Lucas 23

Jesús Pilatonu buáncan

(Mt 27.1-2, 11-14; Mr 15.1-5; Jn 18.28-38)

1Catancëx niruquin ca camaxunbi Jesús buánxun Pilátonu buáncëxa. 2Buanx bëbax aín bëmánon ꞌixun ca Jesús ñuiquin ësaquin Pilato cacëxa:

—Ënë unían judíos unicama nun caibu bëtsi oquian sinánun quixun ꞌunánmia cananuna nunbi cuan. Nun nu a César buánmiti curíqui ꞌinánxunma ꞌanun nu canan ca ax isa Cristo ꞌaish ꞌapu ꞌicë quiaxa.

3Usaquian cacëxun ca Pilátonën Jesús ñucáquin cacëxa:

—¿Mix caramina judíos unicaman ꞌapu ꞌain?

Cacëxun ca Jesusan cacëxa:

—Asérabi cana ꞌëx a ꞌain, minmi cacë, usa.

4Jesusan cacëxun cuaquin ca Pilátonën sacerdotenën cushicama ꞌimainun anu timë́cë unicama cacëxa:

—ꞌËn iscëx ca ënë uni ꞌatima ñu ꞌacëma ꞌicën.

5Usaía Piláto quicëbëbi Jesúsmi xuamati nishi ca munuma quicancëxa:

—An ca Galilea mecamanuxun unicama ꞌatimaquin ꞌunánmiquin tsuáquirumianan Judea mecamanuxunribi usoquin ꞌaia.

Pilátonëan Jesús Herodesnu xua

6Ësaquian unicaman ñuia cuaquin ca Pilátonën —¿ënë unix cara Galileanu ꞌicë uni ꞌic? —quixun atu ñucácëxa. 7Ñucácëxuan —usa ca —quixun cacëxun cuaquin ca Pilatonën Jesúsa Herodesnu buántanun quixun xuacëxa. A me anua Herodes ꞌapu ꞌain, anu ꞌicë uni ca Jesús ꞌicë quixun ñuia cuaxun ca —Herodes ca Jerusalénu uëxanxa —quixun ꞌunánquin anu buántanun quixun cacëxa. 8Buáncëx bëbacëa unicaman Jesús ñuia cuati ca an uni itsin ꞌacëma ñu ꞌaia istisa tanquinbi iscëma ꞌaish, bërí a isi Herodes cuëëancëxa. 9Usai cuëënquia ꞌitsaira bana ñucácëxunbi ca Jesusan cáma ꞌicën. 10Caíma ꞌimainun ca judíos sacerdotenën cushicama ꞌimainun an Moisésnën cuënëo bana ꞌunáncë unicama munuma banai ami manáncëxa. 11Usaria ca Herodesbëtan aín suntárucaman Jesús ꞌatimonan a ꞌusánquin cuaioquin ꞌapúan pañucë chupa pañumitancëxun Pilátonua buántëcëntanun quixun xuacëxa. 12Usa ꞌain ca ꞌitsa baritia abë nishanancë ꞌaíshbi a nëtë́nbi sinanati Pilátobë Herodes nuibanancëxa.

Jesús ca bamati ꞌicë quiáxa quican bana

(Mt 27.15-26; Mr 15.6-15; Jn 18.39–19.16)

13Usa ꞌain ca Pilatonën, judíos sacerdotenën cushicama ꞌimainun judíos ꞌapucama ꞌimainun unicama camiacëxa. 14Camicëxa ucë ca cacëxa:

—Mitsun, ënë unin ca ꞌatimati banaquin unicama tsuáquirumia quixun cacëxun, cana mitsun ismainunbi a ñucán. Ñucáxun ꞌën iscëxbi ca an uisa ñubi mitsux ami manánquin ꞌë cacë, a ꞌacëma ꞌicën. 15Anu xucëxunbi ca Heródesnën amiribishi nunua bëtëcënun xuaxa. Anribi ca añu ꞌuchabia ꞌacëma ꞌicë ꞌunánxa. Usa ꞌain ca nun iscëxun a cupía bamati, ñu ꞌatima ꞌacëma ꞌicën. 16Usa ꞌain cana paë tanmitancëxuinshi cuantánun ënti ꞌain.

17Caquin ca anun pán chamiti ñucëñunma ꞌacë pán piti nëtëa sënë́ncëma pain ꞌain, usabiquin ꞌacë ꞌixun, uni achúshi sipunua chiquínti sináncëxa. 18Usoquian Jesús chiquínti sináncëbëbi ca unicamax munuma sharárui quicancëxa:

—Ënë uni ca ꞌat, ꞌanan ca Barrabás nu chiquínxun.

19An ꞌapu ñui ꞌatimati banaquin, Jerusalénu ꞌicë unicama tsuáquirumicë, ꞌianan an uni ꞌacë cupí ca Barrabás sipuacë ꞌiacëxa. 20Unicamaxa munuma sharárui quia cuati ca Pilátonëx amiribishi —nun iscëx ca a cupía bamati ñu ꞌatima ꞌacëma ꞌicë —quiax quitëcëancëxa. 21Quicëbëbi ca munuma sharárui quicancëxa:

—Bamatanun ca i curúsocënu matas, i curúsocënu ca a matas.

22Usaía quicaniabi ca rabë́ oquin cacësabi oquin Pilatonën amiribishi catëcëancëxa:

—¿Añu ñu ꞌaisama cara ënën ꞌax? ꞌËn iscëx ca a cupía bamati ñu ꞌatima ꞌacëma ꞌicën. Usa ꞌain cana paë tanmitancëxuinshi cuantánun ënti ꞌain.

23Quicëbëbi ca usaribiti amiribishi munuma sharárui quitëcëancëxa, bamatanun i curúsocënu matáscë ca ꞌiti ꞌicë quiax. Usai quia ca Pilatonën atu sinanamicasmacëxa. 24Sinanamicasmaquin ca Pilatonën atúan cacësabi oi ca ꞌiti ꞌicë quixun cacëxa. 25Caxun ca Barrabás, an unicama tsuáquirumianan uni ꞌacë cupí sipuacë uni, a judíos unicaman ñucácësabi oquin chiquíancëxa. Usaquin chiquíanan ca Jesús, judíos unibunën ꞌapucamaxa cuëëncësabi oquian ꞌanun quixun, aín suntárucama cacëxa.

I curúsocënu Jesús matáscan

(Mt 27.32-44; Mr 15.21-32; Jn 19.17-27)

26Usoquian Pilatonën cacëxun Jesús buani cuanquinbi ca suntárunën Cirene nëtënu ꞌicë uni Simón, ax aín naënuax anúan cuancë bai, anun aia isquin suntárunën biquin ꞌiámiquin, anua Jesús matásti i curúsocë, a Jesús caxu cuanquin buánxunun quixun cacëxa.

27Usaía ꞌia ca ꞌaisamaira unin nuibiancëxa, xanucamanribi nuibiani ca ꞌaisamaira masá nuituti bëunan mëscuti rarumacëxa. 28Usai ꞌia cuati cuainacëquin ca Jesusan atu cacëxa:

—Jerusalénu ꞌicë xanucama, ꞌë sinani bëunan mëscuti rarumaxma ca ꞌit. Mitsu ꞌimainun mitsun tuácamashi sinani camina bëunan mëscuti inti ꞌain. 29Anúnmi mitsun tëmërati nëtë ca uti ꞌicën. A nëtë ucëbë ca unicamax ësai quiti ꞌicën, tuacëma xanux ca cuëënti ꞌicën, tuacëma ꞌixun aín tuá xuma ꞌamicëma xanux ca xanu itsían ꞌacësaribi oquin paë tancëma ꞌaish cuëënti ꞌicën. 30Anun usai ꞌiti nëtë ucëbëtan ca unicaman unë́tisa tanquin aín bashicama atunu rëucubunun canan matá atu mapunun quixun cati ꞌicën. 31ꞌËn ñu ꞌatima ꞌacëma ꞌicëbia ꞌë ësoquin ꞌacë ꞌain ca an ñu ꞌatima ꞌacë unicamax atun ꞌë ꞌacësamaira oquin ꞌacë ꞌiti ꞌicën. Usoquian anun ꞌati nëtë ca uti ꞌicën. Usai ca ꞌiti ꞌicë quixun sinani camina bëunan mëscuti inti ꞌain.

32Usa ꞌain ca uni rabë́ an ꞌatima ñu ꞌacë, aribi Jesúsbëa bamati suntárunën buáncëxa.

33Usoxun ca suntárunën a buani cuanx, Mapuxo cacë me, anu bëbaquin anuaxa bamanun Jesús matástancëxun i curúsocë nitsíancëxa. Nitsíanan ca an ꞌatima ñu ꞌacë uni rabë́ribi i curúsocënu matástancëxun, bëtsia Jesusan mëqueu ꞌimainun bëtsi Jesusan mëmiu ꞌinun nitsíancëxa. 34Suntárunëan usoquin ꞌacëxun ca Jesusan Nucën Papa Dios cacëxa:

—Papan, ënë unicaman ca añu cara ꞌaia quixun ꞌunanima. Usa ꞌicë camina atun ꞌucha tërë́nquin manumiti ꞌain.

Usa ꞌain ca anu uni matáscë i curúsocëcama nitsíntancëxun, suntárunën uin cara isa Jesusan chupa bëtsi bëtsi biti ꞌicë iscatsi quixun ñuratsu pain niquin tancëxa. 35Usaquian Jesús ꞌaia ca unicaman isacëxa. Ismainun ca judíos unibunën ꞌapucamax Jesús ñui ꞌatimati banai ami cuai ësai canancëxa:

—An uni raíri ië́micësaribi oi ië́tibi ca ië́tima. Ax asérabi Cristo a Nucën Papa Diosan ënu xunuxun caíscë ꞌaish ca axbi ië́ti ꞌicën.

36Anu ꞌicë suntárucamanribi ca uquin ami cuaiquin bimi baca cachacë a xëanun quixun ꞌináncëxa. 37ꞌInánquin ca —mix asérabi judíos unicaman ꞌapu ꞌaish ca mixbi iët —quixun cacëxa.

38Anua a matáscancë i curúsocënu ca Jesús manámi ësaquin cuënëocë bana matáscë ꞌiacëxa: “Ënëx ca judíos unicaman ꞌapu ꞌicën”. A banax ca griego banan cuënëocë ꞌianan Romanu ꞌicë unin bana, latín cacë, anun cuënëocë ꞌianan judíos unibunën bana, hebreo cacë, anúnribi cuënëocë ꞌiacëxa.

39A Jesús ꞌacësaribi oquin i curúsocënu matáscë uni rabë́, achúshinën ca ami ꞌatimati banaquin ꞌusánquin Jesús cacëxa:

—¿Mix caramina Cristoma ꞌain? Mix asérabi Cristo ꞌaish ca mixbi ië́t. Ië́anan ca nuribi ië́mit.

40Usoquian Jesús caia cuaquin ca acëñuan matáscë unin bëtsi ñu caquin cacëxa:

—¿Mix usaribi oquin ꞌacë ꞌaíshbi caramina Nucën Papa Diosmi racuëtiman? 41Asérabi cananuna nux nun ꞌucha cupí paë tanin. Usa nux ꞌaínbi ca ënë uni añu ꞌuchabi ꞌacëma ꞌicën.

42Usoquin bëtsi catancëxun ca a unin Jesús cacëxa:

—Jesús, min nëtënuax ꞌapu ꞌixun camina ꞌë manutima ꞌain.

43Cacëxun ca Jesusan cacëxa:

—Asérabi cana ꞌën mi cain, ënë nëtë́nbi camina anu ꞌëx ꞌicë anu ꞌëbë ꞌiti ꞌain.

Jesús bama

(Mt 27.45-56; Mr 15.33-41; Jn 19.28-30)

44Usai ꞌimainun ca bari xamárucëbëbi me bëánquiacëxa. Bëánquiax ca rabë́ ꞌimainun achúshi hora ꞌicëbë bari pëquitëcëancëxa. 45Usai bari bëánquimainun ca Nucën Papa Diosan ꞌimicëx anuxun a rabiti xubu mëu anun bëpáncë chupax amo rabë́ ꞌinun tuquiacëxa. 46Usaía ꞌicëbë ca munuma cuëncënishi Jesús quiacëxa:

—Papan, ꞌën cana ꞌën bëru ñunshin minmi binun mi ꞌinanin. Usaquin catancëx ca ashiti bamacëxa.

47Usaía ꞌicëcama isquin ca Romanu ꞌicë capitán Nucën Papa Dios rabi quiacëxa:

—Asérabi ca ënë unix ꞌuchañuma ꞌiaxa.

48Usaía quimainun ca axa Jesús ꞌia isi timë́cë unicamaxribi masá nuituti, atun nuitu mëëi shitáshquiquiani utë́nbuax, atun xubunu cuancëxa. 49Raírinëxa usai ꞌimainun ca an a ꞌunáncë unicama ꞌimainun axa Galileanuax a nuibëtsini ucë xanucamanribi ꞌura nixun Jesús usai ꞌia isacëxa.

Jesús bamacë mëníon ñui quicë bana

(Mt 27.57-61; Mr 15.42-47; Jn 19.38-42)

50Judea cacë menu ꞌicë ëma, Arimatea, anu ꞌicë uni achúshi ca José cacë ꞌiacëxa. Ax ca upí uni ꞌaish upí sinánñu ꞌiacëxa. Ax ca judíos cushicaman ꞌapucama achúshi ꞌiacëxa. 51Usa ꞌaíshbi ca José an anun Nucën Papa Dios camabi unin ꞌapu ꞌiti nëtë uti caíncë uni ꞌiacëxa. Usa ꞌixun ca raíri ꞌapucaman ꞌacësaribi oquin sinánquinma, atúxa Jesús ꞌacatsi quiax ꞌësë́nani —ꞌati ca —quiax quicëbëtanbi, an cáma ꞌicën. 52Usa ꞌixun ca Josénën anu cuanxun Pilato cacëxa:

—Jesús ca bamaxa, cana buántisa tanin.

53Usaquin cacëxuan —camina buánti ꞌai —quixun cacëxun ca Josénën Jesús i curúsocënua nanpátancëxun, sábana upitan rabúancëxa. Rabúnbianquin ca anu uni bamaia mëníotia matá me tëmú bërí naëcë, anu uni ñucë mëníocëma pan, anu mëníonuxun buáncëxa. 54Usoquin anun ñu mëëtima nëtën ꞌatima cupí, a nëtë ꞌicëma ꞌain, ca Josénën Jesús mëníonuxun buáncëxa. Buánxuan mëníon ca anun ñu mëëtima nëtë ꞌiacëxa.

55Usoquian buania nuibianxun ca Galileanuax abë uéxancë xanucaman uinuira cara Jesús mëníoia isanan uisaira oquin cara mëníoia quixun isacëxa. 56Isbiani atun xubunu cuanxun ca anun Jesús sanu oti ro buánuxun mëníocëxa. Mëníotancëx ca Moisésnën cuënëo bana quicësabi oi, anun ñu mëëtima nëtë ꞌain, tantiacëxa.

Zur Zeit ausgewählt:

Lucas 23: cbrPB

Markierung

Kopieren