Yohánɛs 1

Miɓotlé mí pɔ́l

1Á míɓotlé mí ŋkɔŋ-á-sí Eɓaŋgá ɛ́ ɓɛ́ɛ́,

Eɓaŋgá yú ɓɛ́ élɔŋ la Ɔlolómɛ̄,

Eɓaŋgá yú ɓɛ́ Ɔ́lolómɛ̄.

2Á míɓotlé Eɓaŋgá ɛ́ ɓɛ́ɛ́ elɔŋ la Ɔlolómɛ̄.

3La Eɓaŋgá nɛ mam mísɛ má vegɓɛ; tɔ jam láh vegɓɛ ɓé ɛ́h ɓɛ́ ɓé yɔ.

4La yɔ́ nɛ́ jam sig lá kuh éniŋ,

la eniŋ yú ɓɛ́ mipúú mí ɓot.

5Mipúú mú páa átē á livito,

ndí livito láh lɛ́gle ɓé mɔ́.

6Ɔlolómɛ̄ a ómóó mut wa, joó jɛ́ɛ́ nɛ́ Yohánɛs Ǹtíi-nzoɓan.

7A sɔ́ɔ́ ja kaa mbóŋ, á lí tíi lí mbóŋ nyí mipúú, nɛ́ ndí li kele la nyɛ́ ɓot bísɛ bí yéɓé.

8Nyɔ́ŋ mut ah ɓɛ́ɛ ɓé mípūū ndí a ŋgí nyɛɛ li tíi lí mbóŋ nyí míŋ mipúú.

9Eɓaŋgá nɛ ɛ́ ɓɛ́ɛ́ mipúú mí mbálɛ, mí má sɔ́ á ŋkɔŋ-á-sí la mɔ́ mú paayé ɓot bísɛ.

10Eɓaŋgá ɛ́ ɓɛ́ɛ́ á ŋkɔŋ-á-sí,

la yɔ́ nɛ́ ɓá veg ŋkɔŋ-á-sí

Ndí ŋkɔŋ-á-sí wáh lem ɓé yɔ.

11Ɛ́ sɔ́ɔ́ á ndog yɛ́ɛ̄,

tɔ la náŋ ndog yɛ́ɛ̄ yāh lɛ́gle ɓé yɔ.

12Ndí ɓot ɓá lɛ́glé yɔ, bú yéɓé ki á jóō jɛ́ɛ́, yéŋ Eɓaŋgá yá tí ɓɔ kundɛ li yaan lí ɓɔ́ɔ̄n bí Ɔlolómɛ̄. 13Ɓáŋ ɓot bí sē ɓé bíveglé bí mícii, mison tɔ miɔ́ŋɔ mí mut á binam, ndí ɓá byáá ja á nsom á Ɔ́lolómɛ̄.

14La Eɓaŋgá yú ɓɔ̄ŋɓɛ́ mut-a-binam,

la yɔ́ yú tɔ́ɔ̄ la ɓɛ́hɛ,

ɓɛ́hɛ ki bu mɛ̄mɛ́ lipém jɛ́ɛ́.

Jéŋ lipém, lí pɔmbɛ Mɔɔ́n, líg sɔ́le nyɛ́ la Ɛsáŋɛ́, nyíŋ pɔmbɛ Mɔɔ́n ɛ yáhɛ́ la mikaale mí Ɔ́lolómɛ̄, mbálɛ ki ɛ yáhɛ yɔ á nyúū.

15Yohánɛs ag tíi mbóŋ yɛ́ɛ̄ la li laga nɛ́:

«Mut ma máŋlɛ́ ɓɛ́nɛ, nyɛ́ nyɔ́. Nyɛ́ nɛ́ a ŋga sɔ́ ámbúh yáma, ndí a dúgú lí ɓɛ́ sɔ́kágánɛ́ mag ɓɛ́, ányúū nɛ sɔ́kágánɛ́ mag sɔ́, kí nyɛ́ a lɛ.»

16Á líɓɛ́ɛg jɛ́ɛ́ lí ŋyálāg la mikaale mí Ɔ́lolómɛ̄ ɓɛ́hɛ bísɛ ɓaá kūh ɛ́jāhá joga, jé likaale ámbúh jéŋé.

17Kasig mbéndá Ɔlolómɛ̄ ya tíéɓɛ́ ɓɛ́hɛ la Móse, ekɔnan-ŋgɔ́ɔ́ la mbálɛ bíg sɔ́lé ɓɛ́hɛ li kele la Yésus Kilístus.

18Mut tɔ wa a ɓáág ŋgí lí ɛ́n lí Ɔ́lolómɛ̄, amáh sig pɔmbɛ Mɔɔ́n Ɔ́lolómɛ̄ nyɔ́ a lɛ Ɔ́lolómɛ̄, nyɔ́ a ŋga nīŋ átē á Ɛsáŋɛ́, nyɛ́ a étɛ́ ɓɛ́hɛ nyɛ́.

Yohánɛs Ǹtíi-nzoɓan ag tíi mbóŋ

(Mat 3.1-12; Mlk 1.2-8; Lúk 3.15-17)

19-20Ɓakanʼyɛ bí Élōg-Yúda bí Yélūsalɛm bí ómóó ɓatíi-nsúlé la Ndog-Lévi#1.19-20 Ɓɔɔ́n bí Lévi nɛ́ bí ŋgí óŋgánɛ ɓatíi-nsúlé á nsɔ́n wáɓá. á lí bihi lí Yohánɛs nɛ́: «Wa nɛ́ ɔ lɛ nzáá é?» Mbóŋ a tí ɓɔ á mpeelán wɛ́ɛ́, ɛ́h ɓɛ́ ɓé li sɔɔ lí tɔ jam ɔ́sū ví ɓot bísɛ, yɔ nyí nɛ́: «Mi sē ɓé ma Nyɔ́-a-Pɔ́hlɛ.» 21La ɓɔ́ bú ɓāt sīg-pɛ nyɛ nɛ́: «Ɓaá, ɔ lɛ nzáá é? Wa nɛ́ ɔ lɛ Élías m̀pɔ́tle-a-Ɔlolómɛ̄ é?» Ɔ tímānɛ̄ pɛ ɓɔ́ nɛ́: «Mi sē ɓé ma nyɛ́.» Bú ɓat sīg-pɛ nyɛ́ nɛ́: «Ɔ lɛ nyɔ́ŋ m̀pɔ́tle-a-Ɔlolómɛ̄ bi ŋga láaŋke é?» Ɔ pélē sīg-pɛ ɓɔ́ nɛ́: «Kɛ́m.» 22Bú bíhī hɔ́ nyɛ́ nɛ́: «Wa hɔ́ nɛ ɔ lɛ nzáá é? Ɛ́g somlɛ nɛ́ bi kɛ́la ɓot ɓá óm ɓɛ́hɛ mbele! Wā-mɛ̄n lagá nzáá ɔ lɛ!» 23Yohánɛs ɔ pélē ɓɔ nɛ́: «Ma nɛ́ mi lɛ cíŋ nyí nyɔ́ mut a ŋga lón á éyāŋ nlemlem kaa Esáya m̀pɔ́tle-a-Ɔlolómɛ̄ a lagléé nɛ́: ‹Tɛ́ɛ́yánɛ nzen nyí Nyɔ́ŋ-Ɛsáŋɛ́ sim›.» 24Kasig ɓot bí ómɓɛ́ɛ bí ɓɛ́ɛ́ ɓɔ́ɔ̄n bí Élōg-Falísái, 25bú kōndyé nyɛ́ li bihi nɛ́: «Kíyáɓɛ́nɛ ɔ sē ɓé Nyɔ́-a-Pɔ́hlɛ, tɔ Elías, tɔ nyɔ́ m̀pɔ́tle-a-Ɔlolómɛ̄ bi ŋga láaŋke, ányúū yéé hɔ́ ɔ ŋgɔ tíi ɓot nzoɓan é?» 26Yohánɛs ɔ pélē ɓɔ́ nɛ́: «Ma, mag tíi nzoɓan átē a mindím, ndí mut wa a lɛ á póla yaná miní ŋga yí ɓé nyɛ, 27ag sɔ́ ámbúh yáma, mih kɔ́ɔ́ ɓé tɔ ma lí kúhu lí míkɔɔ mí bítāmbí byɛ́ɛ́.» 28Míŋ mam mísɛ mí ŋgí loole á Betánia á nyúŋú mií á lɔm lí Yɔ́ldan ápah Yohánɛs a ŋgí tíi nzoɓan.

Yésus a lɛ mɔɔ́n ntómbɛ́ a Ɔlolómɛ̄

29Ámbúh víŋ ɔlɔ́, ɛnɛ́ Yohánɛs a ɛ́n Yésus ag siŋgle nyɛ́ ɓɛɓɛ, ɔ lága nɛ: «Nyɔ́ nɛ́ a lɛ mɔɔ́n ntómbɛ́ á Ɔlolómɛ̄ a ŋga ɓógtɛ aɓé á ŋkɔŋ-á-sí 30Mut ma máŋlɛ́ ɓɛ́nɛ, nyɛ́ nyɔ́: ‹nyɛ́ nɛ́ a ŋga sɔ́ ámbúh yáma, ndí a dúgú li ɓɛ́ sɔ́kágánɛ́ mag ɓɛ́, ányúū nɛ sɔ́kágánɛ́ mag sɔ́, kí nyɛ́ a lɛ.› 31Mā-mɛ̄n mi ŋgí yí ɓé ma nyɛ́, ndí á lí ɓɔŋ nɛ́ lilóm lí Íslāɛl lí yí nyɛ́, jɔ́ nɛ́ ma sɔ́ li tíi lí nzoɓan átē a mindím.» 32Yohánɛs ɔ tí mbóŋ yɛ́ɛ̄ a byɛ́ nɛ́: «Ma ɛ́n M̀búl Mpúán ag suh kaa ɔɓeŋ, ɔ sɔ́, ɔ ɓɛ̄tɓé nyɛ á nyúū. 33Mi ŋgí yí ɓé ma nyɛ́, ndí Ɔlolómɛ̄ nyɔ́ a óm ma á lí tíi lí nzoɓan nyí mindím nɛ a lága ma nɛ́: ‹Nyɔ́ ɔ ŋgɔ kɛ́ li ɛ́n lí M̀búl Mpúán ag suh, a ɓɛ̄tɓé nyɛ á nyúū, nyɛ́ nɛ́ a ŋga tíi nzoɓan nyí M̀búl Mpúán.› 34Jɔ́ nɛ́, kaa ma ɛ́n, mi lɛ mbóŋ nɛ́, nyɔ́ mut a lɛ̄ Mɔ́ɔ̄n Ɔlolómɛ̄.»

Ɓayége bí ɔsú bí Yésus

35Ámbúh víŋ ɔlɔ́, Yohánɛs Ǹtíi-nzoɓan ɔ sɔ́ sīg-pɛ á nlemlem á voóm la ɓayége ɓɛ́ɛ́ bíɓáa. 36Ɔ tíg lí légɓe lí Yésus ag wɛ́ɛ ɔ laga nɛ́: «Nyɔ́ nɛ́ a lɛ mɔɔ́n ntómbɛ́ a Ɔlolómɛ̄.» 37Ɛnɛ́ ɓayége ɓɛ́ɛ́ bíɓáa ɓá ámblé nyɛ́ ag laga náŋ, bú ōŋ Yésus. 38Á míyaan mí Yésus, ɔ ɛ́n nɛ́ ɓayége bíg oŋ nyɛ́, ɔ bíhī ɓɔ nɛ́: «Miníg somo yéé é?» Bú pélē nyɛ nɛ́: «Lábi yóg yɔ́ɔ ɛ lɛ véé é?» Lábi ag mínɛ nɛ́ ŋ̀yéglɛ. 39Ɔ pélē ɓɔ́ nɛ́: «Sɔ́án miníg kɛ li ɛ́n.» La ɓɔ́ bú kɛ, bú ɛ́n ápah a ŋga tɔ́ɔ̄, bú tɔ́ɔ̄ elɔŋ la nyɛ́ víŋ ɔlɔ́. Náŋ a ɓɛ́ɛ́ jam-kaa ŋgɛ́ŋ ɛ́náa ɛ́ ŋgōgó. 40Andeléas, mɔɔ́nyāŋ á Símɔn Pétlos a ɓɛ́ɛ́ mut wa átē á ɓá bíɓáa bí ámbléé bíɓaŋgá bí Yohánɛs la li oŋ lí Yésus. 41Mut ɔsú Andeléas a kɛ́ lí ɛ́n, a ɓɛ́ɛ́ jā mɔ́ɔ̄nyāŋ Símɔn, a byɛ́la nyɛ nɛ́: «Ɓɛ́hɛ ɓa ɛ́n Mésia.» Náŋ ag mínɛ nɛ́ Nyɔ́-a-Pɔ́hlɛ. 42La nyɛ́ ɔ kɛ́la Símɔn á yóg Yésus. Ɛnɛ́ Yésus a tīŋ nyɛ miíh ɔ lága nyɛ nɛ́: «Ɔ lɛ Símɔn mɔɔ́n Yohánɛs, ɔg kɛ li yáŋlɛ nɛ́ Séfas.» Náŋ a lɛ nɛ́ ŋgɔgɛ.

43Ɛnɛ́ kítí ya yɛ́, Yésus ɔ nyɔ̄ŋ bísúghɛ́nɛ́ li kɛ á Galiléa. Ɔ kɔ́p Filípo, a byɛ́la nyɛ́ nɛ́: «Ōŋ ma.» 44Filípo a ɓɛ́ɛ́ mɔɔ́n ŋkɔŋ á Betsaída tísɔn nyí Andeléas la Pétlos. 45Filípo ɔ kɛ́ li kɔ́p lí Natánáɛl ɔ lága nyɛ nɛ́: «Ɓaá ɛ́n mut Móse a ŋga pɔ́tle á kálati yɛ́ɛ̄ Mbéndá, nyɔ́ kálati yí ɓapɔ́tle-bí-Ɔ́lolómɛ̄ ɛ́ ŋga kwɛ́lene. Nyɔ́ŋ mut nɛ́ a lɛ Yésus nyɔ́ a Názalɛt mɔɔ́n Yósɛp.» 46Váŋ nɛ́ Natánáɛl a ɓāt Filípo nɛ́: «Ɓaá, taŋ jam ɛg la li pámléné á Názalɛt é?» Filípo ɔ pélē nyɛ nɛ́: «Sɔ́, ɔ ɛ̄n.» 47Yésus ɔ légɓé Natánáɛl ag siŋgle nyɛ́ ɓɛɓɛ, ɔ lāgá líkɔlɓan la nyɔ́ŋ nɛ́: «Taŋ mɔɔ́n Íslāɛl nyí, nyɔ́ a sē ɓé micaŋg tɔ puh.» 48Natánáɛl ɔ ɓāt nyɛ́ nɛ́: «Á véé ɔ ŋgɔ yíléne ma é?» Yésus ɔ pélē nyɛ nɛ́: «Sɔ́kágánɛ́ Filípo a ŋgí yáŋá wa, kí mu ɛ́n wa ɔ tɛ́ɛ́ á tín fígiya.» 49Natánáɛl ɔ tímānɛ̄ nyɛ nɛ́: «Lábi, ɔ lɛ̄ Mɔ́ɔ̄n Ɔlolómɛ̄, ɔ lɛ káísa nyí Íslāɛl.» 50Yésus ɔ laga nyɛ nɛ́: «Wa yéɓe ányúū nɛ, ma yó wa nɛ́ ma ɛ́n wa á tín fígiya. Ɔg kɛ li ɛ́n li mam mí ŋga lōo míŋ.» 51Ɔ kóndyé sīg-pɛ nɛ́: «La mbálɛ mbálɛ mag laga ɓɛ́nɛ nɛ́, miníg kɛ li ɛ́n lí lóō lí áhɛ, áŋgɛl Ɔlolómɛ̄ ki ɛ́g ɓét ɛ́g suh á lóō lí Mɔɔ́n mut.»

Zur Zeit ausgewählt:

Yohánɛs 1: NTB

Markierung

Kopieren