Keriekitho 16
16
Hagar mu Ishmael Dze
1Abram kimia Saraie nuojüpfü puo. Puo kituo Ijiptmiapfü puo nyi, süpfü za Hagar; 2mu Sarai Abram ki, “Harie Jihovae a bu nuo kepenuo khawate; a kituopfü ki vocie; a bu puo geinu nuo ngulie rei si lhomu.” Sitse Abram-e Sarai die zeta. 3Sidi Abram Kanan kijü nu lhou ketuo teicie kerketa zenu puo kimiapfüe Hagar ze vo Abram bu pie puo kimia chülie. 4Sitse puo Hagar ki vo, ru puo nuonipfülie; puo nuonipfüketa silie tse, puo niepupfü peseta. 5Sitse Sarai Abram ki, “A gei kekrükeshü hau bu n gei pfücie! A a kituopfü khapie n merü gei shü mu puo nuonipfüketa silie tse a pesete. Jihova bu avu donu capiu chüliecie.” 6Derei Abram sie Sarai ki, “Harie kituopfü sü n dzie nu ba; puo gei n thuo n medo-u chüwalie vi ze.” Sitse Sarai hapfü peseta, süla puo bu puo ki nunu tata.
7Jihova dieliemia puoe Shur nu kevo chau rayha nu dzüluo puo khieki nu süpfü ngulie. 8Sidi puoe sie, “Hagar, Sarai kituopfü, no kirapuo nu vor mu kirapuo votuo üzhü ga?” Puoe sie, “Ae a niepupfü Sarai ki nunu tatazhie,” si. 9Jihova dielieue sie puo ki, “N niepupfü ki la volie, di n khapie puo khrükhro balie,” si. 10Jihova dielieu puo ki pu di, “A n nuosenuoyie chü pekruo phipie phrü hulie kelho chüshütuo.” 11Sidi Jihova dielieue puo ki pu sa di,
“Harie, no phoupiemo bate,
no thepfumia puo penuolietuo mu no puo za pie Ishmael#16:11 Puoca Ukepenuopfü rünyü ba. chüliecie;
kekreilamonyü Jihovae n mezhieko rünyülieketa la.
12Puo nha gada puo tuoi zotuo,
puo dzie-e mia pete petsoutuo,
mu mia pete dzie rei puo petsoutuo;
puo puo siezedzürie pete petsou di lhoutuo”
si. 13Süla puoe Jihova puo rüchükeshüu üse, “No El-roi#16:13 Mha nguyakezha Kepenuopfü.” idi kieta; kekreilamonyü puo sie, “A Ukepenuopfü ngu ketho me mu a puo ngukewa sie rei rhei balie vi zo me?” 14Süla dzükhouu za thopie Beer-lahai-roi iwa; süusü Kadesh mu Bered unie donu zhü.
15Süsie Hagar-e thepfumia puo penuopie Abram tsü; mu Abram-e puo nuo Hagar-e penuokeshüu za thopie Ishmael chülie. 16Siro Abram-e Hagar Ishmael penuopie puo ketsü ki cie hiethethaesorouta.
Zur Zeit ausgewählt:
Keriekitho 16: ANBRBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society of India
© 2023, Used by permission. All rights reserved. More
