John 7
7
Iesu na da Jerusalem pondo ta pambuto embo ahe poekena
1Eto iji amita ambota enda Judea embomeni na Iesu taro pehaja ke eo Iesu na kito enda Galilee ta isa ena. 2Eto Judea ta pondo javo Horoma Pondo auvihinu 3Iesu ta ambo jimbi na Iesu ta degi ke einge ea, “Inena degi erevi toto Judea enda ta pambuto no ari neite neite avo ao no ambotani na kiorote? 4Eto embo amuna dombo aisi uje aisuja amo mane ojikari na aehija avoeto embo tapa ta tihi ta ari no avo ao sigeto peni vahai ururou tihi na koguroro embo peni aisoa,” ainge ea 5amo Iesu ta ambo jimbi na Iesu humota ae avoeto ke emo eo, 6Iesu na ke mine einge ena, “Iji nau amo puvuraera te ungota iji amo inono be ra. 7Eto enda embomeni na ungota degi tumo ae rate nanena enana ta ari sasapura harikagona avoeto nau degi ta tumo eagora. 8Avoeto ungo pondo ta pambuvujo, eto nau iji puvurae avoeto na eha pondo ta mane pambasona.” ainge enu.
Iesu na pondo ta pambuna
9-10namei kamei pahuo enda Galilee ta mihimihe embo na kiora ojiketo titiha ta kiae pondo ta pambuna. 11Eto pondo ue Judea embomeni na Iesu puveite puvuraere avo kesi jombure ea. 12Eto embomeni na oenga oenga horuketo embo nei na kumumu ke na, “Embo amo javotohora,” ke ijio embo nei na, “Embo amina embo sio humbei ere pahora” ainge ea 13amo Judea ta embo okokose joru ue ke araha ta ae ojikari na ea.
14Eto Iesu na pondo orohuta puvuto temple jo ta horeto embomeni oje kahihinu 15Judea embomeni na kito haha puha ijie ke einge ea, “Embo emo school kiae rate daingeto book ere ehekihei,” ainge eo 16Iesu na kito ke mine einge ena, “Ahe Poekari nau emo na ikenu puvua Embo amita ahe poekari ra te nau hotembari na aera, 17te embo amuna God ta uje avo aisuja embo amina ahe poekari nau amo God ta degi eto puvurari rete nau degi ta eto puvurari re avo be kesuja. 18Eto embo amuna amita hotembari na embomeni ahe poekasuja amo embomeni na kito embo peni ke ijie jakeka ara aisuja rate embo amuna ikari embo avo embomeni na jakeka ara ke hande aisuja amo ke sokova na mane hande aisuja te ke be na pere aisuja. 19Eto Moses na ke pepeni ikenute ikae re? Eto ikena te ungo tapa na poekagova te do eto na tavo pehana uje ere ove?” ainge enu 20embomeni na, “Umo ahihi sapura na jo ta horari ra. Embo amuna umo taisi erere?” ainge eo 21Iesu na ke einge ena, “Na ari vahai jangu indari iji te ehena avo ungona kito ke isapamane ereva te erevi hotembevujo 22eto Moses na hamo kakamba ava ena (ari amo amina ihikae rate ungota ohihi mamahu na ihikari ra) Eto ari amo ungo na jangu indari iji te eagova. 23Eto na ke erena amo ungona Moses ta ke pepeni agi ue jangu indari iji te embo ta hamo kakamba eagova ainge dombo na jangu indari iji te embo ta hamo javotoho uena avoeto ungo do eto nau degi ta tumo ere ove? 24Eto ungo embo ta ari javotoho rete sapura re avo tihi na kogue pe pekihi emina ke re eagova te jo na aera,” ainge Iesu na ena.
Embo emo Keriso be rete avo ke kasea
25Eto iji amikote da Jerusalem embomeni na ke mine ara eto einge ea. “Eto embo tasi uje ere ora emo erevi rete o erevi manere? 26Eto embo emina ke eria te haekae eto nei do ae rate embo okokose na embo erevi Keriso be ere hotembiherete? 27Eto embo emita puvurari degi amo ungotena kiarira te Keriso be simba ere ovora avo puvuraehija amo ungotena amita puvurari degi avo mane kiaehera.” Ke ainge embomeni na ea.
28Eto Iesu na temple jo ta embomeni ta degi ahe poekihe ke vasiri na eto einge ena, “Eto ungo na kiarira eto na daingeto puvena amo ungo kiarira eto na uje nau oenga na puvurae rate Embo vahai na ikehei puvena amo ke be rate Embo amo ungo kiaera te 29Embo amina na ikehei puvena avoeto Embo amo na kiarira,” ainge enu, 30embomeni na ingito andito humbasi ea te amita iji puvurae avoeto God na haekenu toa. 31Te embomeni nei uhoho ai ta mihia amina Iesu ke be ijie ke einge ea, “Eto Keriso na puvuto ari neite neite aisuja ke eagora amo Keriso erevira.” Ainge ijio.
Temple ta police na Iesu humbasi pambua
32ke peni vahai be enu Pharisee embomeni na ingito temple ta police na Iesu humbuto tipura ta ikara eo pambua.
33Eto Iesu na ke einge ena, “Na ungote iji isapa mihima na ikena Embo ta degi ehako egerembeto pambasona 34eto ungo na jombure eto hambae asova amo na pambasona degi amo ungo mane pambasova.” Ainge enu, 35Judea embomeni na ingito ke mine ara ijie einge ea, “Embo emina pambuto mihirou mane hambara ke eria degi mo davorami erei? Eto Judea embomeni Greek enda nei nei ta pambuto iragora ai pambuto ahe poekasi ereite? 36Eto ‘Na pambasona amo ungo na jombure eto mane hambasova eto na pambasona degi amo ungo mane pambasova’ ainge eria amita ke be mo deirami erei?” ainge ea.
Eto Iesu na daroho umo ikasi ke ena.
37Eto pondo iji tutumota pondo iji peni puvunu Iesu na ereto heteto ke vasiri na eto einge ena, “Eto embo amuna umo ujeje ururou kito evujo nau degi ta huroi. 38Eto embo amuna na humota ere oi avo evujo hurou umo ikano indoi. Eto God ta ke kajari ta einge mihia. ‘Amita jo ta umo kuru na viharako eto vasiri te daroho iresuja.’” ke ainge ena 39amita ke be amo Iesu na pambuto Mamo ta usasa ta horeto Ahihi Otohu ikau puvuto Iesu ke be ea embomeni amita jo ta horasuja amita ke avo ena.
Eto embomeni na Keriso amunure avo ke taimbea
40Eto embomeni nei uhoho na ke avo ingito einge ea, “Eto embo emo peroveta simba ere ovora vahai avora.” ainge ijio 41embo nei na, “Embo emo Kerisora.” ainge ijio embo nei na, “Keriso simba ere ovora amo Galilee embo na mane aisuja 42te David ta ahije vahai David ta da Bethlehem embo na Keriso aisuja ainge God ta ke kajari ta mihia” ainge ea 43amo embomeni tapa amita hotembari vahai na ae rate hotembari tunga oenga oenga na ea 44eto embo nei uhoho na Iesu humbuto tipura ta ikasi uje ea te enana ta ingeni amo Iesu ta hamo ta ingeni jujurukae.
Judea ta embo okokose na Iesu ke be ae ea
45Eto temple ta police na egerembeto priests pepeni te Pharisee embopo ta degi pambuo ke einge eto ingia, “Ungo do eto Iesu humbuto puvurae eheve?” ainge eo 46police na ke mine einge ea, “Eto embo amina ke ainge ae ingae pekota ke javotoho eria.” ainge eo, 47Pharisee embo na ingito ke einge ea, “Eto ungote tapa embo amita ke ingihe ere pahove? 48Eto ungo kogova amo kiari embo pepeni te Pharisee embo te na embo avo ke be aera. 49Eto tumo sosou embopo amina embo amita ke ingihe mihera amina Moses ta ke pepeni avo kiae ue ere pahora amo God na hana kiari ikasuja.” ainge eo, 50embo vahai Nicodemus Iesu ta degi kihi pambuna amina ke einge ena. 51“Eto embo ta sapura deire avo ganoka eto ingae teho sio humbasora amo ungotenau ke pepeni Moses na kajena amo ainge rete?” ainge enu, 52Pharisee embomeni na ke mine einge ea, “Umo te tapa Galilee embo rete? Umo oenga eheketo ki. God ta peroveta tapa amo da Galilee ta eto mane puvagora,” ke ainge 53eto embomeni sisiketo pambua.
Zur Zeit ausgewählt:
John 7: OKVH
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 1988, Wycliffe Bible Translators, Inc. All rights reserved.
