǝn, me ngǝ maa nǝ ra.”
35Pa Yeso yǝɓǝ taa, “Nǝ timi sǝsǝ koɓa, taa, hana ɓukra semra wa, ǝn mbi sǝ ta rau? Ɓǝ kak me.
“Ən mbuka ra.”
36Yǝɓǝ nkee me, “Pa nawa me sǝma ɓukra sǝ too hana koɓa ɗǝm me sǝ sem ma empaame ra sǝ fang lukta sǝsa saa tiri fin. 37Nyorsǝ me, ‘Ɓaa kwasǝ ke ma ɓan tǝblǝ mara ɓa,’ pa nǝn nkeesǝ me mbu ɓa me kugun a nanin. Ee nwa mbu ɓaa nyorsǝ a ɗuura nara ǝn kan kana a fer kungkung usu.”
38Emfǝɗkaa ɓǝsa ɓǝ nkee me, “Ankundi empaame raɓ wa.”
Yǝ kak me, “Usu maan.”
Yeso tom kǝnara a Yol Zaitun wa
39Yeso fiɗ taadi nga u nfee wa a Yol Zaitun wa, pa emfǝɗkaa ɓǝsa ɓaa ɓǝɗɗǝ. 40Yǝ kansǝ a ham ka ɓa wa yǝɓǝ nkee me, “Sǝ toma kǝnara me tom sǝ kan a han pǝtara ɓa ra.” 41Yǝɓǝ lee ngeek nga ɓa mudkǝ kudara a wii ɓoso yǝ kwǝrsǝ yǝ toma kǝnara, 42“Paapa me ngǝ yauwan a too kongsa a nani ɗǝm a tom mbu ngǝn yausǝ ɓa, sem mbu nǝn yausǝ ɓa ra.” 43An timira Kaa ya yǝ wo a sani yǝn kwasisǝ. 44Me ya kongsa ya ɓaarǝ yǝ tom kǝnara ɓong ɓong, pa yalma ima ǝn roo nga roo modma wa a putu.
45Yǝ nisǝ a kǝnara wa ya kan a emfǝɗkaa ɓǝsa ni yǝɓǝ woɓa munda me kuɗa tǝblǝ ɓǝn. 46Yǝɓǝ ta me, “Sǝn tǝr munda me ǝn mbiu? Sǝ ni sǝ tom kǝnara me tom sǝ kan a han pǝtara ɓa ra.”
Ɓa ma Yeso
47Yeso yǝsǝ nding a kanmǝra wa, ɓeta dem ɓǝ wo, pa eɗ ke yarsǝ me Yahuda fin a ɗaaso emfǝɗkaa puu nhaa raɓ sǝɓa, ya wiiyo ya wo kwang ma Yeso ya ma kwektek. 48Pa Yeso yaa ta, “Yahuda kǝn fang Au Edteya ma maa kwektek wau?”
49Emfǝɗkaa Yeso ɓa ɓǝ wǝrsǝ mbu ɓa kasa tom ɓa wa ɓǝ nkee me, “Ankundi tǝ haa empaame tǝɓǝ tikkiu?” 50Pa fin a ɗaaso ɓoso ya tiki hoora wiine nek mbusa ya, yaa ɗat ngwee a seya ya.
51Pa Yeso ya kakka, “Sem maaso ra!” Pa ya ntee ngwee eɗ kaya ya yaa roɓo.
52Pa Yeso ya nkee wina nek mbusa ɓa, ma ɓan sengge Hit Kaa Urshalima wa ɓa ma ɓaa kwang kwang u ɓǝ wosǝ me sasewa, “Nǝn an tang mbusa yau sǝ wosǝ ma empaame ma kwalanga wa? 53A handa weeya nǝ ke ma sase a tanda Hit Ɓet Kaa Urshalima wa, pa sǝ manǝra. Pa ngawa ǝn fer waso fer ham tebteb ɓa yǝsa kuɓsutu wa.”
Bitrus ɓisi Yeso
54Pa ɓǝsa kosǝ a hit wiine nek mbusasa. Bitrus yaa ɓǝɗ ndiira. 55Pa ɓǝ neksǝ ara a ɗaaso taandawa ɓǝ kaɗ a ham fiina pa Bitrus yǝ kaɗ ke ma ɓosa. 56Nhora autoone ke yaa wǝrǝ kǝnso a ham ɓa neksǝ ara sǝɓa ya ko kwang ma sase. Yaa sengge ya nkee me, “Eɗ ɗa kayǝ ke ma sase.”
57Pa ya renǝ, yaa nkee me, “Toone niina nǝ masǝra.”
58Kaɗsǝ ngeek wa atike ɓol yaa wǝrǝ ya nkee me, “Ngase kǝn ngǝ ke ma ɓosa.”
Bitrus ya kak ya nkee me, “Ete nǝ nasera.”
59Kaɗsǝ singǝ wa atike woya sengge ya nkee me, “Ɓong eɗ ɗa yǝ ke ma sase me yǝn yaa Galili ya.”
60Bitrus ya kakka, “Ete, nǝ ma mbu ngǝn nkesǝnke ɓa ra!” Nga yǝn kansǝnkan wa, kokra ya pa pomra. 61Ankundi ya kǝrtǝ ya sengge Bitrus a nuuwa. Pa Bitrus yǝ ɗim ma mbu Yeso nkee sǝsǝ ɓa me, “Meen nkee me kokra kiya paa pomra naaso, kǝ ngǝ nkee me ngǝ maa nǝra a kan taatǝn” Pa yǝ fiɗ ntaandi yǝ tee dem. 62Pa Bitrus yǝ ko ntaandi yǝ tee kwalakwala.
Ɓan war handa ɓa ɓǝ nhuu Yeso
63Ɓaa ɓǝn warsǝ wanda Yeso ɓa ɓaa ntii nhuura ɓǝ hobsǝ. 64Ɓǝ kaasǝ mbuka a ota ɓaa nkee me, “A nawanto ya hoɓ ngǝ niu?” 65Ɓaa nkee mbu tenatena ɓa ma sǝrma.
Yeso a wii Bilatus ma Hiridus wa
66Handa weesǝwa ɓa kau wina ɓeta ɓa nsaad ma wiina kuɓ nek mbusasa ma malǝma masakasa ɓǝ fama, pa ɓa ko ma Yeso a wiyo ɓoni. 67Ɓaa nkee me, “Me ngǝn Almaseho tǝn nkee.”
Yeso ya kakka, “Menǝ nkeesǝ sǝ na ɓongtǝra ma mbu nǝ nkesǝsǝ ɓa ra. 68Pa menǝ tasǝ sǝnǝ kak ra. 69Pa waso ma ko a wiyo, Au Ete ya kiya kaɗ a nem seya Yaa kwang ya Kaa.”
70Ɓǝ ta nsaad, “Ya ngǝn Au Kaa yau?”
Ya kakka, “Sǝ nkeen keke me nǝn nase.”
71Pa ɓǝ nkee me, “Ya Ən mbi ndǝn kǝrsǝ a ɗuura ira ɗǝmǝu? Ndǝ kuran a ee isi.”
Zur Zeit ausgewählt:
Luka 22: LLA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
©2023 Seed Company in collaboration with Language Developers and Bible Translators Association
