Matáyɔ 1
1
Ina á ɓato á k'ɛɓɔkɔti nde Yéso aɓɔkɔtɛani kau
(Ɔna phɔtɔ Lók 3.23-38)
1Cɔ, ɔnani ina á ɓatatakɛ na Yéso-Kiísito, mosuko á Daúdi, mosuko á Abalaámu. 2Abalaámu ɗámɓɔkɔti Isáka. Isáka áɔmɓɔkɔta Yakɔ́ɓɔ. Yakɔ́ɓɔ áɔmɓɔkɔta Yúda na ɓana-amakɛ. 3Yúda áɔmɓɔkɔta Phalɛ́si na Jɛɛ́a ama ɓaniki ndɔ ɗátú Tamáli. Phalɛ́si áɔmɓɔkɔta Ɛsilɔ́ni. Ɛsilɔ́ni áɔmɓɔkɔta Alámu. 4Alámu áɔmɓɔkɔta Aminadábu. Aminadábu áɔmɓɔkɔta Nasɔ́ni. Nasɔ́ni áɔmɓɔkɔta Salɔmɔ́ni. 5Salɔmɔ́ni áɔmɓɔkɔta Bɔási, amakɛ na Bɔási ɗátú Laába. Bɔási áɔmɓɔkɔta Ɔbɛ́di, amakɛ na Ɔbɛ́di ɗátú Lúta. Ɔbɛ́di áɔmɓɔkɔta Yɛ́sɛ. 6Yɛ́sɛ áɔmɓɔkɔta moamɛ Daúdi. Cɔ, moamɛ Daúdi áomɓɔkɔta Sɔlɔmɔ́nɔ, amakɛ na Sɔlɔmɔ́nɔ ɗátú nkakɛ na Ulía#1.6 Daúdi ɗámɓɔkɔti Sɔlɔmɔ́nɔ na nka á ɛɓɔndɛ á Ulía..
7Sɔlɔmɔ́nɔ áɔmɓɔkɔta Lɔbɔámu. Lɔbɔámu áɔmɓɔkɔta Abíya. Abíya áɔmɓɔkɔta Asáphu. 8Asáphu áɔmɓɔkɔta Yɔsɔpháti. Yɔsɔpháti áɔmɓɔkɔta Yɔlámu. Yɔlámu áɔmɓɔkɔta Ojía. 9Ojía áɔmɓɔkɔta Yɔtámu. Yɔtámu áɔmɓɔkɔta Aáji. Aáji áɔmɓɔkɔta Ɛjɛkía. 10Ɛjɛkía áɔmɓɔkɔta Manásɛ. Manásɛ áɔmɓɔkɔta Amɔ́si. Amɔ́si áɔmɓɔkɔta Yɔsía. 11Yɔsía áɔmɓɔkɔta Yɛkɔnía na ɓana-amakɛ ka mbenɔ nde ɗáɓěge na Ɓaisilaɛ́li ka kɔkɔɓɛ na Babɛ́li#Ɔna 2 Ɓam 24.12-16. 12Mbusa á gǎ na ɓɔ ka kɔkɔɓɛ, Yɛkɔnía áɔmɓɔkɔta Satiɛ́li. Satiɛ́li áɔmɓɔkɔta Jɔɔɓaɓɛ́li. 13Jɔɔɓaɓɛ́li áɔmɓɔkɔta Abiúdi. Abiúdi áɔmɓɔkɔta Ɛliakímu. Ɛliakímu áɔmɓɔkɔta Ajɔ́ɔ. 14Ajɔ́ɔ áɔmɓɔkɔta Sadɔ́ki. Sadɔ́ki áɔmɓɔkɔta Akímu. Akímu áɔmɓɔkɔta Ɛliúdi. 15Ɛliúdi áɔmɓɔkɔta Ɛlɛajái. Ɛlɛajái áɔmɓɔkɔta Matáni. Matáni áɔmɓɔkɔta Yakɔ́ɓɔ. 16Yakɔ́ɓɔ áɔmɓɔkɔta Yɔsɛ́phu, munyakɛ na Malía, mmbé ɗámɓɔkɔti Yéso mmbɔ ɓáɔmɔphana Kiísito.
17Cɔ, ka ɓɔbu ɗáɓátú ɛɓɔkɔti nkama na gena (14) kpanga ka Abalaámu, na gǎ jua ka Daúdi. Goto ɛɓɔkɔti nkama na gena (14) kpanga ka Daúdi na gǎ jua ka mbenɔ á gǎ na ɓɔ ka kɔkɔɓɛ na Babɛ́li. Goto ɛɓɔkɔti nkama na gena (14) kpanga á gǎ na ɓɔ na Babɛ́li, na ka sungiaga á ɓɔkɔtɛana á Kiísito.
Ɓɔkɔtɛana á Yéso Kiísito
(Ɔna phɔtɔ Lók 2.1-7)
18Cɔ, ɓɔkɔtɛana á Yéso Kiísito ɗátú ɓe: Yɔsɛ́phu ɗántɔmi Malía, amakɛ na Yéso. Yɔsɛ́phu na kádondanimbɛ na yɛ, Malía áokumba éme ka ɓukpɛkpɛ á Měma á kanga ɓojeɗe. 19Yɔsɛ́phu, mǒko nɛkɛ á mbanje ɗátú gǎkɛ nto á koɗoni. Ɗákákondi kusa akɛ na soni mosá á ɓakpa, áokonda ɗeketa á Malía ka ɓɔsɔmɛa. 20Mbenɔ nde Yɔsɛ́phu ɗáoianaga nyɔngɔ ndɔ, Malaéka ndea Mɔkɔta áɔnsɛnɛkɛa ka njeki, áongoɗea: «Yɔsɛ́phu mosuko á Daúdi, kɔ́ɓɛ́mbɛ na kɔɓɔɓɔkɔ ka ɓoa á nkakɔ Malía nga, akumbi éme ndɔ ka ɓukpɛkpɛ á Měma á kanga ɓojeɗe. 21Amɓɔkɔtande miki-mǒko, onsuande ina akɛ Yéso. Yɛ aámbé aeamisande ɓakpa nɛkɛ ka ɓojeɗe nɛɓɔ.» 22Nyɔngɔ ndɔ bui ɗátɔtɔkɛani ka tɔtɔkisa á nyɔngɔ nde Mɔkɔta ɗán'yɔngisi Mɔtu-nyɔngɔ ndea Mokonga gea:
23«Nseka akumbande éme. Amɓɔkɔtande miki-mǒko,
ɓámɔphanande Ɛmanuɛ́li#Ɔna Isa 7.14.»
Ande gea te: «Mokonga a kimoci na ɓesu.»
24Ka jujúka á Yɔsɛ́phu, áogea ɓíndɔ Malaéka ndea Mɔkɔta ɗánsosi. Áomɓoa nkakɛ Malía. 25Ɗákádondani gǎkɛ na yɛ na ka ɓî Malía ɗámɓɔkɔti miki-mǒko, mmbɔ Yɔsɛ́phu ɗánsu Yéso.
Zur Zeit ausgewählt:
Matáyɔ 1: KMW
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2021, Wycliffe Bible Translators, Inc.
