John 13

Iesu na amita ambotani ta utu egena

1Eto Iesu na enda toto Mamo ta degi pambasuja amita iji puvuna amo jarukari pondo asora amita mume amina Iesu na kina. Eto Iesu na enda ta mihie amita embomeni osa ena amo doaingere avo au kiora ari einge ena. 2Eto Iesu na amita ambotani ga indari indie mihinu Satan na Simon ta meni Judas Iscariot ta degi Iesu harikau umbara enu ingina. 3Eto God na amita pure tapa Iesu ta ingeni ta iketo tona amite eto Iesu God ta degi eto puvuna avoeto ehako egerembeto pambasuja amite tapa Iesu na kina. 4Eto indio irae enu Iesu na ereto heteto amita bo hamo ta avo houketo hamo tuhari soi humbuto uhu ta tigito 5umo heva ta timbuto overeketo ambotani vahai vahai ta utu egeto soi uhu ta tigina amina tuhihe 6puvuto Simon Peter ta degi puvunu Iesu ta degi ke einge ena, “Bada, umo utu nau egasi ere oe?” ainge enu, 7Iesu na ke mine einge ena, “Na do ere ona ungo eha emo kiae ereova te ambota kesova,” ainge enu, 8Peter na, “Uhu nau avo mane egasoa,” ainge enu Iesu na ke mine einge ena, “Eto na utu na egae amo namo te vahaita mane aisoa,” ainge enu, 9Peter na, “Bada aravora, te nau utu pere mane egasoa te ingeni te siro te tapa egasoa,” ainge enu, 10Iesu na einge ena, “Eto embo na umo kuhasuja amo tongopa irae avoeto ehako hamo mane egasuja. Eto umo tongopa ambu rate embo nei ei ta amo ainge manera,” 11ke ainge ena amita be amo jenge indesuja embo amita jo avo Iesu na kogue ke “Embo nei ei ta amo ainge manera,” ainge ena. 12Eto Iesu na ambotani ta utu egenu irae enu amita bo asuketo pambuto gaga ta arumbeto 13ke einge ena, “Eto na ungota degi ahe kihira ehena emo ungo ere kogovete? Amita be amo erevira, ungona na ungota bada ke eagova eto ungota ahepoekari embo ke eagova amo ke be ra te 14na ungota bada eto ahepoekari embo na ungota utu egehena ainge dombo ungo oenga utu mine ega evujo. 15Eto ungona kito ainge ava ahe kihira ehena. 16Na ungota degi ke be erena, pure ikari embo amo embo penira eto pure ari embo amo isapara eto nei amo ke ari embo amo embo peni ra eto ke hande ari embo amo embo isapa ra 17eto ari erena avo hotembeto agi ue tunga javotoho te iresova. 18Eto na ungo siriketo humbena amita jo amo na ere kogona avoeto ke erena emo ungo tapa ta degi aera. Te God ta ke mahu kajari einge mihia, ‘Embo vahai namo te arumbeto ere india amo nau degi ta kitoho ereua,’ kajari ainge mihia avo au inono aisuja, 19eto ari emo puvurae peko ta ene ere ingiheva amita be amo puvurou kito ungona na ke be aisova. 20Na ungota degi ke be erena, eto embo amuna nane ikano pambasuja embo avo pekasuja amo namote tapa pekasuja. Eto na pekasuja amo na ikari Embo te tapa pekasuja.”

Eto Judas na Iesu harikasuja avo ke ena

(Matthew 26:20-25; Mark 14:17-21; Luke 22:21-23)

21Eto Iesu na ke ainge eto jo ta osaga peni vahai be kito ke einge ena, “Na ungota degi ke be erena, ungo vahai na kitoho embo ta degi harikavo na humbasora,” ainge enu, 22ambotani na mine kia ue ke eria amita be mo deire ainge ijio 23ambotani vahai Iesu na osa ena embo amo Iesu ta engihi ta hereketo mihina amita degi 24Simon Peter na ingeni na ahe ahe ue amunurami erei eto inga ainge ijinu 25Iesu ta jenge ta siro na tembeto, “Bada, amunure,” ainge enu 26Iesu na ke einge ena, “Na bread humbuto su heva jo ta kaimbeto ikano indesuja embo re aravora,” ainge eto bread humbuto kaimbeto Simon Iscariot ta meni Judas ta ikenu 27humbunu Satan na amita jo ta horenu Iesu na Judas ta degi ke einge ena, “Umo do uje ere oe avo sausau pambuto ejo.” ainge enu 28ambotani nei uhoho na ke be ingae 29avoeto einge hotembea, Judas amo ambotani ta koro simba ari embo avoeto pambuto pondo asora amita indari umbaja ereite mo donda ambu embopo ta hande ikaja ereite avo hotembiho, 30Judas na bread humbuto ereto araha mume ta pambuna.

Osa mine ara ari ta ke

31Eto pahunu Iesu na ke einge ena, “Eto iji nau puvija eto God ta usasa na Embo ta Meni joekau embo na God ta usasa kesora 32eto God na nau usasa ikau usasa ta horasona amita iji ahumpa ehija 33te ajao nau meniundi, na ungote iji koso mane iresona te ke mahu Judea embomeni ta ehene ingera avo ungota degi erena ungo na jombure eto amo na pambasona degi ai ungo mane pambasova. 34Eto na ungota degi ke peni be avo eha ere ikihena amo osa mine ara evujo. Eto na ungo osa eagona ainge dombo ungo osa mine ara evujo. 35Eto ungo na osa mine ara ururovo embo tapa na kito amo Iesu ta ambotanira asora,” ainge enu.

Peter na Iesu kiae ke aisuja avo Iesu na harikena

(Matthew 26:31-35; Mark 14:27-31; Luke 22:31-34)

36Simon Peter na ke einge ena, “Bada, umo dainge pambao?” ainge enu Iesu na einge ena, “Umo na eha pahurono mane pambasoa te ambota pambasoa,” ainge enu 37Peter na ke einge ena, “Na do eto umo pambasoa degi ai ta mane pambana ere? Na umo embo sari asi hotembihena.” ainge enu, 38Iesu na ke mine einge ena, “Umo na embo sari asi ke ere? Na no degi ta ke be erena, umo iji 3 na kiae ke ijiro ohora javone aisuja,” ainge Iesu na ena.

Zur Zeit ausgewählt:

John 13: OKVH

Markierung

Kopieren