Gênesis 4
4
Abel, Caim Piranapni
1Jeji himumkatkalo hhanunro Eva. Hiyáhoni tmichiwata, twuhenewatatka. Caim twuheneta. Waneya wane ttshina:
— Jejikta nyoptota Hoyakalu tshinanu.
2Waneya wane pnute twuhenetlu repuru Abel. Abel carneiro kkammaneklerni seyni Caim susanatewaklerni.
3Hiyáhoni wane pnute hix-hohne hiknohatka Caim rutakle tshiji hichpajikatshri hanikanwakatlu Hoyakalu, renekachaxyawakaplu Hoyakalu.
4Seyni Abel koxa carneiro whenenni hanikanwakatlu Hoyakalu hinhiymakananuko mitshikananu matutatshinni ranikanwakatlu Hoyakalu. Hiyáhoni Hoyakalu hikchikhihlenutlu Abel hiyrunu renekachle.
5Seyni Hoyakalu hi hikchikhihlenutlu Caim hiyrunu renekachle. Hiyáhoni hjihekanuwata Caim, hektu hojitkalu.
6Waneya wane htshinru Hoyakalu:
— Haklu tshinanhe pjihekanuwata? Haklu tshinanu koxhe hektu hojitaknayi?
7Kihleru pkamhakamka hi he pukchikhihlenutkomka? Seyni hi kihleru pkamha hiyáhoni hektuntshi hiphapto hwa mhenoklu pixka rixa. Rujhayi hkamnixyawakyi pixa seyni pujhanru ptowuxyawaklu. Hiyáhoni hektuntshi ripyoka ralpokotatka ruptejyawakapa.
Mitshikananu Hiylalewlu Piranapni
8Waneya Caim wla tshinru repuru Abel:
— Wuya campo wyanu.
Waneya wane rixa campo yaletna, Caim kamnitlu repuru Abel. Waneya ruylatanru.
9Waneya Hoyakalu wla tshinru Caim:
— Hanhe hya pepuru Abel?
Waneya ruhita:
— Hi nimata. Walerhe nuslahjeta?
10Waneya wane htshina Hoyakalu:
— Klunerhe pkamhanatka? Pepurni hraha saplewyehitno tshijiya yineru saplewle pixka rixa.
11Hiyáhoni hektu tshijneyatkayi. Tshiji hachihrahatanru pepuru hrahni ruyokahrahatana pixa kamrure tshinanu.
12Hiyáhoni wane pnutpatka tshiji pjitoxinpatka hitaklu tshinanu hi renekmixkonutanutkalu tshiji putakle. Yohimatatshripyi, yanachalupyi xye tshijiya.
13Waneya Caim wan-tshinru Hoyakalu:
— Hi psokananru napnokaxikolupa. Hi nakotanru.
14Petanu, xye hohne pyokanatno nyiywakapa tshij-hoho hiyrunu pixa hoji sreta nuchpajinixka, wane pnute yohimachalpatkano, yanachatatshripno; hiyáhoni katukta hikchikanno ruylatanunno.
15Waneya Hoyakalu wan-tshina:
— Hiyáhoni katukta hiylatanru Caim sete kata rapnokatko ruylatjerupa. Hiyáhoni Hoyakalu hitakmarkatetlu Caim, satu jeji hikchijiniplu hmuylaxyawakanuplu.
16Waneya hyatka Caim Hoyakalu hetanuya. Éden sreta ruchpajyatka, tkatshi hichpajyawaka sreta Node tshinikowaka tshijne nwaka hyatka Caim. Wane rawatka.
Caim Klopichane Piranapni
17Waneya Caim himumkatkalo hhanunro. Tmichiwata, tmatuwheneta Enoque htshinka. Waneya Caim satu poktshi hkotpuka. Wale poktshi hiwakatlu Enoque hiwhene hiwakako.
18Waneya hwuhenewatatka Enoque, Irade hiwakatleta; Irade wuhenewatatka Meujael hiwakatleta. Meujael wuhenewatatka Metusael hiwakatleta; Metusael wuhenewatatka Lameque hiwakatleta.
19Lameque tshinkaluru hepi suxone hanunrota. Sato hiwaka Ada sato hiwaka Zilá.
20Ada wuhenetlu Jabal:
— Xyekni pantshi lona panaxikolu hwatshine hiyrunu wakane kammanekleru nerukni wale.
21Repuru Jubal:
— Xyekni harpa ho flauta tokatatshine nerukni wale.
22Waney-koxa Zilá tshinkaluro wuhenetlu Tubalcaim. Xyekni ptowru hixatshri bronze ho ferro kamhikolu himatkamhatshri nerukni wale. Tubalcaim mole suxo Naamá tshinkaluro.
23Waneya Lameque wan-tshinna hepi hhanunrone:
“Ada, Zilá, hyijnakotanno;
hixa nhanunronhi, hyijnakotanu klu pirana ntshinanhi.
Satu jeji nuylata klu tshinanu hyohlotno
hiyrunu satu makluji rapnokatle tshinanu nuylatlu.
24Sete kata hima rapnutko Caim hiyáhoni Lameque halikaka setenta kata sete rapnutko.
25Waneya hiyrunukotnaka Adão himumkatkalo hhanunro; tmatuwheneta jejni. Thiwakatlu Sete klu tshinanu wane ttshina:
— Hoyakalu henekno satu nowhene nowhenni Abel-ni kachrijru Caim hiylalerni.
26Sete tshinkaluru koxa wuhenewata jejni. Hhiwakatlu Enos. Waneya waneklukawa yine yinuwaka hanjihohneyehretlu Tsru Hixikatshriwa Hoyakalu hiwakaya.
Zur Zeit ausgewählt:
Gênesis 4: mpdBiblia
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
