Yohanna 21
21
Yeso yǝ weɗɗa nhiinyanhiinyato a ma nseeya wa
1Ndiira maaso wa, Yeso ɓaarǝ yǝ weɗɗa ee usu emfǝɗkaa ɓǝsa, a kira aulaara Tibariya wa. U nwa ǝn ɗǝɗa yǝ weɗɗasǝ ee usu ra. 2Emfǝɗkaa ɓǝsǝ ke ɓa, ndǝ Siman Bitrus ma Toma, yaa ǝn yarsǝsǝ Em raɓ ɓa ya, ma Nataniyel, yaa yǝ fiɗsǝ Kana a put Galili wa ya, ma em Zabadi ɓa, ma ɗǝm ɓaata emfǝɗkaa raɓ. 3Siman Bitrus yǝɓǝ nkee me, “Nǝ ko konǝ ma nseeya.” Ɓosa kǝn ɓǝ nkee me, “Kǝ ndǝ ko ke.” Pa ɓǝ fiɗ ɓǝ kana kurnyaamo, a pǝrtǝra sǝra ɓǝ ma mbuka ra.
4Naakǝn a ɗenda, Yeso yǝ nǝɗ a kira aulaara ra, emfǝɗkaa sǝɓa, ɓǝ maa me ǝn Yeso ra.
5Pa Yeso yǝɓǝ nkee me, “Sik ɓǝna, sǝ ma nsenya rau?”
Ɓǝ kak me, “Awo.”
6Yǝɓǝ nkee me, “Sǝ yaɓ langtanga sǝsa ma lau nem saya u kurnyaamo siso, sǝkǝ taa nsenya.” Pa ɓǝ tomsǝ maaso nga yǝ nkee ɓǝsǝ wa, ɓǝ nkaa ɓǝ wiin da, me nsenya ɓǝ masǝsa dem kwang.
7Pa aufǝɗke u Yeso yǝn yausǝsǝ kwang siya, yǝ nkee Bitrus me, “Nwa ǝn Ankundi!” Nok kǝnso, Siman Bitrus yǝ kurasǝ me, “Nwa ǝn Ankundi wa,” yǝ too laulaura ira, yǝ mbǝrkǝ a nkoora ira, me ka yǝ ti ta, yǝ ham ɗaan a mbraa. 8Pa ɓaata emfǝɗkaa ɓǝ ko a han kurnyaamo ɓa, ko ɓǝn wiin langtanga siso kungsǝ ma nseeya, me ka ɓǝ sem mǝbmǝb ma kira ra, yǝ nga nata pusa pu taatǝn. 9Ɓǝ fiɗsǝ a ee mbraa ya wa, ɓǝ wǝr nweeta ara ta kǝnso, ma nsenya ɓoti, ma nkaadǝng ɗǝm.
10Pa Yeso yǝɓǝ nkee me, “Sausǝ ma nsenya u sǝ masǝ wa.”
11Siman Bitrus yǝ kana kurnyaamo kawa, yǝ wiin langtanga a kal mbraa wa, langtanga siso kungsǝ ma nsenya kwangkwang wa kansǝ pusa pu aa nhaa pwa wonon aa nhaa taatǝn, hana maaso ma nsenya kwangkwang siso, langtanga sǝsa nkaa ra. 12Pa Yeso yǝɓǝ nkee me, “Sau ndǝ se mbuseya a ɗenda ɓa.” Yaake sem a ɗaaso emfǝɗkaa sǝsa, yǝ nkaasǝ yaa taa me, “Ngǝn yamniu” ra, me ɓǝ maan me yǝn Ankundi. 13Yeso yǝ wo, yǝ too nkaadǝng sǝsa, yǝɓǝ na, yǝ tom maaso ɗǝm ma nsenya. 14U nwa ndǝ taatente wa, Yeso yǝ weɗɗasǝ ee usu a emfǝɗkaa ɓǝsa ni ɓa, a ndiira yǝ niisǝ a tina wa.
Yeso ma Bitrus
15Ndiira ɓǝ feɗsǝ se mbuseya wa, Yeso yǝ nkee Siman Bitrus me, “Siman au Yohanna ya, ngǝn yaunǝ ma ɓongtǝra a faɗɗa ɓosau?”
Yǝ kak me, “Ee nwa, Ankundi, ngǝ maan me nǝn yau ngǝ.”
Yeso yaa nkee me, “Aa nsee tǝmnkaa sǝnaa.”
16Yeso yǝ ɓaarǝ yǝ nkee me, “Siman au Yohanna ya, ngǝn yaunǝ ma ɓongtǝrau?”
Yǝ kak me, “Ee nwa, Ankundi, ngǝ maan me nǝn yau ngǝ.”
Yeso yaa nkee me, “Aa war tǝmnkaa sǝnaa.”
17A taatente yǝ ɓaarǝ yaa nkee me, “Siman au Yohanna ya, ngǝn yaunǝ ma ɓongtǝrau?”
Pa aa ɗaa Bitrus me Yeso yǝ taasǝ taatǝn me, “Ngǝn yaunǝu?” Yaa kak me, “Ankundi ngǝ maa mbusan nsaad, ngǝ maan me nǝn yaungǝ.”
Yeso yaa nkee me, “Aa nsee tǝmnkaa sǝnaa. 18Nǝn nkeengǝ ɓongtǝra, a fer ngǝsǝ auwe ngeek wa, ngǝn nkaa ngǝ tung luktu nkweerange, ngǝ ko a han tǝngǝsǝ ɓa, pa me ngǝ nkoon, kǝngǝ mal nema sǝnga, yaake ɓol yǝ ngǝ tung luktu, ɗǝm yǝ ngǝn ko a han ngǝn yauwa ra ɓa.” 19Yeso yǝ nkee mbusǝsa maaso, me yǝ weɗɗa nkamǝra woɗɗo Bitrus kiyaa tom aa too ɗǝnda Kaa ra wa. Pa yaa nkee me, “Nǝ bǝɗɗǝ!”
20Pa Bitrus yǝ kǝrtǝ, yǝ wǝr aufǝɗke u Yeso yǝn yausǝsǝ kwang siya, yǝn bǝɗ ɓǝn ɓǝɗǝ. Ən sase yaa yǝ kǝksǝ a maabiri Yeso ya wa, a fer se mbuseya mbukamsa tadko wa ma. Ən sase yǝ taasǝ Yeso me, “Ankundi, yaa kiyǝ ngǝ fang nǝu?” 21Pa Bitrus wǝrsǝsǝ wa, yǝ taa Yeso me, “Ankundi, Eɗ ɗa kau?”
22Yeso yaa kak me, “Me nǝ yau niina me yǝ nɗanyǝ ndub me nǝ kangan, mbu nteengǝ mbiu? Waango ǝnǝ bǝɗɗǝ.” 23A ɗuura mbusǝsa ra, mara sǝra a nweesǝ a ɓaata ni me, aufǝɗke sisi usu yǝ woɗ ɗa. Pa Yeso yǝ nkee me aufǝɗke sisi yǝ woɗ ɗa ra. Mbu Yeso yǝ nkeesǝ ɓa, yǝ nkee me, “Me nǝ yau niina me yǝ nɗanyǝ ndub me nǝ kangan, mbu nteengǝ mbiu?”
24U nwa ndǝ aufǝɗke yǝ nkeesǝ mara a ɗuura mbu tomsǝ ɓa wa nsaad, ɗǝm yǝ ti nyorsǝ. Tǝ maan me mbu yǝ nkeesǝ sǝsa ndǝ ɓongtǝra.
25Mbusa fera kǝn ɓolɓol dem u Yeso tomsǝ wa, me kama ɓaa kǝ nyor mbusǝsa nsaad, aa taa han ka nhii likarkara sǝsa a put taandi wa ra.
Zur Zeit ausgewählt:
Yohanna 21: LLA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
©2023 Seed Company in collaboration with Language Developers and Bible Translators Association
