Gênesis 3
3
Yineru Himtujnawakwa Piranapni
1Seyni himnu jimatkalerni wale pimrine hocha hajeru Hoyakalu kamhalene yohnik-himatkalru, wane htshinro suxo:
— Hoyakallahe hi hitshinikletyi ptowruka hitaklu hwiywaka hajeru?
2Waneya tuhitlu suxo:
— Ptowruko hejnuji hitaklu hwiywaka hajeru wumukata nikleta, hixanutkani,
3seyni hanikajpotuko hwatshri hahmuna sahi wane htshina Hoyakalu hi hyotnekanru, hi hnikanru hmupniywakanupa.
4Seyni himnu wane tshinro suxo:
— Wale hnijinipa hi hipnanutka.
5Klu tshinanu Hoyakalu himata hiklukta hnikanru waneklu himrekhatanutka, Hoyakalu pixka hixanutka himaxyawakaplu kihleru, hektutu.
6Waneya suxo texinixkalu hahmuna, kihle sahkaka rixyawaka tshinanu pnikkolu tikahwaklu hiyrunu toyhale texyalu kihleru hahmunni tet-sotanutlu pnute timaxyawakhimapa. Hiyáhoni hisahi tkomlaka, tniklu, thanuru koxa tumluka, hnik-koxlu wale.
7Hnijinixkaluna ruslahnatkawana wanna hepi machkopinetkani waneya figueira sure hyots-hatkana himkalupna.
8Kayi potuko mapchahapira Hoyakalu hitaklucha hyotaljetapa waneya hyijnaktokantapinixkaluna Hoyakalu yine, Hoyakalu hoji hyohimaxyatkana jeji, suxo. Hahmuna hmana hyohimatna.
9Waneya Hoyakalu tomhamkalu jeji, repomhalu:
— Hanhe pya?
10Waneya wale hihita:
— Nyijnaktokanutmakyi hitakluchaya seyni npikatka klu tshinanu machkopirno hiyáhoni nyohimata.
11Waneya repomhalu Hoyakalu:
— Ha hanu hixa himatletlu machkopiru hixyawaka? Hnikatkalhe hahmuna sahi nmitshiniklexyahi?
12Waneya wane htshina jeji:
— Suxo penejyano, nhanunro, hahmuna sahi henekno, nniklewatanu.
13Waneya Hoyakalu wane tshinro suxo:
— Kluhe xye pikamha?
Tuhitlu suxo:
— Himnu yokwijetno wale tshinanu nniklewatanu.
14Waneya Hoyakalu wane tshinru himnu:
— Hektutu pkamhiywaka tshinanu pimri hocha hajeru, pantshi hajer-koxa yohnik-himtukpatkayi hiyáhokni pisatuko pyannixka ptowru hohneruka tshiji pahi pnikanu.
15Himnu, xawakni pkamnitjeropni suxo, pixa koxa hahkanro wala. Hiyrun-koxa himnu piklopichane hahkanro wala hiyrun-koxa suxo klopichaneyma hkamnikakanna, suxo whene hiylajiwutanunyi seyni pixa hachkastsihjixitanru.
16Waneya Hoyakalu wan-tshinro suxo:
— Psalewnanu ptshinowaxinipa yohnik-tshinpotu petanutshi. Katshinpotpaklu hmatuxinpatka piwhene. Wanepnawaka ptowutjerupni phanuru, pixa kamhanru ptowruka ralukleru.
17Waneya Hoyakalu wan-tshinru Adão:
— Pixa niklu hejnuji wane ntshinyi hi pnikanru seyni pyijnaktokanutlo phanunro. Hiyáhoni hektutkalu tshiji pixa tshinanu, tsru kamrurtshi potuko pkamhinri pnijinri, ptowru hohneruko piwekka pchinika.
18Hiyrunu tshiji ruptshejini ptowru hixatshri kawchiri, pniklerupa hsana hitakkaluru yehi.
19Hiyáhoni pihoji ruchpajini puhkokha pnikleru pkochpajyawakapa haté pupnanu psatkapanu tshiji klu tshinanu tshiji kamhikolyi. Kajpapahyi, kajpa pahiko pixinixnakwa.
20Waneya Adão hiwakatlo hhanunro Eva klu tshinanu ptowru yineru hinropatkani.
21Waneya Tsru Hixikatshriwa Hoyakalu kamhalu mkatshri hocha hajerumtaya, hmakatlerupa Adão hnunro koxa hmakawatatkana.
22Waneya wane htshina Tsru Hixikatshriwa Hoyakalu:
— Jeji hiprotakatka hixa pixka rixyawakpatka, xawakni rimathexyawakpatkalu kihleru, hektutu. Adão, Eva rimaletatka hma yosurukamyoxyawakanpatnaka hiyrun-koxa hma komlajyawakanpatnaklu hahmuna hiwejikaluru heneklewatatshri tshinkaluru sahi, hma nijyawakanuplu, hiweklu phuta hikeklu hohne mnikawnakatupa heneklewatatshri.
23Wale tshinanu Tsru Hixikatshriwa Hoyakalu hiknokatkalu jeji hitaklu hwiywaka Éden tshinikowaka hma wiywakanpatka hiyáhoni hkamhikoluko tshiji hjitota Adão rutaklewaxyawakapa.
24Hiyáhoni maleka hyokanatka jeji. Waneya hma satkapyawakanupa Hoyakalu hitaklu, Hoyakalu towrerune tkatshi hichpajyawaka sreta rutakna Hoyakalu. Hiyrun-koxa rutaklu satu yohlolewapi hitokote ruchpakmeroxya tshitshi, psoluka hsajrukmerota, rinoxyawakaplu hatnu hapo hahmuna hiwejikaluru heneklewatatshri nwak-hapo.
Zur Zeit ausgewählt:
Gênesis 3: mpdBiblia
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
