Kèʼlo 1

Mo Nyùy‑iì bomen yúv wùn à nsay

1Yì‑iì dzə̀ fó mbìy, Nyùy‑iì bòm yúv wùn à nsay. 2Nsay‑iì dzə̀ kilàsir, a dzə ji nə̀ʼkìkì, e kfə̀n a dzə kisáŋ, a ndzə́v ye wiyí súm kitú ke nsay kidzə̀m, a virə́ʼ ví sə́n ji cùm, a Kiyoy ke Nyùy ki ghán e kitu ke ndzəv.

3Nyùy nèn sùúy jii, «Ráne wáa dzə.» Yí ku nèn a dzə. 4Wù leéy rán yee shooy, a yí dzə̀ e juŋ feyì. Wù nèn jàvsìn rán fo ndzə ye sənér, 5e yòŋ rán ji «shùy», e yòŋ ndzə ye sənér ji «vitsə́ʼ». Á kijàvndzə wùn à ŋkuùr#1.5: kijàvndzə wùn à ŋkuùr: Kin ki dzə̀ é Lǎm Hibru jii, ŋkuùr wùn à kijàvndzə. Á yoŋ bèy, e virə̌ʼ virə̀ʼ, a Nyùy máysí ne lim yeé kishiíy kee shó. A kí dzə̀ jii, wír veé Israyi‑iì kì kév ji kishiíy kí yii keʼ e ŋkuùr, a shùy sí nəə, ndzə rán kijàvndzə, bo kishiíy kí tòʼ ne e ntìntìn, a sì lèn ghán sé lìm. Shùy kfə́n yií nəə e ŋkuùr, bo kishiíy kee shooy ki mày ne. fo kishiíy ké mbìy ki.

6Nyùy nèn sùúy jii, «Kikum ki wáa dzə ke kí javsìn ndzə́v, é yí wáa dzə mbìv sibaà, é yímóʼó wáa dzə e yuv, é yímóʼó wáa dzə fo sar.» 7Wù nèn fèr kikum, kí jàvsìn ndzə́v, yímóʼó kfə́n é yuv, yímóʼó gòʼ e nsay. Kí ku nèn a dzə bèy. 8Nyùy nèn yòŋ kikum ke kí‑iì jàvsìn ndzə́v kiy ji «yúv». Á kijàvndzə wùn à ŋkuùr fo kishiíy ke kí meen ji baà.

9Nyùy nèn sùúy jii, «Ndzə́v ye yí dzəə̀n é sar yuví báʼtí kirə́ʼ kimòʼón, é kirə́ʼ ke yumér kí yénsín.» Kí ku nèn a dzə bèy. 10Wù yòŋ kirə́ʼ ke yumér kiy ji «nsay», e yòŋ ndzə́v ye yí‑iì baʼtin rəy ji «rìbà ndzə̀v#1.10: rìbà ndzə̀v: Leéy mbìv Ji se Naarìn sí.». Nyùy leéy, e yèn, a kí dzə̀ kijuŋ feyì.

11Nyùy kfən sùúy jii, «Nsay fəə́r á kfəə́ se vifa ve teʼèn ví, é vímóʼ ví wáa fo ŋgoòy, é vicí ve ví koom vi koóm, a fo báŋ si, kee shó mo kí dzəə̀n.» Kí ku nèn a dzə bèy. 12Nsay ku nèn fə̀ə́r vifá jeéy jeéy. Vímóʼ ví ve ví fó ŋgoòy, à vicí ve ví koom vi, kee shó mo kí dzəə̀n. Nyùy leéy, e yèn, a kí dzə̀ kijuŋ feyì. 13Á kijàvndzə wùn à ŋkuùr fo kishiíy ke kí meen ji taár.

14Nyùy nèn sùúy jii, «Vikaʼày ví wáa dzə e yuv, e fíʼ jàvsìn shùy fo vitsə́ʼ ví, é ví wáa dzə visəəm ve ví din ghán sé vinyò, din sa vishiíy wùn à viyá vi. 15Vikaʼày vin vi lóo dzə e yuv, é ví wáa ban, a fo rán e kitu ke nsay.» Kí ku nèn a dzə bèy. 16Nyùy nèn fèr lúm se vikàʼày sibaà, ke kuʼùn kí wáa ban e shùy, ke terí kí wáa ban vitsə́ʼə́. Wù fèr sa mejiy. 17Wù‑uù lèm vikaʼày vin e yuv ji ví wáa ban, a fo rán e kitu ke nsay. 18Kímóʼ kí wáa ban e shùy, kímóʼ kí wáa ban vitsə́ʼə́, é ví kfə́n a jàvsìn ndzə ye ranén fo ye sənér. Nyùy leéy, e yèn, a kí dzə̀ kijuŋ feyì. 19Á kijàvndzə wùn à ŋkuùr fo kishiíy ke kí meen ji kweè.

20Nyùy nèn sùúy jii, «Vifá ve ŋeʼèn ví rún é ndzəv sí, é menə́n mè wáa dzə, a feŋ e yuv.» 21Nyùy nèn bòm nyám se kuʼkìn sí se sí yii dzə́ e ndzəv, e bòm sə́ si, à vifá vidzə̀m ve ví yii dzə́ e ndzəv ví, kfəə́ si kfəə́ si, e kfə̀n bòm menə́n medzə̀m, kfəə́ si jeéy jeéy. Nyùy leéy, e yèn, a kí dzə̀ kijuŋ feyì. 22Wù nèn səə̀vì vifá vee shooy vidzə̀m ji veé ndzəv ví wáa fəə́r kiŋgoòy kév, a kùʼ, e rùn ndzə́v sidzə̀m, é menə́n mè wáa kùʼ kitú ke nsay kidzə̀m. 23Á kijàvndzə wùn à ŋkuùr fo kishiíy ke kí meen ji tàn.

24Nyùy nèn sùúy jii, «Nsay fəə́r á vifá ve ŋeʼèn ví, kfəə́ si kfəə́ si, veé laʼ wùn à veé kwaʼ vi, ve kuʼkìn ví wùn à ve ŋaŋrìn ví.» Kí ku nèn a dzə bèy. 25Wù nèn fèr nyám seé kitu ke nsay sidzə̀m, seé laʼ wùn à seé kwaʼ si, se kuʼkìn sí wùn à se ŋeerín sí, kfəə́ si kfəə́ si. Wù leéy, e yèn, a kí dzə̀ kijuŋ feyì.

26Nyùy nèn sùúy jii, «Vèsən fer wíri e vèsə́n nshwìnín, aá wáa dzə moo vèsən, e yiì, aáwune wáa ker vitaáví vé a leéy sə́ si wùn à menə́n mè, à nyám seé laʼ wùn à seé kwaʼ si, à vifá vidzə̀m ve ví ŋaŋrì e nsay, e kfə̀n a saʼ kitú ke nsay kidzə̀m.»

27Nyùy nèn bòm wír e wun nshwìnín.

Wù bóm áwune a dzə̀ lumèn wùn wiíy.

Wù bóm, á wáa dzə rú moo wun.

28Nyùy nèn səə̀vì áwune, e sùúy jii, «Vèn wáa dzəə́, a kùʼ, e rùn kitú ke nsay. Vèn kfə́n a saʼ kitú ke nsay, a ker vitaáví vé a leéy sə́ si wùn à menə́n mè, à vifá ve ví ghán e kitu ke nsay vi vidzə̀m.» 29Wù kfən sùúy jii, «Vèn yén ri mbà, fo vifa ve ví dzəə̀n é kitu ke nsay, m fò ne ven ŋgoòy se vifa kfəə́ si kfəə́ si wùn à vicí ve ví koom vi, kfəə́ si kfəə́ si, ji vifá vén vé yi. 30Yii bèy, fo nyám si sidzə̀m, menə́n wùn à vifá vidzə̀m ve ví ŋeʼ, ghán e kitu ke nsay vi, m nen fò a dzə̀ vikwiíy wùn à vav se vifa si ji vév vee viyíkìr.» Kí ku nèn a dzə bèy. 31Nyùy leéy vifá vidzə̀m ve wù‑uù fèrìn, a ví dzə̀ vijuŋ e mbòómbòŋ. Á kijàvndzə wùn à ŋkuùr fo kishiíy ke kí meen ji ntuùfú.

Zur Zeit ausgewählt:

Kèʼlo 1: LNB

Markierung

Kopieren