John 17

Iesu na pari ena

1Eto Iesu na tihi i ta eto pari einge ena, “Mama, nau iji puvija avoeto sovera no avo nau degi ta ikejo usasa ururou embomeni na kiore. Eto, Mama, nanena ano usasa no avo peni ururou embomeni kito javo no avo aro peni ai. 2Eto Mama, inena embomeni tapa avo no Meni ta ingeni ta ika avoeto inena embomeni nau toho ikari amita degi ejo vasiri daroho irari ikane 3eto embo na umo oenga God ra ainge ijie inena Iesu Keriso enda ta ikae puvuna ainge ijie vasiri te daroho iresuja. 4Eto inena pure nane ana ika avo ehene irae ehei no javo enda ta peni ehija. 5Eto Mama, na no usasa ta horari iji puvija amo enda ae kihi ta no usasa ta ungote mihahena avo eto inena javo nau ejo peni ai. 6Eto enda embo inena siriketo humbuto nau ikae nanena ehene umo ere kogora. Eto embomeni no nau ika amina ke no agi ere ovora 7eto eha oroho emite amo nau ke te ari te amo no degi ta eto puvurari avo be ere kogora 8eto amita be amo inena ahe poekari no nau degi ta ikari avo enana ta degi hande one ingihe inena na ikae puvua avo enana na ke be erera. 9Eto na embo tapa avoeto pari ae rate embo no nau ika amo embo no avoeto pari ereona. 10Eto tapa nau amo toho nora eto tapa no amo toho naura. Eto enana na ore javo nau peni ere ua, 11eto na enda ta mane iresona te na no degi ta pahurono enana na enda ta iresora avoeto, Mama Otohu, no javo sinderi te amina enana simba ejo. Eto dago vahai ainge dombo enana vahai are. 12Eto na enana ga mihie sovera no nau degi ta ikari amina enana simba one javotoho mihera te no ke mahu kajari ta mihia avoeto jenge indari embo na umo toto pambija avoeto hana kesuja. 13Eto na no degi ta pambasona avoeto enda erei mihie enana nau tunga javotoho ari avo umbara no degi ta ke erevi erena 14eto enana amo enda ta toho mane, na iteko, avoeto ke no avo ene ingihera avoeto enda embomeni na tumo ere ora. 15Amo na enana enda ta eto umbae penunu aerate engekari embo avo peikihe enana simba ae erena 16te na enda ta toho mane ainge dombo enana amo enda ta toho manera, 17te no ke amo ke be avoeto no ke be ari na enana ejo otohu are. 18Eto na inena enda ta ika ainge dombo nanena enana enda ta ere ikihena 19eto enana ke be ijie otohu ara nanena enana avoembo otohu aisona. 20Eto na enana avoembo pari ae rate enda embomeni na enana ta ke ingihe na ke be aisora avoeto pari ere ona. 21Eto enana ejo tunga vahai eto jo vahai are. Eto Mama, na jo no ta mihena eto umo jo nau ta mihea ainge dombo enana ejo ungotenau jo ta irore. Eto ari avo enda embomeni na kito na inena ikari avo hotembihe ke be aisora. 22Eto ungotena vahai ainge dombo enana vahai ara inena no usasa nau degi ta ika avo nanena enana ta degi ikehena. 23Amo na enana ta jo ta eto umo jo nau ta ra. Eto inena ejo enana ta jo vahai ari inono au enda embomeni na kogue na inena ikari avo ke be aisora eto inena na osa eagoa ainge dombo enana osa eagoa avo hotembasora. 24Mama, embomeni inena nau ikari avo na pambuto iresona degi ai ta pambuto irora uje ere ona. Eto mihie enda irae kihi ta inena na osa ue usasa nau degi ta ika avo kiora uje ere ona. 25Mama, umo ari javotoho ari embo, avo enda embomeni na umo kiae rate nanena umo kiagona eto embomeni nau emina na inena ikae puvua avo ere kogora. 26Nanena javo no avo enana ta degi harikehene ingera eto ehako kaiketo ano ingihiroro inena na osa ere oa eto osari avo enana ta jo enetihirou na enana ta jo ta iresona,” ainge Iesu na pari ena.

Zur Zeit ausgewählt:

John 17: OKVH

Markierung

Kopieren