མ་ཏི། 6
6
རུམ་པེ་ཁེ་ཝ་ཀོར་གེ་ ཡེན་གནང་མ༌ལ།
1རིག་པ་སྒྲིམ་ཅོ། ན་ཤི་ཨ་ཁཱན་ལའི་ལེག་པུ་བ་ སོ་ངོ་བ་ཀི་ཐོང་ཆེན་དག་པ་གི་ མ་ཨའི། ཨུ་ཉུ་ད་བུ་ཨ་ནེ་ལ་ ཞིང་ཁམས་ག་བཞུགས་ཁཱན་ ན་ཧ་ཡབ་གེ་ ན་ཤི་སེ་རབ་ཧང་རང་མ་ཉོང་པ། 2ན་ཤི་དུག་པུ་སོ་ངོ་བ་ཀ་ བི་ལ་ཀབ་ཉི་ འུ་དྲ་པ་བ་ཀི་ ཨ་ཝ་ད་བུ་མ་ཨའི། ཧང་ཡ་དག་ནེ་ལ་ རོག་ཏེ་བ་ཀི་ དུག་པུ་བ་ཀ་བི་ལ་ཀབ་ཉི་ སོ་ངོ་བ་ཀི་ རོག་ཏེ་བ་ཀ་ བསྟོད་པ་ཕིན་ཆེན་དག་པ་གི་ ཡ་ཧུ་དི་པ་ཆོས་འཛོམས་ཁོན་དང་ གཞུང་ལམ་ཁོན་དིན་ཐཱན་ ཤ་དར་ཕི་ཉི་ཀཱད༌ཅ། ཇི་གི་ ན་ཧ་ཐྲང་ཉི་ཡེག་པེ་ རོག་ཏེ་བ་ཀི་ རོག་ཏེ་བ་ཀ་སེ་རབ་ ཐམས་ཅན་རང་ ཉོང་པ༌ཅ། 3ཨོ་ཉི་ཨ་དེན་གེ་ ན་ཤི་དུག་པུ་སོ་ངོ་བ་ཀ་ བི་ལ་ཀབ་ཉི་ ན་ཧ་ག་དང་ལ་ཉོང་གི་ ཨ་ཁཱན་ཁེ་པ་ ག་དང་མི་ཉོང་གི་ སེ་ལེ་མ་བི། 4ན་ཤི་བི་ལ་ཀབ་ཉི་ ཨི་བི་གི་རང་ མ་སེ་ཝ་ཨ་ཉི་བི། ཉི་ཨི་བི་གི་རང་ མ་སེ་ཝ་ཨ་ཉི་བི་ཁཱན་ཁེ་པ་ ན་ཧ་ཡབ་གི་མཁྱེན་ཉི་ རོ་ཀི་ ན་ཧ་སེ་རབ་གནང༌མེ༎
སྨོན་ལམ་ག་ཀོར་གེ་ ཡེན་གནང་མ༌ལ།
5ན་ཤི་སྨོན་ལམ་ཏ་པ་ཀབ་ཉི་ འུ་དྲ་པ་བ་ད་བུ་མ་ཨའི། སོ་ངོ་བ་ཀི་ ཐོང་ཆེན་དག་པ་གི་ རོག་ཏེ་བ་ཀི་ ཆོས་འཛོམས་ཁོན་དང་ གཞུང་ལམ་ག་ཟུར་ཅི་ཁོན་དི་ཉི་ ཐིང་ཐཱན་སྨོན་ལམ་ཏ་པེ་ག་ སེམས་ཨན༌ཅ། ཇི་གི་ ན་ཧ་ཐྲང་ཉི་ཡེག་པེ་ རོག་ཏེ་བ་ཀི་ རོག་ཏེ་བ་ཀ་སེ་རབ་ ཐམས་ཅན་རང་ ཉོང་པ༌ཅ། 6དག་པ་ཀབ་ཉི་ ན་ཤི་སྨོན་ལམ་ཏ་པ་ཀབ་ཉི་ ན་ཧ་ཕའི་ནང་ཀ་དི་ཉི་ ཀོ་དཔ་ཐཱན་ ཨི་བི་གི་རང་མ་སེ་ཝ་ཨ་ཉི་ ན་ཧ་ཡབ་ག་ཏཱན་ སྨོན་ལམ་ཏབ་ཅོ། ཉི་ན་ཤི་ ཨི་བི་གི་རང་ མ་སེ་ཝ་ཨ་ཉི་ སྨོན་ལམ་ཏབ་ཁཱན་ཁེ་པ་ ཡབ་གི་མཁྱེན་ཉི་ རོ་ཀི་ ན་ཧ་སེ་རབ་གནང༌མེ།
7ན་ཤི་སྨོན་ལམ་ཏ་པ་ཀབ་ཉི་ དད་པ་མ་ཨ་ཁཱན་བ་ཀི་ ཨ་ཝ་ད་བུ་མ་ཨའི། རོག་ཏེ་བ་ཀ་ དཀོན་མཆོག་གི་ རོག་ཏེ་བ་ཀ་ སྨོན་ལམ་རིང་མུ་ཆོ་ནེ་ལ་ སྙན་གསེང་པེ་དག་ཉི་ མི་ཝ་ཨ་དེན་གེ་ རོག་ཏེ་བ་ཀི་ སྨོན་ལམ་ཏ་པ་ཀབ་ཉི་ དེན་ཐ་མ་ཁཱན་ཆཱས་ མང་པུ་ཐུར་ཙུག༌ཅ། 8ན་ཤི་ རོག་ཏེ་བ་ད་བུ་མ་ཨའི། ཧང་ཡ་དག་ནེ་ལ་ ནའི་ཧང་ཚཱས་པ་ཅ་གི་ལ་སྨོ་ ཨོ་ཉ་ཀོར་གེ་ ན་ཤི་མ་ཞུ་ལེ་གོ་མ་ ན་ཧ་ཡབ་གི་མཁྱེན་མ༌ཅ།
9ན་ཤི་སྨོན་ལམ་ ཨོ་ཐེན་ཏབ་ཅོ།
ཞིང་ཁམས་ག་བཞུགས་ཁཱན་ ཨ་ཧ་ཡབ། ན་ག་མཚན་དམ་པའི་ཤར༌ཤོ། 10ན་ག་རྒྱལ་སྲིད་བྱོན་ཆེན། ཉི་ཞིང་ཁམས་ག་ད་བུ་རང་ འཛམ་གླིང་ག་བུ་ ན་ག་ཐུགས་དང་ཏུ་ཉི་ ཇུང་ཆེན།
11ཐི་ནོང་ག་ནོང་ཀ་ ཨ་ཧ་ཏ་བུ་ག་ལྟོ་གནང༌ཤོ། 12ཨ་ཧ་ཏཱན་ངཱད་ཁཱན་བ་ཀ་ ཨ་ཤི་བཀའ་དྲིན་བསྐྱང་མ་པུརུས་ཀིན་ཨ་ཉི་ ནཱན་གི་ ཨ་ཤི་ངཱད་ཁཱན་བ་ཀ་བུ་ བཤགས་པ་གནང༌ཤོ།
13ཨ་ཧ་བ་ བར་ཆད་ནང་ཀ་ ཚུད་པེ་མ༌གེ། དག་པ་ཀབ་ཉི་ ངན་པ་གེ་ ཨ་ཧ་བ་ སྐྱབས་གཟིགས་ཉི་གནང་ཤོ་ དག༌ཉི།
14ན་ཧ་ཏཱན་སྡིག་པ་ཨ་ཁཱན་བ་ ན་ཤི་བཀའ་དྲིན་བསྐྱང་ནེ་ཤ་ ཞིང་ཁམས་ག་བཞུགས་ཁཱན་ ན་ཧ་ཡབ་གི་བུ་ ན་ཧ་བཤགས་པ་གནང༌མེ། 15དག་པ་ཀབ་ཉི་ ན་ཤི་སོ་ངོ་བ་ཀ་སྡིག་པ་ བཀའ་དྲིན་མ་བསྐྱང་ནེ་ལ་ ན་ཧ་ཡབ་གི་བུ་ ན་ཤི་ཨ་ཁཱན་སྡིག་པ་ག་ བཤགས་པ་མ་གནང་མ༎
སྨྱུང་གནས་ག་ཀོར་གེ་ ཡེན་གནང་མ༌ལ།
16ཉི་ན་ཤི་སྨྱུང་གནས་ཆོ་ལ་ཀབ་ཉི་ འུ་དྲ་པ་བ་ད་བུ་མ་ཨའི། སོ་ངོ་བ་ཀི་ རོག་ཏེ་བ་ སྨྱུང་གནས་ཆོ་ཝ་ལ་ཨ་ཉི་ སེན་ཆེན་དག་པ་གི་ རོག་ཏེ་བ་ཀི་ རོག་ཏེ་བ་ཀ་ ཟུག་འགྱུར་བ་ཅོད་ཉི་ཆོན༌ཅ། ཇི་གི་ན་ཧ་ཐྲང་ཉི་ཡེག་ཅ་ རོག་ཏེ་བ་ཀི་ རོག་ཏེ་བ་ཀ་སེ་རབ་ ཐམས་ཅན་རང་ ཉོང་པ༌ཅ། 17དག་པ་ཀབ་ཉི་ ན་ཤི་སྨྱུང་གནས་ཆོ་ལ་ཀབ་ཉི་ ན་ཧ་གུམ་ཟིག་ཉི་ ཚམ་ག་སི་སོག་ཅོ། 18ཉི་ཤ་ སོ་ངོ་བ་ཀི་ ནའི་སྨྱུང་གནས་ཆོ་ཝ་ག་མ་སེ༌ལ། དག་པ་ཀབ་ཉི་ སོ་ངོ་བ་ཀི་མ་སེ་ཁཱན་ཁེ་པ་ ན་ཧ་ཡབ་གི་མཁྱེན་ཉི་ ཉི་རོ་ཀི་ ན་ཧ་སེ་རབ་གནང༌མེ༎
རྒྱུ་ག་ཀོར་གེ་ ཡེན་གནང་མ༌ལ།
19རང་ཏེན་ག་དེན་གེ་ ཨོ་ཐ་འཛམ་གླིང་ག་ རྒྱུ་མ་སག་ཅོ། ཧང་ཡ་དག་ནེ་ལ་ ཨོ་ཉ་རྒྱུ་ཤོ་ བུ་དང་ཙག་ཀི་ཅོན་མེ་རེ༌བེ། ཉི་དྲོ་ཝཱན་པ་ནུབ་ཐཱན་ དྲོ་ཝཱན་ཨ་ཉི་བུ་ལེ་རེ༌བེ། 20དག་པ་ཀབ་ཉི་ ན་ཧ་རྒྱུ་ ཞིང་ཁམས་ག་སག་ཅོ། ཧང་ཡ་དག་ནེ་ལ་ ཞིང་ཁམས་ག་ བུ་དང་ཙག་ཀི་ཅོན་མེ་མར་བ། ཉི་དྲོ་ཝཱན་པ་བུ་ ཤེག་པེ་མར་བ། 21ཧང་ཡ་དག་ནེ་ལ་ ན་ཧ་རྒྱུ་ ཨོ་ག་ཆོ་ཝ་ཐུར་ ན་ཧ་སེམས་བུ་ ཨོ་ཉ་ག་རང་ཨོ་ཕེ༎
མིང་ཤོ་ལུས་པུ་ག་ ལ་ཝང་གི༌ལ།
22མིང་ཤོ་ ལུས་པུ་ག་ ལ་ཝང་གི༌ལ། ཨོ་ཉི་ཨ་དེན་གེ་ ན་ཧ་མིང་ལེག་པུ་ཆོ་ནེ་ལ་ ན་ཧ་ལུས་པུ་ ཐམས་ཅན་རང་ འོད་ཟེར་གི་ཕུང་མ་ཨོ་ཕེ། 23དག་པ་ཀབ་ཉི་ ན་ཧ་མིང་ལེག་པུ་མ་ནེ་ལ་ ན་ཧ་ལུས་པུ་ ཐམས་ཅན་རང་ མེར་བུ་གི་ཕུང་མ་ཨོ་ཕེ། ཉི་ན་ཧ་ནང་ཀ་ཆོ་ཁཱན་ འོད་ཟེར་རང་ མེར་བུ་ནང་ཀ་ཆོ་ནེ་ལ་ མེར་བུ་ཧབ་ཏུར་རང་ ཆི་ལུ་ཅ་གི༌ས༎
སྦྱིན་བདག་ཉིག་ཙིང་ག་ཕྱག་ཞུ་ལེ་མར་བ།
24ཨི་བི་གི་རང་ སྦྱིན་བདག་ཉིག་ཙིང་ག་ ཕྱག་ཞུ་ལེ་མར་བ། རོ་ཀི་སྦྱིན་བདག་ཐུར་ཀབ་ཉི་ ཤོ་ནང་ཕེ་ཝ་ཆོ་ནེ་བུ་ སྦྱིན་བདག་ཐུར་ཀབ་ཉི་ ཤོ་ནང་མ་ཕེ་ཝ་ཨོ་ཕེ། ཨུ་ཉུ་མ་ནེ་ལ་ རོ་ཀི་སྦྱིན་བདག་ཐུར་ག་ དམ་ཚིག་ཙུང་ཉི་ཕྱག་ཞུ་ལེ་ དག་པ་ཀབ་ཉི་ རོ་ཀི་སྦྱིན་བདག་ཐུར་ག་ གུས་ཞབས་མ་ཨ༌ལ། ཨུ་ཉུ་པུརུས་ཀིན་ཨ་ཉི་ ན་ཤི་དཀོན་མཆོག་དང་ ཏི་རུ་ཉིག་ཙིང་ག་རང་ ཕྱག་ཞུ་ལེ་མར་བ༎
སྡུག་བསྔལ་མ་ཨའི།
25ཨོ་ཉི་ཨ་དེན་གེ་ ཇི་གི་ ན་ཧ་ཐྲང་ཉི་ཡེག་ཅ་ ན་ཧ་ཚེ་ག་ ཧང་ཟ་ལེ་ཡ་ ཧང་ཇ་མེ་ཡ་དག་ཉི་ སྡུག་བསྔལ་མ་ཨའི། ཉི་ན་ཧ་ལུས་པུ་ག་དེན་གེ་ ཧང་ཡེ་ལེ་ཡ་དག་ཉི་བུ་ སྡུག་བསྔལ་མ་ཨའི། ཚེ་ཤོ་ ཟཱན་ཇམ་གེ་ལག་པ་ ཁག་ཆི་ལུ་མང་གི་སྨོ། ཉི་ལུས་པུ་ཤོ་ ཁ་མུང་ས་རི་གེ་ལག་པ་ ཁག་ཆི་ལུ་མང་གི་སྨོ། 26ངབ་ཀེ་ཕེན་ཁཱན་ ཁ་བ་ཀ་གོད་ཅོ། རོག་ཏེ་བ་ཀི་ ཐོག་ཡ་ཕུ་མཱན༌ཅ། ཉི་ཐོག་དུས་ཐཱན་ རུང་ནང་ཀ་ གོ་ཉི་ཐ་ལུ་བུ་མཱན༌ཅ། ཨོ་ཉེ་རང་གི་ནེ་བུ་ ན་ཧ་ཞིང་ཁམས་ག་བཞུགས་ཁཱན་ ཡབ་གི་ རོག་ཏེ་བ་ཀ་གནང༌ཅ། ཧང་ན་ཧ་བ་ཏ་ ཁ་བ་ཀེ་ལག་པ་ཁག་ཆི་ལུ་མང་གི་སྨོ༎ 27ཚེ་ག་ཀོར་གེ་ སྡུག་བསྔལ་ཨན་ཅ་ཨ་ཉི་ མི་ཚེ་རིང་མུ་ཅོད་པེ་རེ་ཁཱན་ ན་ཧ་པོང་ཀེ་ ཨི་བི་ཅ་ཡ།
28ཉི་ན་ཧ་བ་ ཁ་མུང་ས་རི་ག་དེན་གེ་ ཧང་ཨ་ཉི་སྡུག་བསྔལ་ཨན་ཅ་ཡ། བོ་རང་ག་ལིག་ཁཱན་ མོམ་ནང་ག་གོད་ཅོ༌ལེ། རོག་ཏེ་བ་ཀི་ ལའི་ཨ་ཉི་ རང་ཏེན་ག་དེན་གེ་ ཁ་མུང་ན་མུ་མཱན༌ཅ། 29དག་པ་ཀབ་ཉི་ དཔོན་སོ་ལོ་མོན་ གནམ་མེད་ས་མེད་ བེ་དིང་ཆོན་ཐཱན་རང་གི་ནེ་བུ་ རོ་ཀ་ཁ་མུང་ཐུར་བུ་ ཨོ་ཉ་མོམ་ནང་བ་ད་བུ་ ཅེམ་པུ་མཱན་ཆི། 30ཐི་ནོང་ཆོན་ཐཱན་ ནམ་ནིང་ད་བུ་ མི་ག་གོག་ཁཱན་ངོན་ག་ཆང་ དཀོན་མཆོག་གི་ ཁ་མུང་ཡེན་གནང་ནེ་ལ་ ཧང་རོ་ཀི་ ན་ཧ་ཨོ་ཉ་གེ་ལག་ཉི་ མ་གནང་མ་སྨོ། ན་ཧ་དད་པ་ཤོ་ ཧང་ཨ་ཉི་ ཨོབ་ཏུར་རང་ཟེ་མུ་ཅ་ཡ།
31ཨོ་ཉི་ཨ་དེན་གེ་ ཧང་ཟ་ལེ་ཡ་ ཧང་ཇ་མེ་ཡ་ ཉི་ཧང་ཡེ་ལེ་ཡ་ཨ་ཉི་ སྡུག་བསྔལ་མ་ཨའི། 32ཧང་ཡ་དག་ནེ་ལ་ དད་པ་མ་ཨ་ཁཱན་བ་ཀི་ཤ་ ཨོ་ཐ་བ་ལམ༌ཅ། དག་པ་ཀབ་ཉི་ ཞིང་ཁམས་ག་བཞུགས་ཁཱན་ ན་ཧ་ཡབ་གི་ ཨོ་ཐ་བ་ ཐམས་ཅན་རང་ ན་ཧ་དེན་གེ་ ཁག་ཆི་ལུ་གི་ལ་ཨ་ཉི་ མཁྱེན༌ཅ། 33དག་པ་ཀབ་ཉི་ གོ་རང་ དཀོན་མཆོག་ག་ རྒྱལ་སྲིད་ལམ༌ཤོ། ཉི་དྲང་པུ་ཨ་ཉི་ཆོའི། ཉི་ཨོ་ཐ་བ་ ཐམས་ཅན་རང་ ན་ཧ་གནང༌མེ།
34ཨོ་ཉི་ཨ་དེན་གེ་ ནམ་ནིང་ག་དེན་གེ་ སྡུག་བསྔལ་མ་ཨའི། ཧང་ཡ་དག་ནེ་ལ་ ནམ་ནིང་ག་དེན་གེ་ སྡུག་བསྔལ་ཨ་ལེ་ཁེ་ཝ་ག་ ནམ་ནིང་རང༌ཅ། ཐི་ནོང་ག་དེན་གེ་ ཐི་ནོང་ཏབ་མ་ཉམ་པ་ཤོ་ཁཱན་རང་ ཕྲིག་ཀིན༌ཅ༎
Zur Zeit ausgewählt:
མ་ཏི། 6: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved
