Tatanigaina 14
14
Ebaramu Ne Hio Va Dolini Loti
1Ka fafata iahi, Amarafele ia mane ginitaukelana Babilonia, Arioko ia mane ginitaukelana Elasara, Kedolaoma ia mane ginitaukelana Elamu nia Tidala ia mane ginitaukelana Goeimi e ghua, 2dike la magarari keha gaha mane ginitaukela: Bera ia mane ginitaukelana Sodomu, Birisa ia mane ginitaukelana Gomora, Sinabu ia mane ginitaukelana Adama, Semeba ia mane ginitaukelana Zeboimi nia ia mane ginitaukelana Bela e ghua (ia ta va kudo ghini Zoa haro). 3Keha gaha mane ginitaukela irahi mu dike varighara ka kaike pukuna taremehadi ira nodi punugara ka ia Lovetena Sidimi (ta va kudo ghini ia Lovetena Tahi Lemena.) 4Ka giliodi tazoi palu komuhu maneri dike riva vanani Kedolaoma, ghe ka ia va tazoi litona komuhu mu, maneri dike va puhini ta mala huhughina Kedalaoma.
5Ka ia va tazoi rodanana komuhu, Kedolaoma ia mane ginitaukela nia ira keha lito mane ginitaukela e ghua dike varighara ka kaike pukuna taremehadira ira nodi punugara dike ghahe la magara ghu pelopeka mo paufurira ira nonidi Refa aianihi Asataroti Karanaimi, ira noni Zuzi ani Hamu, ira noni Emi ani Save Kiriataimi, 6nia ira nonidi Hori ka giliodi ira vuhukudi Idomu dufu hauai laona pelopeka mo ani Eleparani, ka gheremena ia malau koroghana ta karango. 7Ianimu tuna ghe dike fihiki leghu lao nga pelovona mo ani Enimisipati (Kadesi ia ta ghua ghini ghatunaina). Maneri dike hio kadoli ia kamotona malau ka ira noni Amaleke nia ira noni Amoa haro e ghua, dike auro ani Hazazoni Tama.
8Va tanari tuna ira nodi punugara ka ia Lovetena Sidimi mala magarana dike ghua ira mane ginitaukeladi Sodomu, Gomora, Adama, Zeboimi nia Bela e ghua, dike magarari ghu 9ira mane ginitaukeladi Elamu, Goiemu, Babilonia nia Elasara e ghua. Rodana mane ginitaukela dike magararira ghu gaha mane ginitaukela. 10Ia Lovetena Sidimi mu neke tehi korosa ta foudu ka taa. Ka ia dike to paufuriro dike peloro ghu ira mane ginitaukeladi Sodomu nia Gomora, kehara ka ira mane magara dike riufu lao ka ira korosa ta foudui taa nia maneri haroharo tuna gedi pelo lao ghu ka ira vuhuku, dike ghua. 11Ira rodana mane ginitaukela dike sakomo hiori ira vahina leghutau kuru lighorodi nga nia ira leghu ghano nga ani Sodomu nia Gomora, ghe dike ghahe nga. 12Maneri dike sakomo hioi haro Loti ia tuunamane ia tahinamane Ebaramu nia ira leghutau neke taghoriro manei e ghua, vununa manei neke au ani Sodomu.
13Ghe kaikeu ka ira nona mane Loti neke pelo ghahe neke la va kahe ghini ghu Ebaramu ia mane Hiburu vahina leghutau nga. Ebaramu neke au ka gheremedi ira heke ta fifiluana ka Mamare ka ia butubutu Amoa. Mamare nia Esikolo ghe Anere ira tahinamane taghonai mu dike naiungene taremehana Ebaramu mala vari tokaina ka magara. 14Ne nomohi ghu Ebaramu dike sakomo hioina maneri Loti ia tuunamane ia tahinamane taghonai, manei neke kudo kaveri ira 318 manemagara dike au taremehanaro, dike bozo leghu laori ghu pelovona mo ira rodana mane ginitaukela dike vuhai la dufuri ghu ka ia malau leghaha ta va kudo ghini Dani. 15Aianimu neke la sopai fotarira manei ira nona mane ka ia reduna, ghe dike la magarari nga paufurina. Manei neke bozori ma neke vuhai la dufu ghu ani Hoba visi pelovonana mo ia malau leghaha Damasikasi. 16Manei neke la hio leghuri ira vahina leghutau nga dike hioriro maneri. Manei neke la hio leghui molamo Loti ia tuunamane ia tahinamane taghona nia ira leghutau neke taghoriro manei nia ira fotati nia ira keha noni dike hio ghaheriro maneri, e ghua.
Melekizedeki Ne Vanani Veha Ebaramu
17Ka ia ke la leghu mehana Ebaramu leghuna ia la magara ta la paufuri ghu manei ira rodana mane ginitaukela, ia mane ginitaukelana Sodomu neke kave lao neke la dufui ghu manei ka ia Lovetena Save (Lovete ka ia Mane ginitaukela, ia ta ghua ghini haro).
18Ianimu tuna ghe neke meha nga Melekizedeki ia mane ginitaukelana Salemu nia neke kaike nona hiamao ia God ta Varanga Sughavona, hio meha beretina nia waenina ka Ebaramu. 19Melekizedeki neke vanani veha ghu Ebaramu kahe ghuana iahi,
“God ia ta Varanga Sughavona e vanani veha Ebaramu
Ia va vuhana ia kolanga nia malau iahi peka.
20Nia helahela ghini ia God ta Varanga Sughavona,
Neke paufuriro ira kana vananighona agho.”
Ebaramu neke vanani ghu Melekizedeki kaike taho ka leleghu va tazona taho ka ira vahina leghutau nga.
21Ia mane ginitaukelana Sodomu neke kahe ghua iahi ka Ebaramu, “O vanagu leghu meha ira leghu noni nga ka ara noke sakomo hioriro, nga posi vananigho taghou leghutau nira,” neke ghua ghini.
22Ghe Ebaramu neke kahe ghua iahi ka ia mane ginitaukelana Sodomu, “Ara nato va bebereana ka God Iahova ia ta Varanga Sughavona, ia neke va Vuhaio ia kolanga nia malau iahi peka, 23ta deona ara ga age posi leghui ghu kaike leghutau tei ghu ka agho, geta ghua ghu kaike laburuna seredi, ba kaike beletina sadolo. E ghua ghe go deo nga agho boka kaheina, ‘Ara lamu nake va taghotaghoina Ebaramu,’ ta ghuana. 24Ara e deo ga age hioi ghu kaike leghutau ghu malaguna taghogu. Taghe tufagu ta ghua ghidira ara mu ira ghano dike hiori dike mahairo ghu ira nogu mane lama. Nga va malumuri ira mane dike magara toka ghinaguro,—Anere, Esikolo nia Mamare, edi hiori ghu ira tufadi.”
Zur Zeit ausgewählt:
Tatanigaina 14: kji
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Islands Bible Ministries. All rights reserved.
