Tatanigaina 6
6
Ia Muko Ka Malau Iahi Peka
1Ka dike tatanigai tehiro ira noni ka malau iahi peka dike doliro ghu ira tuudi ghase, 2ira tuunamane God dike finiri ta ghaseveha ghedira fotati foforu irahi dike hio mala ghaseborodi ghu heiri dike faeterira ka maneri. 3Kahe ghua tuna iahi neke ghua Iahova, “Ara e deo ga age va malumuri ghu ira noni ta age doli toghunaina, vununa maneri mu di vilahi ma. Ghatunaina e vai vona ghu maneri deo gedi boka age au fuludu laoi ghu 120 komuhu.”
4Ka ravata iranimu nia ka ira keha fafata leghunana e ghua, ira zinahagala dike pagusudi meharo ira fotati noni nia ira tuunamane God dike aura ka malau iahi peka. Maneri mu dike manehetadira nia mane varangadira ka ira fafata sepao laoni.
5Iahova neke finini ia muko ka noni ka malau iahi peka neke toraina faa fuludu, nia vahina leghutau dike vato ghidi nga nia nganari nga maneri mu dike mukodi ma leleghu fafata. 6Iahova neke muko nanafa ghini neke to va vuharira manei ira noni ka malau iahi peka. Manei neke toraina muko nanafana fuludu ghu. 7Neke kahe ghua ghu iahi Iahova, “Ara a age takusu kairi noni nake va vuhari irahi ka malau iahi peka—ira noni nia tagukava, ira va vuha ta tagu ka ia kava nia ira memeha ka kolangana, e ghua—vununa ara na muko hihingo ghini nato ke va vuharira maneri.” 8Ghe Iahova neke veha vanani mo ka Noa.
Noa Nia Ia Ologho
9Iahi mu ia tuturina Noa nia ia fototatamana ka manei.
Noa mu neke kaike mane ta lotoro, nia neke kaike mane ta toraina veha ka hoatadi ira noni ka ia fafata manei, nia manei neke au kapa taremehana God. 10Noa neke kurui lito tuunamane: Semu, Hamu nia Zafeti, e ghua.
11Ghe ira leghu noni nga dike toraina muko fuludu ka ia nahalina God ka malau iahi peka nia neke foudui magara nia vari ngovangovala. 12God neke matoi malau iahi peka neke finini ghu neke torai mukona, vununa ira noni dike au haroharo ka ira puhidi ta muko. 13Neke kahe ghua ghu iahi God ka Noa, “Ara a age hio kairi ghatu leghu noni nga, vununa maneri di va foudi malau iahi peka ka magara nia vari ngovangovala. Uve ara a age toraina hio kairi haroharo maneri nia malau iahi peka. 14O riva vananigho ghu taghoughi nia ia fototatamana ka agho kaike zaghimaha ka takifi ta veha. O rivai ringifota giliona nia va api ghini taa tuna giliona mo nia peghuruna mo, e ghua. 15Taghe iahi o ghua riva ghinina agho: Zaghimahana mu e vitungavului gaha kangafa sodunana, tazoi palu kangafa kalanakabe bobonana nia vitu kangafa kalanakabe vonanana, e ghua. 16Riva ghini sugana zaghimaha nia, nia nakaini liloho ghu ka pekana sugana kamoto nia, kaike tobehena ta lito pidoko vonana. O riva ghidi lito papala galahedi ka giliona zaghimaha nia: kaikeu peka, kaikeu hoata nia kaikeu fate, nia nakaini kaike makatana ka gheremena nia, e ghua. 17Ara a va mehai ghatu ka malau iahi peka kaike ologho mala toraina va eongorira vahina leghutau ta doli nga. Vahina leghutau nga ka malau iahi peka edi age leme. 18Ghe ara a age riva ghini ia nogu varivehai taremehau agho, o age haghe ghu agho ka zaghimaha nia—agho nia ia ghaseborou nia ira tuumane nia ira ghaseborodi maneri, e ghua. 19Hio haghele taremehau ka zaghimaha nia, kaike manena nia kaike ghasena ka ira leghu kokolodi va vuha ta rizu nga ka kava mala sute va dolirira. 20Palu ghu ka ira leghu kokolodi memeha nga, ka leghu kokolodi tagukava nga nia ka ira leghu kokolodi va vuha ta tagu nga ka kavana e ghua ta la mehara ka agho mala sute va dolirira. 21Agho o hio taremehau haro leghu kokolodi ghano mala mahai nga, o nakai teghidi ghu malauna agho nia maneri, e ghua.”
22Noa neke toraina riva leghuri ghu ira vahina leghutau neke ungene va gigimariro nga God ka manei.
Zur Zeit ausgewählt:
Tatanigaina 6: kji
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Islands Bible Ministries. All rights reserved.
