Luka 20

Ɓa pǝǝn kwangto Yeso wa

1Kaaka ke, Yeso yǝn fǝɗkǝ ɓeta a taanda Hit ɓǝɗ Kaa Urshalima wa, yǝn nkee mara kwalari Kaa wa, pa wiina nek mbusa sa ma malǝma masaka sa ke ma winna ɗaaso uru wa, ɓǝ wo a sanii. 2“Ɓǝ nkee me, ngǝ tǝ nkee ngǝn tom mbu ɓa ma kwangto yamni wau? Yaa na ngǝ kwangto siso niu?” 3Yaa kak me, “Niina kǝn, kǝnǝsǝ taa mbuka. Sǝnǝ nkee, 4Baptisma Yohanna ya fiɗaa liurau ko a ɓeta niu? 5Pa ɓǝ ntii kanmǝra a ɗaaso ɓoso, ɓǝn nkee me, “Me ndǝ nkee me, ‘Fiɗaa a liura,’ kiyǝn ndǝ taa me, ‘Yaa tomtomni ndǝ na ɓongtǝra ma siso rau?’ 6Pa me ndǝ nkee me, ‘Fiɗaa ɓeta ni,’ ɓeta nsaad kǝnda mudku ma kundate, me ɓeta yauwan me Yohanna ndǝ an nawanto ya.” 7Pa ɓǝ kak me, “Tǝ ma ham fiɗsǝ ɓa ra.” 8Yeso ya nkee me, “Niina kǝn nǝsǝ nkee ma kwangto yamni wa nǝn tomsǝ mbusǝsa wa ra.”

Mǝɗkǝra ma ɓan waa nyayo ɓa

9Yǝ faɗ wiiyo ma nkee mǝɗkǝra me, “Ate ke yǝ turkǝ emngwate inabi ma a nyaanyo usu, Pa yǝ na haya nyaayo kawa ɓaataka me ɓǝ waa, yǝ faɗ mbusa a urko tǝro dem. 10A fer ɗaɗɗa wa, yǝ timi hoora ira a ɓan haya ɓani, me ɓaa na usu emngwate inabi ma. Pa ɓan haya kaɓa, ɓaa hoɓɓo ɗǝm ɓaa tung yǝ faɗ nema sal. 11Yǝ timi hoora pera ɓol, pa yaa sisi ɗǝm ɓaa hoɓ ɗǝm ɓaa na kongsa, ɓaa tung yǝ faɗ nema sal. 12Yǝ timi u taatǝnte wa ɗǝm, pa ɓaa ti hunde, ɓaa muɗku taandi.

13“Pa an nyanyo kaya, yǝ nkee me, ‘Kǝna tom mbiu? Kǝna timi auwane nǝn yausǝ ya, minda ɓǝ kaa na mbarta.’

14“Pa ɓan haya sǝɓa ɓǝ wǝrsǝsǝ wa, ɓa kan a ɗuura ira, ɓǝ nkee me, ‘U nwa ndǝ sase an se kǝnaa ya. Sawo ndaa toɗɗo, kǝnaa usu a tom yau. 15Pa ɓaa muɗkǝ nkaara nyanyo wa, ɓaa toɗɗo.

“Ən mbi an nyaanyo siya ki yǝ ɓǝn tomou?” 16Kiyǝ wo yǝ toɗ ɓan haya nyaanyo sǝɓa, yǝ na haya nyaanyo siso ɓaata ka ɓol.” Pa ɓeta kurasǝ maaso wa, ɓǝ nkee me, “A tom maaso ra!” 17Yeso yǝɓǝ sengge ya taa me, “Ən mbi ɗaanto mara ra u ɓaa yorsǝ wau? U yǝ nkeesǝ me,

“ ‘Ɗungara u ɓan mara ɓa ɓǝ mbisǝsǝ wa,

ǝn siso yǝ kangsǝ yaɓ a timra hito ra wa.’

18Hana yamni yaa yǝ nwiisǝ a ɗungara sǝra ya, kiyaa kau fin fin, pa yaa ɗungara hamsǝsǝ a maabiri isi ya, kiyaa ookǝ yǝ kang arma.” 19Malǝmma masakaa sa ma kuɓsa nek mbusa sa, ɓǝn kǝr ɗǝɗa ɓǝkaa sa ma nok ra, me ɓǝ maan me yǝn kan mǝɗkǝta sǝta a ɗuura ɓora. Pa ɓǝn kura kokto ɓeta wa.

Kwan samra Kaisar wa

20Pa ɓǝ tiri ɓaataka me ɓaa nhii nuwa, ɓet sǝsa ɓǝ weɗa nkweera ɓora nga ɓǝ ɓet tenaa. Ɓǝn tǝra Yeso a maatamse kiyaa nkee ta, me ɓaa sa ko a ngwamna ni, me aa kan kiita. 21Pa ɓaa ɓaa timi ɓǝsǝ me ɓaa tǝraa ɓa, ɓaa taa me, “Malǝm tǝ maan me ngǝn yaa yǝn nkeesǝ ɓongtǝra ya ɗǝm ngǝn fǝɗkǝ mbu yǝsǝ keke ɓa, ɗǝm ngǝ sem ma yau ɗuura ra, me ngǝn too ɓeta nsaad keke, ɗǝm ngǝn fǝɗkǝ ɗǝɗa Kaa ra ma ɓongtǝra. 22Ngǝn wǝr nga pamman me tǝ kwan samra Kaisar rǝu, ko tǝ kwan dau?”

23Pa Yeso yǝ maa wee nuuwa ɓoson, yǝɓǝ nkee me, 24“Sǝnǝ weɗa koɓaa sǝsa.” “Ən sakankura yauni ra ma ɗǝm ɗǝnda yauni ra a sǝu?” Ɓǝ nkee me, “Ən u Kaisar wa.”

25Yǝɓǝ nkee me, “Sǝ na Kaisar mbu Kaisar ɓa, ɗǝm sǝ na Kaa mbu kaɗsǝ me ǝn u Kaa wa ɓa.”

26Ɓǝ taa mbu ɓǝ kǝsa tǝraa a mbu yǝ nkeesǝ a ɗaaso ɓeta peler wa ra, pa ɓǝ roo seuseu me weɗara maaɓǝn, a kakko yǝ kak ɓǝsǝ wa.

Taa mbuka a kaa niya ma kon toone wa

27Pa ɓaata a ɗaaso ɓaa Sadukiyawa ɓa, ɓaa ɓǝ nkeesǝ me niiyo a tina wa samra ɓa, ɓǝ wo a Yeso ni, ɓaa taa me, 28“Malǝm, Musa yǝ nyortǝ me, me ete tii isi woɗ yǝ lee toone isi semma emɓa ra, tomon ɗaɗ koɓɓisi yǝ kon kiu kaya, me yǝ haa emba tii isi. 29Waso ɓaataka kǝn mbutu, ɓǝn tiiyaa ma koɓɓa. Yaa ntiiri ya, yǝ kon toone ke, ɗǝm yǝ woɗɗo, yǝ haa ra. 30Yaa raɓte yǝ kon kiu kaya, ɗǝm yǝ woɗ, yǝ haa ra. 31Yaa taatǝnte ya maaso ɗǝm, tom maaso ɗǝm ma ɓosa mbutu sǝɓa, nsaad ɓǝ ɓǝɗ ɓǝ kon toone kayan, pa ɓǝ woɗ, ɓǝ lee emba ra. 32A feɗefeɗe toone kaya, yǝ woɗ kǝn. 33Ya waso a kaa niinyo put taandi wa ɓa, toone sisi kǝyǝ kaɗ toone yamni ya a ɗaaso ɓaa mbutu sǝɓau? Me nsaad ɓaa mbutu sǝɓa, ɓǝ konsǝn.”

34Yeso ya kak ya nkee me, “Ɓaa a kaɗo ntaadiwa ɓa ɓǝn kon toona ɓǝna ɓaa kono. 35Pa ɓaa pamsǝ me ɓǝ nii a fer niinyo a tina wa ɓa, ɗǝm ɓǝ kaɗ a taandi u ka wo ya wa, parata ɓǝ kon toona ra, toona ɗǝm ɓaa ɓǝ tung a kera ra. 36Ɓǝ fǝta woɗɗo ɗǝm ra, me ɓǝkǝ kang nga ɓantimira Kaa a liura ɓa. Ɓǝkǝ kang em Kaa ɓa, me ɓǝ nǝ a tinan. 37Pa a nyorma Musa ma a ɗuura ara masǝ ɓot piti ɓa ya, yǝ weɗa me wote kǝ nii, me yǝn yar Ankundi me, ‘Kaa Ibrahim ya, Kaa Ishaku ya, ɗǝm Kaa Yakubu ya.’ 38Yǝn Kaa wote ɓa ra yǝn Kaa ɓan ma huurtu ɓa me ɓosa nsaad ɓǝma huurtu.” 39Ɓaata malǝma masakaa sa ɓaa ɓa kak me, “Tomon yaɓ malǝm!” 40Yaake ɓaarǝ yaa taa mbuka ɗǝm ra.

Krisiti ndǝ Au yamni yau?

41Pa Yeso yǝɓǝ nkee me, “Tomtomni ɓǝn nkeesǝ me, Almaseho ǝn Au Dauda yau? 42Dauda ma nkweera ira, yǝ nkee a likarkar Zabura wa me,

“ ‘Ankundi nkee Ankundi yaane me,

“A kaɗ a nem seya yaane

43ndub me nǝ ti ɓaataker ɓǝnga

a faɗa natsa sǝngan.” ’

44Dauda yarsǝ me ‘Ankundi.’ Yaa kiyǝ tomtomni yǝ kaɗ au isiu?” 45Pa ɓeta nsaad ɓǝn kurasǝn kurawa, Yeso yǝ nkee emfǝɗkaa ɓǝsa, 46“Sǝ nhii nwaa ma malǝmma Masaka Musa sa. Ɓǝn taa me ɓǝ siki ma lukta kwang kwangsa, me ɓeta ɓǝ too a lumaa, ɗǝm ɓǝn taa me ɓaa ɓǝ na hansǝ kaɗa u ma mbarta wa a hitsa kwau Yahudawa sa, ma hansǝ kaɗa wiina ɓa a han mbukamsa ɓa. 47Ɓǝn kon mbu kiifa u ker ɓosa wodsǝwa ɗǝm me ɓǝ kǝna Kaa ɓǝn feɗɗa nakǝnda. Kanmǝra ɓeta maaso ra ɓa kǝɓǝ na kongsa dem.”

Zur Zeit ausgewählt:

Luka 20: LLA

Markierung

Kopieren