Lucas 22
22
V. BAMAXBI CA JESUCRISTO BAISQUIAXA QUIXUN ÑUI QUICË BANA (22-24)
Judíos unicama Jesúsmi ꞌësë́nan
(Mt 26.1-5, 14-16; Mr 14.1-2, 10-11; Jn 11.45-53)
1Anun chamiti ñucëñunma ꞌacë pán piti nëtë, Pascua cacë, ꞌiisama pain ꞌain, 2ca judíos sacerdotenën cushicama ꞌimainun an Moisésnën cuënëo bana ꞌunáncë unicama Jesús ꞌacatsi quixun sinanibi —ꞌapuma unicamax ca aín bana cuacë ꞌaish numi nishti ꞌicë —quixun sinani atumi racuë́quin uisoxun ꞌati cara quixun sinani ꞌësë́nancëxa.
3Usacëbë ca Jesusan ꞌunánmicë unicama mëcën rabë́ ꞌimainun rabë́, acama achúshi, Judas Iscariote, anu ñunshin ꞌatimanën ꞌapu Satanás atsíancëxa. 4Usai ꞌiquian cuanxun ca ñunshin ꞌatimanën ꞌapun sinánmicëx judíos sacerdotenën cushicama ꞌimainun anuxun Nucën Papa Dios rabiti xubunu ꞌicë suntárucamabë ꞌësë́nanquin —ꞌën cana Jesús mitsu ꞌinánti ꞌai —quixun cacëxa. 5Usoquian Judasan cacëx ca cuëëni —curíqui ꞌinánti ca —quiax canancëxa. 6Usoquian cacancëx —asábi ca —quixun catancëx cuanquin ca Judasan —¿ꞌapuma unicaman isnunma carana uisaxun ënë unicama Jesús bimiti ꞌai? —quixun sináncëxa.
Ashiquian Jesúsbëtan aín unicaman piá
(Mt 26.17-29; Mr 14.12-25; Jn 13.21-30; 1 Co 11.23-26)
7Anun chamiti ñucëñunma ꞌacë pán anun piti nëtë achúshi ca Pascua nëtë anun carnero ꞌati, a ꞌiacëxa. 8A nëtë ꞌicëbëtan ca Jesusan Pedrocëñun Juan xuquin cacëxa:
—Ënë nëtë́nu a piti ñu pinun camina nu mëníoxuni cuanti ꞌain.
9Cacëxun ca cacëxa:
—¿Uinuxuinra caranuna a piti mëníoti ꞌain? 10Quia ca Jesusan cacëxa:
—Jerusalénu cuantancëx bëbaquin camina uni achúshinëan ñutën ꞌunpax buania mërati ꞌain. Mëraquin nuibiani camina anua ax atsíncë xubunu atsínti ꞌain. 11Atsínquin camina aín ꞌibu ësaquin cati ꞌain: An nu ꞌunánmicë uni an ca ësaquin mi canun nu caxa: ¿Uinuxun cara ꞌëbëtan ꞌën ꞌunánmicë unicaman Pascua nëtën piti ñu piti ꞌic? 12Usaquinmi cacëxun ca an mitsu anuxunu piti xubu namë́ cha, cata itsi manámi ꞌicë, anua mesa ꞌimainun anu tsóti acama mëníocë, mitsu ismiti ꞌicën. Anuxun camina a piti nu mëníoxunti ꞌain.
13Usoquian cacëx cuanx Jerusalénu bëbaquin ca Jesusan cacësabi oquin a ñucama mëracëxa. Mëraxun ca anuxun a nëtën piti ñucama mëníocëxa.
14Mëníoquian sënë́on ca Jesús aín ꞌunánmicë unicamabë pinux mesanu tsóbuacëxa. 15-16Mesanu tsóxun ca Jesusan aín ꞌunánmicë unicama cacëxa:
—Ën cana mitsu cain, ënë nëtënuxun cana ësa piti mitsubë ꞌatëcëniman. Nucën Papa Diosan nëtënuxun cuni cana mitsubëtan ꞌatëcënti ꞌain. Usa ꞌaish cana bamacëma pain ꞌaish a piti ñumi mitsun ꞌëbëtan piti ꞌitsaira cuëëan.
17-18Catancëxun ca anu uvas baca ꞌarucë manë xanpa biquin, Nucën Papa Dios pain —asábi ca —catancëxun, aín ꞌunánmicë unicama ꞌinánquin cacëxa:
—ꞌËn cana mitsu cain, ësaquin cana uvas baca ënuxun ꞌatëcëniman. Axa ꞌApu ꞌaían Nucën Papa Diosan nëtënu aín unicamax abë ꞌicëbëtan cuni cana ꞌatëcënti ꞌain. Usa ꞌain camina ënë biquin camaxunbi ꞌati ꞌain.
19Catancëxun ca Jesusan pán biquin Nucën Papa Dios —asábi ca —catancëxun pán tucapaxun ꞌinánquin atu cacëxa:
—Mitsúnmi piti pán ënëx ca ꞌë ꞌicën. Mitsun ꞌuchacama tërë́ncë ꞌaish Nucën Papa Diosnan ꞌinun ꞌë unin ꞌacë ꞌain, camina ꞌëmi sinánquin ꞌën mitsu bërí cacë ënë ënquinma usabi oquin ꞌati ꞌain.
20Cacëxun piti piia sënënia ca Jesusan manë xanpa anu ꞌicë uvas baca biquin catëcëancëxa:
—Ënë uvas baca ënëx ca ꞌën imi ꞌapati, ꞌëx bamacë cupía mitsun ꞌuchacama tërë́ncë ꞌaish ainan ꞌinun Nucën Papa Diosan mëníocë, a ꞌicën. 21ꞌËn mitsu camainun ca cuat. Uni itsin ꞌatimonuxun binuan an ꞌë ꞌinánti uni, an ca nubëtan ënuxun piia. 22Nucën Papa Diosan mëníosabi oi cana uni ꞌinux anuax uá, ꞌëx bamati ꞌain. Usa ꞌaínbi ca an ꞌatimonuxun binun uni ꞌë ꞌináncë uni, ax ꞌuchañuira ꞌaish uisoquin cara ꞌati ꞌicë, usoquian Nucën Papa Diosan ꞌacë ꞌiti ꞌicën.
23Jesusan usaquin cacëxun cuati ca aín ꞌunánmicë unicamax —¿nucama uin cara usaquin ꞌati ꞌic? —quiax ñucacanancëxa.
Uiira cara bëtsibëtan sënë́nma ꞌiti ꞌicë quicë bana
24Uix cara bëtsibëtan sënë́nma ꞌiti ꞌicë quiax ca Jesusan ꞌunánmicë unicama cuëbicanancëxa. 25Usaía quia ca Jesusan cacëxa:
—Judíosma ꞌapucaman ca aín unicama ax cuëëncësabi oquian tëmëramiquinbi ñu mëënun ꞌamia. Usaquin ꞌamibi ca bëtsi unicama cai, ainsa aín unicamaxa upitax bucunun ꞌimia quiax quia. 26Atux usa ꞌaínbi camina mitsux usai ꞌitima ꞌain. Uix cara mitsun cushi ꞌicë, ax ca cushima uni ꞌicësaribiti ꞌiti ꞌicën. An uni raíri bana ꞌináncë uni, an ca an aín bana cuacë uni usaribi ꞌixun uni itsi ñu ꞌaxunti ꞌicën. 27¿An piti ꞌacë uni ax cara axa mesanu pi tsócë unibëtan sënën ꞌic? An mesanuxun picë uni ax ca an piti ꞌacë unibë sënë́nmara ꞌicën. Usa ꞌaínbi cana ꞌëx an mitsu ñu ꞌaxuncë a ꞌain. 28Mitsun camina unicaman bëtsi bëtsi oiabi ꞌë ëncëma ꞌain. 29Usa ꞌicë cana ꞌën Papa Diosan ꞌë ꞌapuira ꞌinun ꞌimicësaribi oími ꞌëbë cushi ꞌinun mitsu ꞌimin. 30Usa ꞌixunmi ꞌën nëtënuxun ꞌëbëtan pianan, Israelnën bëchicë mëcën rabë́ ꞌimainun rabë́, aín rëbúnquicamax cara atun ñu ꞌacë cupí, uisai ꞌiti ꞌicë quixun canun cana mitsu ꞌimiti ꞌain.
Pedronën —ꞌën cana a ꞌunanima —quixun uni cati Jesusan ñuia
(Mt 26.31-35; Mr 14.27-31; Jn 13.36-38)
31Usaquin catancëxun ca Jesusan Simón Pedro cacëxa:
—Simón, ñunshin ꞌatimanën ꞌapu, Satanásnën ca mitsu ꞌatimamitisa tanquin an usaquin ꞌanúan ënun quixun Nucën Papa Dios ñucáxa. Usa ꞌixun ca xanúan ñu bimi tacaquin shaícacësaribi oquin mitsu tanti ꞌicën. 32Usa ꞌaínbi cana ꞌëmi catamëti ënxunma ꞌanun Nucën Papa Dios mi ñucáxuan. ꞌËmi ꞌuchaxbi sinanati ꞌëmi cushiquin camina axa ꞌëmi catamëcë uni raíri ꞌëmia asérabi upiti catamënun ꞌaquinti ꞌain.
33Cacëxun ca Simón Pedronën cacëxa:
—Mi ꞌacësaribi oquin sipuanan unin ꞌanúnbi cana mi ëniman.
34Quia ca Jesusan cacëxa:
—Pedro, cana mi cain, mix camina usai quin, ꞌixunbi camina ënë ñantan ꞌatapa banatisama ꞌain, min isamina ꞌë ꞌunáncëma ꞌai quixun rabë́ ꞌimainun achúshi oquin uni paránti ꞌain.
Anúan unin Jesús ꞌatimoti nëtë ꞌiá
35Jesusan ca aín ꞌunánmicë unicama ësaquin cacëxa:
—ꞌËn mitsu uni bana ñuixunun xuquin, burasa, curíqui, taxaca, acama buanima camina cuanti ꞌai quixun cacëx cuanx camina ñancáishi ꞌicëma ꞌain, ¿usa cat?
Cacëxun ca —ca usa ꞌicën, ñancáishi cananuna ꞌicëma ꞌai —quixun cacëxa. 36-37Canan ca ësaquinribi cacëxa:
—Nucën Papa Diosan bana ꞌë ñuiquian cuënëo quiásabi oi ca ꞌiti ꞌicën. A banax ca quia: “An ñu ꞌatima ꞌacë unicama achúshi ca ax ꞌicë quiax ca unicamax quiti ꞌicën”. A bana quiásabi oi ca unicamax ꞌë ñui quiti ꞌicën. Usa ꞌain camina bërí min bana ñuixuni cuanquin burasañu ꞌixun a buánti ꞌain. Curíquiñu ꞌixun camina buánti ꞌain. Manë xëtocëñuma ꞌixun camina min tari maruquin anun curíqui biquin maruti ꞌain.
38Cacëxun ca aín ꞌunánmicë unicaman cacëxa:
—Ca is, ënu ca manë xëtocë rabë́ ꞌicën.
Quia ca Jesusan cacëxa:
—Ashi ca asábi ꞌicën.
Jesúsa Getsemaní naënuax aín Papabë bana
(Mt 26.36-46; Mr 14.32-42)
39Jerusalénuax cuani ca ax ꞌicësabi oi Jesús Olivos cacë matánu cuancëxa. Cuancëbë ca abë aín ꞌunánmicë unicamaxribi cuancëxa. 40Anu cuanx bëbatancëxun ca Jesusan aín ꞌunánmicë unicama cacëxa:
—Ñu ꞌatima ꞌatin rabanan camina mitsu bërúanun Nucën Papa Dios ñucáti ꞌain.
41Usoquin cabiani unin nicë́xa maxax ꞌibúcë ꞌurasa cuanx ca rantin puruni, Jesús Nucën Papa Diosbë banacëxa. 42Banaquin ca cacëxa:
—Papan, mix cuëëncëbëtanma cana ꞌën bërí tëmëratima ꞌain. Usa ꞌaínbi cana ꞌëx cuëëncësa oi ꞌitima ꞌain, mix cuëëncësa oíshi cana ꞌiti ꞌain.
43Usaquian cacëbë naínuax anu uxun ca ángelnën Jesús ꞌaquinquin cushiocëxa. 44ꞌAisamaira masá nuituti bënë́quin ca Jesusan amiribishi Nucën Papa Dios ñucátëcëancëxa. Ñucati ꞌaisamairai bënëti ca nichati aín nichá ax aín imi menu tusquicësa ꞌiacëxa. 45Nucën Papa Dios ñucátancëx nirucuatsini uquinbi ca aín ꞌunánmicë unicama masá nuituiraia ꞌuxcë mëracëxa. 46Mëraquin ca bësúnquin cacëxa:
—¿Uisacatsi caramina usaira ꞌuxin? Ca nirut. ꞌUchati rabanan camina ꞌuxti tëai Nucën Papa Diosbë banati ꞌain.
Jesús bican
(Mt 26.47-56; Mr 14.43-50; Jn 18.2-11)
47Usaquian Jesusan cacëbëbi ca ꞌaisamaira uni anu Jesús ꞌicë anu uacëxa. Ucëbë ca a unicamabë aín ꞌunánmicë unicama achúshi, Judas, ax rëcuë́ncuatsini a bëtsucucanux uacëxa. 48Aia ca Jesusan Judas cacëxa:
—¿Judas, uni ꞌinux Nucën Papa Diosnuax uá, ꞌëa ënë unicaman binun caramina ꞌë bëtsucucati ꞌain?
Cacëxunbi ca Judasnën cáma ꞌicën. 49Uisoi cara uaxa quixun isquin ca abë ꞌicë unicaman Jesús ñucáquin cacëxa:
—¿Ënë unicama caranuna manë xëtocën ꞌati ꞌain?
50Usaquin caquin ca uni achúshinën aín manë xëtocën sacerdotenën cushicaman ꞌapun ñu mëëmicë uni aín pabí mëqueu ꞌicë pabíscacëxa. 51Usaquian aín pabí tëaia oquin ca Jesusan cacëxa:
—Usoxunma ca ꞌat. Caquin mëcënan pamëquin ca aín pabí usabi ꞌitëcënun mómiacëxa.
52Usotancëxun ca Jesusan sacerdotenën cushicama ꞌimainun anuxun Nucën Papa Dios rabiti xubunu ꞌicë suntárucama ꞌimainun anpan caniacëcëcama, an a bitsi ucë, acama cacëxa:
—¿Manë xëtocë ꞌimainun imaxu tëacë tuínxun mëcamacë uni ꞌacësoquin ꞌë binux caramina ucan? 53Camabi nëtën anuxun Nucën Papa Dios rabiti xubunu mitsubë ꞌiabi camina uisa ꞌixunbi ësoquin ꞌë bicáncëma ꞌain. Bërími mitsun ësoquin ꞌanun ca Nucën Papa Diosan mitsu ëanxa, ñunshin ꞌatimanën ꞌapun cushínbi camina ësoquin ꞌë ꞌain.
—ꞌËn cana a uni ꞌunáncëma ꞌain —quixuan Pedronën ca
(Mt 26.57-58, 69-75; Mr 14.53-54, 66-72; Jn 18.12-18, 25-27)
54Usoquin bitancëxun ca a unicaman Jesús buánxun judíos sacerdotenën cushicaman ꞌapun xubunu buáncëxa. Usoquian buania ca Pedronën ꞌuránxuinshi nuibiancëxa. 55Buanx bëbaquin a xubu rapasu ꞌicë me mëníocë, anu tsi ticaia tsóbucamainun ca Pedronëxribishi atubë tsóbuacëxa. 56Usaía anu tsócë, tsin ërë́ncëxun pëcaia Pedro isquin ñachai ca anuxuan an ñu mëëcë xanux quiacëxa:
—Ënë uníxribi ca a bicë unibë ꞌiaxa.
57Usai quia ca Pedronën cacëxa:
—Mixmi a ñui quicë uni a cana ꞌunaniman.
58Usoquin can, basicëma ꞌaínshi ca uni achúshinënribi Pedro isquin cacëxa:
—Mix camina abë nicë uni a ꞌain.
Cacëxun ca Pedronën cacëxa:
—ꞌËx cana ama ꞌain.
59Achúshi hora ꞌicëbë ca bëtsíxribi quiacëxa:
—Ënë unix ca Galileanu ꞌicë uni ꞌicën. Asérabi ca axribi a unibë ꞌiaxa.
60Usaía quia ca Pedronën cacëxa:
—Uisai qui caina usai quin, a cana ꞌën ꞌunaniman.
Quicëbëshi ca ꞌatapa banacëxa. 61Banacëbë cuainacëquin ca Nucën ꞌIbu Jesusan Pedro ñachaquin isacëxa. Ñachacëxun ca Pedronën ësaquian Jesusan a cacë bana sináncëxa: Ënë imë́ camina ꞌatapa banatisama pan ꞌain, min isamina ꞌë ꞌunáncëma ꞌai quixun ꞌë ñuiquin rabë́ ꞌimainun achúshi oquin uni paránti ꞌain. 62Usoquian Jesusan coóncë bana sinani ca Pedro ëman chiquiti masá nuituirai bëunan mëscüacëxa.
Suntárucama Jesúsmi cuaia
(Mt 26.67-68; Mr 14.65)
63Usa ꞌain ca an bërúancë suntárucaman Jesús ꞌusani ami cuaiquin mëëacëxa. 64Usoquin ꞌanan ca aín bëru chupan bëmáputancëxun mëëquin —uin cara mi mëëaxa, ca ñuit —quixun cacëxa. 65Usaquin ꞌanan ca ami ꞌatimati banaquin Jesús ꞌusáncëxa.
Jesúsa judíos unibunën cushicaman ꞌapucamanu buáncan
(Mt 26.59-66; Mr 14.55-64; Jn 18.19-24)
66Pëcaracuatsincëbë ca anpan caniacëcë unicama ꞌimainun judíos sacerdotenën cushicama ꞌimainun an Moisésnën cuënëo bana ꞌunáncë unicamax anu timë́acëxa. Timë́cëbëtan ca anu atun cushibunën ꞌapucama timë́cë anu Jesús buáncëxa. Usoquian buáncëxa bëbaia ca ꞌapucaman Jesús cacëxa: 67—Mix asérabi ax utinu nun caíncë, Cristo ꞌixun camina, asérabi cana a ꞌai quixun nu cati ꞌain.
Cacëxun ca Jesusan cacëxa:
—Asérabi cana a ꞌai quixun ꞌën mitsu cacëxunbi camina ꞌën bana ca asérabi ꞌicë quixun sináncantima ꞌain. 68Usa ꞌixun camina ꞌën mitsu ñu ñucáquin cacëxunbi ꞌë caíma ꞌianan ꞌë chiquínti sinántima ꞌain. 69Usa ꞌaínbi cana bërí ënë menu ꞌitancëxbi Nucën Papa Dios cushiira, aín nëtënuax aín mëqueu tsotax abë ꞌApu ꞌiti ꞌain.
70Usoquian atu cacëxun ca camaxunbi ñucáquin Jesús cacëxa:
—¿Usa ꞌaish caramina asérabi Nucën Papa Diosan Bëchicë ꞌain?
Cacëxun ca Jesusan cacëxa:
—Mitsúnmi ꞌë cacë, ax ca asérabi ꞌicën.
71Usai quia cuati ami nishi ca quicancëxa:
—ꞌItsa unix ca ami manánxa. Usa ꞌaínbi cananuna nunribi bërí nun pabitanbi asérabi ax ꞌatimati banaia cuan.
Zur Zeit ausgewählt:
Lucas 22: cbrPB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 1978, 1995, 2008, 2022 Wycliffe Bible Translators, Inc. All rights reserved.
