Lukas Uram 1

Deyok kouna uram

1:1-4

(Mat. 1:1-10)

1Ni Nai Teofilus. Nun Nai Imtamnyi biryi minob ebdeiansou tok ukuryok kunubdeibmou deyok ati kerek sekeibkwinkin. Ara, nun Du Yesus biriman aryi nun kankan dam aryi kunubdeibmou dinyi yuk-yuk ati kerek sekeibkwinkin. Yuk nang ninyi ilinto aryi a deyok ati, “Lak ebkwayeb,” tenen kerek sengna sirya kerek sengdeiriramnyi. 2Ara, sun nun Du biryi yuma kobdob aryi kuboka kunuramwe dinyi asi asing eiriramnyi nang ara nun Du uram kunubde ban nang aryi, “Ato-ato dinyi kunuramwe,” eboka lak eramnyi tok liliboka kerek sengdeiriramnyi. 3Yuk nang aryi nun Du biryi kunuramwe to liliboka kerek sengdeiriramnyi deyok aryi, nibabyi neiktoto a kunuramwe dinyi nirya asi kerek sekeibman. Ara, nun Du yuma kobdob aryi kuboka kunuramwe dinyi asi busul kuboka ingkirikoka ani, niryi, “A dinyi lilibdeiboka kerek sekdeibkwan,” tenebsiryi, kanda ni nai Teofilus bisi a kerek sengna sekdeibmakin. 4Uca, kanci a kerek sengna nukminci bikminyi ura, kanci kankana kum uca, “A etereraning dinyi nirya ara diba,” teneboka bikwandim.

Er Imtamnyi uram eryuryangananyi biryi, “Ninyi me dongonanyi si Yohanes deibkwande,” lak ebmou deyok

1:5-25

5Weik sienyi si Herodes biryi sun Yudea mutuk nang asi arungdeiriramwe ba, ninyi si Zakharia ab er ner Elisabet ab a kurandei. Anyi Zakharia bira Er Imtamnyi kan ninyi kan noutam kuboka antanirdeirinanyi kuramwe. Zakharia bira Harun deibdobanyi si Abia yalanyi kuramuryi, Abia yala nang wa in tamnyi kuramwe. Ba, er doamwe ner Elisabet bibabyi Er Imtamnyi ai wa inanyi Harun deibdoba ner kuramwe. 6A nang bitinyi ara Er Imtamnyi urasintam aryi teleb dinyi kurandeici, Er Imtamnyi Uram aryi ukubdarur eramwe to ab erdeiramwe to kunurandei. Ba, malyi kun dinyi ara ton kum kurandei. 7Ato kurandei bok, er ner ara mi you ner kuramwe deyok aryi, a nang bitinyi mi ton kum deibdandei asi wise sirya danandei.

8Ura, uki tentok tum aryi Zakharia wa in tam nang aryi Er Imtamnyi biti ninyi dama deirin ai wa ibmai. Wa inmai ba, Zakharia biryi Er Imtamnyi urasintam asi ninyi dama deirin ai wa in dinyi irbinmou. 9Ara, Bait Allah ai ara Er Imtamnyi biti ninyi dama deirin ai siltong teleb dinyi uk darbinkwamangnyi ura, “Unanyi bisi Bait Allah ai wengbindoka siltong teleb dinyi uk darbinkwamar do?” teneboka keil ila deici ninyi si kerek sekoka im sukni uca, erebwelebnanyi bisi Bait Allah ai wengbindoka wa iramnyi. A ukuramnyi to kuboka im sukmai uca, Zakharia si sekmai tam asi erebwelebmou. 10Ba, Zakharia bira Bait Allah ai wengbindoka ani, Er Imtamnyi biti siltong teleb dinyi uk darbinmou. Er Imtamnyi biti siltong teleb dinyi uk danmou talak ara Er Imtamnyi Uram keken nang ilinto ara ai dam buluboka wekmaici, Er Imtamnyi bisi molonmai.

11Ura, Zakharia biryi wengbindoka diramwe uca, Er Imtamnyi uram eryuryangananyi yandoka lak kibdanmouci, tong teleb dinyi uk daramnyi ai siriktam kuboka tikmou asi asing eibmou. 12Zakharia biryi anyi bisi asing eibmou ura, lukdandoka er kanya ilil kubmou ba, kanya sirim talebmou. 13Ato kubmou bok, Er Imtamnyi uram eryuryangananyi biryi Zakharia bisi ato ebmou, “Se Zakharia, kan ilil kukina mem! Kanci Er Imtamnyi bisi molorum dinyi ara Er Imtamnyi biryi sirya kekebkou ati, kan ner Elisabet bira mi mundu boboka sal deibkwande. Ba, a deibci mi ara si Yohanes eboka dobkwandum. 14A mi deibci ura, kan kanya karyi asa mitik kum kubkwankir. Neiktoto ninyi ilinto ababyi sun kanya kilkil mitik kum kubkwande. 15A mi ara Er Imtamnyi urasintam aryi weiknyi kubdiryok, Er Imtamnyi wa akwe ibde binkwande ba, nebdobci ura, walina talen me ara kum yibkwandur. Tonda, er kwin mundu umbura kubkwande talak aryi kuboka Er Imtamnyi Kanya Roh Kudus aryi ersi langdibdeibkwande. 16Langdibdeibci ura, erci eterebkwande eterena deib aryi Israel yala nang ilinto asi Er Imtamnyi tam urasin dangubdeibkwande. 17Erci Er Imtamnyi Kanya Roh Kudus mikib aryi nabi Elia biryi ilil kum asa etereramwe to kuboka Er Imtamnyi yankwamar asi menekoka bisik yabkwande. Ba, er eterena aryi tubto tamuboka ninyi wise nang aryi sun mabwe nermabwe boukwe kiboka antanibdobkwaming. Ani, tonda ‘Er Imtamnyi Uram asi sulbalyi kanya bon nang asi danguboka busul kanya bon nang kuraming to diblilibde kunubting,’ tenento kubkwaming. Ato kubokabdiryi kan ner deibkwande mi nebdobci ura, Er Imtamnyi Uram keken nang kobdoba kibdeibkwande,” ebmou.

18Ato ebmou bok, Zakharia biryi Er Imtamnyi uram eryuryangananyi bisi, “Ni ab ni ner ab ara sirya wise danoumwe. Ukura mi deiriraming talak kuma, ati una kubniminyi uca, kan ebmarim uram ara diba tenebkwaman do?” eboka asibdenmou.

19Uca, Er Imtamnyi uram eryuryangananyi biryi Zakharia bisi, “Nira Gabriel Er Imtamnyi wa irmilinunyi kunun aryi kansi uram teleb boyankwamakunwe ati, Er Imtamnyi biryi bokwetebmanir ba, kan dam eryuryanman. 20Bok, ni ebman uram dib kum tenebmarim ati, kansi diboka ebkwinkin, arub aryi uram kum danankici ani, a nirya ebman to kunubci tum ara uram botobkwankir,” ebmou.

21Ai umbura dam uram sisingmarei talak ara uki weik kubmou ba, baitam kunmai ninyi ara, “Ukuca yankur, ukuca yankur,” tenen dibde bukmai asi ola kum yanmou. Ola kum yanmou ura, “Nai e, una kunmar do?” tenen aryi sun kanya kankana kubmou. 22Asi ai umbura aryi anamtingyau ura, uram kum ebmouci, taruk aryi uram sisingninto kuboka sunsi, “Ni uram iya kum danmanir,” eboka lak kibmou. Ba, sunci bikmai ara, “Bait Allah ai umbura aryi kunumna ton eibmar aryi kubmar,” tenen bikmai.

23Ura, Zakharia er wa ibde kuramwe ani, er uki sirya ibmou ura, er atei bindobmou. 24Bindobmou ura, uki kum kunmarei cok, er ner Elisabet bira mi mundu bobmou. Mi mundu bobmou talak ara wala amubaryi ai dem buramwe ba, ninyi ara er urasin ton kum eiramnyi. 25Ba, mi mundu bobmou deyok ati Elisabet biryi ato ebmou ara, “Ni Nai Imtamnyi biryi nisi ilil tenen dinyi kiknibmanirci, ukuryok Er Imtamnyi biryi teleb tenebnou to aryi mi you dinyi asi ninyi urasin dam aryi kilibkabokmanir ba, mundu bobman,” ebmou.

Er Imtamnyi uram eryuryangananyi biryi Er Yesus deibkwamwe to lak ebmou uram deyok

1:26-38

26Ura, Elisabet mi boamwe talak ara wala nabaryi dinyi kubmou ba, uki tentok tum aryi Er Imtamnyi biryi Er Uram eryuryangananyi si Gabriel bisi imtam aryi kuboka Galilea mutuk atei si Nazaret dam bokwetebmou. Ara, “Kanci kam ner si Maria dam bindoka Ni uram erbirum,” eboka bokwetebmou. 27A kam ner ara ninyi mitika iya ton er dam bardena kum kuramnyi ner kuramwe. A kam ner si Maria bira, “Yusuf dobkwande,” eboka taknubdeiamnyi. Yusuf bira weik sienyi si Daud yalanyi kuramwe. 28Ura, Er Imtamnyi Uram eryuryangananyi Maria dam yuryanmou ura, erci, “Telebe, Maria kanda Er Imtamnyi biryi dibdeboka wibkouci kisal dangkurur ner kurum, Er Imtamnyi bira kan ab tonkwa kururum!” ebmou.

29Er Imtamnyi Uram eryuryangananyi biryi ato ebmou asi, Maria biryi kekebmou ura, lukdanmouci, “Unatoa ati, ‘Telebe,’ ebmanir do?” tenen aryi er kanya lukmou. 30Maria kanya ilil kubmou bok, Er Imtamnyi Uram eryuryangananyi biryi Maria bisi ato ebmou, “Maria, kan kanya teneina bukam kukina mem! Kanda Er Imtamnyi biryi boukwe kiboka kisal dangkurur. 31Ati, kanci mi mundu boboka sal deibkwandim. A deibkwandim mi si ara, ‘Yesus,’ eboka dobkwandim! 32A deibkwandim Mi ara weik sienyi kibde ba, ‘Er Imtamnyi Iya Weik Erebdobnyi Mi,’ ebkwaming. Er Imtamnyi biryi a Mi asi Er abwe kisok Daud weik sienyi kuramwe atonyi kibkwande. 33Ba, a Mi aryi weik sienyi kibdiryi, Yakub deibdoba Israel yala nang nirya asi iya kalikmurubkwande. Ba, Er Kalingna ara iya kum danana kum kubkwande, erda iya kubkwande,” ebmou.

34Ato ebmou bok, Maria biryi Imtamnyi Uram eryuryangananyi bisi ato ebmou, “Ato ebmarim bok, nira ninyi ton kum dobse ati, una kuboka mi mundu bobkwan do?” ebmou.

35Uca, Er Imtamnyi Uram eryuryangananyi biryi Maria bisi ato ebmou, “Er Imtamnyi Kanya Roh Kudus kan dam yuryaci ura, kan kanya dam asi Er Imtamnyi mikib aryi kalubkiriryok wa ibkwankir. Ba, mundu bobkwamarim Mi ara Er Imtamnyi Mi kobdoba aryi malyi kun dinyi mitika ton kum kubkwandanyi ebkwaming,” ebmou. 36Ato ebmou cok, tonda ato ebmou, “Tonda diba ati ebman, kan du ner Elisabet bira mi you ner eramnyi asi ukuryok wise deib ababyi mundu bobwe, ara sal mi bobwe. A mundu bobwe talak ara ukura nab wala kibmar. 37Ati, Er Imtamnyi bira iya ilil tenen dinyi kiknina ati mikib kurur,” ebmou.

38Ato ebmou ura, Maria biryi, “Nai, nira diba ni Nai Imtamnyi wa irmilin ner kunun ati, kan ebmarim to nisi ur da kunubnurur,” ebmou. Ato ebmou ura, Er Imtamnyi Uram eryuryangananyi biryi Maria takloboka bindobmou.

Maria ab Elisabet ab ebdanmarei uram

1:39-45

39Uki kuna kum uca, Maria biryi, “Ni du ner Elisabet dirbinkwan,” tenen Nazaret atei aryi kuboka anabmouci, Yehuda mutuk tam binmou. Baramwe ani, Yehuda mutuk asi mutuk dub doramnyi atei tentok asi welebinmou. 40-41Binmou ura, Zakharia ai asi wengbinmou. Akai bublan dam tingbindoka, “Teleb,” eboka Elisabet bisi kibdobmou. Ba, Elisabet biryi Maria kibdobmou uram asi kekebmou uca, er mi mundu umbura aryi kweilyakmou asi bikmou. Ba, Elisabet kanyatam ara Er Imtamnyi Kanya Roh Kudus aryi langkarikmou. 42Langkarikmou deyok aryi, Elisabet biryi uram weikanun iboka ato ebmou, “Ni weit ner! Er Imtamnyi biryi yuk nerabwe kisal dangdur ara mitikanun kisal dangdur bok, kansi ara weikanun kisal dangkurur. Ani, mundu bobmarim Mi ababyi Er Imtamnyi biryi kisal dangdur,” ebmou. 43-44Ato ebmou cok, tubto tonda ato ebmou, “Se, nira una kunun ner ati, ninyi lebkwande Sienyi Er kwin biryi ni diryanmanirim do? Kanci, ‘Teleb,’ eboka kibdobnirim ba, kan uram ni amol um bok wengbaranir uca, diba ati ni mi mundu umbura mi ara er kanya kilkil aryi kweilyakoka merebdande. 45Nun Nai Imtamnyi biryi kan dam ebmou to ati kanci, ‘Diba kunubkwamanir,’ tenebmoumwe ati, Er Imtamnyi biryi kansi kisal dangkurur,” ebmou.

Maria mot sebmou uram

1:46-56

46-47Ura, Maria biryi ato eboka mot sebmou,

“Nira ni kanya dam aryi kilkil weik kunurur ba,

Ni Nai Erebdobnyi bisi si weik eren mot semnun.

Niryi, ‘Er Imtamnyi bira ni Lemninanyi kurur,’ tenenun ba,

ni kanya dam aryi karyi mitik kum kubmanir.

48-49Nira luknubdob ner kunun bok,

Er Imtamnyi biryi nira Er Uram kunubde ban ner asi dibnilibnou.

Ati, ukuryok aryi kuboka ninyi ilinto aryi niti ato ebkwaning,

‘Er Imtamnyi biryi kisal dangdur ner,’ ebkwaning.

Ukuryok kubde baraming nang ara ato ebkwaning.

Aminda odei-odei nirya binkwaming nang ababyi ato ebkwaning.

Er Imtamnyi si ara iya erebdob si kurur.

Erda Iya Mikibnyi biryi ilil weik tenen dinyi ni dam kunubdeibmanir.

A deyok aryi, ninyi ilinto aryi niti, ‘Er Imtamnyi biryi kisal dangdur ner,’ ebkwaning.

50Er Imtamnyi bira bico weik tenerurnyi kurur.

Er Uram kunubde ban nang ati Erci bico weik tenerur.

Ukuryok kuramingnyi nang kankan ab

aminda odei-odei kubkwamingnyi nang kankan ababyi

sun Er Imtamnyi biti, ‘Nun Nai,’ tenen nang ati

Er Imtamnyi biryi bico weik tenerur.

51Er Imtamnyi bira Er taruk mikib biriman aryi iya mikib tenen dinyi kikniransou.

Sun dub erebdob kanya bon nang aryi tenebdobmangnyi tok, Erci walwal arsinirur.

52Weik sien nang ara erebdob bun sokon bun nang asi

Er Imtamnyi biryi dobkweteboka tukwetam nang kimdeirirur.

Ba, sun luknubdongon kanya boramingnyi nang asi Erci ererdeirur.

53Er Imtamnyi biryi sun kwaning atan nang utotoa kum nang asi teleb dinyi karerurci, bourdeirirur.

Ba, bona bon nang asi Erci, ‘Utotoa kum karebkwansin,’ eboka ur dem yangdonongdur.

54-55Er Imtamnyi biryi nun abwe Abraham bisi, ‘Iya milibkwansin,’ eboka ebdeiamwe to, kunubdeibmou.

Erci nun abwe Abraham deibdoba nang asi, ‘Iya milibkwansin,’ eboka ebdeiansou to, kunubdeibmou.

Nun Nai biryi, ‘Bico tenebkwan,’ iya tenerur uca,

Erci sun Er Uram kunubde ban nang si Israel yala nang asi iya miliransou ani, ukuryok tuba milisurur.”

Ato eboka Maria biryi mot sebmou.

56Ura, Maria bira Elisabet ab tonkwa kurandei ara wala bitinyi kum winiryi kum mabmarei ura, erci anaboka er atei tamuboka binmou.

Yohanes ninyi me dongonanyi deibmou uram deyok

1:57-66

57Elisabet mundu boamwe ani, deirin talak sirya kubmou ura, mi deyok donmou ani, sal deibmou. 58Deibmou ba, er ai dam ninyi ab er malnang ab er ka yabwe ab aryi, “Er Imtamnyi biryi iya bico weik tenen dinyi lak kibmouci, Elisabet bisi mi karebmar,” en uram kekebmai ba, sunbabyi kanya karyi mitik kum kubmou.

59Ba, uki inbaryi tum kubmou ura, a nang aryi yanmaici, “Den bama sekeibibyi ura, a mi si ara er nai si dobyi to, ‘Zakharia,’ eboka dobkwayeb,” tenen ati yanmai. 60“Ato kubkwayeb,” tenen yanmai bok, a mi er kwin biryi, “Se mem, ato kuma! Er si ara, ‘Yohanes,’ eboka dobkwanub,” ebmou.

61Ato ebmou bok asi, a mi deibmou ati diryanmai ninyi aryi ato ebmai, “A ebmarim to si ara sun du weit yabwe si ton kum donung,” ebmai.

62-63Ebmai cok, a mi er nai bisi taruk aryi, “A mi si ara unanyi eboka dobkwayeb do?” eboka asibdenmai uca, Zakharia biryi keil kerek sengna asi molobmou. Molobmou ba, dobkarebmai ura, erci a keil deici asi, “Er si ara Yohanes eboka dobkwayeb,” eboka sekmou. Asi eibmai ura, sun kanya aryi, “Nai e,” tenebmai. 64Ura, a talak aryok Zakharia si bambul deneamwe lokmouci, silalum ababyi lokmou ba, er uram ebkaliboka Er Imtamnyi bisi si weik ebmou. 65Ato ukubmou deyok aryi, akatei kuramnyi ninyi aryi, “Nai e,” tenebmai ba, ilil kubmou ura, a kubmou deyok ara Yudea mutuk dub doramnyi atei nang nirya nukde yibaramnyi. 66Ba, a deyok kekeramnyi nang kanya dam aryi, “Nai yabwe, er kwin a mi mundu bobkwamwe ura, Er Imtamnyi biryi ilil tenen dinyi kubde yau ani, arub ababyi ukubde ati, a mi ara aminda una kubkwande mi deibmar da?” tenebmai. Ara, Er Imtamnyi taruk mikib aryi ersi taleboka bobkirikwamwe deyok aryi, ato kuramwe.

Zakharia mot sebmou uram

1:67-80

67A talak ara Er Imtamnyi Kanya Roh Kudus aryi a mi er nai Zakharia kanya asi langkarikmou ba, ato eboka mot sebmou,

68“Er Imtamnyi bira nun Israel yala nang aryi molonubyi bisi si weik ebkwayeb.

Nun Nai biryi nunda Er Uram keken nang asi diryandoka, ‘Lebkwan,’ tenen yanmasir.

A deyok aryi, nunci Er si weik ebkwayeb.

69Er Imtamnyi biryi Er Uram kunubde bananyi si Daud deibdobanyi bisi tikeibmarci,

Ninyi Lebkwansiranyi Iya Mikibnyi bisi karebmasir.

70Ara, Er Imtamnyi biryi minob uca Erci wiboka uram ebdeibmaci to lak etereramnyi nang biriman aryi ebdeiansou to,

‘Lemsina dinyi karebkwansin,’ eboka ebdeiansou to,

Nun Nai biryi sirya kunubdeibmasir.

71Erci, ‘Sun mar oransingnyi nang asi muna kibdongobniryok, lebkwansin,’ eansou.

Tonda, ‘Sunsi yu boboka bimsa yariransing nang dam asi muna kibdongobniryok, lebkwansin,’ eansou.

72Ara, nun abwe yabwe asi, ‘Bico tenebkwan,’ eboka ebdeiamwe to lak kibkwamwe ati,

Er Imtamnyi biryi lemsin dinyi karebmasir.

Tonda, nun Nai biryi, ‘Minob mururdeirin uram karebmase asi teneibniryok, kunubde binkwan,’ tenen

‘Eblobman kum uram kunubdeibkwan,’ tenen

Nun Nai biryi lemsin dinyi karebmasir.

73-74Ara, Er Imtamnyi biryi uram ebdarabmouci, nun abwe Abraham bisi diboka ebdeibmou to, sirya kunubdeibmasir.

Ara, ‘Sun mar ordana nang asi muna kibdongobniryok, lebdeibkwansir,’ ebmou to, kunubdeibmasir.

Tonda, ‘Sunci ilil kuna kum uca Nira Imtamnyi si weik ebde binkwandum,’ ebmou to, kunubdeibmasir.

75Ati, Er Imtamnyi biryi nunti, ‘Sun kam kuramingnyi talak nirya asi busul kuboka Ni Uram kunubde binkwanung,’ tenen lemsin dinyi karebmasir.

Tonda, Erci, ‘Nira Imtamnyi urasintam aryi teleb dinyi akwe kubkwanung,’ tenen Er uram ebdeibsou asi kunubdeibmasir.

76Ura, ni mi kanda sirya nebdobminyi ura, kanda Ninyi Lebkwandanyi Iya Erebdobnyi biti menekmincok,

‘Er Iya Erebdobnyi yankwamasir ati, sunci sun kanya dam kiknibdeiboka Ersi kibdobdarur,’ ebkwandim.

A deyok aryi, ninyi aryi kanti, ‘Er Imtamnyi Erebdobnyi Uram ebdeibmaca bobananyi,’ eboka nabkwanking.

77Kanci ato kuboka Er Imtamnyi Uram keken nang asi, ‘Er Imtamnyi biryi lebde binkwansurur,’ eboka lak eterebkwandim.

Ara, ‘Er Imtamnyi biryi sun malyi kun dinyi kilibkwansir biriman aryi lebdeibkwansir,’ eboka lak eterebkwandim.

78Nun Nai Imtamnyi bira nunti iya bico tenesurur.

A deyok aryi, ninyi berengdeirisinanyi imtam aryi kuboka yuryankwamasir.

A yuryankwamasiranyi bira belekuna kiting urukoka milil ararkarerande atonyi kuboka yuryankwamasir.

79Kiting anamyandoka milil ararkarerande ato kubdiryok,

Erci Er milil biriman aryi sun kunuk umbura kuramingnyi nang asi berekeibkwande.

Ara, sun, ‘Din dinyi dobdobibyei,’ tenen ilil kanya bon nang asi berekeibkwande.

Berekeibsiriryok, Erci nunsi teleb bisik eterebkwansir.

Ara, ‘Ato-ato kubmunyi ura, Er Imtamnyi biryi antanirdeirisin dinyi karebkwansir,’ ebkwansir.” Ato eboka Zakharia biryi mot sebmou.

80Ura, Zakharia ab Elisabet ab aryi deibmarei mi si Yohanes bira nong nebdongobnin baramuryi er kanya dam aryi mikib kibdongobnin baramwe. Ba, erda ninyi kun kum mutuk kuramwe ani, Israel yala nang kankan dam yandoka erdamnyi lak kimdaryanmou.

Zur Zeit ausgewählt:

Lukas Uram 1: MTG

Markierung

Kopieren