পত্থম 2
2
1এধোক্ক্যেনগুরি আগাজ্চান আর পিত্থিমীগান আর ইয়েন ভিদিরে বেক্কানি বানানা থুম্ অলঅ।
2গোজেনে তার বেক্ সৃট্টির কামানি ছয় দিনোত্ থুম্ গুরিলো; তে সাত দিনোত্ জিরেল কনঅ সৃট্টির কাম ন-গুরিলো। 3এ সাত দিন্নোরে তে বর্ দিইনে নিজোত্যে ফারক্ গুরিলো, কিত্তে সে দিনোত্ তে কনঅ সৃট্টির কাম ন-গুরিলো।
4-5সৃট্টির পরেদি আগাজ্চান আর পিতথিমীয়ানর কধা: লগেপ্রভু গোজেনে যেক্কে আগাজ্চান আর পিতথিমীগান্ বানেল সেক্কে পিতথিমীয়ানর বুগোত্ শোজ্য জাদর্ কনঅ গাছ-বাশ ন-এলাক্ আর ক্ষেত্-ক্ষেত্তিয়ো জর্মানা আরম্ভ ন-অয়, কিত্তে সেক্কেয়ো তে পিতথিমীয়ান উগুরে ঝড় পড়িবার যুক্কোল ন-গরে। সিয়েনবাদে ভূইয়োত্ চাষ-বাজর্ কাম্ গুরিবাত্তে কনঅ মানুচ্অ ন-এলাক্। 6মাত্তর্ মাদি তলেত্তুন পানি উদিদো আর সিয়েনদোই মাদিগান ভিজিদো। 7পরেদি লগেপ্রভু গোজেনে মাদিলোই এক্কো মরদ্ মানুচ্ বানেল আর তা নাগত্ ফুন্ দিইনে তা ভিদিরে পরাণান্ ভোরেই দিলো। সেক্কে সে মানুচ্চো এক্কো জেদা প্রাণি অলঅ।
এদন বাগান
8ইয়েনর্ আগেদি লগেপ্রভু গোজেনে পুগেদি এদন দেজত্ এক্কান বাগান গোজ্যে, আর সিয়োদোই তে তার বানেইয়্যে মানুচ্চোরে রাগেল। 9সে জাগার মাদিগানত্ তে নানান্ বাবোত্যে গাজ্ জর্মেই দিলো যিগুন্ চাদেয়ো দোল্ আর যিগুনোর গুলো-গুলিগুন্ হাদেয়ো গম্। সিগুনবাদে বাগান ভিদিরে তে জিংকানি-গাজ্ আর গম্-ভান্ন্যেই-জ্ঞানর গাজ নাঙে দ্বিবে গাজঅ জর্মেই দিলো।
10সে বাগানানত্ পানি যোগেই দিদো এন্ এক্কান গাঙ্ যিয়েন্ এদন দেজর ভিদিরেত্তুন্ নিগিলি এচ্চ্যে আর চেরান চিগোন্ ছড়া ওইনে ভাগ ওই যেইয়্যে। 11পত্তম গাঙান নাঙান্ পীশোন। ইয়েন হবীলা দেজর চেরোকিত্তেন্দি ছিদি পোজ্যেগোই। সিধু সনা পাহ্-যেদঅ, 12আর সে দেজর সনাগানি জদবদে গম্। ইয়েনিবাদে সিধু গুগগুলু আর বৈদূর্যমণিয়ো পাহ্ যেদঅ। 13দ্বি-লম্বর গাঙান নাঙান্ গীহোন। এ গাঙান্ কূশ দেজর চেরোকিত্তেন্দি ছিদি পোজ্যেগোই। 14তিন লম্বর গাঙান নাঙান্ টাইগ্রীস। ইয়েন অশূর দেজর পূগেদি ছিদি পোজ্যেগোই। চের্ লম্বর গাঙান নাঙান্ ইউফ্রেটিস।
15লগেপ্রভু গোজেনে সে মানুচ্চোরে নেযেইনে এদন বাগানত্ রাগেল যেনে তে সিয়োত্ চাষ-বাজ্ গুরি পারে আর সিয়েনর দেগাশুনো গুরি পারে। 16সে পরেদি লগেপ্রভু গোজেনে তারে উগুম গুরিনে কলঅ, তুই তঅ মনহুজিয়ে এ বাগানানর যে কনঅ গাজর গুলোগুন্ হেই পারচ্; 17মাত্তর্ গম্-ভান্ন্যেই-জ্ঞানর যে গাজ্চুয়ো আঘে সিবের্ গুলোগুন তুই হেই ন-পারিবে, কিত্তে যেদিন্যে তুই সে গুলোগুন হেবে সেদিন্যে ঘেচ্চেকগুরি তুই মুরি যেবে।
পত্তম মিলে
18সে পরেদি লগেপ্রভু গোজেনরে কলঅ, “মানুচ্চোর্ আজলে গায় গায় থানাগান্ ঠিগ্ ন-অর্। মুই তাত্যেই এক্কো তা যগাজ্যে মিলে বানেই দিম।” 19লগেপ্রভু গোজেনে মাদিলোই বানেয়্যে মাদ উগুরে যিদুক্কুন য়েমান আর আগাজর্ পেক্ বানেইয়্যে সিগুনোরে সে মানুচ্চো ইধু আনিলো। লগেপ্রভু চেলঅ তে সিগুনোরে কি কি নাঙে ডাগে। তে সে জেদা পরাণবলাগুনোরে যিবেরে যে নাঙে ডাগিলো সিবের্ সে নাঙান অলঅ। 20তে বেক্ ঘোর্বো আর ঝাড়্বো য়েমানুন্ আহ্ আগাজ পেক্কুনোর নাঙানি দিলো, মাত্তর্ সিগুনো ভিদিরে সে মানুচ্চোর্ কনঅ যোগাজ্যে মিলে সমাজ্যে দেগা ন-গেলঅ।
21সেনত্তে লগেপ্রভু গোজেনে আদমরে এন্ ঘুর্ঘুজ্যে ঘুম আনি দিলো, আর সেনে তে ঘুমোত্ পড়িলো। সেক্কে তে তার এক্কো বুগো আড়্ তুলি লোইনে সেই জাগায়ান য়েরালোই নাঢি দিলো। 22আদমত্তুন্ তুলি নেযেইয়্যে সেই বুগো আড়্বোলোই লগেপ্রভু গোজেনে এক্কো মিলে বানেইনে তারে আদম মুজুঙোত্ নেযেল। 23তারে দেগিনে আদমে কলঅ, “এবেরা ওইয়্যে। ইবে হাড়্-য়েরাগান মর্ হাড়্-য়েরালোই বানেইয়্যে। মরদ মান্জ্যর কিয়্যে ভিদিরেত্তুন্ তুলি নেযা ওইয়্যে বিলি ইবেরে মিলে কূয়া অবঅ।” 24ইয়েনত্যে মান্জ্যে মা-বাবরে ছাড়িনে তারা মোক্কুনো লগে এগত্তর্ ওইনে থেবাক্ আর তারা এক্কান কিয়্যে অবাক্। 25সেক্কে মানুচ্চো আর তা মোক্কো লাঙ্দা থেদাক্, মাত্তর্ সেক্কে তারার কনঅ লাজ্ দর্ ন-এলঅ।
Zur Zeit ausgewählt:
পত্থম 2: CBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 2021 Bangladesh Bible Society
