Luk 23

Pilat Mhodzünu Jisu Ketsokecü

(Mat 27:1-2,11-14; Mark 15:1-5; Joh 18:28-38)

1Süsie themia kro süu pete sielie di Jisu ze Pilat mhodzünu vo. 2Mu uko puo pejo di sie, “Hieko themia hauha u seyieu ketsi pesuo, u bu khezhanuo khruopie Kaisar tsü hienu, mu puo thuo puo üse Khristau, kediu#23:2 Moro kenhekelie kediu. üketa la.” 3Sitse Pilat sie puo ki, “No Judako Kediu me?” idi ketso. Sitse puo sie, “N kepuu zo,” sita. 4Süsie Pilat sie zievokezhako mu themia krodiko ki, “A themia hau pejolieketuo ca puorei ngulie mo,” sita. 5Derei uko u rhiechü sa di sie, “Puo mia petha di Judia kijü pete nu themiako pfükerhü sidi Galil kijü nu sede zo hanu rei vorte,” sita.

Jisu Ketsepie Herod ki Keshü

6Siro Pilat die hau sishü tse, puo Galilmia mo kishicü mia ketso. 7Sidi puoe puo Herod diyakezha kijütsa nu vor ükecü silie tse puo ketsepie Herod ki shüwa, puo rei sükisü Jerusalem nu bakecü la. 8Siro Herod Jisu ngulie tse puo nei phita, kekreilamonyü puo Jisu dze sishü di telhe puo ngushü nyü tuotacü la, mu puo ungomhatho chüshü puo kietuo nhiemu idi merütuo. 9Süla puoe puo ki mha kekra ketso, derei Jisu puo ki mhapuorei pu lashü mo. 10Ru zievokezhako mu thezhokepethako süki tha di puo pejopie mhapuochüta. 11Siro Herod mu puo rüpfhünuoko puo pese se tsiu puo pie kethekre seshü di puo bu pfhenei phriephrieicü puo dzielie, di puo ketse lapie Pilat kishüwa. 12Sünhie yawinu Herod mu Pilat unie khrietho chülieta; hamhodzü we unie kengumvü tuoya.

Jisu Gouwanukewa

(Mat 27:15-26; Mark 5:6-15; Joh 18:39—19:16)

13Süsie Pilat-e zievokezhako, krütamiako mu themiako kie kengushü, 14sidi uko ki, “Nieko themia hau teze a ki vor mu puo üse themiako ketsi pesuoya üte; mu harie a nieko mhodzünu puo ketso menuo sie zorei nieko puo pejokecü dieko le kesie ki a puo pejolieketuo puorei ngulie mo. 15Sizomonyü Herod rei mia bu puo pesiawalie kesü mhatho puorei ngulie kemo la puo ketse lashüte. 16Süla a puo vüwa di puo kha lashüwatuo.” 17(Siro thenyiu nu mia puo khashü uko tsü morosuoya).

18Süla uko shie di, “Themia hau dukhriwacie mu Barabas khapie hie tsüwalie!” 19(Themia hau nadiu nu mha kebvükecü la mu mia kedukhri nyie puo la kedieki nu ba.) 20Siro Pilat Jisu khashüwa nyü di uko ki pu la; 21derei uko melie u rhiechü di, “Puo gouwacie! Puo gouwacie!” sita. 22Va seu va rei puo uko ki, “Puo kedipuo kejo chüwata ga? A puo sia kesü mhatho chüwaketa puorei ngulie mo. Süla a puo vüwa di puo kha lashüwatuo,” sishü. 23Derei uko shie u rhiechü di puo gouwanu tha zota, sidi uko pfhe la kuolie. 24Süla Pilat uko kechau chüpie tsüwaketuo pepilieta. 25Sidi puo uko cha ketha themiau, mha kebvü mu mia kedukhri la kedieki nu khapie kebau khashüwa, mu puo Jisu pie uko bu u medo chülienu di uko dzie nu khashüwata.

Krus Geinu Jisu Kegou

(Mat 27:32-44; Mark 15:21-23; Joh 19:17-27)

26Süsie uko puo merhashü ze vozhü tse, Simon ükecü Kurinmia puo kijü kekreitsa nu vorkezhü ngulie ru puo telie di puo bu krus-u pielie, di puo bu Jisu medzilienuta. 27Süki mia krodi puoe puo siemedzi vozhü; süko donu thenuko huomia rei tuo di puo la u merü kepfhü di thekrü chü tuo. 28Derei Jisu reipra uko ki, “Jerusalem nuopfüko, a la kra hiecie, derei nie thuo nie la mu nie nuonuoko la kraliecie. 29Kekreilamonyü mia sie, ‘Nuojüpfüko mu nuo penuo mo zoluokecüko, tsiu nhicunuomia bu mhakipuorei u nu nu kemoko thejakepfütho’ idi puketuo teisozha puo vorzhie. 30Süki mia kijüthou kerükrieko ki, ‘Nieko me hie gei tsurcie,’ tsiu kijükhruko ki, ‘Vor hie yapfüliecie,’ isietuo. 31Kekreilamonyü mia seibo kerhei gei thuo rei mha hako chü liro, seibo kesiako gei we kedipuo chüshü ta?”

32Süki thezho kevarhuomia kenie sa Jisu ze goutuo üdi ze vozhü. 33Sidi uko vo thechü puo Tsütsoru ücüu tsolie tse, sü geinu mia Jisu gouwata, siro kejokechünie rei mia puoe puo zatsa mu mia puo puo vitsa idi puo sa gouwa. 34Sitse Jisu sie, “Apuo, uko kejo vashücie; kekreilamonyü uko kedipuo chü tha shicü si kemo la,” sishü. Sidi uko dape di puo pfheneiko kezalieta. 35Siro themiako sükinu meho tha, derei pehüko puo kre di sie, “Puo kekreimia we kelashüya; mhanuü puo Ukepenuopfü kedakelie Khristau üro puo thuo puo kelaliecie,” ibata. 36Rüpfhünuoko rei puo pie kethekre, tsiu zu kekhro se puo tsü, 37sidi sie, “No Judako kediu üro n thuo n kelaliecie,” sita. 38Siro puo tsü kinu,#23:38 Leshü kewe nu Grik, Latin mu Ibri (süu, Aramaik die nunu) icüu sa. “Hauha Judako kediu,” sikecü rei thu sashü.

39Siro thezho kevarhuo la goupiekezhanie mia puoe puo pese di sie, “No Khristau zo üro n thuo n kelalie mu hienie rei kelashücie,” sita. 40Derei kekreiu puo kerhie di sie, “No Kepenuopfü prei mo me? No rei kepejo kemhiecü nu ba ze! 41Derei avu we avu siazha ngulie zhü, avu we avu mhatho zhakhra nguzhie, derei themia hau we mhapuorei chü kekrü mo,” sita. 42Sidi puo sie, “Jisu, no n kedi nu kevo ki a va rükrashücie,” sita. 43Süla puo sie, “A n ki pu toushütuo, no thie a ze Kerüüchü nu batatuo,”

Jisu Se

(Mat 27:45-56; Mark 15:33-41; Joh 19:28-30)

44Siro keba kerekenie nunu vo keba se ketso kijü pete zeibouita; 45niaki rei zieshü mo, siro rüsuokiu nu pfhe lhapiekezhau rei rürha kenie chüta. 46Süki Jisu shie puo rhiechü di “Apuo, a a ruopfü khapie n dzie nu shüwate ho,” sidi puo die süu pushü di puo ruopfü khashüwa. 47Siro chüpahi kriemhokezhau mhachüketako pete ngushü di Ukepenuopfü tshe di sie, “Themia hau kejo kejümia#23:47 Moro kemiatho. puotou zo.” 48Siro meho ketha themia kro-u rei mhachüketa pete ngu di u merü kepfhü di la kinu vota. 49Siro puo kesi kheko mu Galil nunu puo siemedzi kevor thenuko rei vo ratsanu mha süko meho tha.

Jisu Pie Khrukewa

(Mat 27:57-61; Mark 15:42-47; Joh 10:38-42)

50Süki Judamia puo puo za Josef ükecü themia kevi mu kemiatho, mechükehou tsüphrü puo chüya, 51derei puo kekreiko mharhü mu mhatho-u puo medo mo. Puo Judamia rüna Arimathia nunu vor, mu puoe Kepenuopfü kedi vorketuo pfhetuoyakezhamia puo. 52Themia hau Pilat ki vo di Jisu mo cha. 53Sidi puo themo-u pie kerlie, mu linen pfhe pie kezilie di pie vo tsiekrie geinu hokelie mia puo mo rei se shü kemo mekhru puo nu zhüwa. 54Siro sünhie mha kesekecü teiso, mu sabat zha rei sedetazhü. 55Siro Galil nunu puo siemedziketuo thenuko rei Josef ze vo mekhruu nu puo mo khapie kezhü ngu. 56Süsie uko la kinu vor di Jisu kenheketuo la kethengu mu tier puore keviko keselie, sidi thezho-u medzi di uko sabat nhie rüleilie.

Zur Zeit ausgewählt:

Luk 23: ANBRBSI

Markierung

Kopieren