लूकाल 10
10
येसु डेब्बै रोंड सिस्युल्कुन सेवाहाटीं लोहातोर
1अद आता पजा सामि, इंका डेब्बै रोंड मंदि सिस्युल्कुन पेरतोर. पेरसि, बव नाह्कुने अय्ते ओन्क होनना मत्ता अव नाह्कुने ओना सिस्युल्कुन इव्वुर-इव्वुर्कुन कीसि मुन्ने लोहातोर. 2ओर्कुन लोहानेंके इल्हा वेहातोर, “पंटा वेल्लेने पंडुता गानि बूतिनोर तक्को मंतुर. अदुनहाटीं पंटाता मालकुंक बूतिनोर्कुन पंटा कोय्यालय लोहा इंचि विनंति कीम्टु.#10:2 इद वचनता अर्तम बतल इत्ते, वेल्लेन लोकुल्क येसु वेहता पोल्लें केंजालय तयार मंतुर, गानि ओर्कु कराहलय, वेहालय मात्रम लोकुल्क तक्को मंतुर. इगे पंटा इत्ते केंजना लोकुल्क, पंटा मालक इत्ते पेनबाबाल आनि बूतिनोर इत्ते पेनदा पोल्ले कराहनोर. 3मिमेट होंट! हुळाट, तोडेल्लिन लोप्पो गोर्रे पोरिह्कुन लोहताप नना मीकुन लोहचंतन.#मत्तयाल 10:16 4मीवातोनि कोत्ताना संचि, जोरा आयि, हेरपुह्क आयिं पियमट. हर्रि पीसि होननेंके बोर कलियते ओर्कु जोहारगुडा वेहमट.#10:4 यहुदि जातितोर बेकेनना पय्नेम होननेंके नड्डुम हरदे बोरन्ना एरपाटनोर कलियानय्ते वरोंक-वरोर ऊके-ऊके सुक-दुक्काल्क वेहकुनुंदुर. अदुनहाटीं सेवक होननेंके अल्हा कीते अग्गेन वेला आंता इंचि येसु ओर्कु इल्हा वेहातोर. 5मिमेट बद लोन अय्ते दांतिटो, मोदाला, ‘इद लोतुक सांति दोर्कि’ इंचि इंटु. 6अद लोते सांति गावाले इनना मनकल मत्ते अद सांति ओनगा दांता, गानि अगा गिंटा सांति गावाले इनना मनकल हिलाकोंटे आ सांति मिहागेन वापस वांता. 7कबळ कियानोंकु बूति दोर्कंता. अदुनहाटीं मिमेट बद लोन अय्ते दांतिटो अद लोतुर बतल हींतुरो अद तिंचेक-उंचेके अदे लोते मंटु, अलग-अलग लोह्कुने मनमट. 8मिमेट बद सहरते दांतिरो, अद सहरतोर मीकु बेस मान-मरयादा कीते, ओर मीक बतल तिनालय हींतुर अदे तिंटु. 9अगाटा बिमारतोर्कुन बेस कीसि, ‘पेनदा राज्येम दग्गेर्क एव्ता’ इंचि ओर्क वेहाट. 10-11गानि मिमेट बदन्ना सहरते होतस्के ओर मीकुन बेस मान-मरयादा कियाकोंटे, अगाटा हरकुने होंचि, ‘मिमेट माकु मरयादा कियुवा विरोदमते, मावा काल्कुंक अंटता मीवा सहरता दुब्बागुडा मोमोट इगेन दुल्पसंतोम. अय्नागानि इद मतिते इर्रट, पेनदा राज्येम दग्गेर्क एव्ता,’ इंचि ओर्क वेहाट. 12नना मीकु वेहासेक गदा, न्यायम कियना रोजुने, #उत्पत्ति 19:24,25 सदोम सहरता परिस्तिति आ नाह्कुंकन्ना बच्चोरो बेस मनंता,” इंचि येसु ओर्क वेहतोर.
येसुना पोल्लें केंजवोरा नाहकु
(मत्तयाल 11:20-24)
13येसु मर्रा इत्तोर, “ए कोरजिना आनि बेतसेदा नाटेना लोकुरिटा! मीकु गोसा तप्पो! ओक्कला मिहगा बव अद्बूताल्क आतां, अवे गिंटा सूर, सिदोन नाह्कुने आसि मत्ते, अगाटा लोकुल्क बिराना बोंतां हुट्सि, मेंदुल्क बूळ्दि होकसि उद्दिसि दुक्कमते मनसु मार्सकुंचि मन्नेर. 14गानि पेन न्यायम कियना रोजुने सूर आनि सिदोनतुरा परिस्तिति मीकन्ना बच्चोरो बेस मनंता. 15ए कपर्नाहुम सहरता लोकुरिटा! मिमेट स्वर्गमते दांतोम इनकुंचंतिरा? मिमेट नरकमते दांतिर.”
16“सिस्युल्कुनिटा! बोर मीवा पोल्लें केंजंतोरो, ओर नावा पोल्लें केंजंतोर. बोर मीकुन हय्सोर ओर नाकुन हय्सोर. नाकुन हय्सवोर नाकुन लोहता पेनदुनगुडा हय्सोर,” इंचि येसु वेहातोर.
येसुना सिस्युल्कु कूस आंतुर
17पजा, येसु लोहता डेब्बै रोंडु मंदि सिस्युल्कु वेल्लेन कुसिते मल्सि वासि, “सामि, नीवा पोरोल्ते देय्याल्कगुडा मावा पोल्लेतुन केंजतां,” इंचि येसुंक वेहतुर. 18अस्के येसु ओर्कुन इल्हा इत्तोर, “नना पेद्दा देय्यमतुन मब्बुनाल पिळगुनलेसीं अरनेंके हूळतन. 19केंजट, नना मीकु तरासकु, मिच्चोन जारानद आनि पगातोरा पूरा बलमतुन गेल्सानद अदिकारम हीतन. मीपोर्रो बोरे अन्यायम किया पर्रुर. 20अयना मीवा पोल्ले देय्याल्क केंजतां इंचि कूस आयमट, गानि मीवा पोरोल स्वर्गमते रासि मंता इंचि कूस आम्टु,” इंचि वेहतोर.
येसु पेनबाबांक दन्यवाद कींतोर
(मत्तयाल 11:25-27; 13:16-17)
21अस्केने येसु पवित्र आत्माते निंडसि कूस आसि इल्हा इत्तोर, “ए नावा बाबा, बूमि आनि स्वर्गमता सामि, तेल्विगल्लोर्क आनि समजदार लोकुल्कुनगटाल इव पोल्लें मक्किचि इरतिन, सादा-सिंपल लोकुल्कुंक बारे इव पोल्लें हुपिस्तिन, इंचि नना नीवा स्तुति कीसेक मंतन. हो बाबा! नीकु इदे बेस अनपिस्ताहाटीं निमे इल्हा कीतिन. 22नावा बाबाल नाकु अन्नि अप्पजेपतोर. बाबान तप्पा मर्रिन बोरे एरपाट किय्युर, मर्रिन तप्पा बाबान बोरे एरपाट किय्युर. मर्रि ओना इस्टमाताप बाबाना बारेमते बोर्क अय्ते तेळियानाल वेहांतोर ओरे बाबान एरपाट कींतुर,” इंचि इत्तोर.
23पजा ओर ओना सिस्युल्कुन पक्कक ओसि ओर्कुन इल्हा इत्तोर, “मिमेट हूळानवुन हूळना मीवा कळ्कु वेल्लेन आसिर्वाद दोर्कतव आंदुं. 24बारित्ते नना मीकु वेहांतन, इय्याला मिमेट बव हूळसंतिरो, केंजसंतिरो, अवुन वेल्लेटुर पेनदा कबुरतोर आनि राजालोर हूळालय, केंजालय तन्लाळुंदुर. गानि ओर्क हूळालय, केंजालय दोर्काहिल्ले,” इंचि इत्तोर.
25अच्चोटेन मूसाना नियम बेस तेळियतोर वरोर गुरु निततोर. नित्तिसि येसुना पट्टु हूळानाहाटीं, “गुरु, बस्केळ्क पिस्सना पिस्वरता वारसदार आयानाहाटीं नना बतल कीते बेस?” इंचि पूसकीतोर. 26अस्के येसु ओन, “मूसाना नियमते बतल रासि मंता? दानहेंदाल नीकु बतल तेळियता?” इंचि इत्तोर. 27इत्तस्के आ गुरु, “निमे नीवा सामि आता पेनदुन पूरा मनसुनाल, पूरा आत्माताल, पूरा ताकतताल, पूरा बुद्दिताल पावरम कीम. अल्हेने नीवद निमे बच्चोन पावरम कींतिनो अचोने पावरम इंकावरोनगुडा कीम. इल्हा रासि मंता,” इंचि जवाब हीतोर. 28अस्के येसु ओन, “निमे बरोबर वेहतिन, अल्हेन निमेगुडा कीम, अस्के नीकु बस्केळक पिस्सना पिस्वर दोर्कंता,” इंचि इत्तोर. 29ओर, नना नीतिमंतुन इंचि हुप्सालय, “नावा पक्कातोर इत्ते बोर आंदुर?” इंचि येसुन पूसकीतोर.
सामरि जातिता मनकना वेसुडि
30अल्हा पूसकीतस्के येसु ओन्क उंदि वेसुड वेहातोर: “वरोर मनकल येरुसलेम सहरताल यरिहो इनना नार होंचेके मत्तोर. होननेंके नड्डुम हरदे ओन दोंगाल्क पीतुर. ओर ओनगा मत्ता सामानतुन इग्गुकुत्तुर, कपडिं तेंडकुत्तुर. पजा ओन पक्का तंचि, डुक-डुक जीवा मननेंके होळसि होत्तुर.”
31“पजा बतल आता इत्ते, अदे हरपीसि वरोर पेर्माल होंचेक मत्तोर. आ पेर्माल हिळु अरसि मत्ता मनकन हूळसि होरियसि होत्तोर. 32ओर होतस्के वरोर लेवि जातिता#10:32 लेवि जाति लेवि जातिता मनकालोर गुळिते कबळ कींतुर. मनकल अदे हर्रि पीसि वातोर. ओर इंका हिळु अरसि मत्ता मनकन हूळसि होरियसि होत्तोर. 33ओर होत्ता पजा, अदे हर्रि पीसि वरोर सामरिया मनकल#10:33 सामरिया मनकल सामरियाता एरियाता लोकुल्क सिन्ना जातितोर इंचि यहुदिल्क ओर्कुन इटते मुट्टुळ इनुंदुर. अगा एवतोर. एवतस्के हिळु अरसि मत्ता मनकन हूळसि ओनकु इरगा जीवा नोता. 34ओर ओनगा वासि ओन्क देब्बां आतगा, अवुनपोर्रो निय, अंगुर पंडिना पानकम#10:34 इस्राएल लोकुल्क अंगुर पंडिना पानकमतुन उननाहाटीं, देब्बां दल्गतगा होकनाहाटीं कियुंदुर. होकसि पट्टि दोहतोर. दोहता पजा, आ सामरि मनकल हिळु अरसि मत्ता मनकन ओना गाड्दिपोर्रो वाटसि, उंदि लाजुने ओसि ओन बेस हूळकुत्तोर. 35इंकुंदि रोज लाजता मालकुंक रोंडु एंडि कोत्तां हीसि, ईन बेस हूळा, ईनाहाटीं एक्को कोत्तां कर्स आयानय्ते, नना मल्सि वातस्के अव नीकु हींतन इत्तोर.”
36पजा येसु, “दोंगाल्कुन कय्दे देब्बां तित्ता मनकंक मुव्वुर मनकालोर कलियतुर. आ मुव्वुर लोप्पो नीवा विचारमते ओना पक्कातोर बोर आंदुर?” इंचि ओन पूसकीतोर. 37अस्के आ गुरु, “बोर अय्ते ओन हूळसि ओनपोर्रो दया कीतोर ओरे,” इंचि इत्तोर.
अस्के येसु, “होन, ओर कीताप निमेगुडा कीम,” इंचि ओन इत्तोर.
मरियम आनि मार्ता
38पजा येसु, ओना सिस्युल्कु हर्रि पीसि होननेंके, उंदि नाटेनगा एवतुर. अगा उंदि मार्ता इनना मुरतळ मत्ता. अद येसुन दाना लोन ओसि बेस हूळकुत्ता. 39दान्क मरियम इनना उंदि हेलड मत्ता. अद सामिना काल्कुनगा उद्दिसि ओर वेहना पोल्लें बेस केंजसेक मत्ता. 40गानि दाना अक्कल मार्ताल सेवा कीसि-कीसि, पूरा मोता दान पोर्रोने अरताप आता. अदुनहाटीं अद येसुनगा वासि, “सामि, नावा हेलड पूरा कबळ नावा पोर्रोने वाटसि हीता, इद निमे हूळसेक हिल्लिना? नाकु आसर आयालय दानकु वेहा,” इंचि इत्ता.
41अस्के सामि दानकु इल्हा जवाब हीतोर. “मार्ता, निमे वेल्लेन कबाह्कुना बारेमते विचारम कीसि गाबर आंतिन. 42गानि असल उंदे कबळ कियना अवसरम मंता. मरियम आ बेस कबळतुन पेरकुत्ता. अदुनहाटीं दानगटाल अद कबळतुन बोरे इगुकुन्ना परुर,” इत्तोर.
Zur Zeit ausgewählt:
लूकाल 10: esg-Deva
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Wycliffe Bible Translators, Inc. All rights reserved.
