Genesis 7
7
Kai ǁgammi dâus
1ǁNās khaoǃgâb ge ǃKhūba Noaxa ge mîba: “Sa omaris din hoan ǀkha arki ǃnâ ǂgâ re. Sats ǀguitsa ta go ǂhanu-ai khoese nē hoaraga ǃhūbaib ai hâ khoen ǁaegu mû xuige. 2Hoaraga ǃanu xamarin tsî ǀguruna xuts ge disihakaǀase nî ū, hû aorese tsî hû tarese, xawets ge ǁnān hîa ǃanuoǃnâna xu ǀgamǀgammese, aore tsî tarese nî ū. 3ǁKhāti hoa aniǃnôana xu disihakaǀase, hû aorese tsî hû tarese ū re. Nēsats ge hoaraga anin, ǀgurun tsî xamariǃnôan hoan nî ǃkhōǀgarahe tsî ǁkhawa ǃhūbaib ai ôananôaguse nî dī. 4Hû tsēdi ǃnâ ta ge tita hakadisi tsēdi tsî hakadisi tsuxugu tsîna nî ǀapi ǀnanuba nî sî, hoaraga ûitsaman tita xa ge ǃhūbaib ai kuruhena nî hîkākāse.”
5Noaxi ge hoaraga xūn ǃKhūb xab ge mîmāhena ge dī.
6Noaxi ge ge ǃnanikaidisi kurixa i, kai ǁgammi dâus ge ǃhūbaib ai hāo. 7ǁÎb tsî ǁîb di taras, ǁîra ôagu tsî ǁîgu di taradi tsîn ge arki ǃnâ ge ǂgâ, nē ǁgammi dâusa xu nî ûiǂoase.#Mat. 24:38-39; Luk. 17:27 8ǃAnun tsî ǃanuoǃnâ ǀgurun, xamarin tsî anin, aoren tsî taren tsîn ge 9Elob ge mîmā khami Noaxi ǀkha arki ǃnâ ge ǂgâ. 10Tsîs ge kai ǁgammi dâusa hû tsēdi khaoǃgâ ǃhūbaib ai ge hā.
11Noaxi ǃnanikaidisi kurixa hîa di ge ǀgamǁî ǁkhâb di disihûǀaǁî tsēs ai hoaraga ǀaudi ǃhūb ǃnaka hâde ge ǃhui tsî di ge ǀhommi di mûǂuidaode ge ǁkhowa-amhe.#2Pet. 3:6 12Tsîb ge ǀnanuba hakadisi tsēdi tsî hakadisi tsuxugu tsîna ge ǀapi. 13ǁKhā tsēs ǁîs aib Noaxa ǁîb taras, ǀgôagu âb, Semmi, Xammi tsî Jafet hâgu tsî ǁîgu taradi ǀkha arki ǃnâ ge ǂgâs 14ain ge hoa xamarin tsî ǀguruǃnôan, hoaraga ǁgâuǀgurun tsî ǀgoan, kain tsî ǂkharin tsî hoa aniǃnôana ǁîn ǀkha arki ǃnâ ge ǂgâ. 15Aoren tsî taren, ûitsama xamarin tsî ǀgurun din hoan ge Noaxi ǀkha arki ǃnâ ge ǂgâ 16Elob ge mîmā khami. Tsîb ge ǃKhūba Noaxi ǃgâb ai arki di daosa ge ǂganam.
17ǁGammi dâus ge hakadisi tsēde ge hâ tsîb ge ǁgamma, khâib ra khami arka ǃhūba xu ge kui. 18ǁGammi ge ge ǃgam tsîb ge arka ǁgammi ai gere hâma. 19ǁNātikōse kai tsîb ge ǁgamma ǁîgu hoan xa a ǀgapi ǃhomga ge ǃgū-ai, 20hû metergab ge ǃhomgu ǂamǃnâ sīǃnâs kōse. 21Mâ ûitsama xū-i ǃhūbaib ai hâ-i hoa-i ge ge ǁō; anin kas, xamarin kas, ǀgurun kas, khoen kas hoasa. 22Mâ xū-i hîa ra ǀom-i ǃhūbaib ai hâ-i hoa-i ge ge ǁō. 23ǃKhūb ge hoaraga ûitsama xūn ǃhūbaib ai hâna ge hîkākā; khoen, xamarin tsî anin hoana. Hūs din hîa ge ǃgaun ge Noaxi tsî ǁnān ǁîb ǀkha arki ǃnâ ge hâ ina. 24ǀGuikaidisi tsî korodisi tsēdi kōseb ge ǁgamma noxopa ge ǁnoro tama hâ i.
Zur Zeit ausgewählt:
Genesis 7: KKG20
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Khoekhoegowab Elobmîs © Bible Society in Namibia, 2020.
