लूका 7

मियाँहोड़ दरोगा राः बिसवास

(मत्ती 8:5-13; एहुन्‍ना 4:43-54)

1हेना वरी नआँ सींड़िय टेबोः हनी केते, ईसु कफरनहूम सहर रेय मिड़ाः मेजेना। 2हेना रे मियाँहोड़ रोमि सिपाहिकू रेनकू दरोगा#7:2 सव झन सिपाहिकू रेनिय मुखिया रेनिय नोकर दोहो एना। दरोगा हेंय अच्छाय दुलारिय दोहो एनु। हेंय दुख तेय गोजुः दोहो एनु। 3दरोगा ईसु राः खभेर अँजोम केते, कुछ एहूदी सामाज रेनकू सपायँड़कू ईसु थरेय कुलतेड कुआ। ईसु मेजकोः ते ईञाअय नोकारिय चीकानू मेनाः टेबोः लाय लगाडिय कुलतेड कुआ। 4हेना वरी हेंकू ईसु थरे कू मेजेना। अवुर गोड़े पय्याँ केनतेकू कहनी तेडा, “दरोगा अबू जात न लगे, हेंडे रेहो अम हेंय रेनिय नोकर मी चीकानू। 5कहेकि नेय दरोगा अबू जातकू सुदा मया मिलन तेय दोहोना, अवुर ने-नी अबू लगड गिरजा ओड़ाईय एर बनो तेडा।” 6हेना वरी ईसु हेंकू सुदाय सेनेना, तहाँ हेंकू ओड़ाः कू तयाः बंचो तोलोग, हेंय दरोगा गतितकू थरे हाः ते कहनिय लगाडिय कुलतेड कुआ, “ओ परभु, इंञ नआँ लायिक कोवाञाँ, अम इंञ ओड़ाः रे मेजुः लगड परेसानी अलोम रीमे। 7अम थरे मेजुः लायिक हो कोवाञाँ, हेनाते मेनेंञ मेजगाना, लेकिन अम मेन वरी मियाँ अखर मी टेबोः गोत्ते रेदो, इंञाअय नोकर चिकानुआयू। 8इंञ हो कनय रेनिय हरवाह हवे। इंञ उपर रेहो कुछ होड़कू राः हँक इदाना। ईञाः पेंदी रेहो कुछ नोकरकू कामा, हेंकू थरे ईञाः हँक इदाना। सींड़कू ईञाः टेबोः कू अँजोमेआँ, ‘जू’ मेंडे रेदोय चलोआ, मेजुः मी मेंडे रेदोय मेजुआ। अवुर ईञाअय कनय हरवाह हो नअँम काम मेनतेंञ कहनी वय रेदोय करो वेआ।”

9हेना वरी ईसु नआँ टेबोईय अँजोम केतेय अहचरज यनु, तहाँ अनेज तयोम ते से-ने दोहोएन हेंकू थरे, तयोम हनते तेरेज केतेय कहनी तेडा, “इंञ अपेंञ लाय वताना सींड़ इसराएल रेहो नआँ घियाआ बिसवास कबोह मेनेंञ ञेंलगाडा।” 10हेना वरी कुलतड कुः हेंकू होड़कू, ओड़ाः मिड़ाः केनते, हेंय नोकर चिकन हतड़ तन तोलोग कू मेज ञँमतेडिया।

एकल तनय कोड़ीहोन रेनिय चोंडिज ईसु जियो तेडिया

11कुछ दिन बितो केन रे ईसु नाईन सहर रे चेला कुतय सुदाय सेनेना। हेंय रेनकू चेला कुतय अवुर अखीर होड़कू हेंय तयोम तेकू से-ने दोहो एनु। 12गाँव कू बोल दोहोएन तोलोग, मियाँहोड़ मड़ा हरेय लगड होड़कू बहेर हनतेकू गोगेय दोहो एनु। हेना रे इंगत होय दोहो एना, हेंय रेनिय मिनियेंटंग कोड़ा होपोन तू दोहो एना अवुर हेंय एकल तनायू। 13ईसु मसीह हेंय ञेंलके ते अखीरिय सोग एना अवुरिय कहनी तेडा, “अलोम ईयामू।”

14हेन तोलोग ईसु मटी बँदे रेय सेनेना, अवुरिय छुवों तेडा तहाँ तुतूल कू चड़ाँ यनु। हेना वरी ईसु कहनी तेडा, “अम ढिंगवंञ कहनी वताना, रिमुःमी!” 15हेनेन तोलोग हेंय जियो रिमयाँनू अवुरिय टेबोः बेड़ाऊ। तहाँ हेंय इंगत थरेय जिमा तेडिया।

16नआँ ञेंलके ते सींड़कू अहचरज यनकू अवुर हेंकू परभु भगवान बडेय वते कू कहनी तेडा, “अबू मँझर रे मियाँहोड़ भविस्यवक्ता मेजकेना, अवुर भगवान अपन होड़कू ञेंलकेड कुतेय बंचो केडबुआ।” 17ईसु राः बिसेय ते सींड़ एहूदी देस रे अवुर आस पास राः सींड़ जघा रे टेबोः मिरीज यनु।

बतिस्माय ए-मय एहुन्‍ना राः सवाल

(मत्ती 11:2-19)

18ईसु जे-जेय करो तेड हेना सींड़ टेबोः बतिस्मा ए-मय एहुन्‍ना, अनेज रेनकू चेलाकू लाय वडिया। 19तहाँ बतिस्मा ए-मय एहुन्‍ना, बा होड़ चेला कींञतय राःकेड ते, ईसु थरे नआँ होंबोर लगाडिय कुलतेड किञाँ, “मेजुः मेनाअय अनम हवे किदो अले एटागी ले तँगिआ?” मेनते।

20हेंकींञ हेंय थरे मेजकेन तेकींञ कहनी तेडा, “एहुन्‍ना बतिस्मा ए-मय नआँ होंबोर लगड अम थरेय कुलकेड लिञाँ, मसीहा ले तँगी यडा, हेंय अनम हवे किदो अले एटागी ले तँगिआ?”

21हेनेन तोलोग ईसु अखीर दुख बिपेत तनकू अवुर जे होड़ थरे भूतकू लगो तना, हेंकुय चिकन तेडा अवुर अंद्हाकू होय चिकन तेडकुआ। 22अवुर हेंय हेंकींञ थरेय कहनी तेडा, “जू, मिड़ाः सेनकोःते नआँ हँडेबा ञेंलकेड अँजोम केड हेना एहुन्‍ना थरे बा लाये, कि अंद्हाकू ञेंञेंल तना, लंगड़ाकू सेनियाडा, कुड़गाकू चिकानुः तना अवुर बेहरा कू अअँजोम तना, गोजकोःकू जियोः तना अवुर गरीब होड़कू बढ़ियाँः खभेरिय लाय वकू तना। 23आसीसिय ञाँमा हेंय, जे इंञ थरे बेगर संखा तेय बिसवास बगी तआ।”

24हेना वरी एहुन्‍ना रेनकींञ चेला कींञ चलो यनु, तहाँ ईसु एहुन्‍ना राः बारे ते होड़कू थरेय लाय तेडा, “अपे सुनहर ओत रे ची ञेंल पे सेनेना? होय ते हिलोः हेना सरफी किदो? 25अपे ची ञेंल पे सेनेना? महगाँ दाम राः कपड़ा तुसींञ तडाय होड़ किदो? अँजोम पे, चमकोः हेना कपड़ा तुसींञ कू अवुर मवोज मस्ति ते दोहोनकू गड़ही रेकू दोहोना। 26हेनावर फेर ची ञेंल पे सेनेना? कनय भविस्यवक्‍ता किदो? हूँ, इंञ अपे थरे सही मेतेंञ कहनी यडा, भविस्यवक्‍ता वरी हो बडेअय ञेंञेंल पे सेनेना। 27नेय हें-नी हवे, हेंय राः बिसेय ते लिखल इदाना, ‘अँजोम मी, इंञ इंञाअय दूत#7:27 ईसु वरी मड़ंग ते खभेर ए-मय हो-ड़ू अम वरी मड़ंग मड़ंग तेंञ कुलियाडिया, अम वरी मड़ंग ते अमाः होरिय सोझा#7:27 होड़कुय तयार हताड़ा। ।’ 28इंञ अपे थरेंञ कहनी यडा, कोड़िकू वरी जनम केनकू मेंडे एहुन्‍ना वरी बडे कनय कोवाआ। हेंडे रेहो भगवान राः राज रे सींड़कू वरी होडीञाँय, एहुन्‍ना वरी होय बडे गिआ।”

29 # मत्ती 21:32; लूका 3:12 सींड़कू अँजोम केते अवुर मलगुजारी तिलाकू हो एहुन्‍ना वरी बतिस्मा तिला केते, ईसु राः टेबोः भगवान सच्‍चा गिअय मेनते कू मनो तेडा। 30लेकिन फरीसिकू अवुर एहूदी नियम चेचेडकू भगवान हेंकू लगाडिय पसींद तडा हेना कू बगी वडू। कहेकि हेंकू एहुन्‍ना वरी बतिस्मा मेने कू तिला गडा।

31ईसु फे-रिय कहनी तेडा, “नआँ जुग रेनकू होड़कू करा घयगी अकू, काःतेंञ लाय वपेआ? 32हेंकू नेकू चोंडिजकू घयगी अकू, बाजार रे दुड़ूब कोःते एटाःकू थरे हाक हाक तेकू कहनियाँ, ‘अले अपे लगड खुसी ते बसरी ले बजा तेडा, अवुर अपे मेने पे सुसून गना, अले दुख राः सीरिंग ले सिरिंग तेडा, अवुर अपे मेने पे ईयाम गना।’ 33लेकिन बतिस्मा ए-मय एहुन्‍ना खयना चिली हो मेनेय जोमगाडा अंगूर रस हो मेनेय ञूँ दरवर गडा, अवुर ‘अपे कहनी वया नेय थरे भूत इदाना’ मेनते। 34अवुर होड़ होपोन जोमुः चरोः तनायू अवुर अपे कहनी यडा, हरहाअयू अवुर मतवाड़ी अयू अवुर मलगुजारी तिलाकू अवुर पापी होड़कू रेनिय गति हवे मेनते। 35एहुन्‍ना अवुर इंञ काम केड हेना सच्‍चा गिआ मेनते, भगवान रेनकू होपोनकू जे-रेआ कू।”

फरीसी ओड़ाः रे पापी कोड़ीहोनिय माफ तेडा

36हेना वरी मियाँहोड़ फरीसी अनेज सुदा जोमुः लगड ईसुय राःतेडा, तहाँ ईसु फरीसी ओड़ाः रे जोमुः लगाडिय दुड़ूब तना। 37#मत्ती 26:7; मरकुस 14:3; एहुन्‍ना 12:3हेन तोलोग हेन सहर रेनिय मियाँहोड़ पापी कोड़ीहोन पपाड़ियन किदो ईसु फरीसी ओड़ाः रे जोमुईय दुड़ूब केना मेनते, तहाँ दिरी राः बोतल ते सोओं सुनूमिय अकतेडा, 38हेंय ईसु कटा बँदे रे उकड़ुम केनतेय ईयाम एना, मेडतू दाः ईसु कटा रे जोर दोहो एनु। हेना वरी हेंय कोड़ीहोन उबतू ते ईसु कटाई जोड दोहो एनु, अवुर बित्ताही ते कटात चोः चोः ते हेंय ईसु कटा रे सोओं सुनूमिय ओजाः दोहो एनु।

39तहाँ नआँ ञेंलके ते ईसुय राःतड हेंय फरीसी मने मन रेय पसींद तेडा, “सही मेते नेय भविस्यवक्ता दोहोएन रेदो, ईया छुवों यडिंञ मेनाअय पपाड़ियन मेनू; कहेकि नेय पापी कोड़ीहोन हवे।”

40हेना वरी ईसु कहनी तेडा, “ए सिमोन, इंञ अम थरे कुछ कहेक इदाना।” तहाँ हेंय कहनी तेडा, “कहनिय मिखा गुरू।”

41ईसु कहनी तेडा, “कनय महाजन रेनकींञ बा होड़ करजा कींञ तिला तडा, मियाँहोड़ थरे पाँच सव चाँदी राः सिक्‍का#7:41 रिचकी अवुर मियाँहोड़ थरे पचास सिक्‍का राः करज दारिय दोहो एना। 42हेना तोलोग हेंकींञ बना होड़ थरे उधार मिड़ाः लगड पेयसा मेने दोहो गना, हेनाते हेंय हेंकींञ राः करजाय छुट तेडा। हेनाते नेकींञ बना होड़ वरी हेंय होड़ बगरा ते काय मान मरजादिया?”

43हेना वरी सिमोन जबाब तेडा, “ईञाः मन रेदो जे राः बगराई छुट तेड हेनी।” हेना वरी ईसु हेंय थरेय कहनी तेडा, “अम ठिकेम लाय तेडा।”

44हेना वरी हेंय कोड़ीहोन हनते तको केते, ईसु सिमोन थरेय कहनी तेडा, “अम नेय कोड़ीहोन मी ञेंलियाडिया? इंञ अम ओड़ाः रेंञ मेजेना, कटांञ गोड़दोही लगड दाः घलि मेनेम एमगाडा, लेकिन नेय इंञ कटा मेडतू दाः ते लोहा केते उबतू तेय जोडतेडा। 45अम मेनेम चोःगाडिञाँ, लेकिन इंञ मेजकेन वरी नेय कटांञ चोचोः मेनेय बगी गडा। 46अम दो भोगिंञ रे सुनूम मेनेम ओजाः गडा, लेकिन नेय कटांञ रे सोओं सुनूमिय ओजाः तेडा। 47हेनाते इंञ आमींञ लाय वताना, नेय बगराय पाप तेडा हेना माफ यना, हेनाते नेय अखीर तेय मान मरजाद यडिञाँ। लेकिन जे राः दमभर माफ केना, हेंय दनम भर तेय मान मरजादिया।”

48अवुर ईसु कोड़ीहोन थरेय कहनी तेडा, “अमाः पाप माफ यना” 49हेना वरी जे जे हेंय सुदा जोमुः कू दुड़ूब तना, हेंकू अपन अपन मन रेकू पसींदे दोहो एनु, “नेय ईया हवे पाप होय माफ गोत्तेआ?” 50हेना वरी हेंय कोड़ीहोन थरेय कहनी तेडा, “अम बिसवास तेडा ते अम भगवान बंचो केडमिआँ, हँसी खुसी तेम चलोऊ।”

Zur Zeit ausgewählt:

लूका 7: ksz

Markierung

Kopieren