LUK 24

Jisu Kithi Para Kibur

(Mot. 28:1-10; Mrk. 16:1-8; Jhn. 20:1-10)

1Manta hat-irul along kicheng arni, adap prang, arlosohel kachihonjok angnim abihini hel ensi ahilik yok wango. 2Anali ahilik amahang para arlongpo paklongsi kibi thekngo, 3manta anali arlo lut damo, anali abangpo hlonghle yongot. 4Anali labang alam angthin ihik-bihiksi kido amunsi, lajongsi, kiklar-et ape kachi-ik bang-hini arleng anali akung wang arjap mo. 5Arlosohel phere ongo aro anali mahang lungleyok chingkuk phrongo, manta arleng hel analiyok pulo, “Piyok nali kithi para kihreng phak poyok lang-wor do? Anang holek ingjong, manta burphakngo. 6Galili long kido amun, anang naliyok potsi kithan, nalineng chipurki not, 7lake, Arleng Aso yok papihel arideng champi nange, aro kros long tar hlonge, aro ni-thom arni burphak nange, labang kipu alamthe chipurkinot.” 8Laparake anali labang kipu alamhel aneng chipurkilo, 9aro ahilik para chirulsi, anali bang kere-isi adun hel chengsi ahuwityok labang alam a-odi thandamo. 10Minonke arlosohel adak Mary Megdalini pe, Jowana pe pen Jems po anang ai Mary pe analipen kido, aro kamprek arlosohel kangthir adun helyok thano. 11Manta anali adun hel ke arlosohel kithan alam kiwangwe atomo badi hlongo, aro anali arloso helyok krolkre yongo.#24:11: Angkhan aban alo longke labang alampo do, 12 Manta Pitor po ingthuro aro ahilik long yok kilangyok katsi damo; ingkukngo aro arlo yok lango, anang bithangsi pe kang-ar so detsi thekngo; laparake anang hemyok damo, potsi apot chiplango lamehel asombhik pahlong detno. 12Manta Pitor po ingthuro aro ahilik long yok kilangyok katsi damo; ingkuk ngo aro arloyok lango, anang bithangsi pe kang-ar so detsi thekngo; laparake anang hemyok damo, potsi apot chiplango lamehel asombhik pahlong det no.

Emayus yok Kidam

(Mot. 16:12-13)

13Minonke, la-arni matmatsi Jisu adun bang-hini arleng Jerusalem para mayel thorok isine ibeng aduwar kahalo kido Emayus kipu isi arong longyok damsi kido, 14aro anali lamehel kachiplang ahuwit alamthe chithan josi kidam. 15Anali kachithan aro chirwalsi kidam amun si, Jisu abithang adung wango aro anali pen dunjongo, 16manta anali mekpen anang yok pachini un-eh yongo. 17Aro Jisu analiyok pulo, “Nali kidam amun nalidak pot alamthe chithan si damjong do?” Anali aneng dohosi, arjap phrongsi dolo. 18Laparake anali dak Kliyopas amen ihutpo, anangyok pulo, “Pipot alam mondak hetsi chiplangdo, mehel alam, Jerusalem kido arleng nangdetsi than un-eh yong ma?” 19Anang analiyok arjulo, “Pot te kachiplang?” Anali anangyok pulo, “Najaret Jisu yok kachiplang alam hel, Arnam aro ahuwit arleng ango asombhik asal aro lamthepen kihaldong turki ihut kido, 20aro ili bor-bangthe hel aro kithe-kiding hel pot badi kamariyok ado batno aro anangyok kros long taro, lamehel alam. 21Manta inghosi Israyel abang yok pajoknge, anangsi labang pusi hali kachiha ding kido. Oik, aro lamehel tang detsi, minonke mehel kachiplang mini nithom chokdolang. 22Lajongta, hali sitem angkhan arloso helta haliyok asombhik hali pahlongo. Anali adap prang ahilik alongyok damo, 23aro anali lalong anang bangpo hlong kelsi, anali wang chirulsi wango aro anali tharlon helyok isi kachimangkai thekdam hlongsi, analisi anang hreng phakngo pusi kipu alam hali wang thano. 24Anali angkhan ke hali pen kido abang ahilikyok damo, aro arloso hel kipu matmat thek damo; manta anali anangyok thek dam hlonghle yongot.” 25Laparake Jisu analiyok pulo, “Ei, nali konbak kamango hel, aro turkihel kapahar ahuwit alam kikrol yok angthin kardip arleng! 26Khristo ke lamehel aduk kicho, aro anang jortang kidolong dam nangne ye ma?” 27Laparake anang Mosi po aro turkihel alam chengsi ahuwit lo-kangthir long Jisu alamthe kiwi hel analiyok than phrotno. 28Anali kidame arongpe yok adung wang kihleng apor, anang pango dapsi kidam badi chipaklango. 29Manta analike anangyok kapado tolyok chingdukngo, “Hali pen donot, piyok pu tene arni chelo aro anithulo.” Lasi anang anali pen kidolong lutduno. 30Anang anali pen kicho ahong long kangning amun, anang himpo eno, bor-eh pilo, aro bangpo ingbengo, aro analiyok thakngo. 31Laparake anali mek chingpulo, aro anali anangyok chinilo; aro anang anali mek ango para chibuti sitno. 32Anali ihut para ihut chithansi pulo, “Duwar ajon wang jongsi ilipen lam kachithan amun, ili thin long nengkirung, lo-kangthir alam kithan phrot amun ili thin arlo kachiwak phlen kalek ma?” 33Lamatmat aporsi anali ingthuro aro Jerusalem yok chirulo; aro anali bang kere-isi yok aro alokjor helyok inan kachingrum thek hlongo. 34Anali kachipujo, “Hemphu khanang si burphak ngo, aro anang Simon po yok chiklango!” 35Laparake anali duwar long kachiplang alam, aro pot badi anang him kangbeng amun anangyok pot badi chini uno, la bang-hini than phrotno.

Jisu Adunhelyok Kachiklang

(Jhn. 20:19-23; Aka. 1:3-5; 1 Ko. 15:5)

36Labang pomar anali thansi kido amun, Jisu abithang anali sitem wang arjap mo, aro pulo, “Nengsam, nali pado nang.” 37Anali kaphere serekngo aro kaphere lutno, and ihut si-ik thekngo pusi chiron-iro. 38Anang analiyok pulo, “Piyok nali neng chipheredo, aro nali thin ihik-bihik chiplang do? 39Ne-ari hel aro ne kengpak hel langot; langot lake nebithango. Ni-ot not aro langot; piyok pu tene ihut Ajiuli ke neyok kithek badi, abangpo aro aru pe ingjong.”#24:39: Angkhan aban alo longke labang alampo do, 40 Aro ladi kithan jong aporsi, anang abithang ari hel aro akeng hel paklango. 40Aro ladi kithan jong aporsi, anang abithang arihel aro akeng hel paklango. 41Anali, jat kikrolkre amun kiwang anengrong aro asombhik kipahlong amun, anang lahelyok pulo, “Nali holek penebak kicho abihini doma?” 42Anali anangyok karmu ok ithan pilo, 43aro anang bangpo eno aro anali ngosi cholo. 44Laparake anang analiyok pulo, “Ne nalipen kido amun, ne nali kithan, nelamthe mar ke lamehel lo—Mosi po kiwi kanong along, turki hel alo aro lun-parklam along ne lam potsi kiwi done, bang hel ahuwit chok-pleng nange.” 45Laparake anang lo-kangthir alamhel abhu pahlongyok neng hel pachiwak phlenno, 46aro anang analiyok pulo, “Labadi kiwi do, lake Khristo duk-tap chohlonge, aro ni-thom arni kithi kibi along burphaknge, 47aro Jerusalem para chengsi ahuwit ason ango neng kachipharlep aro pap kikol alam anang menpen si pathan hlonge. 48Nali labang ahuwit alamthe aphan hakhi do. 49Aro langot, ne Apa pot seme-kitang, labang ne nali sitem wangtol le; lasi nali ethakpe ajakong hlongle lengke labang rongpe longne donot.”

Jisu yok Ethakpe Long Kipon Alam

(Mrk. 16:19-20; Aka. 1:9)

50Laparake anang analiyok Bethani arong angoyok olepono, aro, anang ari rungsi, analiyok bor-eh batno. 51Labadi si analiyok bor-eh kibat amun, anang anali para chitikango, aro anang yok ethakpe long pangthur pono. 52Aro anali Jisu yok chirdomo, aro neng arongpen Jerusalem yok chirulsi wango; 53aro anali arnita Arnam ahem long Arnam yok jortang pisi pingkitsi kido.

Zur Zeit ausgewählt:

LUK 24: AMRI-BSI

Markierung

Kopieren