एहुन्‍ना 15

ईसु सुदा बू जुड़ो बगी कोऊ

1सहिआ अंगूर नरंग इंञ हवे, अवुर अपुंञ किसान हवे। 2अवुर जे नरंग इंञ वरी नरंग केना, अवुर हेना मेने जोः रे, अपुंञ गेर गोत्ते अयू, अवुर जोः हेना नरंग अवुर जोः लगाडिय कुड़गो वेआ।#एसा 5:7 3अपे दो इंञ चेडकेड पेआ हेना रेपे बिसवास केडा, हेनाते अपे पनाहिल ते सुद्ध#15:3 कुड़गो केडपेआ गिआपे। 4अगर अपे इंञ थरे पे दोहोन रेदो, इंञ हो अपे थरेंञ दोहोना। जेयसे लरंग तू दुबीत रे मेने जुड़ो बगी कोः रेदो अपने अपन ते एरो जो-एना, हेन घयते अपे हो इंञ थरे मेने पे जुड़ो बगी कोः रेदो, अपे फल एरो पे अग सको एना। 5इंञ अंगूर दुबीत हवे, अपे लरंग तू हवे, जे इंञ सुदाय जुड़ो बगी कोआ, इंञ हेंय सुदांञ जुड़ो बगी कोआ, अवुर हेंय फालिय आगा। कहेकि अपे इंञ वरी बेघर कोःते कनर एरो पे करो सको एना। 6अगर कनय इंञ सुदा मेनेय जुड़ो बगी कोः रेदो, हेंय जेयसे नरंग तू गेरके तेकू घिर गोत्तेआ, अवुर लोहोड़ जोम तहाँ होड़कू जवर केते सेंगेल रेकू तुयाँग लोया, हेंय हेन घयगी अयू। 7अपे इंञ सुदा पे जुड़ो बगी कोः रेदो, अवुर ईञाः टेबोः राः अनुसार ते जीवन पे बितो रेदो, भगवान थरे जे-नपे असी, हेनाय ओवा पेआ। 8अवुर अपे अखीर ते फल पे अग रेदो, भगवान राः मान मरजाद होयाआ। नआँ घयतेपे करोवे रेदो, अपे सही मेते ईञाःकू चेलाकू हवे। 9अवुर जेयसे अपुंञ ईञिय परेम तेडा, हेन घयते इंञ होंञ परेम केडपेआ, हेनाते अपे हमेसा ईञाः परेम रेपे दोहोनू। 10इंञ अपुंञ राः हुकूमिंञ मनो केडा, हेनाते इंञ हमेसा हेंय राः परेम रेंञ दोहोना। हेन घयते अपे हो अगर ईञाः हुकूम पे मनो रेदो, ईञाः परेम रेपे दोहोना। 11अवुर ईञाः मन हवे कि जेयसे इंञ अखीर खुसी तेंञ दोहोना, हे-ना खुसी अपे हो भरपूर ते ञँमुऊ। हेनाते इंञ नआँ सींड़ टेबोः अपे थरेंञ कहनी तेडा।

12 # एहुन्‍ना 13:34; 15:17; 1 एहुन्‍ना 3:23; 2 एहुन्‍ना 1:5 ईञाः हुकूम नआँ हवे कि जेयसे इंञ अपेंञ परेम केडपेआ, हेन घयते अपे हो परेम ओड़ेंग पे। 13नआँ वरी बडेआ परेम कनय राः कोवाआ कि अपन गतिकू लगड जीवितिय ए-मू। 14इंञ जे-नंञ हुकूम वडपेआ, हेना पे मनो रेदो, अपे ईञाःकू गतिकू हवे। 15अब इंञ हरवाहकू मेनते एरोंञ कहनी वडपेआ, कहेकि मुँवर तू चीय बनोः हेना, हरवाह मेनेय पपाड़िआ। लेकिन इंञ अपे गतिंञ कू मेनतेंञ कहनी वपे तना, कहेकि जे टेबोः अपुंञ वरिंञ अँजोम केड हेना, अपे सींड़िंञ लाय वडपेआ। 16इंञ अपे बेगर पे चुनो विञाँ, बल्कि इंञ अपेंञ चुनो केडपे तेंञ चड़ाँ केडपेआ। ताकि अपे सेनकोःते फल पे आगू, अवुर अपे राः फल बनो बगी कोऊ, अवुर अपे इंञ ञुमू ते जे-ना अपा थरे पे असियू, हेंय अपेय ओवापे। 17अपे एटाःकू सुदा परेम पे रखो लगड, नआँ सींड़ टेबोः अपे थरेंञ हुकूम यडा।

दुनिया रेनकू होड़कू चेलाकू एरो कू बेस वडकुआ

18तहाँ फेर ईसु चेला कुतय थरेय कहनी तेडा, “दुनिया रेनकू होड़कू जरूर अपे एरो कू बेस वडपेआ, उहयारे पे हेंकू अपे वरी हो मड़ंग ते इंञ हो मेनेकू बेस गडिञाँ। 19अगर अपे दुनिया रेनकू होड़कू घयतेपे दोहोएन रेदो, हेंकू अपन होड़कू घयतेकू परेम तेडपे मेनू। लेकिन अपे दुनिया रेनकू होड़कू घयते कोवा पेआ, बल्कि अपे दुनिया रेनकू होड़कू वरिंञ चुनो केडपेआ, हेनाते अपे दुनिया रेनकू मेने कू बेस वपेआ। 20#मत्ती 10:24; लूका 6:40; एहुन्‍ना 13:16हरवाह मुँवर तू वरी बडे मेनेय दोहोना मेनते, इंञ अपे थरेंञ कहनी तेडा, हेना टेबोःपे उहयरता। अगर हेंकू इंञ घली कू सतो तेडिञाँ, दो अपे होकू सतो पेआ। अगर हेंकू ईञाः टेबोः कू मनो तेडा, दो हेंकू अपे राः होकू मनोवेआ। 21नेंदोरा सींड़ इंञ ञुमू राः चलते ते, अपे सुदा कू करो वेआ, कहेकि हेंकू ईञिय कुलकेडा हेंय मेने कू पपाड़ी तना। 22अगर इंञ ना दुनिया रे मेनेंञ मेजगानू, अवुर हेंकू भगवान राः टेबोः मेनेंञ चेडगड कू रेदो, हेंकू अकू पाप केड हेना, हेंकू थरे पाप राः दोस एरो लगोएन मेनू, लेकिन इंञ मेजकेनते हेंकू भगवान राः टेबोईंञ लाय वडकुआ, हेनाते न्याये चेका हेंकू बेगर ले पापा मेनते बहाना एरो कू बनो सको एना। 23जे इंञ मेने कू बेस वञाँ, हेंकू अपुंञ हो मेने कू बेस वया। 24अवुर जे चमत्कार राः काम कनय होड़कू मेने कू करो सको गना, हेना इंञ हेंकू मड़ंग रेंञ करो केडतेंञ तिःवड कुआ। अगर हेना काम मेनेंञ करो गड रेदो, हेंकू थरे पाप राः दोस एरो लगोएन मेनू। लेकिन अब हेंकू ईञाः दोवारा ते करो केड हेना चमत्कार कू ञेंलकेडा, हेंडे रेहो हेंकू इंञ अवुर अपुंञ मेने कू बेस गडलिञाँ। 25अवुर नआँ नेन लगड होया एना कि हेंकू राः नियम रे लिखो तड हेना पूराऊ, हेंकू राः नियम रे हाँःते लिखो केना, ‘हेंकू इंञ बे-मतलोब ते मेने कू बेस गडिञाँ।’ 26अवुर तयोम ते अपुंञ हनवरी मियाँहोड़ सहेता ए-माय अपे थरेंञ कुलेया। हेंय अपुंञ हनवरिय मेजुआ, सत आत्मा#15:26 पवितर बिरवा हवे। अवुर हेंय सहेता ए-माय ईञाः बारे ते अपे गोवाहिय ओवा पेआ। 27अवुर अपे हो ईञाः गोवाही एम कू हवे, कहेकि अपे पहील वरी इंञ सुदा पेआ।”

Zur Zeit ausgewählt:

एहुन्‍ना 15: ksz

Markierung

Kopieren