Johan 2
2
Kana nu Nuyieu
1Zha se nhie Galil Kana rünau nu nuyie puo chü, mu Jisu-nuo zuo sünu ba. 2Siro nuyie sünu Jisu mu puoe pethakelieko rei sa kie. 3Süki khubezu tsatazhü tse, Jisu-nuo zuoe sie puo ki, “Uko khubezu jüte.” 4Sitse Jisu sie, “Thenupfü, no a bu kedipuo chü morosuo shicü pu morei vi. Tsie rei a teiu vor moluo.” 5Sitse puo zuoe chalieko ki, “Puo nieko ki mhakehoupuo pu rei chüliecie,” ishü. 6Süki Judako u chü kemesaketuo zho-u la, ketsie liki sorou ba, puo nu dzü lipfhü mepfü moro ser balie vi. 7Jisu uko ki, “Dzü pie likiko tshuliecie.” Sitse uko dzü pie süko tshu kho puo nyie tso phrelie. 8Siro puo sie uko ki, “Tsie dzü huo thoulie di pie vo mha mezakeba krütau ki shücie.” Mu uko rei pie puo ki vo. 9Süki krütaue dzü khubezu chü parketau metha, derei puo khubezu kirapuo nu se vor shicü si mo, (sirei dzü thoukeshü chalieko süu si ba), süla puoe yasau kieshü, 10di puo ki, “Kehoupuorei therieki khubezu kevi khashü di mia krie u kelhuo chülie tse, krie kesuo khashütaya, derei no we tsie rei khubezu kevi khashü ba ze ha!” 11Jisu Galil Kana nunu zasi kerie hau chüshü di puo zayie pie pekieshü; mu puoe pethakelieko rei puo pelelie.
12Hau sie puoe puo zuo, puo siezeko, mu puoe pethakelieko ze di vo zha huoyo Kapernaum nu bata.
Jisu Rüsuoki Chü Kemesakecü
(Mat 21:12-13; Mark 11:15-17; Luk 19:45-46)
13Judako Ciekevo teiu penuota, süla Jisu Jerusalem nu kho. 14Sidi puo rüsuoki nu mia mithu, tekuo, paruonuo ze mu priesako keliyakezhako ba di ngulie. 15Süla puo mhakevüro chülie di rüsuokiu nunu tekuo mu mithuko pete whuopie chazou shüwa. Süsie priesa keli kebako priesa pete bie kezakeziwa mu mizhüko phou pelawa. 16Siro puo paruonuo ze kebako ki, “Mha hako chüsetalie! A puo ki üse lhithoki chü hie!” 17Süki puoe pethakeliekoe “N kiu la a shürhei thuo a cü pejüwatuo” idi thupie kezhü dieu rükralie. 18Sitse Judako puo ki vor di sie, “No hakemhie chükezha kedipuo zasi se hie pekieshülie vi ga?” 19Jisu uko die kela di sie uko ki, “Rüsuoki hau bierhuowalie, sitse a zha se nu süu chü lalietuo.” 20Siru Judako sie, “Rüsuoki hau teicie hiediaesorou se chü, mu no zha se nu süu piesie lalietuo le?” 21Derei puoe puo mo rüsuokiu dze kepu zo. 22Süla puo kesia nunu rheikelie sie puo hau dze pushü zo ükecü puoe pethakeliekoe rükralie di uko kethodieu mu Jisu pukeshü dieu pelelie.
Jisu Themia Pete Rülikesiu
23Süsie puo Ciekevonyiu nu Jerusalem nu keba ki zasi chükeshüko ngu di mia kekra puo za nunu pelelie. 24Derei Jisu puo thuo zowe uko le pevi mo, puoe themia pete rüli sikecü la. 25Siro mia puo bu rei u rüli pie puo ki pu mo rei puo mia nou kedipuo ba shi si phreya.
Zur Zeit ausgewählt:
Johan 2: ANBRBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society of India
© 2023, Used by permission. All rights reserved. More
