Matiɔ 4

Ŋkpɛli ka mɔmsiki Jisɔs

(Mak 1:12-13; Luk 4:1-13)

1Kiŋ'waka ki Baiŋni ka dzɔ Jisɔs tsə bəh wi i chwa a ŋkpɛli mɔmsi wi. 2Wi tsə ka numki fɛiŋ nshi bəh nchɔkɔ bam dzaka i kaŋ wə mbaŋnyani. Asi yəmaka nì tsə dzɔŋ bə́ wɔɔ wi. 3Wi wə wi shi kɔ a mɔmsiki bəni ka dzə dzaka i wi a, “Wɔ kabə num waiŋ Nyɔ, dzâka la a kitəh kələ fiəni chu chɔkɔ yi blɛd.” 4Jisɔs chukuli wi a, “Yi kɔ num bə nyaka a,

‘Mi nɔki kə a kɔm bə dzɛiŋ shəŋ.

Mi nɔki tə kɔm gia yichi yə yi bukuki i dzaka ki Nyɔ wə.’”

5Ayakadəiŋ, ŋkpɛli ka dzɔ tsə bəh wi i kwili wi baiŋni Jɛlusalɛm, ka tɔm wi i findɔŋ fi fwu wi juŋ yi fəni yi gia wə, 6dzaka i wi a, “Wɔ kabə num waiŋ Nyɔ, jə̄ŋ shi la fa, kɔm yi kɔ num bə nyaka a,

‘Nyɔ ni dzaka i bəchinda bu a bɔ tɔkni bəh wɔ.’

Yi chu num bə nyaka a,

‘Bɔ ni kwa wɔ,

maka wɔ chɔkɔ gbu wa i təh wə.’”

7Jisɔs chukuli i wi a, “Bə nyaka tə a,

‘Ma mɔ̂msi Bah Nyɔ wa.’”

8Ŋkpɛli chu dzɔ Jisɔs fɛiŋ, tsə bəh wi i fwu wi ŋkwuŋ widɔkɔ wi dəŋə i bɛiŋ nalə, ka chusi kitumi kichi i mbi wələ wə bəh mbum biwɔ yɛiŋ i wi. 9Ayaka wi ka dzaka i wi a, “Mih ni nya lə biɛiŋ biələ bichi i wɔ, i jɔbi wə wɔ ka gbɔ i mih nshiŋ kɔksi mih.” 10Jisɔs chukuli i wi a, “Dzâ nyə̂ fa Satan! Bə nyaka a,

‘Wɔ kɔ̂ksi a Bah Nyɔ wa,

ma wɔ nɔ̂mki a wi shəŋ.’”

11Ayakadəiŋ, ŋkpɛli ka bee Jisɔs, ka nyə. Yi num a bəchinda bə Nyɔ nì dzə ka tsɛiŋki wi.

Jisɔs yisi nɔm wi i Galili

(Mak 1:14-15; Luk 4:14-15)

12Jisɔs ka bi dza wɔkɔ a bə kwa Jɔn Njulibɔkɔ ka fa i juŋ yi nsəŋ mə, wi nyə ka fiəni chu i kimbu ki Galili wə. 13Wi tsə buku i Nasali, dza fɛiŋ tsə ka nɔki i kwili wi Kafanaum wə. Kwili wələ num kɔmsi i kinchwɔ kimbum ki Galili wə bəh i kɔmsi tsə i bimbu bi bəni bə Sɛbulun bəh bi Naftali wə. 14Gia yələ nì dzə kpɛiŋ asi mi wi ntum wi Nyɔ Isaya nì dzaka a,

15“Kimbu ki Sɛbulun bəh ki Naftali

biə bi kɔ kɔmsi i waka wi Bɔkɔ yi Jɔdan wəyaka wə,

i nshwaiŋ yi Galili wə i bəni bə̀ bɔ kɔkə Bəju,

16bəni bə̀ bɔ ni nɔki i jisi wə,

bɔ yɛiŋ baiŋni bimbum.

Wɔŋ kaka

i bəni bələ bɔ ni nɔki i di bi jisi bi kpi wə.”

17I yisi i jɔbi wiwɔ wə, Jisɔs ka yisi i fukuki i bəni dzaka a, “Mbɛiŋ kwûni shɔ́m yimbɛiŋ, kɔm ŋkuŋ bi bɛiŋ si num kɔmsi dzə.”

Jisɔs bɔɔŋ bəni bənaa a bɔ numki bwa bu bə mbaŋ

(Mak 1:16-20; Luk 5:1-11)

18Jisɔs bi nyə ka nyaniki tsəki i kinchwɔ kimbum ki Galili kpəŋ, ka yɛiŋ bəni bədɔkɔ bəfa, num mi bəh waiŋnih wi. Bəni bələ nì kɔ Samɔn wə bə nì bɔɔŋki a Bita, bəh waiŋnih wi Andulu, bɔ tum gbi i bɔkɔ, kɔm bɔ nì kɔ bəni bə kwani bwɔ́kɔ. 19Jisɔs dzaka i bɔ a, “Mbɛiŋ bîəliki mih, ma mih ni fə mbɛiŋ kwaki num lɔ bəni.” 20Akisəkə bɔ dza bee gi yibɔ ka biəliki wi. 21Jisɔs ka bi kini tsə i ninshiŋ, chu tsə yɛiŋ bəni bədɔkɔ bəfa a num mi bəh waiŋnih wi. Bəni bələ nì kɔ Jɛm bəh waiŋnih wi Jɔn bɔ nì kɔ bwa bə Sɛbide, bɔ num bəh ba wibɔ Sɛbide i ŋgwuki mə kwɔ gi yibɔ. Wi ka bɔɔŋ tə bɔ. 22Akisəkə bɔ dza bee ŋgwuki bəh ba wibɔ ka biəli wi.

Jisɔs ka laniki bəni chu chuku bə̀ jwɛiŋ

(Luk 6:17-19)

23Jisɔs ka nyaniki i kimbu ki Galili kichi lani bəni i júŋ yi bijuŋni bibɔ wə chu fuku ntum wi ndzɔŋni kɔm ŋkuŋ bi Nyɔ. Wi chuku tə na yi naiŋ jwɛiŋ i bəni wə. 24Ayakadəiŋ, ntum wələ kɔm wi waŋ tsə i tumi ki Silia wə kichi. Bəni ka dzəki bəh bəni bəchi bə̀ bɔ nì gwɛiŋki, bəh bə̀ bɔ nì kɔ i nshili wə i wi, kɔŋ a nì kɔ na bə̀ bəchinda bə ŋkpɛli nì njiŋsiki bɔ, nabə bə̀ bɔ nì gbɔki kiŋgbɔ, bəh bə̀ bɔ nì kɔ bɔ kpi wa wimu. Si bɔ nì dzəki bəh bɔ yakadəiŋ wi chuku bɔ bəchi. 25Na faiŋ wi nì tsəki mbaŋ wi bəni wimbum ka kwuki i wi chɛiŋ. Bəni bələ nì nyəki dzəki i bimbu bi tumi ki Galili wə, bədɔkɔ nyə dzə i Bikwili Jɔfi wə, bədɔkɔ i Jɛlusalɛm bəh i di bi Judea bidɔkɔ wə. Bədɔkɔ nyə dzə i kiwuŋ ki Bɔkɔ ki Jɔdan wə.

Zur Zeit ausgewählt:

Matiɔ 4: cug

Markierung

Kopieren