Jenesis 13
13
O Abram ta o Lot fuladile
1O Abram likisto katar o Ejipto pe rromiaia ta sa pe ezgodenchar kai saia le, ta irisailo ande phuv katar o Negev pe sinouchoia o Lot. 2O Abram saia but barvalo soke saia le sunakai, rup ta but zivirinie. 3Ta katar o Negev irisailo poloke lligo ni avilo kai o foro katar o Betel, ta kotar llelotar karing o than kai inzardaia pi chara o purvo drom, maskar o Betel ta o Ai. 4Ta kote saia kai o Abram vazdiaia iek altar te blagosil e Devleko anav, ta kote molisailo.
5Ta i o Lot kai llala lea, saia le bakre, guruva ta i chare. 6A pe goia phuv kai sea, ni resela te jan pe gachin zivirinie. Ta nasti zivina ande iek than, 7soke janape e chobanura e Abrameke ta e chobanura e Loteke. Ta i ande gua vreme, e kananeura ta e fereseura zivina ande goia phuv. 8Goleke iek llive o Abram phenda e Loteke:
Tu ta me sam phlal, inai sukar te avel chingar maskar amende ta maskar amare chobanura. 9¿Inai angla tu sa e phuv? Goleke mangav tutar te fulado mandar. Te llaia po stingo me ka llav pe chachi, a te llaia pe chachi me ka llav po stingo.
10O Lot dikhla pe sa e bari umal katar o Jordan, kai latar nakhela e len llik kai o Soar. Sa goia bari umal saia la but pai sargo o vostano e Devleko ta sargo ando e Ejipto. Gaia phuv saia gia mai anglal o Del te zatril e Sodoma ta e Gomorra. 11Ondaka o Lot ezvirisarda e bari umal katar o Jordan, ta llelo karing likel o kham. Ta gia o Abram ta o Lot fuladile. 12O Abram achilo ando Kanaan, a o Lot llelotar te zivil pasa e forura kai si ande bare umalia pasa o foro katar e Sodoma, 13ta sa e llene ande gua foro sea but bilache ta cherena but baro bilachipe karing o Del.
14Mapalal kana llelotar o Lot, o Del phenda e Abrameke:
Pe rig kai san, dik karing o norte ta karing o sur, ta karing likel o kham ta karing perel o kham. 15Soke me ka dav tut sa gaia phuv kai dikhe. Ostade ka avel chiri ta che porodoki.#Ech 7.5; Gl 3.16. 16Me ka cherav te aven pe gachin sargo o prajo e phuviako. A vareko te sai llinela o prajo e phuviako, gia i chi vicha ka avel llindi. 17¡Uste ta phir gaia phuv pe sa lako lungipe ta bulipe, soke me ka dav la chuke!
18O Abram chidia pi chara ta laglo, ta llelotar te zivil ando vos kai si e bare kasta katar o Mamre, pasa o foro kai ikhardol Jebron. Ta kote vazdia iek altar de Blagosil e Devle.
Zur Zeit ausgewählt:
Jenesis 13: BACHRO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Biblia ande chib Romani © Sociedad Bíblica Chilena, 2018.
