John 15

Iesu amo esi uhu be ra

1Eto Iesu na ke einge ena, “Namo esi uhu be ra eto nau Mama amo Pure Mamora 2eto esi hatu vahai be ae aisuja amo sapura avoeto gisiketo gosukau iraesuja eto hatu nei be eaguja avo kito kombu poekau be isapamane aisuja 3eto ungo nau ke eagone ingagova avoeto hatu ta kombu poekari avoeto nau jo ta iresova eto na ungota jo ta iresona. 4Eto hatu na be oenga mane eaguja te uhu mihia avoeto hatu ta be eaguja, ainge dombo ungo namote irae amo ungota be mane aisuja 5eto namo esi uhu ra eto ungo esi hatu ra eto ungo namote iresova eto na ungote iresona amo be isapamane aisuja rate tiukasora amo be mane aisuja 6eto embo amuna na toto pambasuja amo hatu tiukeore jaise eaguja ainge au humbuto ji ta ikaro evekasuja. 7Eto umo namote mihiro nau ke avo no jo ta irirou umo do uje eto penunu aisoa amo ikano humbasoa. 8Eto ungo na be isapamane ururovo amo embomeni na nau Mama ta usasa javotoho koguroro ungo nau ambotani be aisova. 9Eto nau Mama na na osa eaguja ainge dombo nanena ungo osa ere ona avoeto ungo nau osa ari ta irivujo 10eto nau Mama ta ke agi ue nau Mama ta osa ari ta iragona ainge dombo ungo ke nau tapa agi aisi uje eto kito osa ari nau ta irivujo. 11Eto osa ari nau na ungota jo enetau tunga javotoho be ava ehene ere ingiheva. 12Avo ari vahai erevi ava erena, eto na ungo osa ere ona ainge dombo ungo na osa mine ara evujo. 13Eto embo na amita namei kamei osa ue oreketo pehasuja amo osa eagora amo dembasuja. 14Eto ungo ke nau tapa avo agi ue amo namei kamei nau be aisova 15eto na ungo pure embopo ke ijiena te avo toto ungo nau namei kamei ke aisona amita be amo pure embo na pure mamo ta ari tapa avo mane kiaguja rate na Mama ta ari tapa amo kiagona avoeto ungota degi eagone ingagova avoeto ungo nau namei kamei ra. 16Eto ungona na uje ae rate nanena ungo uje eto siriketo humbuhana amo ungo be ava ikehene pahava eto be amo mane sari aisuja te daroho iresuja. Eto ungo na nau javo ta do uje eto penunu aisova amo nau Mama na ikau humbasova. 17Eto na ungota degi ke peni be amo ari vahai erevi ava erena. Ungona osa mine ara evujo.

Enda embomeni ta tumo ari

18Eto enda embo na ungo uje ae ururoro kito amo ke erevi hotembevujo, ari amita kihi ta amo na uje ae ere uahera 19eto ungo enda embo ta toho aheva amo enda embo na ungo osa ahera te ungo nanena enda ta eto umbua avoeto ungo enda embo mane avoeto enda embo na ungo osa ae eagora. 20Eto ke mahu nanena ea avo hotembevujo, eto pure embo amo isapa eto pure mamo amo peni ra. Avoeto nau degi ta memenga ikasora ainge dombo ungota degi ta memenga ikaro keisova. Eto ke nau agi aisora amo ungota ke te tapa agi aisora. 21Amo na ikari embo avo kiae na vahai kiora avoeto aisora. 22Eto na puvuto enana ta degi ke avo ae toaehena amo na enana ta degi pehumba mane ahena te na puvuto ke mahu ijiena avoeto enana ta ari tapa amo teto haito ari inono aera. 23Eto embo amuna na tumo eaguja amo nau Mama te tapa tumo eaguja 24eto embo nei na puvuto ari neite neite ae kiae rate nanena puvuto ari neite neite ehene kehera. Eto ainge ae kiae amo enana ta degi pehumba mane ahena te enana ari tapa ehene kera te namote nau mama te avo uje ae ere ora. 25Amita ke avo God ta ke kajari ta einge kajari mihia, ‘Enana ke amita susu irae rate teho sio tumo sosou nau degi ta ere uahera.’ ke ainge kajari mihia avo eto ehera. 26Eto na Mama ta degi pambuto ungota hondate ari embo ikano puvuresuja amo ke be ari ta Ahihi Mama ta degi puvaguja avo puvuto nau harika embo aisuja. 27Eto ungo te tapa ihikari ta namo te tapa mihovova avoeto ungote tapa harika ari embopo nau aisova.”

Zur Zeit ausgewählt:

John 15: OKVH

Markierung

Kopieren