Atos 4
4
Pedro João-yma Preso Rutajikolu Piranapni
1Runkaklewakanatawana Pedro, João yin-yehiya, rapokatkana sacerdote-ne hiyrunu Hoyakalupji hislahjetatshine chefe-te hiyrunu saduceu-ne hapoka.
2Hjihekanuwatna klu tshinanu nuretkalune hepi hinkakletlu Jesus hiwejyawakatnaka pirana hiyáhoni xye hekhitlu hipnatshinetka koxa hiwekkakko.
3Hiyáhoni hkachitna Pedro, João waneya preso rutakna haté wale prika klu tshinanu kayixkani.
4Seyni hixo yine tokantshi yijnakotatshine halixlu Hoyakalu tokanu. Waneyakni Cristo halixatshine pejnu rixolewnana cinco mil yine hetko.
Pedro, João Jemahchinikankakatshine Hoji Sreta Hitakka
5Waneya wale prika rapatjetna Jerusalém poktshi hajene judeu-ne tsrukakalutene, yine chefe-tene hiyrun-koxa kasruklewaklerune hinanchitkaluru pirana hasruklewatatshine hapatjeta.
6Wane koxa rawakanata tsru sacerdote Anás wannayma, hiyrun-koxa Caifás, Anás mekanuru, João, Alexandre, hiyrunu pimrine Anás molene.
7Wanna hoji sreta rutakkana Pedro, João waneya wanna hepomhana Pedro, João:
— Hanhe ruchpajya xye hpixkonu, kat-hiwaka tshinanhe hkamhalu xye hiyakolukaka?
8Waneya Pedro Hoyakalu Hiwejikaluru katsepoyalu wan-tshinna:
— Tsrukakalune judeu-ne hiyrunu yine chefe-tenhi!
9Xawakni hixa hepomhawu klu hixlu xye jeji myanakanatkatu hiyrun-koxa hanukta rixa hitskalakkota.
10Hiyáhoni himatanru xako hixa hiyrun-koxa israel-nerune ptowruneka, Jesus Cristo, hixa hiylaleru cruz-ya seyni Hoyakalu hiwekkakatnaklu waleko hpixkonu tshinanu rutskalhapotutatka xye jeji myanakanatkatu hixa hetanuya.
11Walekatkani Jesus Yonawahlo Potukalu wan-tshinyehita: “Xye Jesus wale honukla sotlu, hixa panawatatshinhi, malukkotu rikahwakluna hepixlewatatshri potukni, psolupjiko poyehitatshrini wale.”
12Hiyáhoni Jesus tsonu hiwekkaklewata klu tshinanu tshiji psoluko hikeni satu hiwaktshi yine tskalaya yine hiwekkakatshri.
13Waneya hixolune hetna Pedro, João hi hpika hinkaklewletna. Waneya rimathetkoklunutkana Pedro, João muchtotkakkone rixyawakna hixolune himyekpotuta hiyrunu rimathetna Jesus-yma yanjejekanatatshine rixyawakna Pedro, João.
14Hiyrunu hixolune hetlu jeji hitskalakkaluru João, Pedro-yma hyopkajyawaka wale tshinanu hike rumukata tshinretna.
15Waneya hyokanatatkana Pedro, João jemahchinikankakjexikowakapjiya maleka hyiywakapna waneya tsrukakalune hjemahchinikankakatkana wannakakluko.
16Wane htshinkakna:
— Kluhe wixanutkana nyi jejine? Klu tshinanu ptowru yine Jerusalém poktshi hajene himatlu tsru hiyákolu hkamhana hiyrunu hi wumukata malixlenutlu.
17Seyni hma mupalaxyawakanupa hipirana yin-yehiya wuykotanna hipokananu hma munkaklewaxyawakanupna hiyrunuko yin-yehiya Jesus hiwakaya.
18Waneya tsrukakalune hepukatnakna Pedro, João waneya ruykotna hma munkaklewaxyawakanupna hi psojikna Jesus hiwakaya, hi koxa rasruklewatanna Jesus hiwakaya.
19Waneya Pedro hiyrunu João hihitna:
— Haté hixa hinkakanwu katpothe xawaka wyijnakotanu ho hixa ho Hoyakalu?
20Klu tshinanu hi koxa wumukata wma munkaklexyawakanuplu wale wetanru, wyijnakotanru.
21Waneya rali hiykoletatnakna João, Pedro ruchochatna klu tshinanu hike rumukolujtatkana Pedro-ne yine tshinanu. Klu tshinanu ptowru yineru himalwutlu Hoyakalu wan-rixikolutka.
22Xye jeji hitskalakkalurutka hiyákolu tshinanu quarenta mhale pnutetkalu.
Hapatjetatshine Hanjihohnexyawaka Piranapni
23Waneya ruchotkona Pedro, João rujhapyawakapna pimrine Cristo halixatshine. Runkakletluna ptowruka tsru hixikatshinwa sacerdote-ne hiyrunu tsrukakalune judeu-ne tshinyawakatkana.
24Waneya Cristo halixatshine rali yijnakolexinixkana, wanna pa hchinikanurune rimalwutluna Hoyakalu, wane htshinruna:
— Pixa Hoyakalu Ptowru Himukatatshriyi tenhohne hiyrun-koxa tshiji pkamha, mar powha koxa pkamha hiyrun-koxa ptowruka mar powha hitokote hwatshri, tenhohne hwatshri, tshiji hwatshri kamhatshriyi.
25Pixa hinkakletatkalu Hoyakalu Hiwejikaluruya wutsrukatni Davi-ni ptowrerni namaya, wane htshina: “Klu tshinanhe rahnanuwatna yine panerkaka, hiyrunu jipukaleru pirana ruchinikanretna yine?
26Ptowru tshiji hajene phurune hiyrun-koxa tsrukakalune hapatjetna pa hchinikanurune hkamnixyawakluna Tsru Hixikatshriwa Jesus, Hoyakalu nurreru.”
27Klu tshinanu halikaka phuru Herodes hiyrun-koxa Pôncio Pilatos hapatjeta xye poktshiya, judeu-neyma hiyrun-koxa pimri tshijnekaka hkamnixyawakluna Jesus, pnurreru potukalu.
28Rapatjetna hkamhiywakapluna wale mitshikananu punkakletleru pmixkonu tshinanu, pihchinikanu tshinanu hakanhatshripa.
29Hiyáhoni xawakni Tsru Hixikatshriwa Hoyakalu, hetanu hi pso hamlenukananu htshinanwakatwu. Penekanna ptowrene hmixkowahchinikanuxyawakna runkaklexyawakluna ptokanu.
30Seyni wanepnawaka Hoyakalu pomyokanu wan-hixkalurkakapa hitskalhalkaka, hetkalurkaka, himyekaklewatatshrikaka, pnurreru potukalu Jesus hiwaka tshinanu.
31Rali hanjihohnerexinixkana, waneya ruyolikatka rapatjekanaxyawakna. Ptowru neruka katsepoyatka Hoyakalu Hiwejikaluru. Hoyakalu tokanu runkakletna hike pikanu.
Cristo Halixatshine Hwiywakni Piranapni
32Ptowruneka Cristo halixatshine pa hajipkana, pa hchinikanurunni. Hi satukna wan-tshina: Nimwaleru pejnu hitanu. Seyni wanna ptowruneka hapiklu rejnunkatkakna psoluka rimwastsireneyma.
33Tsru pixkonuyma nuretkalune hiphujetlu Tsru Hixikatshriwa Jesus hiwejinixnaka pirana, hiyrun-koxa Hoyakalu hihlenuymatkana.
34Klu tshinanu hi satukna wanna mahaxya pa hixanu klu tshinanu katukta himwalu tshiji ho pantshi, ruchankanru waneya ranikanru ruchankaleru wenru.
35Waneya nuretkalune jixistsi ruknokluna ruchankalerna wenru. Hiyáhoni satkaka rapikna wan-rixa mahlexyana.
Barnabé Henekachale Piranapni
36Hiyáhoni José, nuretkalune yokmakhiwakleru rutakhiwakatatkaluna, Barnabé. Waleni yokakkaluru hiykolewatatshri. José Levita, Chipre tshijne hichpajikatshrini.
37Waneyakananru tshiji. Hiyáhoni ruchankalu. Raniklu hwenru. Nuretkalunesko rutakwenrutlu.
Zur Zeit ausgewählt:
Atos 4: mpdBiblia
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
