Luc 6

Zezi Nkumu a tsuhu ma awuumaha

1Tsuhu ma awuumaha, Zezi bla aluoni a nde aki ma yira ntsa nguunu. Aluoni aki ma boloho mburu e ble#6.1 Ble oma kaha mva mburu aluumu, ma siaha na mpeembe bla yo.,bo ma miiŋa o dziala, ma adza. 2Afarizi ake na bo ndi: «Be lema siaha dzaa ma ama lehe saabe ngri o tsuhu ma awuumaha oma?» 3Zezi okaali bo ndi: «Be leka liira osuumbu a Davide asi bla abuha a nde, ntini e bo ma aki ndzala ni?» 4Nde onyuniŋi ntsa ndzo e Ndziami. Oyahi mpeembe odzi, ompi abuha a bla nde. Okoroho mpeembe dzia eki odzi eso asi ma avuoŋi. 5Ŋa Zezi na bo ndi Muana Mvuuru, nkumu a tsuhu ma awuumaha.

6Eto tsuhu ma awuumaha e mo, Zezi onyuniŋi ma oyisiha mbari e Ndziami ntsa ndzo ma avuonoho. O ŋa balaha mo eki oleme o kuoho olumi. 7Ayisihi ma angri bla Afarizi aki ma akeese yuhu Zezi asalaha nde o tsuhu ma awuumaha, ma obanaha nde. 8Zezi aki oya etsimiŋi e bo nde na oleme ndi: «Temehe, ka o mua baari aso.» Nde se otemihi. 9Zezi opisi bo ndi: «Ngri e saabe eduha ndi nki? Lesa leve si lebi o tsuhu ma awuumaha, ma ovusuha mvuuru omuo si ma obuma?» 10Zezi okeesi bo aso, nde na oleme ndi: «Laba kuoho.» Nde olabi tso, owuumi. 11Ateendi a mbari e Ndziami bla Afarizi abiri nkala yo mini, bo ma wobo o mpanihi e bo ma osaha dzaa e bo ma buuna osa Zezi.

Zezi asuolo antuma a kuumi na vuele

12Tsuhu mo Zezi okumi yula okuri, nde ovuoni Ndziami lempiibi letsiina. 13Tsuhu etsa, Zezi otsuoli aluoni a nde. Osuoli kuumi na vuele, nde ompi bo a nkuumi ma antuma. 14Simon a nde aluhi Piere, na Andre a muana nguhu a Simon. Zaake, bla Zan, Filipe bla Batelemi, 15Matie bla Toma, Zaake a muana Alife na Simon ma tsuoloho o Zelote.#6.15 Zelote, mvuuru ali na ndzala osi o nde. 16Zide a muana Zaake na Zida osi Sikaryote, atoosihi Zezi.

Zezi ayisiha lemvuuru

17Zezi osurihi okuri bla antuma a nde. Bo asuri o biri odzemi. O ŋa eki na lenkindi la aluoni a nde. Eki se na lemvuuru le Zide leso, na le Zerizaleme na enguundu e ma osiese okeri a Tiire bla Sidon. 18Bo ayi na ayuha mbari ma osaha nde se osalaha bo. Zezi se osalihi ma aki na edidima ma ebi. 19Lemvuuru leso lesahi otiila nde mo mpari eki o nde. Osalihi bo aso.

Osuere bla ndoho

20Zezi okeesi aluoni a nde, na bo ndi:

«Osuere oka na be leli ntsa owuha,

obila Onkani o Ndziami oli bla be.»

21Osuere oka na be baari leli na ndzala o ntini dzi,

obila nde adila ompa be biila e kuna.

Osuere oka na be baari lelila lobi,

osuuha be le edze osebe!

22Osuere oka na be baari ma ama bele, ma ama tsuura, ma atuuha, na leduha le maami ma abi o be obila o Muana mvuuru.

23O ntini dzi lesuere, lekina na mpari e nyuru obila o puha enini edila be o yulu. Bo ali ma antaami ma akuuru a bo, ma suesihi awobi a mbari e Ndziami.

24«Ndoho eka na be anga osolo,

obila be lemi mana obaha e be mvuuha.»

25«Ndoho eka na be le eli na eso lobi,

obila be le edze oka ndzala.

Ndoho eka na be lesebe lobi,

obila be le edze oka ntsa ndoho, be lelila.»

26«Ndoho eka na be o ntini e baari aso ma dzuusa be, dzua osuumbu ataara a be ma asihi bla awobi a mbari e Ndziami ma abi!»

Ledia la abuha

27«Me eduha be baari leyuha me, ledia a nga mbele e be. Lesa leve na baari ma ama bele be. 28Lempa baari ma loho be andosoho. Levuono Ndziami o baari ma wobiho maami ma abi o be. 29Mvuuru obula we lempali mo baa mo, laha nde baa le odzuele. Mvuuru ayaha we mfa, we i liha nde ngoyi nkima ni. 30Mvuuru opisa we kiila, we ompi. Mvuuru oyaha we kiila, kaa kalaha nde ni. 31Lesa abuha maami a be ledia mbri asa be. 32Yuhu be odia eso baari ma dia be atu, be osaha mbri asa be leve buni? Na asi ma ambiini ma diiŋa se baari ma ali na ndzala bo. 33Yuhu be osiaha leve na baari ma siaha be leve, be osaha mbri asa be leve buni? Anga ambiini se ma siaha vua. 34Yuhu be obiha eso baari ma abuuna ovuura be, be osaha mbri asa be leve buni? Na anga ambiini se ma abiha ndi abuha avuura bo ma osuumbu dzua. 35Ŋa ledia anga mbele e be. Lesa leve, lebiha ngori, be ledila obaha puha e nini. Be le edze oka baana a Ndziami a Nkara Yulu, obila nde oli ove o baari ma anga lebi na baari ma abi. 36Leka ave, mva e taara a be ali ove.»

37Le kaa pamaha abuha ni, Ndziami se i pama be ni. Le kaa banaha abuha ni, Ndziami se i banaha be ni. Leboloho abuha, Ndziami se oboloho be. 38Lempa abuha, Ndziami ompa be se. Ma adila oluusa we biibi o mpie kuna. Nde adze ompa we ma lemihi le we ampa abuha. 39Zezi oti bo ntsintsami ndi: «Mvuuru ali i mono ni abuuna olaha buha ndzila? Mbaa bo vuele avi ntsa bila! 40Oluoni i vula nkumu a nde ni, ŋa oluoni ma ama yisiha yemiŋi abuuna oka mva nkumu a nde. 41We amono lemfisi leli ntsa diisi le buha, okoroho otini oti oma diisi le we, we i mono ni? 42We aduha na muana nguhu “otsiese lemfisi mo diisi le nde”! Okoroho otini oti oli o diisi le we, we i mono ni? We na ompiele, sa tsiese o tini oti o diisi le we, omana we tsiese lemfisi o diisi le buha.»

Oti bla mburu e nde

43«Oti ove i buuna ompa mburu e mbi ni. Oti se obi i buuna ompa mburu e mve ni. 44Oti ma yiimbaha mo mburu e nde. Mvuuru i buna otolo mburu e fiige ma eti ma antsiene ni. I buuna otolo mburu e reze#6.44 Reze oma kaaha mburu e mva elili. Ma siaha mali a ba o yo. ma ongama ni. 45Mvuuru ove otusaha ntsa otima a nde maami ma ave, mva mvuuru ali na osolo ove. Mvuuru obi otusaha ntsa otima a nde maami ma abi mva osolo obi. Obila maami ma tsuuha ma onyua, ma wuaha ntsa otima.»

Andzo a muele

46«Be letsuolo me o “Nkumu, Nkumu” okoroho be i sa a me eduha be ni? 47Mpini mvuuru aya na e me, ayuha mbari e me, ove nde o nyiimi me. Ŋa me elaha be osuumbu eli nde. 48Nde oma kaha mva mvuuru atui ndzo ma otsima owuunu nkara ntsina ntsie o yula kele. Ŋa ntuuna oya, ndzo eka buuna obooho ni ma etuuŋi ove. 49Ŋa mvuuru ayuha mbari e me, nde i sa a me eduha ni, nde mva mvuuru atsuuŋa ndzo o yula ntsie eli esumu kali, ntuuna eya enyuniŋi ntsa ndzo, o ŋiŋa yo etsalihi eso.»

Zur Zeit ausgewählt:

Luc 6: MDT

Markierung

Kopieren