Matta 6
6
Didhedha Kaloŋa nyim
1Ethadhinul galo athathanya apo ŋiro ŋalo ŋina ŋiŋir gi je ganu ja liji, dil laŋa no; i nyaŋa lati laji labuje mukaafa gwalo di Babo gwalo gwina gwathije Sama no. 2Ma ŋa dhedha kwijo gwarush gwuŋa gwina gwati gwuthi ŋida no, athaŋa gwi ulinu no, gwiro ŋinena athin liji lina luthi dhuŋuna ganu ram are gi majaamiⓐ a gi dai alaŋ, alari lal liji neye. Titiganu nyi gwa gwacaijinu, Limapai mukaafa gwegen. 3Abi mathaŋa dhedha lijo ŋida ŋalo lina lati luthi ŋida no, athaŋa abrico dhoi dhuŋa dhina dhiro dhour dhaliŋa dhuŋuna dhina dhapo dhiŋir no. 4A dhedha gwalo ro nyim; a Babo gwalo gwina gwathaŋa dhuŋuna dhina dhigilibo gwaji gwaŋadhedha mukaafa titir.
Dabiŋaijo Kaloŋa nyim
5Ada ŋa gwimaro gwabiŋaijo Kaloŋa, athaŋa rui ŋinena liji lina luthi dhuŋuna ganu ram no, lina lathamani ganu di dire alabiŋaijo Kaloŋa gi majaamiⓐ, a kalo gina gathin dai apaije galo, athilari lal liji aŋa. Titiganu nyi gwa gwacaijinu, Limapai mukaafa gwegen. 6Abi maŋari gwabiŋaijo Kaloŋa, udhi kiru, ŋaluthe gibura, ŋabiŋaijo Babuŋw gwuŋa nyim; a Babo gwuŋa gwaŋaŋa dabiŋaijo nyim a gwaji gwaŋadhedha mukaafa. 7Ada ŋa gwimabiŋaijo Kaloŋa, athaŋa wuritejo gi dhuŋun dheta gwortal, gwiro ŋinena athin Liumam are no; lathare minoŋ, alari laji lal Kalo deŋinaijo dhuŋuna dhegen dhina dhoinyadho. 8A minoŋ athanya rui ŋinena ŋediŋa no; ŋinena liŋidhi Babo gwalo ŋida ŋina ŋibupanyalo kwereny nanaŋ gwati gwothaijanya galo no.
Dhuŋun dha dhabiŋaijo Kaloŋa dhina dhaŋajo Yasuuⓐ calmiz
9Mathanya abiŋaijo Kaloŋa nyare minoŋ, Babo gwuri gwina gwathije Sama, abrico jiriny juŋa al liji uminyi. 10Ŋabrico gidhileo guŋa ŋwila, a dhuŋun dhuŋa je kidhila, gwiro ŋinena ŋwunje Sama. 11Athijidhedha ŋida ŋa dheny gigina. 12Ŋa dhudhani ganu ŋidi ŋike ŋina ŋathanalapai; gwiro ŋinena athana dhudhani ganu ŋidi ŋike ŋina ŋathil liji liter apai daguri. 13Athijabrico ana lugejini gi dugor ganu duri no, jibubire ŋidi ganu ŋina ŋike. Gidhila peth guŋa, a ŋoma peth ŋuŋa, a majdh, gwortal. Amiin. 14Ada nyaŋa limathi dhudhani ganu ŋidi ŋike ŋina ŋathil liji liter apai dagalo, a Babo gwalo gwina gwathije Sama gwadhudhani ganu ŋidi ŋalo ŋina ŋike ko. 15Abi ada nyaŋa limathathi dhudhanu ganu ŋidi ŋike ŋina ŋathil liji liter apai dagalo no, a Babo gwalo gwati gwadhudhani ganu ŋidi ŋalo ŋina ŋike ko no.
Dijalo jamu
16A ada nyaŋa limathije jamu, athathanya jo gi je ganu kwudiny, gwiro ŋinena liji lina luthi dhuŋuna ganu ram no; lathije gi je ganu kwudiny minoŋ al liji liŋa darnu lo jamu. Titiganu nyi gwa gwacaijinu, Limapai mukaafa gwegen. 17A ada ŋa gwimathije jamu, athaŋa bulani ŋela gi lira ganu, ŋuni gi je ganu. 18A kwiji gweda gwati gwaŋaŋa darnu ŋa gwo jamu no, abi Babo gwalo gwina gwathije girimu; a Babo gwalo gwina gwathijaŋa nyim, gwaji gwaŋa dhedha mukaafa.
Ŋidi ŋoinyadho ŋina ŋiro titiganu
19Athaŋa auwadhinu ŋida ŋina ŋiŋiranu mina kidhila, ŋina ŋaji ŋal lodo digiriye i ŋarode, i ŋal luram aji ŋaluni i ŋalapai ŋwuramai no. 20Ŋa bauwadhini ŋida ŋuŋa Sama, kalo gina gati gan lodo digiriye i ŋarode, i ŋati ŋuthi ŋoma ŋan luram uni alapai ŋwuramai no. 21A kalo gina gathaŋanauwa ŋida ŋuŋa, a dhugor dhuŋa dhathin je ko.
Fure a girim
22Ke giro lamba la dhaŋinu; ada ke guŋa gimure ganu, a aŋinu yuŋa yathuthi fure gwoinyadho. 23Abi ada ke guŋa gimake, a aŋinu yuŋa yathirimi ganu. Abi ada fure gwuŋa gwimarimi ganu, gabidaije gabuthani gwuleny.
Dhenya, a aradi Kalo
24Kwiji gwetipo gwati gwuthi ŋoma gwupijo lelenya ram ŋiro no, gwaji gwuŋwirini gweta, a gwuŋwuminyi gwiter; i gwaji gwuŋwdima gweta, a gwuŋwirini gwiter. Nyaŋa lati luthi ŋoma laro jadham ja Kalo a ja gidhila no. 25A minoŋ, nyi gwa gwabiŋaijaje, ŋajaici, Athaji dugor mirejo ŋida ŋa dheny a ŋidi ŋa dheye no; a ŋidi ŋa dhil aŋinu yalo gena no. Midhe gwati gwibuthanu ŋidi ŋa dheny, a aŋinu ibuthanu gi ciraŋ ja dhigena? 26Aŋadhul nyireo nya kabo; nyati nyathikwoi no, a nyati nyathuni no, a nyati nyuthi nyiluŋu no, athilbi Babo gwalo gwina gwathije Sama dhedha ŋida ŋa dheny. Nyaŋa lati liŋiranu gwuleny gi nyira a? 27Ei gwo dagalo gwina gwuthi ŋoma gwolanalaŋ gwitiny gwiren dhuŋun dhai dhina dhuthuŋw? 28Abi kworaŋ athajibi dugor mirejo ŋida ŋa dhigena? Aŋadhul ŋwaur ŋwa kedho dilbiŋa akwai; ŋwati ŋwathapai ŋiro no, a ŋwati ŋwathireye no. 29Abi nyi gwa gwabiŋaijaje, ŋajaici, Sulemaan gi majdh gwuŋun peth gwati gwigeno ciraŋa jiro ŋinena laur leta ibila no. 30Ada Kalo gimathigeta karo momaŋ minoŋ, gina gathije kedho lamun letipo, athibi liji geta kiga bigunu, gati gwoinyadhanu dajidhedha ciraŋa na? nyaŋa lina lati luthi imaan gwoinyadho no. 31A minoŋ athathanya abiŋinu gi dugor ganu dalo no nya larnu, aŋ gwiro gwaji gwaneny? i aŋ gwaji gwaniye? i aŋ gwaji gwanagena? 32(Ŋinena athi Liumam bupe ŋida ibiŋa peth;) a Babo gwalo gwina gwathije Sama gwiliŋidhi darnu nyaŋa libupo ŋida ibiŋa peth. 33Abi kwerkwereny bupul gidhileo ga Kalo, a dhuŋun dhuŋun dhina dhiŋir; a ŋidi ibiŋa peth ŋajil badhaijo. 34Athaji dugor mirejo dhuŋuna dhina dhaji dhila bigunu no; abi bigunu gwaji gwubiŋini ŋida gi dhugor dhuŋun. Lamun lidadho lina lijilai ŋidi ŋina ŋike.
Zur Zeit ausgewählt:
Matta 6: HBN
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
First published by the British and Foreign Bible Society in 1966.
