Keriekitho 19
19
Sodom mu Gomora Kepeka
1Siro teigeidieliemia kenie thevatie Sodom nu vor; mu Lot-e Sodom kharuki ba. Lot-e unie ngu tse, unie ze kesetuoü sie tuota, sidi nerhutsu puo zie pie kijü zerepfü zhüta. 2Sitse puoe sie, “A niepunie, rüreise nnie kituou kinu lerliecie, nnie phi khrüwa di tsiezhü batacie. Khise nnie bu sie zilie di nnie cha nu volietuo,” sitse unie sie, “Mo, hienie teizeizhau pete chadi nu ba zotuo.” 3Derei puo unie ki pu beilieta, süla unie puo kinu lelie, siro puo unie ze hieshü, sidi khreiüshükemo niekhrüda rieshü ru unie süu cülie. 4Derei unie zhütsu kemonu, Sodom nadiu nu thepfumiako, phichünhicu pete vor kiu houpfülie; 5sidi uko Lot kie di sie, “Tsiezhü n kinu vor kebanie kirapuo ba ga? ze parshücie, sitse hie unie sishütuo.” 6Sitse Lot tuo uko ki par mu puo kikha shüpie kha lawa, 7di sie, “A siezedzürieko, a nieko ki chaya, mha kesuo chü hai zota hiecie. 8Harie, thepfu si mo zokecü a nuo rüü kenie ba, a bu unie ze par nieko ki shü, di unie gei we nie thuo chü kenyüu chüwa mu themia hanie gei we mhapuorei chü hie zocie, unie a ki khrükhro lerketa la,” si. 9Derei ukoe sie, “Phir hie.” Süsie rei uko la sie, “Themia hau rüso chü vor, di puo bu u capi chütuo le! Tsie we hie unie ki rei n gei we suokuotatie.” Sidi uko Lot khu toutou zo kikha vaphapfü letatuo üta. 10Derei themianie unie dzie chase pra Lot teshü ze ki nu lerta. Sidi ki khawa. 11Süsie unie kikha ki kethako pete, phichünhicu mhi chü pecie phrewa, di uko bu kikha pfhülie lho bata.
12Sitse themianie sie Lot ki, “Haki n nuo thepfu rei thenu rei, n nyanuo morei n kicükinumia huo nadi hau nu ba saluo me? Thechü hau nunu uko ze partacie; 13hie thechüu pekawatuo üzhie, kekreilamonyü Jihova mhodzünu uko kepejo pfhe re se baketa la mu Jihovae süu pekaketuo la hienie ketseshüte.” 14Süla Lot vo di puo nuopfünie lietuoü keba puo nyanie rüchü di sie, “Sielie di thechü hau nunu tuotacie; Jihova nadi hau pekawatuoü baketa la.” Derei puo nyanie-e puo üse keyu chü keba mhieta.
15Khise teiso pi par tse, teigeidielienie Lot kesou di sie, “Sielie, di n kimia mu n nuo thenunie ze tatalie, mo üro siazha pie nadiu tsükeshü ki nieko pekawaketuo la.” 16Derei puo rüge ba zo; sitse themianie sie puo tsiu puo kimia mu puo nuo thenunie dzie merhashülie, Jihovae puo ngumezhieshü, di puo ze par nadiu khie shüwa. 17Süsie unie uko ze chazou parshü di sie uko ki, “Nie kerheiro la tataliecie; rei la vo nie sietsa meho hie, morei razhau nu bata mo zolie: nie pekakewa keprei la ta kijüthou gei votalie.” 18Sitse Lot sie unie ki “He-i, si hiecie, a niepunie; 19harie, nnie kituou nnie mhodzünu nnie neipfüliete, mu nnie-e a kerheiro kelakeshü geinu nnie kekhrie ngukemezhie se a pesipengushüte; derei a kijüthou gei ta volie kenjü zolie, kesuo a valie ro a siatatie. 20Harie, lutsakhie rüna kecü yopuo nu ta volieketuo la penuo ba, a bu vo sünu rüshütacie, süu kecü yopuo zo mo me? Siro a kelalietuo,” si. 21Sitse puo sie, “Harie, a n die hau rei lieliete; süla n kepu rünau pekawalie lho. 22Rükrilie di ta sünu volie; no sünu vo tsolie kemochie a mhapuorei chülie kenjü zocü la,” Süla nadi süu za üse Zoar#19:22 Puoca Kecüyo. üta. 23Lot-e Zoar nu vorkelie ki niaki thuse kijüu va bata.
24Süsie Jihovae teigei nu Jihova kinu mitsie tsiu mi perüpie Sodom mu Gomora va; 25sidi nadi sünie siro razhau pete, nadinie nu kelhou pete mu kijüu gei lhou keba pete peka phrewa. 26Derei Lot kimiapfü rürei puo sietsa meho lashü sidi metsiekro puo mevita.
27Siro Abraham khiserüna sielie di puoe Jihova mhodzünu thakecü thechüu nu vo; 28sidi puo Sodom mu Gomora, tsiu kijü razha pete mehoshü, ru harie kijü süu nu mikhu sü miü mikhu tuoi siekezhü ngulie.
29Derei Ukepenuopfüe Lot kelhou thechü razhau nu, nadinie pekakecü ki, puo Abraham rükralie, sidi kepeka nunu Lot ketsewa.
Moabko mu Ammonko Lhou Kesier Dze
30Lot-e Zoar nunu tuota, sidi puo nuopfünie ze kijüthou gei lhou tuota. Puoe Zoar nu lhou michieketa la; süla puo nuopfünie ze di tsiepfü puo nu lhou. 31Sitse puo nuo phichüpfüe nhicupfü ki, “Avu puou phichüte, mu kijü pete nu thepfumia puorei kijüu zho tuoi avu ki kevor tuo mote. 32Vorlie, avu puo bu khubezu krielie khe, sidi avu puo zezhütuo, di puo geinu avu puo tsia se tuolietuo,” ita. 33Süla süzhü unie puo bu khubezu krielie; sidi phichüpfü le di puo puo ze zhü, mu puoe kicükipuo süpfüe ler mu siete shi si mo. 34Süsienhie phichüpfüe puo siezepfü ki sie, “Harie, a nzhü a puo zezhüwate; avu tsiezhü rei puo bu khubezu krie lalie khe; sidi no le puo ze zhülie, siliro avu puou tsia setuolietuo.” 35Süla unie puou bu süzhü rei khubezu krie lalie, sidi nhicupfü bu le puo ze zhü, mu puoe kicükipuo süpfü ler puo ze zhü morei siete shi si mo zo. 36Sidi Lot nuopfünie unie puo geinu nuonipfü phrelie. 37Phichüpfü thepfunuomia puo penuolie mu puo za pie Moab tholie; süu tsiedo Moabmiako krüu zo. 38Siro nhicupfü rei thepfunuomia puo penuolie mu puoe puo za pie Ben-ammi tholie; süu tsiedo Ammonmiako krüu zo.
Zur Zeit ausgewählt:
Keriekitho 19: ANBRBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society of India
© 2023, Used by permission. All rights reserved. More
