मत्ती 9
9
अक अधरंगी मैहणु ठीक कांना
(मरकुस. 2:1-12; लूका 5:17-26)
1फिरी यीशु किश्ती पन चढ़ी ग्या जां नदी पार अपड़ै तैस नगरा मझ या जैस मझ सै रिहींथ्या। 2जां तैस टैंमा किछ मैहणु एकि अधरंगेरै बिमार मैहणु मंजै मझ चोउवा मैहणुवां किना चुका करि तैस किनि लै यै। यीशु तेन्हैरा विश्वास तका करि, तैस अधरंगेरै बिमार मैहणुनी बौलु, “हे पुत्र! धीर रख, तिंडै पाप माफ भुवै।” 3जां कुछ यहूदी शास्त्रियै योकिया मझ बौलु, कि “ऐ मैहणु ता परमेश्वरेरी निंदा काता आ।” 4यीशु तेन्हैरै मंनेरी गलै बुझि करि बौलु, कि “तुवे मैहणु अपड़ै-अपड़ै मंना मझ बुरा विचार केईनी कातै?” 5क्या ऐ बोलणु आसान आ? कि तिंडै पाप माफ भुवै या ऐ बोलणु कि खड़ा उठ जां चलणा-फिरना लग। 6पण ऐठणीरै तेईनी कि तुवे समझि ल्या कि मैहणुरै पुत्रा मतलब मूं धरती पन पाप माफ कानेंरा बि हक आ। यीशु अधरंगेरै बिमार मैहणु सिंउ बौलु, “उठ, अपड़ा मंजा चुक जां अपड़ै घरेनी गा।” 7सै झट खड़ा उठा जां अपड़ै घरेनी चलि ग्या। 8ऐत पन सारै मैहणु जै तैस तकांतै थ्यै हैरान भौ ग्यै, जां सै सारै ऐ बोलि करि परमेश्वरेरी माहिमा कांना लगै, कि “असै ऐतियु कदि ना तकाउ कि परमेश्वरै मैहणुवंनी ऐतिया अधिकार दितौरा आ।”
यीशुरै जरियै मत्ती शदायुंणा
(मरकुस. 2:13-17; लूका 5:27-32)
9तेठां किना आघै गहि करि यीशु मत्ती नाँईयेरा अक मैहणु, जै चुंगी लींणै बाई चोउकि पन बेठौरा थ्या, सै लधा, जां तेसनी आज्ञा दित्ती, “मिन्डा चैला बंणनेरै तेईनी मूं पीछै आ” ऐ शुणि करि सै तैस पिचालीं चलि पिया। 10जेख्णी यीशु घरै रोटी खांणा बेठा, ता बड़ै सारै चुंगी लींणै बाऐ जां पापी मैहणु अईछी करि यीशु जां तेसेरै चैला सेईतै बेशि करि रोटी खांणा लगै। 11ऐ तका करि फरीसियै तेसेरै चैला सिंउ बौलु, तुवाड़ा गुरू चुंगी लींणै बाऐ जां पापिया मैहणुवां सिंउ रोटी केईनी आ खांता? 12ऐ शुणि करि यीशु तैन्हांं सिंउ बौलु, “बिमार मैहणुवां डोक्टरेरी जरूरत भूंती, पण जै ठीक अत्तै तैन्हांं डोक्टरेरी जरूरत ना भूंती। 13ऐठणीरै तेईनी तुवे गहि करि ऐठणीरा मतलब समझा कि आंउ बलिदान ना चांहथा पण दया चांहथा; केईनी कि आंउ तैन्हां मैहणुवां शदाणनि ना यौउरा जै अपड़ै आपनि धर्मी समझतै, आंउ तैन्हां मैहणुवां बचाणनि आ यौउरा जै अपड़ै आपनि पापी मंनतै।”
उपवासैरा सवाल
(मरकुस. 2:18-22; लूका 5:33-39)
14फिरी यूहन्नेरै चैलै यीशु किनि अईछी करि बौलु, “कितु कारण आ कि असै जां फरीसी भ्रुख्णु पैटै यौउता उपवास कातै, पण तिंडै चैलै भ्रुख्णु पैटै उपवास किना रखतै?” 15यीशु तैन्हांं सिंउ बौलु, “क्या जन्दड़, ज्यो तेईनी नवाँ लाड़ा तैन्हांं सेईतै आ दुख मना सकतै? पण सैकेई धियाड़ी ऐईंणी कि नवाँ लाड़ा तैन्हांं किना अलग करियूंणा, तैस टैंमा सैक्यै दुखी भूंणै जां तैन्हांं उपवास रखणा। 16पुरांणै लिकड़ानि नवें कपडै़री टलि ना लांतै; ना ता जेख्णी सै धूंणु ता नवाँ कपड़ा ढुकि गांहणा जां पुरांणु लिकड़ जादु फटि गांहणु 17जां तिहियें नवें अंगूरेरै रसा पुराणियां चमड़ेरिया थेईलिया मझ कौ ना रखता, केईनी कि अंगूरा केरै रसै ला सै फटि गांहणी, जां अंन्गूरा केरा रस जां चमड़ेरी थेईली दोईयो खत्म भौ गांहणी; पण नवाँ अंगूरेरा रस नवीं चमड़ेरिया थेईलिया मझ भरियूंता। जां सै दोईयो बचोरी रींहथी।”
मौरी छोकरी जींतियुणी
18यीशु जेख्णी तैन्हांं मैहणुवंनी ऐ गलै बोलता ऐ थ्या, कि यहूदियै केरा अक मुखिया तैस किनि या जां तैस किनि झुकि करि विनती कातै बौलु, “मिंडी छोकरी किछ टैंम पेहिलै मरि गैई! तु चलि करि तैस पन अपड़ा हत्थ रखि दै, ता सै जींति भौ गांहणी।” 19यीशु खड़ा भौ करि अपड़ा चैला समैत तैस सिंउ चलि पिया; 20जां तका, अक जनानि थी, जैसनि बाहरा साला किना खून चलणैरी बिमारी थी सै पीछै किना यीशु किनि नीड़ यैई जां तेसेरै लिकड़ैरा पल्ला छू ल्या। 21केईनी कि सै छूंणा किना पेहिलै अपड़ै मंना मझ सौचती थी, “अगर आंउ तेसेरै लिकड़ैरा पल्ला बि छू लियुं ता आंउ ठीक भौ गांहणी।” 22यीशु फिरी करि सैकेई तकाई, जां बौलु, पुत्री धीरज रख, “तिंडै विश्वासै, तु ऐस बिमारी किना ठीक केयि।” तां सै जनानि तेसै टैंमा ठीक भौ गैई। 23जेख्णी फिरी यीशु तैस सरदारेरै घरै पुज्जा, जां तेनी तकाउ कि शंख बजाणै बाऐ जां तैठि किठै भोरै मैहणु छोकरिरै मरना पन रूंतै जां चिंडै दींतै अत्तै। 24फिरी यीशु मैहणुवां सिंउ बौलु, “घिरी गहा! छोकरी मौरी ना, पण झुलोरी आ।” तेसैरी ऐस गलै पन मैहणु मजाक उडाणां लगै। 25फिरी जेख्णी मैहणु भेईनि भेईजि दित्तै, तां यीशु छोकरिरै कमरै मझ गहि करि तेसैरा हत्थ पकड़ा ता सै जींति गैई। 26जां ऐसै गलेरी चर्चा तैस सारै देशा मझ फैली गैई।
कांणा केरा विश्वास
27यीशु जेख्णी तेठां किना आघै गांहणा लगा, ता दो कांणै मैहणु ऐ बोलतै तैस पिचोरै चलणा लगै, कि “हे राजा दाऊदेरै वंशज! असु पन दया कर।” 28सै जेख्णी घरा अंतर पुज्जा, ता सै कांणै मैहणु तैस किनि यै, फिरी यीशु तैन्हांं किना पुच्छु, “क्या तुहां ऐ विश्वास आ, कि आंउ तुहां ठीक करि सकता?” तैन्हैं उत्तर दित्ता, “हाँ, प्रभु, असै विश्वास कातै कि तु असु ठीक करि सकता।” 29फिरी तेनी तेन्हैरै टीरै छू करि बौलु, “केईनी कि तुवे विश्वास कातै कि आंउ तुहां ठीक करि सकता, ऐठणीरै तेईनी तुवे ठीक भौ गांहणै।” 30जां सै दोईयो कांणै इकदम तकांणा लगी पियै, फिरी यीशु तेन्हांनि सावधान करि बौलु, “याद रखै कि कोस बि ऐसै गलैरा पता ना लगिया कि मीं तुवाड़ै तेईनी कितु आ क्यौरू।” 31पण तैन्हैं तेठां किना गहि करि ऐस गलेरी चर्चा तैस लाकेरै चोउवो-पासै फैलाय दित्ती।
अक टट्टा ठीक कांना
32जेख्णी सै दो कांणै मैहणु भेईनि गांहथै थ्यै, ता किछ मैहणुवें यीशु किनि ऐतिया मैहणु अंणा, जै बोलि ना सकींथ्या केईनी कि तैस मझ अक दुष्ट आत्मा थी। 33जां जेख्णी यीशु बुरी आत्मा तैस मैहणु किना भेईर कढि दित्ती, ता टट्टा मैहणु बिचाना लगा जां भीड़ हैरान भौ-करि बोलणा लगी, ऐस किना पेहिलै इस्राएल देशा मझ ऐतेई गल कदि ना भुई। 34पण फरीसियै बौलु, ऐता दुष्ट आत्माईया केरै सरदारा शैतानेरी मजति ला बुरी आत्माईया भेईर कढता।
मजूरा भेईजणेरै तेईनी विनती
35ऐठां किना बाद यीशु जां तेसेरै चैलै गलील जिल्हैरै बड़ै शहरा जां बस्ती मझांं भौ करि ग्यै जां तेंन्हैरै यहूदी सभा घरा मझ उपदेश दींतै जां परमेश्वरेरै राज्यरी खुशखबरिरा प्रचार कातै जां हर-एकि किस्मिरी बिमारिया जां कमजोरिया दूर कातै रिय्है। 36यीशु जेख्णी बड़ै मैहणु तकाय ता तैस तैन्हां पन बड़ा तरस या, केईनी कि सै मैहणु तैन्हांं भ्रैडा सैयि थ्यै, जैन्हैरा कोई पुव्हाल ना भूंता। 37फिरी यीशु अपड़ै चैला सेईतै बौलु, “जिहीं-चारै पट्टिया मझ बड़ी फसल भूंती, ऐतियै बड़ै सारै मैहणु अत्तै जै परमेश्वरैरा सन्देश शुणनेरै तेईनी तियार अत्तै, पण परमेश्वरेरै राज्यरै बारै मझ शुणांणै बाऐ मैहणु घट अत्तै।” 38ऐठणीरै तेईनी परमेश्वरा सिंउ प्रार्थना करा जां पुच्छा कि सै हौरा मजूरा भेईजि दिया कि मैहणुवंनी तेसेरै राज्यरै बारै मझ शुणांईयो।
Zur Zeit ausgewählt:
मत्ती 9: CDJNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
