योहान 15
15
येसु वेलितसंटोर, विस्वासुल्क पंगांनसंटोर
1येसु इल्हा वेहतोर. “निजम अंगुर वेलितसंटोन ननाने आंदुन. नावा बाबाल बारे अंगुर तोटातुन बेस हूळकुनानोर आंदुर. 2नावा पंगानाल बव पंगांक अय्ते कायां हादोंगो, अवुन ओर नरकिस पोहांतोर. आनि हादाना पंगान बारे, इंका बेस हादगोम इंचि अवुना कोस्सन कत्रिच्चंतोर. 3दीनकन्ना मुन्ने नना मीकु वेहता पोल्लेहेंदाल मिमेट साप आतिर. 4मिमेट नावातोनि बस्केळ्क कलियसि मंटु, अस्के ननागुडा इंका मीवातोनि बस्केळ्क कलियसि मनंतन. पंगा वेलिक अंटिस मनाकोंटे दान्क कायां हादों, अल्हेन मिमेटगुडा नावातोनि कलियसि मनाकोंटे बेसता कबाह्क किया परिर.”
5“ननाने अंगुर वेलितसंटोन आंदुन, मिमेट बारे पंगांनसंटोर आंदिर. बोर अय्ते नातोनि कलियसि मनंतुरो, नना बोरतोनि कलियसि मनंतनो, ओर वेल्लेन बेसता कबाह्क कींतुर. नाहगटाल वेरे आसि मंचि, मिमेट बतले किया परिर. 6बोर अय्ते नावातोनि कलियसि मन्नुरो, ओर्कुन कबळ्क ओज्जुवा पंगान पोहताप पोहचियमळ जर्गंता. पजा अव पंगां वत्तुतस्के, अवुन जमा कीसि तडमिते वाटसि बोळ्संतुर. 7मिमेट ना लोप्पो आनि नावा पोल्लें मीलोप्पो मनानय्ते, मीकु गावाले मत्तद बतल तल्किना, अद मीवाहाटीं कियमळ जर्गंता. 8मिमेट वेल्लेन बेसता कबाह्क कियानय्ते नावा बाबांक वेल्लेन महिमा दोर्कंता. दीनहेंदाल मिमेट नावा सिस्युल्क इंचि दिस अर्रंतिर. 9नावा बाबाल नाकुन बल्हा पावरम कीतोर, अल्हेन नना मीकुन पावरम कीतन. मिमेट नावा पावरमते निलसि मंटु. 10नना नावा बाबाल वेहता आदेसकुनपोर्रो ताकसेके, ओना पावरमते निलसि मंतन. अल्हेन मिमेटगुडा नना वेहता आदेसकुनपोर्रो ताकतिरित्ते, नावा पावरमते निलसि मनंतिर. 11नावा कुसि मीलोप्पो मनना, आनि मीवा कुसि पुरागा आयना इंचि, नना मीकु इव पोल्लें वेहतन.”
12“नना मीकुन बल्हा पावरम कीतनो, अल्हेन मिमेटगुडा वरोंक-वरोर पावरम कीकुंटु, इदे नावा आदेस आंदु. 13वरोर मनकल ओना दंटागानाहाटीं ओना जीवा हियमळकन्ना पेद्दा पावरम बद्दे आयो. 14नना हियना आदेसकुनपोर्रो गिंटा मिमेट ताकानय्ते, मिमेट नावा दंटातोर आंदिर. 15इंदकेटाल नना मीकुन दासुल्क इंचि केयोन. बारित्ते मालक बतल कींतोर अद ओना दासुंक बतल तेळियो. गानि नना अय्ते मीकुन दंटातोर इंचि केयंतन. बारित्ते नावा बाबाल नाकु वेहता अन्नि पोल्लें मीकु वेहतन. 16नाकुन मिमेट पेर्रा हिल्लिर, गानि मीकुन नना पेरतन. पेरसि, मिमेट बेसता कबाह्क कीसेक बेस पलम हियगोम, इंचि नना मीकुन निलाहतन. अल्हा कीते, मिमेट नावा पोरोल्ते बाबान बतल तल्किनागानि, अद मीकु दोर्कंता. 17मिमेट वरोंक-वरोर पावरम कीकुंटु, इद मीकु नावा आदेस आंदु.”
दुनियातोर मीकुन हय्सुर
18“ओक्कला दुनियातोर मीकुन हय्साकोंटे, मीकन्ना मुन्ने ओर नाकुन हय्सा हिल्लुर, इंचि मीकु एर्के. 19मिमेट दुनियातोर्क नच्चताप मनानय्ते, ओर मीकुन पावरम कीसि मन्नेर. गानि मिमेट दुनियातोर्क नच्चताप मंचेके हिल्लिर. नना मीकुन इद दुनियाताल पेरतन. अदुनहाटीं दुनियातोर मीकुन हय्सुर. 20वरोर दासुड ओना मालकुंकन्ना पेद्दोड आयोर, इंचि नना दीनकन्ना मुन्ने वेहता पोल्लेतुन मिमेट मति इर्कुंटु. ओर नाकुने तकलिप कीतुर अय्ते, मीकुनगुडा तकलिप कींतुर. ओर नावा पोल्ले परकारम ताकानय्ते, मीवा पोल्ले पोर्रोगुडा ताकंतुर. 21नाकुन लोहचीतोन ओर एरपाट किय्युर, अदुनहाटीं ओर मीकुन नावा पोरोलहाटीं इव अन्नि तकलिप्क कींतुर.”
22“उंदि वेला नना वासि ओरतोनि वळ्काकोंटा मंचि मत्ते, ओरपोर्रो पापम मना कोनवळ. गानि इंदके मात्रम ओर्क ओरा पापमताल तपिच्कुनालय हर्रि हिल्ले. 23नाकुन हय्सवोर, ओर नावा बाबान इंका हय्सोर. 24वेरे बोर किया हिल्लोर असोंटा, अद्बूतामाता कबाह्क नना कियाकोंटा मंचि मत्ते, ओरपोर्रो पापम मना कोनवळ. गानि इंदके ओर नना कीता अद्बूतामाता कबाह्कुन हूळसिगुडा, नाकुन, नावा बाबान हय्सेक हिल्लुर. 25नाकुन हय्साकोंटा मनालय बतले कारनम हिलाकोन्ना ओर नाकुन हय्सुर, इंचि ओरा दर्मसास्त्रमते रासि मंता. अद पोल्ले पुरागा आयानाहाटींगें इल्हा जर्गता. 26गानि बाबानाहेंदाल नना लोहना सहायम कियानोर, इत्ते बाबानगटाल वायना सत्तेम आत्मा, बस्के अय्ते मिहगा वायार. अद मीकु नावा बारेमते गवाइ वेहंता. 27नना सेवा सुरुव कीतस्केटाल मिमेट नातोनि मत्तिर, अदुनहाटीं मिमेटगुडा नावा बारेमते गवाइ वेहंतिर.”
Zur Zeit ausgewählt:
योहान 15: esg-Deva
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Wycliffe Bible Translators, Inc. All rights reserved.
