यूहना 3

यीसू अर निकुदेमुस

1निकुदेमुस नाम गो एक यहुदियां गो नेता बठै हो अर बो फरीसिया माऊं हो। 2एक रात बण यीसू कनै आ'गे पूछयो, हे गुरूजी, म्हे जाणा हां कै म्हानै सिखाण खातर थे परमेसर गी ओर ऊं आया हो क्यूंकै थे झिका निसान दिखावो हो बे परमेसर गी मदद बिना कोई कोनी दिखा सकै।

3यीसू बिनै उतर दियो, “मैं तनै साची साची केऊं जे कोई आत्मिक रूप ऊं नुअं सिरै ऊं जन्म ना लेवै तो बो परमेसर गै राज में भागिदार कोनी बण सकै।”

4निकुदेमुस बिनै पूछयो, “जे कोई आदमी बुढो हो जावैगो तो फेर जन्म किंया ले सकै है। क्यूंकै जन्म लेण खातर बो दूसर आपगी मां गै कूख में कोनी जा सकै।”

5यीसू उतर दियो, “मैं तनै साची साची केऊं जद कोई पाणी अर पवितर आत्मा ऊं जन्म लेवै है जद ई बो परमेसर गै राज में जा सकै है। 6अर मां बाप ऊं लोग जन्म लेवै है तो बे सिरफ सरीर ऊं जन्म लेवै पण आत्मिक जीवन गी सुरुवात एकली पवितर आत्मा ऊं होवै है। 7मैं झिको कीं तनै केयो बिं पर अचंभो ना कर, तनै नुअ सिरै ऊं जन्म लेणो ई होवैगो। 8पून गो जिनै जी करै बा बिनै चालै है, थे बिंगी आवाज सुण सको हो पण थे कोनी जाण सको कै बा कठूं आवै है अर किनै जावै है। आत्मा ऊं जन्म लेएड़ो हर एक आदमी हिस्यो ई है।” 9निकुदेमुस उतर दियो कै, “ऐ बातां किंया हो सकै।”

10ओ सुणगे यीसू बिनै केयो, “तूं इसराएल गो एक ई गुरू होगे बी तूं आ बात क्यूं कोनी समझै। 11मैं तनै साची साची केऊं झिकी सच्चाई म्हे जाणा हां बो ई म्हे बोला हां। अर बो ई कीं बतावां हां झिको कीं म्हे देख्यो है। पण थे लोग जिंया म्हे केवां हां कोनी मानो। 12जद मैं थानै धरती गी बातां बताऊं तो तूं बिं पर बिस्वास कोनी करै। ईंखातर जे मैं सुरग गै बारै में बताऊं तो बिं पर किंया बिस्वास करैगो। 13मैं झिको मिनख गो बेटो सुरग ऊं आयो हूं अर अब तांई कोई बी सुरग पर कोनी गेयो पण एकलो मैं ई गेयो हूं। ईंखातर सुरग गै बारै में एकलो मैं ई जाणू हूं। 14जिंया मूसा बन उजाड़ में सांप नै ऊंचो चढायो इंयाई मैं झिको मिनख गो बेटो हूं आपगी जान देण खातर लोग करूस पर चढावैगा। 15जिंऊं झिको कोई बिं पर बिस्वास करसी बिनै अनन्त जीवन मिलसी।”

16क्यूंकै परमेसर संसार गै लोगां सागै इतो प्रेम करयो कै आपगो एकलोतो बेटो दे दियो कै झिको कोई बी बिं पर बिस्वास करै बो नास ना होवै पण अनन्त जीवन पावै। 17परमेसर आपगै बेटै नै संसार गै लोगां नै सजा देण खातर कोनी भेज्यो पण बिंगै द्वारा संसार गै लोगां नै मुकती मिलज्यै ईंखातर भेज्यो। 18झिको परमेसर गै बेटै पर बिस्वास करै है बिं पर सजा गी आग्या कोनी होवै पण झिको बिं पर बिस्वास कोनी करै बिनै दोसी बणागे सजा मिलैगी क्यूंकै बण परमेसर गै एकलोतै बेटै पर बिस्वास कोनी करयो। 19अर सजा गी आग्या गो कारण ओ है कै परमेसर गो बेटो एक जोती गी तरियां ईं संसार में आयो पण लोग भोत बुरा काम करण आळा हा। ईंखातर लोग जोती गै उपर प्रेम पसंद कोनी करयो पण अंधेरै तरियां पाप करणो पसंद करयो। 20क्यूंकै झिको कोई बुराई करै है बो जोती नै पसंद कोनी करै अर बो जोती गै कनै कोनी आवै जिंऊं बिंगा बुरा काम सामणै ना आ जावै। 21पण झिको सच्चै रास्तै पर चालै है बो जोती गै कनै आवै है अर बा जोती परगट करै है कै ओ झिको करै है बो परमेसर गी इच्छा गै अनुसार करै है।

यीसू गै बारै में यूहना बतिस्मो देण आळै गी गवाई

22कीं दिनां गै बाद यीसू आपगै चेला गै सागै यहुदियां परदेस में आयो। चेला गै सागै रेगे लोगां नै बतिस्मो देण लागग्यो। 23जद यूहना बतिस्मो देण आळो बी सालोम सैहर गै नेडै़ ऐनोन गाम में लोगां नै बतिस्मो देवंतो हो क्यूंकै बठै भोत पाणी हो अर हर रोज लोग आ'गे बतिस्मो लेवंता हा। 24आ घटना यूहना गै जेळ में जाण ऊं पेलां होई। 25बठै यूहना गै चेला अर एक यहुदी गै सागै सुद्धी गै बारै में बाद बिवाद होयो। 26अर बां चेलां यूहना कनै आ'गे केयो, गुरूजी, झिको आदमी यरदन गै दूसरै पार थारै सागै हो अर बिंगै बारै में थे बतायो हो कै बो ई मसी है अब बो आदमी लोगां नै बतिस्मो देण लागरयो है अर भोत लोग बिंगै कनै जाण लागरया है।

27यूहना बानै उतर दियो कै जे परमेसर गी इच्छा ना होवै तो कोई कीं कोनी ले सकै। 28मैं थारै सारै लोगां गै सामै बतायो हो मैं मसी कोनी हूं पण बिंगै खातर रा तैयार करण खातर बिंऊं पेलां भेज्यो गेयो हूं। 29झिको बीनणी नै ब्या कर'गे ले जावै है बो ई बीन होवै है अर बीन गै सागैआळो खड़यो बिनै उड़ीकतो रेवै है अर जद बो बीन गी आवाज सुणै है, जद बो भोत राजी होवै है ओ सुणगे सारा यीसू गै कनै जाण लागग्या हा, इंऊं मेरी खुसी पूरी होवै है। 30जरूरी है कै बो पूरी तरियां ऊं मोटो होवै अर मैं बिंऊं छोटो होऊं।

31यूहना बतिस्मो देण आळै फेर बानै केयो बो ई सुरग ऊं आयो है अर सारा ऊं म्हान है। झिको ईं धरती ऊं आयो है, बे सिरफ आदमी है अर बे सिरफ ईं धरती गै बारै में ई बाता करै है। पण बो सुरग ऊं आयो है। ईंखातर बो सगळा ऊं म्हान है। 32झिको कीं बण सुरग में देख्यो अर परमेसर ऊं सुण्यो बिंगी गवाई देवै है पण इंगी गवाई कोई मानै कोनी। 33पण झिका बिंगी गवाई मानल्यै तो बो गवाई देवै है कै परमेसर साच्चो है। 34क्यूंकै बो झिकै नै परमेसर भेज्यो है बो परमेसर गी बाता ई बोलै है। क्यूंकै परमेसर बिनै पवितर आत्मा पूरी तरियां ऊं देवै है। 35पिता आपगै बेटै नै प्रेम करै है अर बण सारी चिजां गो अधिकार बिंगै हात में दे दियो है। 36झिको परमेसर गै बेटै पर बिस्वास करै है बिनै ई अनन्त जीवन मिलैगो। पण झिको परमेसर गै बेटै गी आग्या नै कोनी मानै बिनै कदी अनन्त जीवन कोनी मिलैगो पण परमेसर बिं पर रीस कर'गे सजा देवैगो।

Zur Zeit ausgewählt:

यूहना 3: BGQ

Markierung

Kopieren