Tatanigaina 19
19
Ia Sasakena Sodomu
1Ka saighona ianimu ira palu engizeli dike la sabara ani Sodomu. Loti mu neke nohe ka ia gheremena makatanana hidi riringi ka malau leghaha ani. Ne fini laori ghu, manei neke tetu vona neke la dufuri ghu, la maimanihi rorogho hinaena ka kavao. 2“Ghau palu faghina leghaha,” neke ghua manei, “Meha ka sugagu ini mala tihiri ghu tabaladi ghahemu nira nia boka meha au epu mo tuna redu ini e ghua. Ianimu tuna ghe goke magali baghunu fufugho nga go ghahe ghu.”
“Deo,” di ghua ghini. “Ghatu redu ghai a epu ma aiahi ka galahena mala varighara ini ka malau leghahana.”
3Ghe manei neke papada va gigimari, dike la haghele taremehana ghu ka suga ani manei. Loti neke va kahe ghidi ghu ira nona noniriva ta toi vanadina keha bereti ta deo isidi nia ta va tana vanadina kaike va fafara ghano e ghua, dike mahai ghu maneri palu. 4Ghe dike epu nga maneri palu, ira leghu manedi nga Sodomu, ira ta foforu ghe ira ta faa ghu, dike la meha ka leghu pelodi nga ka malau leghahana, dike la au lilohi ghu suga ani. 5Maneri dike la kudo ghua iahi ka Loti, “?Hae mu ira mane dike meha mala au taremehauo agho redu iahi? Hio kave vanamai meha a mala zave mamane taremehadi ghu ghai,” dike la ghua.
6Loti neke kave lao mala la dufurira peghuru, ghe neke bakisini nga ia makatana leghuna mo. 7“Ghau tahiguro,” neke ghua ghidi. “Oka riva ghini ghu kokolona leghutau ta muko iamu. 8Fini, ara e au palu tugu ghase ta kupi. Va malumuau a la hio kave mehari ghu ara, o riva ghini ghu heve no kabai ghinina ghau ka maneri palu. Nga oka riva ghini ghu kaike leghutau ghu ka mane irahi, vununa maneri dike meha ka pekana ia kopu ara ka sugagu ini.”
9“Ghahe ka kenumai idi,” dike ghua kudodira. “Mane iahi mu kaike mane mehana neke meha ghu ka malau iahi, ghe taghe kaike mane mala varifate ne meha ghua. Ghai a ngovala va muko laoighoni agho fuludurira maneri.” Maneri dike izu kaini Loti dike rizu kenu lao ghu mala va mukoina ia makatana.
10Ghe ira palu mane gilio dike haghara kave lao dike koroho leghu hagheli ghu Loti ka giliona sugana, ghe dike bakisini nga ia makatana. 11Ianimu tuna ghe dike ruza va melu fifiniri nga ira leghu mane ta foforu nga nia ira ta mane faa lao nga dike auro ka ia makatanana suga, mala deona maneri gedi boka finini ghu ia makatana.
12Ira palu mane dike kahe ghua iahi ka Loti, “?Di au mo keha taremehau agho gilio ka malau leghaha iahi—ira varaoto, ira tuumane ba tuughase, ba hei keharani ta taghori agho? Hio kaveri aiahi, 13vununa ghai a age va muko purukuti malau iahi. Iahova neto nomohori puhi ta muko fuludu irahi, neto tuhu meha ghai ghu manei mala meha huara va mukoina.”
14Ianimu tuna ghe neke lao nga Loti ka ira mane dike mala varihioro ka ira tuunaghase la kahe ghuana iahi, “Magali o kave kaini ghu malau iahi, vununa Iahova to namo va mukoi malau leghaha iahi.” Ghe nganganadira mane foforu irahi, manei neke suna va sire ma, dike ghua.
15Ka ia nganai fughona, ira engizeli dike va sisiva boboli Loti. “!Magali!” dike ghua ghini. “Hioi ghaseborou iamu, nia palu tuughase nira e ghua, o kave ghu ghatunaina lama, mala deo ghu age siana ghidira dolimu nira ka ia va mukoi Iahova malau leghaha iahi.”
16Ne mamahuge ghu Loti, ira engizeli dike sakomo hioi ia kamena manei nia ira kamena ia ghaseborona nia ira tuunaghase e ghua dike batu ghidi kave va veha ghu ka peghuruna malau leghaha ani, vununa Iahova neke dudumana ghidi ghena. 17Hio kaveri di ghua ghu, kaikeu ka maneri palu neke kahe ghua iahi, “!O purudu pelo, o doli ghemu ghu! !Oka mato leghu ghu nia oka nodo ghu ka keha pelodira ka giliona sare ani! !O pelo lao ka vuhuku ari, mala deo ghu age lememuna!”
18!Ghe Loti neke ungene tughuri, “Deo ghau faghinagu, oka va riva ghini ghai ghu ko iamu! 19Ghau noto va riva ghinagu kaike leghahai dudumana nia noto va podolo vanagu leghahai varisute noke hio va doliau ghu. Ghe ara e deo ga boka pelo lao ghu ka vuhuku ari. Lelemeana iahi e age ghahe fuluduau, a age leme ghu ara ghe ga dufu nga aianimu. 20?No fini mo agho malau faana tei ianihi? Manei ne namo meha mo. O va malumuau ta laona aianimu, agho o boka fini mo ta kaike rekahana malauna ma manei, e ghua ghe ga age doli nga ara.”
21“Veha fuludu, ara a vananigho haro mo fanga iahi,” neke ghua ghini; “Ara e deo ga age va mukoi ghu malau faana tei ta kahei nia agho. 22Ghe agho o magali pelo lao aianimu, vununa ara e deo heve leghutau ta boka riva ghinina, o vuhai dufu ghu agho aianimu.” (Malau faana tei ianimu neke va kudo ghini Zoa#19:22 Fafahakanana Zoa ka Hiburu mu, “rekahana” e ghua., vununa Loti neke va kudo ghini rekahana.)
23Ia taunu neke to vona meha ka ia fafata neke dufuno Loti ani Zoa. 24Ianimu tuna ghe neke va nanare hinae ghahipa heko ta saliga nga Iahova fatena Sodomu nia Gomora. 25Ka ghaghahena ianimu neke saliga va mukorira manei ira malau leghaha nia ia kamotona sare, taremehadi harora heiri haroharo dike auro ka ira malau leghaha, nia ira vahina leghutau nga dike kodoloro ka ia kava, e ghua. 26Nga ia ghaseborona Loti mu, ia tinina toke piha kaputi ka kuratahi, taghe ghahipa neke age ghua ghu gimanana.
27Ebarahamu neke magali baghunu fufugho neke leghu lao ghu ka ia malau neke tetuo taghona ka kenuna Iahova. 28Manei neke mato hinae lao Sodomu nia Gomora nia ka ia kava kamoto ka sare ani e ghua, neke fini ghu ta tuta vonana ia gufu ka kava ani taghe gufu sipana ka kaike totoi leghaha, ta ghuana.
29Ghe ne huara va mukori ghu God ira malau leghaha ka sare neke au ani Loti, manei neke ngana leghui ia fanga ka Ebarahamu, neke va malumi ghu manei Loti ta pelo ta dolina ghu manei.
Loti Nia Ira Tuunaghase
30Leghunana Loti nia ira palu tuunaghase dike ghahe kaini Zoa dike la au ghu ka giliona kaike lianga ka ira vuhuku, vununa manei neke mau ghidi ghena ira noni ani Zoa. 31Kaike ravata ia tuunaghase ta faa neke kahe ghua iahi ka ia tahina ghase ta itena, “Noda mama neto mamanekusu nia deo mane tuna ta auna ka kamotona kobosona iahi ta boka varihiona ghita palu mala vanada rekahana. 32Aria da va ketuhu gogosui ghu ka waeni noda mama, nia epu taremehana tuna e ghua, mala da boka hio rekaha ghu ka manei taghe ta ghua idi la leghu noni nga,” neke ghua ghini.
33Ka redu ianimu maneri palu dike va ketuhu ghini waeni nodi mama, nia haghele lao tuna ia tuunaghase ta faa geke la epu taremehana ghu neke ghua. Ghe manei neke gogosu fuludu neke deo ghu ge avohi ghena ghu ka ia la epu hinaena nia ka ia ke tetu vonana e ghua tuunaghase ani.
34Ia keha ravata ia tuunaghase ta faa neke kahe ghua iahi ka ia tahina ghase ta ite, “Reduo ara nake epu taremehana noda mama. Aria dake va ketuhu gogosuini ka waeni redu iahi, nia haghele lao tuna agho go la epu taremehana ghu e ghua, mala sopai hio rekahana ghita palu ka noda mama.” 35Ka redu ianimu maneri palu dike va ketuhu gogosuini nodi mama, nia haghele lao tuna ia tuunaghase ta ite geke la epu taremehana ghu, neke ghua. Manei neke toraina ketuhu gogosu fuluduni neke deo ghu ge avohi ghena ghu ka ia la epu hinaena nia ka ia ke tetu vonana e ghua tuunaghase ani.
36Ka ghaghahena iahi dike age potena ghu ira palu tatahina ghase ka Loti ia nodi mama lama taghodi palu. 37Ia tuunaghase ta faa mu neke age au kaike tuunamane, Moabu neke ghua ghini ghu manei babaolonana. Manei lamu faadira ira nonidi Moabu ghatunaina. 38Ia tuunaghase ta ite neke au molamo kaike tuunamane, Benami neke ghua ghini ghu manei babaolonana. Manei lamu neke faadira ira nonidi Amoni ghatunaina.
Zur Zeit ausgewählt:
Tatanigaina 19: kji
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Islands Bible Ministries. All rights reserved.
