मत्ती 27
27
पिलातुस का सामुनि यीशु
(मरकुस 15:1; लूका 23:1-2; यहूना 18:28-32)
1और भौत रात्तैनि जब सब प्रधान याजकून ले और यहूदी अगुवा लोगून ले यीशुस मार डालना कि योजना बनाछ। 2उनूनले यीशु स बाँदीभेरन उ बखत का रोमी राज्यपाल पिलातुस का हात सौंप दीछ।
यहूदा को आत्म हत्या करूनो
(प्रेरि. 1:18-19)
3जब यीशुका पकड़ून वाला यहूदा इस्करियोती स यो पत्तो चलछै कि यीशु दोषी ठैहर ग्योछ तो उ भौत पछताछ, और उ चाँदी का तीस सिक्कान लीभेरन, प्रधान याजकून और यहूदी अगुवान वापस लौटा दीछ। 4और क्योछ, “मैंले निर्दोष आदिमी स घात करून खिन पकड़वा भेरन पाप करछ्य।” तब प्रधान याजकून ले क्योछ, “हमून यो बारिमें कोई परवाह नाहातिन? तैं खुदै येको जिम्मेदार छै।” 5तब उ उन सिक्का मन्दिर में खितभेरन वाँ भटे न्हैजाछो, और भ्यार जाभेरन अपनास फाँसी लगा लीछ।
6और प्रधान याजकून ले उन सिक्का लीभेरन क्योछ, “हमार कानून का हिसाब ले नै लेकिन मूसा का नियम का अनुसार इन पैंसान मन्दिर का खजाना में राखून ठीक नाहतिन, क्याखिनकि यो एक आदिमी स मरून खिन दिईनाको दाम।” 7तब उनूनले आपस में बात-चीत करभेरन उन सिक्कान ले परदेशीन का दफनून खिन एक गड़ो मोल ली लीछ।
8येक कारण उ गड़ो आज ले खूनो को गड़ो कहलाई जाछो। 9जो बात परमेश्वरो को संदेश दिनवाला यिर्मयाह का द्वारा कईना की छी; उ बात पुरी भैछ, “उनूनले उ तीस सिक्का मतलब उ कीमत जो इस्राएल देशा का लोगून ले उ खिन दिन खिन राजी छ्या, ली लीछ, 10और जसो मैंस प्रभु ले हुकुम दिईनाको छ्यो, उनूनले यो सिक्का कुम्हार की जमीन खरीदन खिन दे दीयान।”
पिलातुस का सवाल
(मरकुस 15:2-5; लूका 23:3-5; यहूना 18:33-38)
11जब यीशु राज्यपाल पिलातुस क सामुनि ठाँड़ा छया, त राज्यपाल पिलातुस ले यीशु थैं पुछ्छै, “क्या तैं यहूदीन को राजा छै?” यीशु ले उथैं क्योछ, “त खुद कुन मरेछै।” 12जब प्रधान याजक और यहूदी अगुवा यीशु में भौत ज्यादा झूठ्ठा दोष लगून लाग्यान, त यीशु ले के जवाब नै दीनो। 13तब राज्यपाल पिलातुस ले यीशु थैं पुछ्छै; “क्या तैंस सुणाई नै दीन मर्यो, कि इन लोग त्यारा विरोध में कतुक गवै दिनमर्यान?” 14लेकिन यीशु ले ऊस एक ले बात को जवाब नै दीनो, त यो बात ले राज्यपाल पिलातुस स भौत ताजुब भ्योछ।
मौत की सजा को हुकुम
(मरकुस 15:6-15; लूका 23:13-15; यहूना 18:39-19:16)
15राज्यपाल पिलातुस की यो रीति छी; कि उ त्यारा का बखत एक कैदी स जैस उन चाँछै; ऊस छोड़ दी छ्यो। 16उ बखत बरअब्बा नामोको एक जाना-माना आदिमी स जेल में बन्द छ्यो। 17राज्यपाल पिलातुस ले जामा होईना की भीड़ थैं क्योछ; “तुम कि चाँछा, मैं तुमून खिन कैस छोड़ द्यू? बरअब्बा स या यीशुस जो मसीह कहलूछो?” 18किलैकी राज्यपाल पिलातुस जाण छ्यो कि इनुनले यीशुस जलना का कारण पकड़वा रैछ। 19जब राज्यपाल पिलातुस न्याय का गद्दी में बैठिना को छ्यो, उक स्यैनिले उ खिन जवाब भेजवाछ; “तैं उ धर्मीका मामला में अपूनो हात जन हालै, किलैकी मैंले आज स्यून में उक कारण भौत दुख उठाछ।”
20तब प्रधान याजक और यहूदी अगुवान ले और लोगून भड़काछ; कि बरअब्बा स छोड़न खिन कौ और यीशु खिन मौत माँग। 21राज्यपाल पिलातुस ले फिर लोगूनथैं पुछ्छै, “कि तुम कि चाँछा; इन द्वीन में भटे तुमून खिन कैस छोड़ू?” लोगून ले क्योछ, “बरअब्बा स।” 22राज्यपाल पिलातुस ले उनूनथैं पुछ्छै, “त यीशु जो मसीह कहलूछो; उक दगाड़ कि करू?” सबून ले क्योछ; “येस सूली में चढ़ा दे।” 23फिर राज्यपाल पिलातुस ले पुछ्छै, “क्याखिन, येले कि बुराई कर रैछ?” लेकिन लोग और ले ज्यादा जोर-जोरले कुन लाग्यान, “तैंस सूली में चढ़ाई जौ।” 24जब पिलातुस ले देखछ्य कि यीशुस बचुन में असफल छै; बल्कि लोगून को उपद्रव बढ़नै जानमरेछ्यो, त उले एक भांण में पानि मंगाभेरन भीड़ का सामुनि अपूनो हात धोभेरन क्योछ; “मैं यो धर्मीका खून भटे निर्दोष छूँ अब तुमी जाणा।” 25तब सब लोगून ले जवाब दीछ; “तैको खून इल्जांम हमून में और हमार संतान में हो।” 26यो बात सुणिभेरन राज्यपाल पिलातुस ले उनून खिन बरअब्बा स छोड़ दीछ, और यीशु स कोड़ा लगवा भेरन सूली में चढ़ून खिन उनार हात सौंप दीछ।
सिपाईन का द्वारा यीशु को अपमान
(मरकुस 15:16-20; यहूना 19:2,3)
27तब राज्यपाल पिलातुस का सिपाईन ले यीशु स राजभवन का भितर ली ग्यान, और उनूनले अपून सब सिपाईन यीशु का सामुनि जाम करछ्य, 28और यीशु का कपाड़ान खोलभेरन यीशुस बैजनी रंगा का राजा का कपाड़ा पैनायान, 29और काँणान को मुकुट बनाभेरन उक ख्वारा में लगाछ और उक दैन हात में सरकंडा थमा दीछ; और उक अघिल घुणा टेकी भेरन उकी मजाक उड़ून लागनान और कुंनान, “हे यहूदीन का राजा, तैंस नमस्कार।” 30और यीशुक मुँख में थुकनान और उई सरकंडा लीभेरन उक ख्वारा में हाड़नान। 31उन यीशु की मजाक करनाका बाद, तब यीशु को बैजनी कपाड़ा उताभेरन, यीशु का कपाड़ा पैनायान, और सूली में चढ़ून खिन ली ग्यान।
यीशुस सूली में चढ़ाई जानो
(मरकुस 15:21-32; लूका 23:26-43; यहूना 19:17-27)
32जब यीशु स सूली में चढ़ून खिन शैहर भटे भ्यार ली जानमरेछ्या, उई बखत शमौन नामोको एक कुरेनी गौं को आदिमी मिलछ्य। सिपाईन के उ जबरदस्ती पकड़ भेरन क्योछ, यीशु की सूली लीभेरन चल। 33जब उन सब गुलगुता नामाका जाग में पुज्यान, जै जागा स खोपड़ी जाग ले कुंनान। 34और उनूनले यीशु स सूली में चढ़ून है पैलि दर्द कम हुन खिन ऊस पित्त मिलीना को अंगूर को रस पिन खिन दीछ; लेकिन यीशु ले चाख त लीछ, लेकिन ऊस पियो नै। 35येका बाद उनूनले उक हात-खुटान में कील ठोकभेरन सूली में चढ़ा दीछ; और उक कपाड़ान आपस में बाणून खिन उनूनले परची डालियान, 36और वाँ बैठि भेरन यीशु की चौकीदारी करून लाग्यान। 37और सिपाईन ले लाकड़ा को की पट्टी में दोषपत्र लिखभेरन उक ख्वारा का मलि में सूली में लागा दीछ, “कि यो यहूदीन को राजा यीशु छै।” 38तब यीशुका दगाड़ द्वी डाकून ले अलग-अलग सूली चढ़ायान, एक स दैन और दुसरा स बौं तरफ। 39और उन जानवाला लोग अपूनी खोरो हिला-हिलाभेरन उको अपमान करून मरेछ्या। 40और कुछ्या “वा रे मन्दिर स उधारून वाला और तीन दिन में बनून वाला, अपून आपस बचो। अगर तैं परमेश्वरो को च्योलो छै; त सूली में भटे उतरि अ।” 41और यो तरीका ले प्रधान याजक और मूसा का नियमून सिखून वाला और यहूदी अगुवान का दगाड़ यीशु की मजाक बनाभेरन कुन छ्या, 42“येले दुसरा लोगून त बचाछ, लेकिन अपूनास नै बचा सकनोई। ‘यो त इस्राएल देशो को राजा छै।’ अब सूली में भटे उतर अ त फिर हम विश्वास करला। 43और कुंनान तैले परमेश्वर में भरोस राँखछ्य, अगर परमेश्वर यो है खुश छै, त येस बचाले, किलैकी तैं कुछै, कि मैं परमेश्वरो को च्योलो छूँ।” 44और इसीकैं जो द्वी डाकू यीशु का दगाड़ सूली में लटकाईना का छ्या, उन ले उको अपमान करून लाग्यान।
यीशु को प्राण त्यागून
(मरकुस 15:33-41; लूका 23:44-49; यहूना 19:28-30)
45छकाला का बारा बजे भटे तीन बजे तक उ पूरा देश में अन्यारो रियोछ। 46तिसरा पहरा का बखत यीशु ले जोरले धध्याभेरन क्योछ, “एली, एली, लमा शबक्तनी?” जैको मतलब छै, “हे परमेश्वर, हे परमेश्वर, तैले मैंस किलैं छोड़ी दीछ?” 47जो वाँ ठाड़ छ्या, यो सुणिभेरन कुन लाग्यान, “यो त एलिय्याह बुलून मरियोछ।” 48तब उन सिपाईन में भटे एक तुरन्त दौड़भेरन ग्योछ, स्पंज लीभेरन सिरका में डुबाछ, और लम्बा डन्डा ले यीशु स चुसू खिन दीछ। 49फिर कुछ लोग कुन लाग्यान, “थ्वाड़ा देर इन्तजार करभेरन देख लीनू एलिय्याह येस बचुन खिन उछोई कि नै।” 50तब यीशु ले जोरले चिल्ला भेरन अपून प्राण छोड़ दीयान।
51और तब उई बखत मन्दिर को मोटो परदा जो सबून है पवित्र जाग में जान भटे रोक छ्यो, मलि भटे लीभेरन तलि तक फाटि भेरन द्वी टुकड़ा है ग्यो, और धरती हिलगै और चट्टान टुट ग्या, 52और कबर खुलि ग्या, और मरिनका पवित्र लोगून ज्यून है ग्या, 53और यीशु का ज्यून होईना का बाद उन मरिना का आदिमी कबर में भटे निकल भेरन पवित्र नगर में ग्यान, और भौतून दिखाई दीयान। 54तब सुबेदार और उन लोग जो यीशुक पहरा दीन मरेछ्या, भूचाल और जो कुछ हो र्योछ उ देखिभेरन भौत डर ग्या, और कुन लाग्यान, “सच्ची में यो परमेश्वरो को च्योलो छ्यो।” 55और वाँ भौत स्यैनिन छ्या जो गलील प्रदेश भटे यीशु की सेवा करून खिन उक दगाड़ आईना की छी, और उन दूर ठाड़ हो भेरन देखन मरेछ्या। 56उनूनमें भटे मरियम मगदलीनी, और याकूब और योसेस कि ईजा मरियम, और जब्दी कि च्यालान की ईजा छी।
यीशु को दफनाई जानो
(मरकुस 15:42-47; लूका 23:50-56; यहूना 19:38-42)
57जब ब्याल भेछ त यूसुफ नामोको अरिमतिया शैहरो को एक धनी आदिमी आछ, जो खुद यीशु को शिष्य छ्यो। 58उले पिलातुस का पास जाभेरन यीशु की लाश स माँगछ्य। और पिलातुस ले लाश स दिना को हुकुम दीछ। 59तब यूसुफ ले यीशु की लाश स लीभेरन सफेद चादर में लपेटछ्य, 60और यीशु की लाश स नय्या कबर में राखछ्य, जो चट्टान में खुदवाईना की छी, और कबर का मुँख स एक ठूल्ला ढूंगा ले ढकी दीछ। 61और मरियम मगदलीनी और दुसरी मरियम वाँई कबर का पास बैठिना का छया।
कब्र में चौकीदार
62दुसोरो दिन जो सबत को दिन छ्यो, तब प्रधान याजक और फरीसी लोग पिलातुसा का पास जाभेरन कुंनान, 63“हे महाराजा, हमून याद छै कि उ झूठ्ठा आदिमी यीशु ले जब उ ज्यून छ्यो, तब उले कै राखछ्यो, कि ‘म्यारा मरना का तीन दिन बाद मैं ज्यून है जूलो।’ 64येक कारण सिपाईन हुकुम दे कि उन तीन दिन तक लगातार ध्यान ले कबर की रखवाली करून, अगर तैं इसो नी करले, त काँई इसो नै हो कि उक शिष्य आभेरन की लाश चोरी लिजुन, और लोगूनथैं कुन लगाला, ‘उ मरिन में भटे ज्यून है ग्योछ।’ अगर अब इसी बात है जालि त यो पैलि भटे लै खतरनाक होलो।” 65पिलातुस ले उनूनथैं क्योछ, “तुमार पास पहरेदार त छन, जा, अपूनी समझ अनुसार कबर की रखवाली करा।” 66तब उन पैहरेदार अपून दगाड़ ली ग्यान और ढूंगा मलि में मोहर लगाभेरन कबर कि रखवाली करनान।
Zur Zeit ausgewählt:
मत्ती 27: SORNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
